ວັນທີ 14 ສິງຫາ 2024 ຜ່ານມານີ້, ສະຖາບັນພັດທະນາຊັບພະຍາກອນມະນຸດລາວ-ຍີ່ປຸ່ນ (ສລຍ), ມະຫາວິທະຍາໄລແຫ່ງຊາດ(ມຊ) ໄດ້ຈັດງານສົ່ງເສີມພັດທະນາທຸລະກິດ ເພື່ອປະກອບສ່ວນສ້າງຄວາມເຂັ້ມແຂງໃຫ້ແກ່ຫົວໜ່ວຍທຸລະກິດໃນການຮັບໃຊ້ສັງຄົມ, ເຊິ່ງໄດ້ຮ່ວມຈັດໂດຍ ອົງການສົ່ງເສີມການຄ້າສາກົນຍີ່ປຸ່ນ ປະຈຳນະຄອນຫຼວງວຽງຈັນ (JETRO) ແລະສໍານັກງານສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ກະຊວງອຸດສາຫະກຳ ແລະ ການຄ້າ ພາຍໃຕ້ການສະໝັບສະໜູນຈາກອົງການໄຈກາ (JICA); ງານດັ່ງກ່າວໄດ້ຈັດຂຶ້ນທີ່ໂຮງແຮມຄຣາວພາຊ່າ ນະຄອນຫຼວງວຽງຈັນ; ໂດຍການເຂົ້າຮ່ວມເປີດພິທີ ຂອງ ທ່ານ Junya NAKANO, ອຸປະທູດຂອງສະຖານທູດຍີ່ປຸ່ນປະຈຳ ສປປ ລາວ, ທ່ານ ນາງ Miyako KOBAYASHI ຫົວໜ້າ ຫ້ອງການໄຈກາປະຈຳ ສປປ ລາວ ແລະ ທ່ານ ສາ ສິລິພົງ ຮອງຫົວໜ້າສຳນັກງານສົ່ງເສີມ ຈຸນລະວິສາຫະກິດ, ວິສາຫະກິດຂະໜາດນ້ອຍ ເເລະ ກາງ, ມີທ່ານຜູ້ອຳນວຍການ-ຮອງອຳນວຍການ ສະຖາບັນ, ພະນັກງານ ພ້ອມດ້ວຍຄະນະກຳມະການ ແລະຜູ້ແຂ່ງຂັນເຂົ້າຮ່ວມ.
ງານດັ່ງກ່າວ ເເມ່ນຈັດຂຶ້ນພາຍໃຕ້ໂຄງການ LJI SUSU ເຊິ່ງມີຈຸດປະສົງ ສ້າງທ່າແຮງໃນການແຂ່ງຂັນ ເເລະ ຂະຫຍາຍເຄືອຂ່າຍທຸລະກິດ ລະຫວ່າງບໍລິສັດພາຍໃນ ເເລະ ຕ່າງປະເທດ, ລວມທັງບໍລິສັດຍີ່ປຸ່ນ ໃຫ້ເເກ່ຫົວໜ່ວຍບໍລິສັດທີ່ໄດ້ເຂົ້າຮ່ວມໂຄງການ. ໂດຍໄດ້ຄັດເລືອກທີມທີ່ຜ່ານເຂົ້າຮອບຊະນະເລີດ ຈາກການແຂ່ງຂັນແຜນທຸລະກິດ LJI SUSU ທີ່ຈັດຂຶ້ນໃນເດືອນຕຸລາ ປີ 2023 ທີ່ຜ່ານມາ ຈຳນວນ 5 ທີມ (5 ບໍລິສັດ) ແລະພາຍຫຼັງເຂົາເຈົ້າໄດ້ດຳເນີນການຈັດຕັ້ງປະຕິບັດແຜນທຸລະກິດໃຫ້ປະກົດຜົນເປັນຈິງ (Proof of Concept) ເປັນໄລຍະເວລາ 8 ເດືອນ ໂດຍໄດ້ຮັບການສະໜັບສະໜູນເງິນທຶນຈາກອົງການໄຈກາ (JICA) ແລະ ໄດ້ຮັບຄໍາເເນະນໍາຈາກຜູ້ໃຫ້ຄໍາແນະນໍາ (Mentor) ຕ່າງປະເທດແລ້ວ, ມື້ນີ້ ເຂົາເຈົ້າໄດ້ນໍາສະເໜີກ່ຽວກັບທຸລະກິດຂອງຕົນ ພ້ອມທັງຮູບເເບບໃນການຮ່ວມມືນຳຄູ່ຮ່ວມງານ ຫຼື ນັກລົງທຶນອື່ນໆ ປະກອບມີ: 1. SYSTORY Co.,Ltd: ແອັບຈັດການບໍລິຫານລະບົບຄລີນິກ ເພື່ອການບໍລິການທີ່ດີຂຶ້ນສຳລັບຄົນເຈັບ; 2. ຍອດຊຳ: ຜະລິດຕະພັນເຂົ້າໄກ່ນ້ອຍ ເພື່ອອະນຸລັກວັດທະນະທໍາຂອງຄົນລາວ ເເລະ ສົ່ງເສີມຊີວິດການເປັນຢູ່ຂອງຊາວນາ; 3. VendeeX Co., Ltd: ຕູ້ກົດສິນຄ້າອັດຕະໂນມັດ ຂະຫຍາຍຊ່ອງທາງການຈຳໜ່າຍສິນຄ້າ ເພື່ອເພີ່ມຄວາມສະດວກໃຫ້ເເກ່ລູກຄ້າ; 4. Cofarm Co., Ltd: ລະບົບສຳລັບການປູກພືດຜັກ ເພື່ອຂະຫຍາຍທ່າແຮງຂອງການກະສິກຳໃນຕົວເມືອງ ເເລະ ເພີ່ມທະວີການຜະລິດພາຍໃນ ແລະ 5. SAYA Arts and Crafts: ຜະລິດຕະພັນຜ້າຝ້າຍ ເພື່ອສົ່ງເສີມຄຸນຄ່າຂອງຝ້າຍລາວໃຫ້ມີຄວາມຍືນຍົງ ເເລະ ກ້າວສູ່ເວທີສາກົນ.
ຜ່ານການແຂ່ງຂັນຜົນປະກົດວ່າ ທີມທີ່ໄດ້ຮັບ ລາງວັນ LJI SUSU Awards ໄດ້ແກ່ທີມ: ບໍລິສັດທີ່ໄດ້ຮັບແມ່ນ Cofarm Co., Ltd “Best Performance Award” ແລະ ທີມຈາກບໍລິສັດທີ່ໄດ້ຮັບແມ່ນ SAYA Arts and Crafts “Social Impact Award”; ພ້ອມນັ້ນ ຍັງມີລາງວັນພິເສດຄື: ລາງວັນຈາກ JETRO : ທີມບໍລິສັດທີ່ໄດ້ຮັບແມ່ນ Cofarm Co., Ltd, ລາງວັນຈາກ TechSauce: ທີມບໍລິສັດທີ່ໄດ້ຮັບແມ່ນ Systory Co.,Ltd ເເລະ Cofarm Co., Ltd ແລະລາງວັນຈາກ Lighthouse Partners (Venture Fund Law): ທີມບໍລິສັດທີ່ໄດ້ຮັບແມ່ນ Cofarm Co., Ltd