ຄະນະນິຕິສາດ ແລະລັດຖະສາດ (ຄນລ) ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີສະຫຼຸບການຮຽນ-ການສອນ ສົກສຶກສາ 2023-2024, ເປີດສົກຮຽນໃໝ່ 2024-2025 ແລະ ມອບ-ຮັບໃບປະກາສະນີຍະບັດໃຫ້ຜູ້ສໍາເລັດການສຶກສາ ໃນວັນທີ 25 ຕຸລາ 2024 ນີ້, ທີ່ຄະນະຂອງຕົນ ໂດຍການເຂົ້າຮ່ວມ ແລະ ມອບປະກາສະນີຍະບັດ ຂອງທ່ານ ຮສ. ປອ. ສິນທະວອນ ດາລາວົງ ຮອງອະທິການບໍດີ ມຊ, ມີຮອງຄະນະບໍດີ ຄນລ, ແຂກຖືກເຊີນ, ພະນັກງານ, ຄູ-ອາຈານ, ນັກສຶກສາ ແລະຜູ້ປົກຄອງນັກສຶກສາເຂົ້າຮ່ວມ.
ໃນພິທີ, ທ່ານ ປອ. ສົມເດດ ແກ້ວວົງສັກ ຮອງຄະນະບໍດີ ຄນລ ກໍໄດ້ຂຶ້ນຜ່ານບົດລາຍງານສະຫຼຸບສົກສຶກສາ 2023-2024 ແລະເປີດສົກຮຽນໃໝ່ 2024-2025 ເຊິ່ງທ່ານໄດ້ກ່າວວ່າ: ຄະນະນິຕິສາດ ແລະ ລັດຖະສາດ ເປັນຄະນະຫນຶ່ງໃນ 13 ຄະນະວິຊາ ທີ່ຂຶ້ນກັບ ມະຫາວິທະຍາໄລແຫ່ງຊາດ ຊື່ງມີພາລະບົດບາດໃນການກໍ່ສ້າງນັກວິຊາການທາງດ້ານກົດຫມາຍ, ການປົກຄອງ ແລະ ການຕ່າງປະເທດ ໃນລະດັບ ປະລິນຍາຕີ ແລະ ປະລິນຍາໂທ ເພື່ອຕອບສະຫນອງນັກວິຊາການຕາມຄວາມຮຽກຮ້ອງຕ້ອງການຂອງສັງຄົມ ກໍຄືຂອງ ປະເທດຊາດ. ນັບແຕ່ມື້ໄດ້ຮັບການສ້າງຕັ້ງຂຶ້ນໃນປີ 1986 (23 ມີນາ 1986) ເຖິງວັນທີ 23 ມີນາ 2024 ທີ່ຜ່ານມາ ຄນລ ມີອາຍຸ 38 ປີແລ້ວ, ມາຮອດປັດຈຸບັນນີ້ ຄະນະນິຕິສາດ ແລະ ລັດຖະສາດ ສາມາດກໍ່ສ້າງນັກວິຊາການລະດັບປະລິນຍາຕີໄດ້ເຖິງ 28 ຊຸດ ແລະ ລະດັບປະລິນຍາໂທນິຕິສາດໄດ້ 14 ຮຸ່ນ, ປະລິນຍາໂທ ສາຂາກົດຫມາຍປົກຄອງ 10 ຮຸ່ນ, ປະລິນຍາໂທ ສາຂາກົດຫມາຍທຸລະກິດ 8 ຮຸ່ນ ແລະ ປະລິນຍາໂທ ສາຂາກົດຫມາຍສາກົນ 3 ຮຸ່ນ. ມີພະນັກງານ-ຄູອາຈານທັງຫມົດ: 84 ທ່ານ, ຍິງ 38 ທ່ານ. ໃນນີ້ປະກອບດ້ວຍ: ອາຈານສອນ: 71 ທ່ານ, ຍິງ 27 ທ່ານ; ພະນັກງານບໍລິຫານ: 13 ທ່ານ, ຍິງ 11 ທ່ານ; ພະນັກງານຕາມສັນຍາ: 1 ທ່ານ, ໃນສົກສຶກສາ 2023-2024 ຄນລ ມີນັກສຶກສາທັງຫມົດ 1.305 ຄົນ, ຍິງ 701 ຄົນ, ໃນນັ້ນມີນັກສຶກສາ ປະລິນຍາຕີ 1.060 ຄົນ, ຍິງ 644 ຄົນ ແລະ ນັກສຶກສາປະລິນຍາໂທ 245 ຄົນ, ຍິງ 57 ຄົນ. ສົກສຶກສາ 2023-2024 ຄນລ ມີນັກສຶກສາ ປີ 4 ທັງຫມົດ 375 ຄົນ, ຍິງ 219 ຄົນ ໃນນັ້ນມີນັກສຶກສາ ທີ່ ສໍາເລັດການສຶກສາທັງຫມົດ 370 ຄົນ, ຍິງ 218 ຄົນ ຄິດເປັນເປີເຊັນ 99%. ມີນັກສຶກສາຕົກຄ້າງທັງຫມົດ 5 ຄົນ, ຍິງ 1 ຄົນ. ໃນຊຸດຮຽນນີ້ ມີນັກສຶກສາ ຂອງ ຄນລ ໄດ້ຮັບໃບປະກາສະນີຍະບັດ ກຽດນິຍົມ ຈໍານວນ 33 ຄົນ, ຍິງ 24 ຄົນ (ພາກວິຊາກົດຫມາຍແພ່ງ 2 ຄົນ, ຍິງ 1 ຄົນ, ພາກວິຊາກົດຫມາຍອາຍາ 2 ຄົນ ຍິງ 1, ພາກວິຊາລັດຖະສາດ 2 ຄົນ ຍິງ 1, ພາກວິຊາກົດຫມາຍທຸລະກິດ 9 ຄົນ, ຍິງ 7 ຄົນ ແລະ ພາກວິຊາພົວພັນສາກົນ 18 ຄົນ, ຍິງ 14 ຄົນ). ນັກສຶກສາ ລະດັບ ປະລິນຍາໂທ ສໍາເລັດການສຶກສາ ທັງຫມົດ 43 ຄົນ, ຍິງ 19 ຄົນ.
