ໃນວັນທີ 20 ມີນາ 2026 ທີ່ຜ່ານມາ ໂຮງຮຽນພອນສະຫວັນແຫ່ງຊາດ, ໄດ້ຈັດງານປະກວດຊຸດລີໄຊໂຄ ປະຈຳປີ 2026 ເຊິ່ງເປັນໂຄງການຊາວໜຸ່ມຮັກສາສິ່ງແວດລ້ອມ ຢູ່ທີ່ສະໂມສອນຂອງໂຮງຮຽນ, ໂດຍການເຂົ້າຮ່ວມຂອງ ທ່ານ ຄຳຫອງ ສີບຸນເຮືອງ ຮອງຜູ້ອຳນວຍການ-ຜູ້ຊີ້ນຳວຽກງານສາມອົງກອນການຈັດຕັ້ງມະຫາຊົນ, ທ່ານ ໜູເບ ທິບພົນເລືອງ ຮອງເລຂາຄະນະບໍລິຫານງານຊາວໜຸ່ມ ມຊ, ພ້ອມດ້ວຍແຂກຖືກເຊີນ, ພະນັກງານ, ຄູ-ອາຈານ ແລະນ້ອງໆນັກຮຽນ ເຂົ້າຮ່ວມ.

ໃນໂອກາດນີ້, ທ່ານ ຄຳຫອງ ສີບຸນເຮືອງ ກໍໄດ້ມີຄຳເຫັນຕໍ່ທີ່ປະຊຸມ ໂດຍທ່ານໄດ້ເນັ້ນວ່າກິດຈະກຳດັ່ງກ່າວເປັນກິດຈະທີ່ຈັດຕັ້ງ-ປະຕິບັດໂດຍນ້ອງນັກຮຽນທີ່ເປັນສະມາຊິກຊາວໜຸ່ມ ເພື່ອສ້າງຈິດສຳນຶກໃນການອະນຸລັກຮັກສາ ແລະປົກປັກສາສິ່ງແວດລ້ອມ ໂດຍສະເພາະແມ່ນການແປຮູບ, ປະຍຸກ ຫຼື ນຳເອົາສິ່ງເສດເຫຼືອກັບຄືນມານຳໃຊ້ໃໝ່ເພື່ອຫຼຸດຜ່ອນປະລິນມານຂີ້ເຫຍື້ອ. ພ້ອມນັ້ນ, ຍັງເປັນການສ້າງພຶດຕິກຳທີ່ດີໃຫ້ກັບໄວໜຸ່ມໃນການແຍກຂີ້ເຫຍື້ອ ແລະຄຳນືງເຖິງສິ່ງແວດລ້ອມທຸກຄັ້ງໃນການໃຊ້ຊີິວິດປະຈຳວັນ.

ໃນພິທີ, ນາງ ມະນີລິນ ໄຊທອງປານ ຫົວຫນ້າໂຄງການຊາວໜຸ່ມຮັກສາສິ່ງແວດລ້ອມ ຂອງໂຮງຮຽນພອນສະຫວັນແຫ່ງຊາດ ປະຈຳສົກຮຽນ 2025-2026 ກໍໄດ້ກ່າວປະຫວັດຄວມເປັນມາຂອງໂຄງການ ເຊິ່ງໄດ້ກ່າວວ່າ: ໂຄງການດັ່ງກ່າວໄດ້ ສ້າງຕັ້ງຂື້ນໃນປີ 2015 ໂດຍ ທ້າວ ແສງຕາວັນ ວິລະສາວົງ ເຊິ່ງເປັນນັກຮຽນຮຸ່ນທີ VII ຂອງໂຮງຮຽນພອນສະຫວັນໃນໄລຍະນັ້ນແມ່ນມີ ອາຈານ ແກ້ວສິລິພອນ ຈັນທະລາ ທີ່ດຳລົງຕຳແໜ່ງເປັນເລຂາຄະນະບໍລິຫານຊາວໜຸ່ມຂອງ ຮພຊ ໂດຍມີຈຸດປະສົງຫຼັກຂອງການແມ່ນເພື່ອປົກປັກຮັກສາສີ່ງແວດລ້ອມພາຍໃນໂຮງຮຽນພ້ອມທັງເຜີຍແຜ່ ແລະປູກຈິດສຳນຶກໃຫ້ກັບໄວໜຸ່ມ ກໍຄືການສ້າງໄວໜຸ່ມລຸ້ນໃໝ່ໃຫ້ມີຈິດສຳນຶກຮັກ ໃນການອະນຸລັກ ປົກປັກຮັກສາສິ່ງແວດລ້ອມ, ນັບແຕ່ມື້ສ້າງຕັ້ງຈົນຮອດປັດຈຸບັນໂຄງການແມ່ນຈະປະກອບມີ 4 ໜ່ວຍງານຄື: ໜ່ວຍງານເກັບກໍາຂໍ້ມູນ, ໜ່ວຍງານສາງ ຫຼື ໜ່ວຍງານລີໄຊໂຄ, ໜ່ວຍງານປະຊາສຳພັນ ແລະ ໜ່ວຍງານກິດກຳ. ນອກຈາກການເຄື່ອນໄຫວພາຍໃນໂຮງຮຽນແລ້ວຍັງໄດ້ເຄື່ອນໄຫວນອກສະຖານທີ່ຄືໄດ້ເປັນສ່ວນໜື່ງໃນການຮັກສາຄວາມສະອາດໃນສັງຄົມເຊັ່ນ: ຂະບວນການເກັບຂີ້ເຫຍື້ອໃນງານນະມັດສະການພຣະທາດຫຼວງວຽງຈັນໃນປີ 2019-2020, ສິ່ງທີ່ພິເສດທີ່ສຸດແມ່ນສົກຮຽນ 2018-2019 ໂຮງຮຽນ ມສ ພອນສະຫວັນ ໄດ້ຈັດງານປະກວດລີໄຊໂຄຂື້ນເປັນຄັ້ງທຳອິດເຊິ່ງໄດ້ຮັບປະສົບຜົນສຳເລັດເປັນຢ່າງດີ ມາຮອດສົກຮຽນ 2025-2026 ນີ້ງານປະກວດຊຸດລີໄຊໂຄກໍ່ໄດ້ຈັດຂື້ນອີກຄັ້ງເຊີ່ງຖືວ່າເປັນຄັ້ງທີ່ II ແລະໄດ້ຮັບຄວາມສົນໃຈ ຈາກຊາວໜຸ່ມນັກຮຽນພາຍໃນໂຮງຮຽນເປັນຢ່າງດີ ເຊິ່ງຊຸດທີ່ນ້ອງນັກຮຽນໄດ້ອອກແບບມາປະກວດໃນຄັ້ງນີ້ລ້ວນແຕ່ປະດິດມາຈາກສິ່ງເສດເຫຼືອ ແລະສ້າງສັນຈາກຄວາມຄິດຂອງເຂົາເຈົ້າາທີ່ມີເອກະລັກສະເພາະຂອງແຕ່ຊຸດນັ້ນເອງ..

