ສະຫະພັນກໍາມະບານຮາກຖານສໍານັກງານອະທິການບໍດີ ມະຫາວິທະຍາໄລແຫ່ງຊາດ(ມຊ) ຈັດກິດຈະກຳແຂ່ງຂັນກິລາມິດຕະພາບ ຂຶ້ນໃນວັນທີ 1 ກຸມພາ 2023 ທີ່ເດີນກິລາຫ້ອງການຄຸ້ມຄອງຫໍພັກສັກສຶກສາ ເນື່ອງໃນໂອກາດສະເຫຼີມ-ສະຫຼອງວັນສ້າງຕັ້ງສະຫະພັນກຳມະບານລາວ ຄົບຮອບ 67 ປີ (1 ກຸມພາ 1956-1 ກຸມພາ 2023) ເປັນກຽດເຂົ້າຮ່ວມໂດຍທ່ານ ຮສ. ປອ. ອຸດົມ ພອນຄໍາເພັງ ເລຂາຄະນະພັກ, ອະທິການບໍດີ ມຊ, ທ່ານ ຮສ. ໂພສີ ທິບດາວັນ ຄະນະພັກ, ຮອງອະທິການບໍດີ ມຊ, ທ່ານ ຮສ. ຄໍາເຜີຍ ພົມມະຈັນ ເລຂາພັກຮາກຖານສໍານັກງານອະທິການບໍດີ, ຫົວໜ້າຫ້ອງການແຜນການການເງິນ ມຊ, ມີບັນດາຫົວໜ້າຫ້ອງການ, ຄະນະບໍລິຫານງານສະຫະພັນກໍາມະບານຮາກຖານສໍານັກງານອະທິການບໍດີ, ຕາງໜ້າ 3 ອົງການຈັດຕັ້ງມະຫາຊົນຮາກຖານສໍານັກງານ, ບັນດາຫົວໜ້າໜ່ວຍ-ຮອງໜ່ວຍກໍາມະບານ ພ້ອມດ້ວຍສະມາຊິກກໍາມະບານທົ່ວຕຶກສໍານັກງານອະທິການບໍດີ ມຊ. ເຂົ້າຮ່ວມຢ່າງຟົດຟື້ນມ່ວນຊື່ນ.

 ການແຂ່ງຂັນກິລາເປຕັງໃນຄັ້ງນີ້ປະກອບມີ 11 ພາກສ່ວນເຂົ້າຮ່ວມ ເຊິ່ງໄດ້ແບ່ງອອກເປັນທີມຊາຍ, ທີມຍິງ. ການແຂ່ງຂັນແມ່ນໄດ້ດໍາເນີນໄປຢ່າງຄຶກຄືນ ແລະມ່ວນຊື່ນ.

ພາບບັນຍາກາດ

ໃນຕອນບ່າຍວັນທີ 27 ມັງກອນ 2023 ຜ່ານມານີ້, ສະຫະພັນກຳມະບານມະຫາວິມະຍາໄລແຫ່ງຊາດ (ມຊ) ໄດ້ຈັດພິທີປາຖະກະຖາເຜີຍແຜມູນເຊື້ອການເຕີມໃຫຍ່ຂະຫຍາຍຕົວຂອງສະຫະພັນກຳມະບານລາວ ແລະມອບຫຼຽນກາກໍາມະບານລາວເພື່ອຂໍ່ານັບຮັບຕ້ອນວັນສ້າງຕັ້ງກຳມະບານລາວຄົບຮອບ 67 ປີ (1 ກຸມພາ 1956 – 1 ກຸມພາ 2023) ຂຶ້ນທີ່ຫ້ອງປະຊຸມຂອງຄະນະເສດຖະສາດ ແລະບໍລິຫານທຸລະກິດ ມຊ. ໂດຍການປາຖະກະຖາໂດຍ ສະຫາຍ ຮສ. ໂພສີ ທິບດາວັນ ຄະນະປະຈໍາພັກ ຜູ້ຊີ້ນໍາ 3 ອົງການຈັດຕັ້ງມະຫາຊົນ, ຮອງອະທິການບໍດີ ມຊ. ເຂົ້າຮ່ວມມີ ສະຫາຍ ສີສະໝຸດ ແສນບຸດຕະລາດ ຮອງປະທານຄະນະບໍລິຫານງານສະຫະພັນກໍາມະບານກະຊວງສຶກສາທິການ ແລະກີລາ, ສະຫາຍ ຄໍາເຟືອງ ລໍວັນໄຊ ຄະນະພັກ ມຊ. ຜູ້ຊີ້ນໍາອົງການຈັດຕັ້ງກໍມະບານ ມຊ, ຮອງປະທານສະຫະພັນກໍາມະບານ ມຊ, ມີທ່ານປະທານສະຫະພັນກໍາມະບານ ມຊ, ທ່ານຮອງເລຂາຊາວໜຸ່ມປະຊາຊົນປະຕິວັດລາວກະຊວງສຶກສາທິການ ແລະກີລາ, ຕ່າງໜ້າຄະນະບໍລິການງານສະຫະພັນແມ່ຍິງ ມຊ, ມີບັນດາທ່ານ ຄະນະພັກຮາກຖານ ຜູ້ຊີ້ນໍາ 3 ອົງການຈັດຕັ້ງມະຫາຊົນ ທັງ 17 ຮາກຖານ, ບັນດາທ່ານຄະນະບໍລິຫານງານສະຫະພັນກໍາມະບານ ມຊ ພ້ອມດ້ວຍສະມາຊິກກໍາມະບານແຕ່ລະຮາກຖານທົ່ວ ມຊ.ເຂົ້າຮ່ວມ ຈໍານວນ 300 ກວ່າ ສະຫາຍ.