ຄນລ ໄດ້ເອົາໃຈໃສ່ຊີ້ນໍາ -ນໍາພາ ໃຫ້ມີກິດຈະກໍາເສີມທັກສະ, ຄວາມຮູ້ ໂດຍ ປະຕິບັດຕາມ 3 ລັດສະນະ 5 ຫຼັກມູນຂອງການສຶກສາ. ນອກຈາກການຮຽນວິຊາສະເພາະແລ້ວ, ນັກສຶກສາຍັງໄດ້ ປະກອບສ່ວນເຂົ້າໃນວຽກງານນອກຫຼັກສູດຄື: ມີການແຂ່ງຂັນ ອາຊຽນ QUIZ, ແຂ່ງຂັນສານຈໍາລອງ MOOT COURT, ການແຂ່ງຂັນຖາມ-ຕອບ ຂອງກຸ່ມນັກສຶກສາ ALSA, ກິດຈະກໍາແລກປ່ຽນລະຫວ່າງນັກສຶກສາ, ຕັ້ງຄ້າຍ ຂອງນັກສຶກສາ ແລະ ອອກແຮງງານລວມ. ພິເສດໃນສົກສຶກສາ 2023-2024 ສຶກສາ ຄນລ ໄດ້ເຂົ້າຮ່ວມການແຂ່ງຂັນ ສີລະປະ-ວັນນະຄະດີ ໃນວັນທີ 26 ເມສາ 2024 ທີ່ ມຊ ເຊິ່ງສາມາດຍາດລາງວັນມາໄດ້ຫຼາຍປະເພດ, ດ້ານການປະກັນຄຸນນະພາບການສຶກສາ
ຄນລ ໄດ້ຈັດການປະເມີນຫຼັກສູດທັງ 5 ສາຂາ ຕາມມາດຕະຖານຄຸນນະພາບຂອງ ເຄືອຂ່າຍມະຫາວິທະຍາໄລອາຊຽນ ສໍາເລັດເປັນທີ່ຮຽບຮ້ອຍ. ປັດຈຸບັນແມ່ນພວກເຮົາພວມສືບຕໍ່ຈັດຕັ້ງປະຕິບັດ ແລະ ປັບປຸງມາດຕະຖານຕ່າງໆຕາມການແນະນໍາຂອງຜູ້ປະເມີນທີ່ມີຕໍ່ແຕ່ລະຫຼັກສູດ ເພື່ອເຮັດໃຫ້ການຮຽນ-ການສອນ ເປັນຕົ້ນ.
ພ້ອມໃນພິທີຍັງໄດ້ຮັບຟັງການໂອ້ລົມຂອງທ່ານ ຮສ. ປອ. ສິນທະວອນ ດາລາວົງ ເຊິ່ງທ່ານໄດ້ກ່າວສະແດງຄວາມຍ້ອງຍໍຊົມເຊີຍຕໍ່ກັບນັກສຶກສາໃນທຸກລະດັບທີ່ສຳເລັດການສຶກສາທີ່ ຄນລ ພ້ອມນັ້ນ ທ່ານຍັງໄດ້ກ່າວເນັ້ນໃຫ້ ນັກສຶກສາທີ່ສຳເລັດການສຶກສາຈົ່ງນຳໃຊ້ຄວາມຮູ້ຄວາມສາມາດຂອງຕົນເອງປະກອບສ່ວນເຂົ້າໃນການເຮັດວຽກໃຫ້ເຕັມຄວາມສາມາດ, ໜູນໃຊ້ໃຫ້ຖືກກັບໜ້າວຽກຕ່າງໆເພື່ອໃຫ້ສຳເລັດຜົນອີກດ້ວຍ.