ເພື່ອເປັນການສ້າງໂອກາດໃຫ້ນັກສຶກສາໄດ້ນໍາໃຊ້ທິດສະດີເຂົ້າໃນການປະຕິບັດຕົວຈິງ; ໃນຕອນເຊົ້າວັນທີ 26 ທັນວາ 2022 ຄະນະເສດຖະສາດ ແລະບໍລິຫານທຸລະກິດ (ຄສບ) ມະຫາວິທະຍາໄລແຫ່ງຊາດ (ມຊ) ໄດ້ເປີດງານຕະຫຼາດນັດ ນັກສຶກສາຂຶ້ນຢ່າງເປັນທາງການ ໂດຍການເຂົ້າຮ່ວມຂອງ ທ່ານ ຮສ.ປອ. ອຸດົມ ພອນຄໍາເພັງ ອະທິການບໍດີ ມຊ, ທ່ານ ສຈ.ປອ. ພູເພັດ ກ້ຽວພິລາວົງ ຄະນະບໍດີ ຄສບ, ມີບັນດາແຂກຖືກເຊິນ, ພ້ອມດ້ວຍພະນັກງານ, ຄູອາຈານ ແລະນັກສຶກສາເຂົ້າຮ່ວມຢ່າງຫຼວງຫຼາຍ.

          ເພື່ອເປັນການປະຕິບັດຕາມຫຼັກສູດການຮຽນ-ການສອນຂອງ ຄສບ ໃນການສ້າງໃຫ້ນັກສຶກສາມີໂອກາດນໍາໃຊ້ຄວາມຮູ້ ພາກທິດສະດີເຂົ້າສູ່ ພາກປະຕິບັດຕົວຈິງ ໂດຍຜ່ານການຈັດງານຕະຫຼາດນັດນັກສຶກສາຂອງ ຄສບ ເຊິ່ງຕະຫຼາດນັດ ນັກສຶກສາດັ່ງກ່າວ, ໄດ້ນໍາເນີນມາຫຼາຍຄັ້ງແລ້ວ ນັບແຕ່ປີ 2003-2004 ມາເຖິງສົກສຶກສາ 2022-2023 ເປັນຄັ້ງທີ 15 ມີນັກສຶກສາຊັ້ນຮຽນ ປີທີ 2-4 ຂອງແຕ່ລາສາວິຊາໃນ ຄສບ ເຂົ້າຮ່ວມຫຼາຍ 50 ຮ້ານ.

          ທ່ານ ອຈ. ເພັດສະໜອນ ພົມມະວົງ ຮອງຄະນະບໍດີ ຄສບ ໄດ້ໃຫ້ຮູ້ວ່າ ການຈັດງານຕະຫຼາດນັດຄັ້ງນີ້, ມີຈຸດປະສົງເພື່ອເຮັດໃຫ້ການຮຽນພາກທິດສະດີ ຕິດພັນກັບພາກປະຕິບັດຕົວຈິງ, ເພື່ອໃຫ້ນັກສຶກສາມີຄວາມສາມັກຄີຮັກແພງກັນໃນການປະຕິບັດວຽກງານຕົວຈິງ, ເພື່ອໃຫ້ນັກສຶກສາຮູ້ຮັກສາຄວາມສະອາດ, ຮັກສາສິ່ງແວດລ້ອມ ແລະເພື່່ອເປັນພື້ນຖານໃຫ້ນັກສາໃນການນໍາເອົາຄວາມຮູ້ຈາກການຈັດງານໃນແຕ່ລະຄັ້ງນໍາໄປໝູນໃຊ້ເຂົ້າໃນການປະກອບທຸລະກິດຂອງຕົນເອງ ໃນອະນາຄົດໃຫ້ປະສົບຜົາສໍາເລັດ.

          ງານດັ່ງກ່າວແມ່ນໄດ້ຈັດຂຶ້ນ ເປັນເວລາ 5 ວັນ, ແຕ່ວັນທີ 26 ຫາ 30 ທັນວາ 2022 ນີ້ ຢູ່ທີ່ເດີ່ນຈອດລົດຂ້າງຕຶກສໍານັກງານອະທິການບໍດີ ມຊ.