          ໃນພິທີໄດ້ຮັບຟັງການປາຖະກະຖາຂອງສະຫາຍ ຮສ. ໂພສີ ທິບດາວັນ ເຊິ່ງໄດ້ຍົກໃຫ້ເຫັນຄວາມເປັນມາຂອງວັນສ້າງຕັ້ງກໍາມະບານລາວໂດຍສະເພາະແມ່ນສະພາບແວດລ້ອມທີ່ພາໃຫ້ເກີດຊົ້ນຊັ້ນກໍາມະກອນລາວ ແລະສະຫະພັນກໍາມະບານລາວ, ຍົກໃຫ້ເຫັນເຖິງຂະບວນການເຕີບໃຫຍ່ຂະຫຍາຍຕົວຂອງອົງການຈັດຕັ້ງກໍາມະບານລາວທີ່ນັບມື້ນັບເຂັ້ມແຂງ, ໄດ້ມີຜົນສໍາເລັດອັນພົ້ນເດັ່ນໃນຫຼາຍດ້ານ ແລະຂໍ້ຈໍາກັດ ພ້ອມດ້ວຍບົດຮຽນທີ່ຖອດຖອນໄດ້ຈໍານວນໜຶ່ງ ໂດຍໄດ້ກໍານົດທິດທາງໃນການພັດທະນາວຽກງານກໍາມະບານລາວຢ່າງຕັ້ງໜ້າ ຕິດພັນກັບການປົກປ້ອງສິດ ແລະຜົນປະໂຫຍດອັນຊອບທໍາ ຂອງຊົນຊັ້ນກໍາມະກອນ ແລະຊາວຜູ້ອອກແຮງງານລາວ.

          ໃນວາລະດັ່ງກ່າວໄດ້ມີພິທີມອບ-ຮັບຫຼຽນກາກໍາມະບານລາວໃຫ້ກົມກອງ ແລະບຸກຄົນທີ່ມີຜົນງານດີເດັ່ນໃນການເຄື່ອນໄຫວວຽກງານຂອງສະຫະພັນກໍາມະບານ ແລະວຽກງານ 5 ເປັນເຈົ້າ ໃນນັ້ນ ໄດ້ຮັບຫຼຽນກາຂັ້ນສູນກາງສະຫະພັນກໍາມະບານລາວ ມີກົມກອງສະຫະພັນກໍາມະບານ ມຊ ໄດ້ຮັບ 1 ຫຼຽນກາ ແລະ ບຸກຄົນໄດ້ຮັບຈໍານວນ 17 ສະຫາຍ, ໄດ້ຮັບໃບຍ້ອງຍໍດີເດັ່ນຂັ້ນສະຫະພັນກໍມະບານກະຊວງສຶກສາທິການ ແລະກີລາ ກົມກອງດີເດັ່ນ 6 ກົມກອງທີ່ຂຶ້ນກັບສະຫະພັນກໍາມະບານ ມຊ, ບຸກຄົນດີເດັ່ນ ຈໍານວນ 107 ສະຫາຍ, ຍິງ 26 ສະຫາຍ ແລະໄດ້ຮັບໃບຍ້ອງຍໍຂັ້ນຄະນະບໍລິຫານງານສະຫະພັນກໍາມະບານ ມຊ. ມີຈໍານວນ 20 ສະຫາຍ, ຍິງ 9 ສະຫາຍ. ໂດຍການເປັນກຽດມອບຂອງສະຫາຍ ຮສ. ໂພສີ ທິບດາວັນ, ສະຫາຍ, ສີສະໝຸດ ແສນບຸດຕະລາດ ແລະສະຫາຍສະຫາຍ ຄໍາເຟືອງ ລໍວັນໄຊ