ໃນວັນທີ 18 ມີນາ 2026 ຜ່ານມາ, ບໍລິສັດ ລາວ ກຣີນດີວີລົບເມັ້ນ ໄດ້ມອບທຶນສະໜັບສະໜູນສ້ອມແປງຫ້ອງຮຽນປະລິນຍາໂທ ຈຳນວນ 2 ຫ້ອງໃຫ້ແກ່ຄະນະອັກສອນສາດ (ຄອສ) ມະຫາວິທະຍາໄລແຫ່ງຊາດ (ມຊ) ທີ່ເປ່ເພ່ໃຫ້ກັບມາມີສະພາບທີ່ດີຂຶ້ນ ແລະພ້ອມຮັບໃຊ້ການຮຽນ-ການສອນໃຫ້ມີຄຸນນະພາບຍ ໂດຍເປັນກຽດມອບຂອງທ່ານ ຄຳຫຼວງ ອິນທະວົງ ປະທານບໍລິສັດ ລາວ ກຣີນດີວີລົບເມັ້ນ ຈຳກັດຜູ້ດຽວ ແລະຮັບໂດຍທ່ານ ສຈ. ປອ. ເດຊານຸລາດ ແສນດວງເດດ ຜູ້ອຳນວຍການໃຫຍ່ ມຊ, ໃຫ້ກຽດເຂົ້າຮ່ວມເປັນສັກຂີພິຍານຂອງທ່ານ ຮສ. ປອ. ລິນຄຳ ດວງສະຫວັນ ລັດຖະມົນຕີກະຊວງກະສິກຳ ແລະສິ່ງແວດລ້ອມ ທັງເປັນປະທານສະພາມະຫາວິທະຍາໄລ ພ້ອມດ້ວຍຫົວໜ້າຄະນະວິຊາ ຄອສ, ຫົວໜ້າຫ້ອງການສັງລວມ ແລະພົວພັນຕ່າງປະເທດ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

ໂອກາດນີ້, ທ່ານ ຄຳຫຼວງ ອິນທະວົງ ກໍໄດ້ກ່າວສະແດງຄວາມຍີນດີ ແລະດີໃຈທີ່ໄດ້ປະກອບສ່ວນສະໜັບສະໜູນການສ້ອມແປງຫ້ອງຮຽນປະລິນຍາໂທ ໂດຍມີມູນຄ່າ 341.400.400 ກີບ (ສາມຮ້ອຍສີ່ສິບເອັດລ້ານສີ່ແສນສີ່ີຮ້ອຍກີບ) ໃຫ້ແກ່ຄະນະອັກສອນສາດ ມຊ ໃນຄັ້ງນີ້ ເຊິ່ງທ່ານໄດ້ເລັ່ງເຫັນຄວາມສຳຄັນຂອງວຽກງານການສຶກສາມາໂດຍຕະຫຼອດ ເພາະການສຶກສາເປັນເງື່ອນໄຂພື້ນຖານໃນການພັດທະນາຊັບພະຍາກອນມະນຸດ ກໍຄືການພັດທະນາປະເທດຊາດໃຫ້ຈະເລີນກ້າວໜ້າ ແລະທ່ານກໍພ້ອມທີ່ຈະໃຫ້ການສະໜັບສະໜູນການສຶກສາອີກໃນຄັ້ງໃນອະນາຄົດ.

