ໃນຕອນເຊົ້າ ວັນທີ 1 ກໍລະກົດ 2024 ຄະນະສະຖາປັດຕະຍະກໍາສາດ (ຄສປ) ມະຫາວິທະຍາໄລແຫ່ງຊາດ (ມຊ) ໄດ້ມີພິທີປະກາດແຕ່ງຕັ້ງ ຄະນະບໍດີ, ໂດຍການເຂົ້າຮ່ວມຂອງທ່ານ ຮສ. ປອ. ເດຊານຸລາດ ແສນດວງເດດ ວ່າການແທນອະທິການບໍດີ ມຊ, ມີທ່ານຄະນະບໍດີ, ຮອງຄະນະບໍດີ, ຫົວໜ້າ-ຮອງຫົວໜ້າພາກວິຊາ, ຫົວໜ້າ-ຮອງຫົວໜ້າພະແນກ, ພະນັກງານ, ຄູ-ອາຈານ ແລະນັກສຶກສາເຂົ້າຮ່ວມ.
ໃນພິທີ ທ່ານ ຄຳເຟືອງ ລໍວັນໄຊ ຫົວໜ້າຫ້ອງການຈັດຕັ້ງ ແລະຄຸ້ມຄອງພະນັກງານ ມຊ ໄດ້ຂຶ້ນອ່ານດຳລັດຂອງທ່ານ ນາຍົກລັດຖະມົນຕີສະບັບເລກທີ 297/ນຍ ລົງວັນທີ 5 ມິຖຸນາ 2024 ວ່າດ້ວຍ ການແຕ່ງຕັ້ງຄະນະບໍດີ ຄສປ. ມຊ ໂດຍແຕ່ງຕັ້ງ ທ່ານ ຮສ. ປອ. ສຸກັນ ຈິດປັນຍາ ເປັນຄະນະບໍດີ ຄສປ.
ພ້ອມນັ້ນ ໃນພິທີຍັງໄດ້ຮັບຟັງການໂອ້ລົມຂອງທ່ານ ຮສ. ປອ. ເດຊານຸລາດ ແສນດວງເດດ ໂດຍທ່ານໄດ້ກ່າວສະແດງຄວາມຊົມເຊີຍຕໍ່ການຮັບໜ້າທີ່ຕຳແໜ່ງໃໝ່ຂອງທ່ານຄະນະບໍດີ ແລະສະແດງຄວາມເປັນຫ່ວງເປັນໄຍ ຕໍ່ພະນັກງານ, ຄູ-ອາຈານ ທີ່ສຸມເຫື່ອແຮງກາຍ, ສະຕິປັນຍາ ເຂົ້າໃນການສິດສອນຂອງຄະນະ ທ່າມກາງຄວາມຫຍຸ້ງຍາກຫຼາຍຢ່າງໃນປັດຈຸບັນ, ພ້ອມນັ້ນ ທ່ານຍັງໄດ້ກ່າວເນັ້ນໃຫ້ພະນັກງານ, ຄູ-ອາຈານ ມີແນວຄິດອຸ່ນອຽນທຸ່ນທ່ຽງເຊື່ອໝັ້ນການນຳພາຂອງພັກ-ລັດ ພ້ອມປະຕິບັດທຸກໜ້າທີ່ ແລະພາລະກິດສຳຄັນທີ່ຖຶກມອບໝາຍຢ່າງເຕັມທີ່.