ພາບບັນຍາກາດ

ໃນວັນທີ 26 ມັງກອນ 2023 ນີ້, ພະນັກງານ, ຄູ-ອາຈານ ແລະນັກສຶກສາພາກວິຊາປະຫວັດສາດ ແລະບູຮານວິທະຍາ, ຄະນະວິທະຍາສາດສັງຄົມ(ຄສຄ) ມະຫາວິທະຍາໄລແຫ່ງຊາດ(ມຊ) ລົງສໍາຫຼວດພື້ນທີ່ ຫາຮ່ອງຮອຍວັດຖຸບູຮານຢູ່ທີ່ ເຫຼົ່າປ່າໂກ ເມືອງປາກງຶ່ມ ນະຄອນຫລວງວຽງຈັນ, ນໍາພາໂດຍ ທ່ານ Hideyoshi KAWASHIMA  ຊ່ຽວຊານຢີ່ປຸ່ນປະຈຳອົງການໄຈກາ, ມີທ່ານ ອຈ. ພອນ ແສງດາລາ ຫົວໜ້າພາກວິຊາປະຫວັດສາດ ແລະບູຮານວິທະຍາ, ມີຕາງໜ້າຈາກພະແນກຖະແຫ່ງຂ່າວ ວັດທະນະທໍາ ແລະທ່ອງທ່ຽວເມືອງປາກງຶ່ມ, ຕາງໜ້າຄະນະບ້ານ ບ້ານໂພນຂາມ ເມືອງປາກງື່ມ ນະຄອນຫຼວງວຽງຈັນ, ພ້ອມດ້ວຍພະນັກງານທີ່ກ່ຽວຂ້ອງ ແລະນັກສຶກສາຈາກພາກວິຊາປະຫວັດສາດ ແລະບູຮານວິທະຍາ ຂອງຄະນະດັ່ງກ່າວເຂົ້າຮ່ວມ.

          ການລົງພື້ນທີ່ຂຸດຄົ້ນຮ່ອງຮອຍວັດຖຸບູຮານຢູ່ເຂດ ເຫຼົ່າປາໂກ ແມ່ນໄດ້ເລີ່ມຂຸດຄົ້ນມາແຕ່ປີ 2019, 2020, 2022 ແລະມາຮອດປັດຈຸບັນນີ້ ແມ່ນເປັນປີທີ 4 ທີ່ໄດ້ນໍາພານັກສຶກສາລົງພື້ນທີ່ສໍາຫຼວດ ເພື່ອກຽມຂຸດຄົ້ນໃນປີຕໍ່ໄປ. ການຂຸດຄົ້ນໃນປີຜ່ານມາ ສິ່ງທີ່ຂຸດຄົ້ນພົບ ໃນສະຖານທີ່ ເຫຼົ່າປ່າໂກ ສ່ວນຫຼາຍເປັນຊິ້ນສ່ວນເຄື່ອງປັ້ນ-ດິນເຜົາ, ເຄື່ອງມືສໍາລັບການປັ້ນ-ຫຼໍ່ເຊັ່ນ: ຫຼີນເຫຼັກ, ຖ່ານໄຟ, ດິນດຸ(ດິນທີ່ໃຊ້ຜະລິດເຄື່ອງປັ້ນດິນເຜົາ), ເສດເຄື່ອງມືເຫຼັກ ແລະເຄື່ອງປະດັບເຊັ່ນ: ລູກປັດ, ປອກແຂນທີ່ເປັນຫີນ ແລະອື່ນໆ. ເຊິ່ງຮ່ອງຮອຍ ວັດຖຸບູຮານທີ່ໄດ້ຄົ້ນພົບແມ່ນບໍ່ມີຮ່ອງຮອຍຕົວໜັງສືບັນທຶກ, ຄາດວ່າ ເປັນຂອງຄົນຢູ່ໃນສະຕະວັດທີ 5-6 ແລະມີອາຍຸໄດ້ພັນກວ່າປີມາແລ້ວ.