ພາບບັນຍາກາດ

ເພື່ອເປັນການສືບຕໍ່ບໍາລຸງ ຍົກລະດັບທາງດ້ານທິດສະດີການເມືອງ ແລະການປົກຄອງໃຫ້ແກ່ ພະນັກງານສະມາຊິກພັກ ແລະພະນັກງານຫຼັກແຫຼ່ງ ຂອງມະຫາວິທະຍາໄລແຫ່ງຊາດ(ມຊ), ໃນຕອນເຊົ້າ ວັນທີ 23 ທັນວາ 2022 ນີ້, ມຊ ໄດ້ເປີດຊຸດເຝິກອົບຮົມທິດສະດີການເມືອງ ແລະການປົກຄອງໄລຍະສັ້ນ 45 ວັນ ໃຫ້ແກ່ພະນັກງານສະມາຊິກພັກ, ພະນັກງານຫຼັກແຫຼ່ງ ທົ່ວ ມຊ. ຂຶ້ນທີ່ຫ້ອງປະຊຸມຊັ້ນ 2 ສະໂມສອນໃຫຍ່ ມຊ. ໂດຍການໃຫ້ກຽດເປັນປະທານຮ່ວມຂອງທ່ານ ຮສ. ໂພສີ ທິບດາວັນ ຄະນະປະຈໍາພັກ, ຮອງອະທິການບໍດີ ມຊ, ທ່ານ ນາງ ຄໍາຫຼ້າ ແກ້ວອຸ່ນຄໍາ ຄະນະບໍລິຫານງານພັກ, ຮອງຫົວໜ້າສະຖາບັນການເມືອງ ແລະການປົກຄອງແຫ່ງຊາດ, ມີບັນດາທ່ານຄະນະບໍລິຫານງານພັກ ມຊ, ຄະນະໜ່ວຍພັກຮາກຖານ, 3 ອົງການຈັດຕັ້ງມະຫາຊົນ, ຕາງໜ້າຄະນະຮັບຜິດຊອບຈາກສະຖາບັນການເມືອງ ແລະການປົກຄອງແຫ່ງຊາດ, ນັກສໍາມະນາກອນ ແລະຄະນະຮັບຜິດຊອບເຂົ້າຮ່ວມ.

        ການເຝິກອົບຮົມທິດສະດີການເມືອງ ແລະການປົກຄອງໄລຍະສັ້ນ 45 ວັນ ທີ່ຈັດຂຶ້ນໃນຄັ້ງນີ້ ເປັນຊຸດທີ XV, ມີພະນັກງານສະມາຊິກພັກ ແຕ່ລະຮາກຖານທົ່ວ ມຊ ເຂົ້າຮ່ວມເຝິກອົບຮົມ ຈໍານວນ 165 ສະຫາຍ, ຍິງ 47 ສະຫາຍ; ສໍາລັບວິຊາທີ່ນໍາມາເຝິກອົບຮົມ ປະກອບມີ 6 ວິຊາຄື: ວິຊາປັດສະຍາ 8 ບົດ, ວິຊາເສດຖະສາດການເມືອງ 8 ບົດ, ວິຊາລັດທິສັງຄົມນິຍົມວິທະຍາສາດ 10 ບົດ, ວິຊາບໍລິຫານສາດ 8 ບົດ, ວິຊາກໍ່ສ້າງພັກ 5 ບົດ ແລະວິຊາພາວະຜູ້ນໍາ.

       ການເຝິກອົບຮົມໃນຄັ້ງນີ້; ຄາດວ່າບັນດານັກສໍາມະນາກອນຈະສາມາດຮັບຮູ້ ແລະກໍາໄດ້ເນື້ອໃນພື້ນຖານຂອງທິດສະດີມາກ-ເລນິນ, ກໍາແໜ້ນແນວທາງການເມືອງຂອງພັກ-ລັດ ແລະສາມາດນໍາໄປຈັດຕັ້ງປະຕິບັດໃຫ້ສອດຄ່ອງກັບສະພາບຄວາມເປັນຈິງໃນປັດຈຸບັນ. ກ້າສະແດງຄວາມຄິດ ຄວາມເຫັນໃນເວລາຄົ້ນຄວ້າ ແລະສົນທະນາ, ມີຄວາມຮູ້ພື້ນຖານ ທາງດ້ານທິດສະດີການເມືອງ ປະກອບໃສ່ໃນການປະຕິບັດວຽກງານຕົວຈິງ, ໂດຍສະເພາະແມ່ນການສິດສອນ,  ການຄົ້ນຄວ້າວິໄຈ ແລະວຽກງານການຊີ້ນໍາ ນໍາພາທີ່ຕົນຮັບຜິດຊອບໃຫ້ເກີດຜົນປະໂຫຍດຕໍ່ສ່ວນລວມຫຼາຍຂຶ້ນ.

