ໃນວັນທີ 17 ມີນາ 2023 ຜ່ານມານີ້, ຄະນະບໍລິຫານງານຊາວໜຸ່ມ ປະຊາຊົນປະຕິວັດລາວມະຫາວິທະຍາໄລແຫ່ງຊາດ (ຄຊປປລ ມຊ) ຮ່ວມກັບ ສະຖາບັນເລືອດແຫ່ງຊາດ, ສູນກາງຊາວໜຸ່ມປະຊາຊົນ ປະຕິວັດລາວ ແລະກະຊວງສຶກສາທິການ ແລະກີລາ ຈັດຂະບວນການຊາວໜຸ່ມອາສາສະໝັກຕະລຸມບອນບໍລິຈາກເລືອດ ພາຍໃຕ້ຫົວຂໍ້ “68 ປີມີໄຊ ຊາວໜຸ່ມລາວຮ່ວມໃຈຕະລຸມບອນບໍລິຈາກເລືອດ” ທີ່ສະໂມສອນໃຫຍ່ ມຊ, ໂດຍການເຂົ້າຮ່ວມຂອງທ່ານ ມອນໄຊ ລາວມົ່ວຊົງ ກໍາມະການສໍາຮອງສູນກາງພັກ, ເລຂາຄະນະບໍລິຫານງານພັກ, ເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ, ທ່ານ ສຈ.ດຣ ພູທອນ ເມືອງປາກ ປະທານອົງການກາແດງແຫ່ງຊາດລາວ ແລະທ່ານ ສິນທະວອນ ດາລາວົງ ຄະນະພັກ ມຊ ຜູ້ຊີ້ນຳອົງການຈັດຕັ້ງຊາວໜຸ່ມ ມຊ, ມີບັນດາມວນຊົນ, ພະນັກງານ, ຄູ-ອຈານ ແລະນັກສຶກສາທົ່ວ ມຊ ເຂົ້າຮ່ວມ.
ຈຸດປະສົງຂອງຂະບວນການຄັ້ງນີ້ ເພື່ອຂໍ່ານັບຮັບຕ້ອນ ແລະສະເຫຼີມສະຫຼອງວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 68 ປີ ແລະວັນສ້າງຕັ້ງຊາວໜຸ່ມ ປະຊາຊົນ ປະຕິວັດລາວ ຄົບຮອບ 68 ປີ ແລະເພື່ອເປັນການສຶກສາອົບຮົມຄົນຮຸ່ນໜຸ່ມໃຫ້ຮູ້ມູນເຊື້ອແຫ່ງຄວາມສາມັກຄີ, ນໍ້າໃຈອາດຫານ ແລະ ຄວາມເສຍສະຫລະ ດ້ວຍຈິດໃຈຂານອາສາສະໝັກ ບໍລິຈາກເລືອດຊ່ວຍເຫຼືອສັງຄົມ ແລະ ກຽມພ້ອມຮັບໃຊ້ປະເທດຊາດ; ການບໍລິຈາກເລືອດຄັ້ງນີ້ຍັງເປັນການແກ້ໄຂການຂາດແຄນເລືອດ ແລະ ຕອບສະໜອງເລືອດໃຫ້ພຽງພໍເພື່ອນໍາໃຊ້ເຂົ້າໃນການປິ່ນປົວຄົນເຈັບ ທີ່ນອນຢູ່ຕາມໂຮງໜໍແຫ່ງຕ່າງໆໃນຂອບເຂດທົ່ວປະເທດ, ການບໍລິຈາກເລືອດຄັ້ງນີ້ ມີຜູ້ເຂົ້າຮ່ວມທັງໝົດ 600 ກວ່າຄົນ ໄດ້ເລືອດທັງໝົດ 495 ຖົງ ສາມາດນໍາໄປຊ່ວຍຄົນໄດ້ຫລາຍກວ່າ 1,485 ຄົນ.