          ສໍາລັບການລົງພື້ນທີ່ສໍາຫຼວດໃນຄັ້ງນີ້ແມ່ນເພື່ອເປັນການເຝິກທັກສະໃຫ້ນັກສຶກສາໄດ້ລົງມືປະຕິບັດຕົວຈິງໃນການສໍາຫຼວດຫາພື້ນທີ່ໃນການຂຸດຄົ້ນວັດຖຸບູຮານ ເຊິ່ງການສໍາຫຼວດແມ່ນໄດ້ແບ່ງອອກເປັນ 3 ໜ້າວຽກຄື ວຽກສໍາຫຼວດພື້ນທີ່ທາງໜ້າດິນ, ວຽກບິນໂດນສໍາຫຼວດທາງອາກາດ ແລະວຽກຕັ້ງກ້ອງວັດແທກເພື່ອວັດລະດັບການຕັ້ງຈຸດຂຸດຄົ້ນ. ເຊິ່ງໄດ້ແແບ່ງອອກເປັນ 3 ທີມຄື ທີມທີ 1 ນໍາພາໂດຍ ອຈ. ສີສຸພົນ ສິງປະເສີດ ຮອງຫົວໜ້າພາກວິຊາປະຫວັດສາດ ແລະບູຮານວິທະຍາ, ທີມທີ 2 ນໍາພາໂດຍ ອຈ. ສຸວັນນະຫົງ ລັດຕະນະພິມ ຫົວໜ້າໜ່ວຍພາກວິຊາເຝິກປະຕິບັດພາກສະໜາມພາກວິຊາປະຫວັດສາດ ແລະບູຮານວິທະຍາ ແລະທີມທີ 3 ນໍາພາໂດຍ ອຈ. ວັນນະເສີນ ໃຈຍາວາດ ຫົວໜ້າໜ່ວຍງານພາກວິຊາ ພາກສະໜາມພາກວິຊາປະຫວັດສາດ ແລະບູຮານວິທະຍາ ເພື່ອນໍາພານັກສຶກສາຜັດປ່ຽນກັນລົງມືປະຕິບັດວຽກງານຕົວຈິງຕາມແຜນວຽກງານທີ່ໄດ້ກໍານົດໄວ້.

           ທ່ານ ອຈ. ພອນ ແສງດາລາ ເປັນໜຶ່ງໃນທີມງານ ໄດ້ໃຫ້ສໍາພາດແກ່ທິມງານຂ່າວ ມຊ ວ່າ: ກ່ອນການລົງພື້ມທີ່ຕົວຈິງໃນຄັ້ງນີ້ ແມ່ນໄດ້ຈັດເຝິກອົບຮົມການນໍາໃຊ້ອຸປະກອນກ່ຽວກັບການລົງພື້ນທີ່ ແລະໄດ້ມີການວາງແຜນລະອຽດເພື່ອລົງພື້ນທີ່ຕົວຈິງໃຫ້ນັກສຶກສາເຂົ້າໃຈ ເຊິ່ງພິທີໄດ້ຈັດຂຶ້ນໃນວັນທີ 25 ມັງກອນ 2023 ຜ່ານມາ. ສໍຳລັບການລົງສໍາຫຼວດພື້ນທີ່ຄັ້ງນີ້, ມີນັກສຶກສາ ປີ 4 ຈາກພາກວິຊາ ປະຫວັດສາດ ແລະບູຮານວິທະຍາ ຄະນະວິທະຍາສາດສັງຄົມເຂົ້້າຮ່ວມ ຈໍານວນ 28 ຄົນ, ຍິງ 22 ຄົນ; ທັງນີ້ ກໍເພື່ອໃຫ້ເຂົ້າເຈົ້າໄດ້ນໍາໃຊ້ຄວາມຮູ້ ຈາກການຮຽນພາກທິດສະດີໃນວິຊາທີ່ກ່ຽວຂ້ອງເຂົ້າສູ່ການປະຕິບັດຕົວຈິງເພາະຈະເປັນການເຝິກທັກສະໃຫ້ເຂົາເຈົ້າໄດ້ມີຄວາມຮູ້-ຄວາມເຂົ້າໃຈໃນການສໍາຫຼວດພື້ນທີ່ຕົວຈິງໄດ້ຢ່າງຖືກຕ້ອງ ແລະສາມາດນໍາເອົາປະສົບການລົງຕົວຈິງໄປນໍາໃຊ້ເຂົ້າໃນການສຶກສາຮໍ່າຮຽນໃຫ້ເລິກເຊິ່ງ-ກວ້າງຂວາງ ແລະໃຫ້ປະໂຫຍດແກ່ສັງຄົມໃນອະນາຄົດ