ພາບບັນຍາກາດ

ໃນຕອນບ່າຍວັນທີ 21 ທັນວາ 2022 ຜ່ານມານີ້, ມະຫາວິທະຍາໄລແຫ່ງຊາດ (ມຊ) ຮ່ວມກັບ ສະຖານທູດຍີ່ປຸ່ນ ປະຈໍາ ສ ປປ ລາວ ຈັດພິທີມອບ-ຮັບ ຫ້ອງຮຽນໃໝ່ ຂອງພາກວິຊາພາສາຍີ່ປຸ່ນ ຄະນະອັກສອນສາດ ມຊ ຂຶ້ນທີ່ພາກວິຊາດັ່ງກ່າວ. ເປັນກຽດກ່າວມອບໂດຍ ທ່ານ ທະເກະອິ ຊຸງຊຸເກະ ຮອງລັດຖະມົນຕີ ກະຊວງການຕ່າງປະເທດຍີ່ປຸ່ນ, ກ່າວຮັບໂດຍ ທ່ານ ຮສ. ປອ. ອຸດົມ ພອນຄໍາເພັງ ອະທິການບໍດີ ມຊ ໂດຍມີ ທ່ານນາງ ສີສຸກ ວົງວິຈິດ ຮອງລັດຖະມົນຕີ ກະຊວງສຶກສາທິການ ແລະກີລາ, ທ່ານ ໂຄບະຢະຊິ ເຄັນອິຈິ ເອກອັກຄະຣາຊະທູດຍີ່ປຸ່ນ ປະຈຳ ສປປ ລາວ, ມີບັນດາທ່ານແຂກທີ່ຖືກເຊີນ, ພະນັກງານ, ຄູ-ອາຈານ ແລະນັກສຶກສາພາກວິຊາພາສາຢີ່ປຸ່ນເຂົ້າຮ່ວມ.

           ທ່ານ ທາເກະອິ ຊຸງຊຸເກະ ໄດ້ກ່າວວ່າ: ພາກວິຊາພາສາຍີ່ປຸ່ນ ຄະນະອັກສອນສາດ ມຊ. ໄດ້ມີບົດບາດສຳຄັນໃນຂະແໜງການສຶກສາ ນັບຕັ້ງແຕ່ປີ 2003, ພາກວິຊາດັ່ງກ່າວ, ໄດ້ສະໜອງການສຶກສາພາສາຍີ່ປຸ່ນ ທີ່ມີຄຸນະພາບສູງ ເພື່ອເຮັດໃຫ້ຄົນລາວຈຳນວນຫລາຍໄດ້ບັນລຸຜົນສຳເລັດຢ່າງດີເດັ່ນໃນແຕ່ລະຂະແໜງວິຊາຂອງພວກເຂົາ ທີ່ກ່ຽວພັນກັນກັບລະດັບພາສາຍີ່ປຸ່ນ. ຂ້າພະເຈົ້າຫວັງວ່າຫ້ອງຮຽນທີ່ໄດ້ຮັບເພີ່ມຕື່ມນີ້, ຈະຍົກສູງສະພາບແວດລ້ອມທາງດ້ານການສຶກສາໃຫ້ດີຂຶ້ນ, ສົ່ງເສີມໃຫ້ມີນັກສຶກສາທີ່ຮຽນພາສາຍີ່ປຸ່ນຫລາຍຂຶ້ນກວ່າເກົ່າ ເພື່ອເພີ່ມພູນລະດັບພາສາຂັ້ນສູງໃນການສຶກສາລະດັບສູງ ຢູ່ທີ່ ສປປ ລາວ.