ພາບບັນຍາກາດ

ໃນຕອນເຊົ້າວັນທີ 17 ມັງກອນ 2023 ນີ້, ຫໍສະໝຸດກາງ ມະຫາວິທະຍາໄລແຫ່ງຊາດ(ມຊ) ໄດ້ເປີດງານປະຖົມນິເທດ ແລະທັດສະນະສຶກສາໃຫ້ແກ່ນັກສຶກສາປີ 1 ທົ່ວ ມຊ. ພິທີດັ່ງກ່າວໄດ້ຈັດຂຶ້ນທີ່ຫ້ອງປະຊຸມຫໍສະໝຸດກາງ ມຊ. ໂດຍການກ່າວເປີດຂອງທ່ານ ອຈ. ນາງ ສີສະຫວັນ ລິນສະຫວັດ ຮອງຜູ້ອຳນວຍການຫໍໝຸດກາງ ມຊ, ມີບັນດາແຂກທີ່ຖືກເຊີນ, ພະນັກງານຫໍສະໝຸດ ພ້ອມດ້ວຍນັກສຶກສາປີທີ 1 ທົ່ວ ມຊ. ເຂົ້າຮ່ວມຢ່າງພ້ອມພຽງ.

          ຈຸດປະສົງໃນການຈັດງານຄັ້ງນີ້ແມ່ນເພື່ອເຝິກອົບຮົມທັກສະການນຳໃຊ້ຂໍ້ມູນຂ່າວສານຈາກສິ່ງພິມ ແລະຖານຂໍ້ມູນເອເລັກໂຕຼນິກວິຊາການ ເພື່ອການຮຽນ-ການສອນ ແລະການສຶກສາຄົ້ນຄວ້າດ້ວຍຕົນເອງສໍາລັບນັກຮຽນ-ນັກສຶກສາລະດັບຂັ້ນຕ່າງໆໂດຍສະເພາະ ນັກສຶກສາປີທີ 1 ຂອງ ມຊ. ການເຝິກອົບຮົມຄັ້ງນີ້ແມ່ນຢູ່ພາຍໃຕ້ຄຳຂວັນທີ່ວ່າ “ສົ່ງເສີມການນໍາໃຊ້ແຫຼ່ງຂໍ້ມູນຂ່າວສານຫໍສະໝຸດກາງ”  ເຊິ່ງນັກສຶກສາໄດ້ຮັບຟັງການບັນຍາຍຫຼາກຫຼາຍຫົວຂໍ້ເຊັ່ນ: ທັກສະການນໍາໃຊ້ຫໍສະໝຸດເພື່ອການຮຽນ-ການສອນ;  ການເຂົ້າເຖິງ ແລະການນໍາໃຊ້ຂໍ້ມູນອີເລັກໂຕຼນິກດ້ວຍລະບົບ DSpace; ເຂົ້າເຖິງ ແລະການນໍາໃຊ້ຂໍ້ມູນສິ່ງຕີພິມ ດ້ວຍລະບົບ PMB, ແນະນໍາພື້ນຖານການຄົ້ນຄວ້າຫາ ແລະການເຂົ້າເຖິງຂໍ້ມູນໃນຖານຂໍ້ມູນຂອງ ມຊ ແລະການຄົ້ນສິ່ງພິມເຕັບຮູບແບບ (Full texts), ບົດຄັດຫຍໍ້ (Abstracts) ວາລະສານວິທະຍາສາດ, ປຶ້ມ ແລະອື່່ນໆ ເພື່ອການຮຽນ-ການສອນ. ນອກຈາກນັ້ນ, ນັກສຶກສາທີ່ເຂົ້າຮ່ວມຍັງໄດ້ທ່ຽວຊົມເບິ່ງຕົວຈິງ ແລະຮັບຟັງການບັນຍາຍກ່ຽວກັບຈຸດໃຫ້ບໍລິການດ້ານຕ່າງໆຂອງຫໍສະໝຸດກາງ ມຊ. ອີກດ້ວຍ.

            ການເຝິກອົບຮົມແມ່ນໄດ້ດໍາເນີນເປັນເວລາ 3 ວັນ ເລີ່ມແຕ່ວັນທີ 17-19 ມັງກອນ 2023 ຈຶ່ງໄດ້ປິດລົງ

ພາບບັນຍາກາດ