          ໂອກາດນີ້, ທ່ານ ຮສ. ປອ. ອຸດົມ ພອນຄໍາເພັງ ໃນນາມການນໍາຂອງ ມຊ. ໄດ້ສະແດງຄວາມຂອບໃຈມາຍັງລັດຖະບານ ແລະປະຊາຊົນຍີ່ປຸ່ນ ທີ່ໄດ້ເຫັນຄວາມສຳຄັນຂອງການສຶກສາຮ່ຳຮຽນຢູ່ໃນ ມຊ ເວົ້າລວມ; ເວົ້າສະເພາະ ແມ່ນ ພາກວິຊາພາສາຍີ່ປຸ່ນ, ຄະນະອັກສອນສາດ ມຊ. ເພື່ອເຮັດໃຫ້ນັກສຶກສາມີຫ້ອງຮຽນທີ່ດີ-ມີຄຸນນະພາບ, ພ້ອມທັງຢືນຢັນວ່າ ຈະປົກປັກຮັກສາ ຫ້ອງຮຽນທີ່ໄດ້ຮັບໃນຄັ້ງນີ້ ໄດ້ເປັນຢ່າງດີ ແລະຈະນໍາໃຊ້ເຂົ້າໃນການສຶກສາຮໍ່າຮຽນ ໃຫ້ເກີດຜົນປະໂຫຍດສູງສຸດ.

          ຫ້ອງຮຽນທີ່ສ້າງໃໝ່ ເປັນອາຄານ 2 ຊັ້ນ, ມີ 3 ຫ້ອງຮຽນ ພ້ອມອຸປະກອນຄົບຊຸດ ໂດຍໄດ້ຮັບການຊ່ວຍເຫລືອລ້າຈາກ ລັດຖະບານ ແລະປະຊາຊົນຍີ່ປຸ່ນ, ເຊິ່ງໄດ້ເລີ່ມສ້າງມາແຕ່ເດືອນ ມີນາ 2021 ແລະສໍາເລັດ ໃນເດືອນທັນວາ 2022 ລວມມູນຄ່າກໍ່ສ້າງທັງໝົດ 10.000.000 ເຢັນ ເປັນເງິນກີບຈໍານວນ 1.305.200.000 ກີບ.

ພາບບັນຍາກາດ

           ໃນຕອນເຊົ້າວັນທີ 20 ທັນວາ 2022 ນີ້, ຄະນະວິທະຍາສາດສັງຄົມ (ຄສຄ) ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີປາຖະກະຖາ ວັນສະຖາປະນາ ສປປ ລາວ ຄົບຮອບ 47 ປີ (2/12/1975 - 2/12/ 2022) ແລະວັນຄ້າຍວັນເກີດ ປະທານ ໄກສອນ ພົມວິຫານ ຄົບຮອບ 102 ປີ (13/12/2020 – 13/12/2022)  ຂຶ້ນທີ່ຫ້ອງປະຊຸມສະໂມສອນ ມຊ. ໂດຍການໃຫ້ກຽດປາຖະກະຖາຂອງທ່ານ ສົມສະຫວາດ ເລັ່ງສະຫວັດ ອະດີດ ກົມການເມືອງສູນກາງພັກ, ອະດີດຮອງນາຍົກລັດຖະມົນຕີ, ເຂົ້າຮ່ວມມີບັນດາທ່ານຄະນະພັກຮາຖານ, ເລຂາໜ່ວຍພັກ, ພະນັກງານ, ຄູ-ອາຈານ  ແລະນັກສຶກສາພາຍໃນ ຄສຄ ເຂົ້າຮ່ວມ.

          ໃນພິທີ ທ່ານ ສົມສະຫວາດ ເລັ່ງສະຫວັດ ໄດ້ຂຶ້ນປາຖະກະໃນຫົວຂໍ້ ວັນຊາດ ທີ 2 ທັນວາ ແລະ ວັນຄ້າຍວັນເກີດຂອງ ປະທານ ໄກສອນ ພົມວິຫານ ເປັນວັນທີ່ມີຄວາມໝາຍ-ຄວາມສຳຄັນຂອງຊາດລາວເຮົາ, ເຊິ່ງສະແດງໃຫ້ເຫັນເຖິງມູນເຊື້ອອັນສະຫງ່າອົງອາດກ້າຫານແຫ່ງການຕໍ່ສູ້ຂອງກອງທັບ ແລະປະຊາຊົນລາວບັນດາເຜົ່າ ພາຍໃຕ້ການຊີ້ນຳ-ນຳພາອັນສະຫຼາດສ່ອງໃສຂອງພັກປະຊາຊົນ ປະຕິວັດລາວ ຢ່າງພິລະອາດຫານ ຕ້ານຈັກກະພັດຜູ້ຮຸກຮານ ແລະການຄອບຄອງຂອງພວກລ່າເມືອງຂຶ້ນທັງແບບເກົ່າ ແລະໃໝ່, ສາມາດປົດປ່ອຍປະເທດຊາດໄດ້ຢ່າງມີໄຊ ແລະປະກາດສ້າງຕັ້ງ ສປປ ລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975, ເປັນວັນແຫ່ງໄຊຊະນະອັນຍິ່ງໃຫຍ່ໃນປະຫວັດສາດແຫ່ງການຕໍ່ສູ້ຂອງຊາດລາວເຮົາ, ເປັນວັນທີ່ປະຊາຊົນລາວບັນດາເຜົ່າ ໄດ້ມີອິດສະຫຼະພາບ ແລະເປັນເຈົ້າຂອງປະເທດຊາດຢ່າງແທ້ຈິງ, ເປັນວັນທີ່ປະເທດລາວໄດ້ມີເອກະລາດຢ່າງສົມບູນ ແລະມີປະຊາທິປະໄຕ ຢ່າງຄົບຖ້ວນ, ມີທີ່ຕັ້ງອັນສົມກຽດ ແລະມີສະຖານະພາບເທົ່າທຽມກັບບັນດາປະເທດອື່ນໆໃນໂລກ, ເຮັດໃຫ້ປະຊາຄົມໂລກ ໄດ້ຮັບຮູ້ ວັນທີ 2 ທັນວາ ແມ່ນວັນແຫ່ງສັນຕິພາບ, ວັນແຫ່ງການກ້າວເຂົ້າສູ່ຍຸກສະໄໝໃໝ່ ແຫ່ງການສ້າງປະເທດລາວໃຫ້ມີສັນຕິພາບ ເອກະລາດ ປະຊາທິປະໄຕ ເອກະພາບ ແລະວັດທະນະຖາວອນ ຫຼືເວົ້າອີກຢ່າງໜຶ່ງ ວັນສະຖາປະນາ ສປປ ລາວ ແມ່ນວັນແຫ່ງໝາກຜົນລວມຍອດອັນອົງອາດກ້າຫານໃນການຕໍ່ສູ້ຢ່າງເສຍສະຫຼະຂອງປວງຊົນລາວທັງຊາດເພື່ອໃຊ້ຊະນະອັນສົມບູນ”.

 ພ້ອມດຽວກັນນັ້ນ, ທ່ານກໍໄດ້ເລົ່າເຖິງປະຫວັດຫຍໍ້-ຊີວິດ ແລະພາລະກິດຂອງປະທານ ໄກສອນ ພົມວິຫານ ໃນການເຄື່ອນໄຫວແຕ່ລະໄລຍະ, ໂດຍສະເພາະແມ່ນ ມູນເຊື້ອການເຄື່ອນໄຫວພາລະກິດປະຕິວັດອັນອົງອາດກ້າຫານ, ເດັດດ່ຽວໜຽວແໜ້ນຂອງປະທານ ໄກສອນ ພົມວິຫານ ຈົນກາຍເປັນນັກຮົບປະຕິວັດທີ່ຍິ່ງໃຫຍ່ຂອງຊາດ, ເປັນວິລະບູລຸດ ເປັນຜູ້ນຳຂອງພັກ-ລັດ ທີ່ມີຄວາມສາມາດສະຫຼາດສ່ອງໃສ, ເປັນນັກທິດສະດີ, ເປັນນັກປຸກລະດົມຂົນຂວາຍ, ເປັນແບບຢ່າງອັນໃສແຈ້ງ ທ່ານມີແບບແຜນນນໍາພາ, ມີວິທີເຮັດວຽກທີ່ດີ, ເປັນແກ່ນສານຂອງຄວາມສາມັກຄີພາຍໃນພັກ ແລະຊາດ, ເປັນຜູ້ທີ່ມີຄຸນສົມບັດສິນທຳປະຕິວັດສູງສົ່ງ, ມີທັດສະນະມະຫາຊົນກວ້າງຂວາງ ເປັນຜູ້ນໍາທີ່ບໍລິສຸດປອດໃສ ເປັນນັກເຄື່ອນໄຫວສາກົນຜູ້ດີເດັ່ນ ທັງເປັນຜູ້ວາງແນວທາງ ແລະເປັນແບບຢ່າງປະຕິບັດແນວທາງຕ່າງປະເທດຢ່າງຖືກຕ້ອງ ເຮັດໃຫ້ ສປປ ລາວ ມີບົດບາດໃນເວທີສາກົນ.

ພາບບັນຍາກາດ