ໂອກາດດຽວກັນ, ທ່ານ ສຈ. ປອ. ເດຊານຸລາດ ແສນດວງເດດ ກໍໄດ້ກ່າວສະແດງຄວາມຂອບໃຈຢ່າງສູງມາຍັງຜູ້ທີ່ໃນການສະໜັບສະໜູນໃນຄັ້ງນີ້ ຖືເປັນການຊ່ວຍເຫຼືອທີ່ສຳຄັນ ແລະມີຄຸນຄ່າມະຫາສານໃຫ້ແກ່ ມຊ ເວົ້າລວມ ເວົ້າສະເພາະກໍຄືໄດ້ອຳນວຍຄວາມສະດວກໃນດ້ານພື້ນຖານໂຄງລ່າງທີ່ເປັນປັດໄຈສຳຄັນຂອງການພັດທະນາການສຶກສາ ການຈັດຕັ້ງການຮຽນ-ການສອນຂອງພາກວິຊາພາສາອັງກິດ ຄະນະອັກສອນສາດນັ້ນເອງ.

ກຸ່ມບໍລິສັດມາລີນີ ມອບເງິນອຸປະຖຳຈຳນວນ 10.000.000 ກີບ ໃຫ້ກັບສະຫະພັນກີລາ ມະຫາວິທະຍາໄລລາວ ໃນການນຳພານັກກີລາ ແລະຄະນະເຂົ້າຮ່ວມແຂ່ງຂັນໃນງານ ກິລາບານເຕະນັກສຶກສາມະຫາວິທະຍາໄລ ທີ່ຈະຈັດຂຶ້ນທີ ມະຫາວິທະຍາໄລຫຍ່າຈາງ ສສ ຫວຽດນາມ ໃນຊ່ວງວັນທີ 25 ເດືອນມີນາ - 6 ເມສາ 2026 ທີ່ຈະມາເຖິງນີ້, ເຊິ່ງມອບໂດຍ ທ່ານ ປອ. ສົມປະສົງ ພົມມະເສນຜູ້ບໍລິຫານຂອງ ບໍລິສັດມາລີນີ ແລະຮັບໂດຍ ທ່ານ ຮສ. ປອ. ອຸດົມ ພອນຄຳເພັງ ເປັນປະທານຄະນະບໍລິຫານງານສະຫະພັນກິລາມະຫາວິທະຍາໄລລາວ, ທ່ານ ຮສ. ປອ. ສິນທະວອນ ດາລາວົງ ຮອງປະທານ, ເລຂາທິການສະຫະພັນກິລາມະຫາວິທາຍາໄລລາວ ພ້ອມດ້ວຍຄະນະ ທີ່ສະໂມສອນໃຫຍ່ ມຊ.

ໃນວັນທີ 18 ມີນາ 2026 ຜ່ານມາ, ຄະນະອັກສອນສາດ (ຄອສ) ມະຫາວິທະຍາໄລແຫ່ງຊາດ (ມຊ) ໄດ້ຈັດກອງປະຊຸມເຊື່ອມຊືມ ແລະ ຜັນຂະຫຍາຍມະຕິກອງປະຊຸມໃຫຍ່ຂອງອົງຄະນະພັກ ກະຊວງສຶກສາທິການ ແລະ ກີລາສະໄໝທີ X ແລະ ມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກ ທີ່ຫ້ອງປະຊຸມສະໂມສອນໃຫຍ່ ມຊ, ໂດຍການເປັນປະທານຂອງສະຫາຍ ປອ. ນາງ ທອງມາລາ ໂພສີຄຳ ເລຂາຄະນະພັກຮາກຖານ, ຫົວໜ້າຄະນະວິຊາ ຄອສ, ມີຄະນະບໍລິຫານງານພັກຮາກຖານ, ມີບັນດາສະມາຊິກພັກພະນັກງານ, ຄູ-ອາຈານ ແລະ ສະມາຊິກພັກນັກສຶກສາເຂົ້າຮ່ວມ.

ໃນພິທີ, ສະຫາຍ ປອ. ນາງ ທອງມາລາ ໂພສີຄຳ ໄດ້ນຳສະເໜີ ແລະ ຜັນຂະຫຍາຍມະຕິກອງປະຊຸມໃຫຍ່ຂອງອົງຄະນະພັກກະຊວງສຶກສາທິການ ແລະ ກີລາສະໄໝທີ X; ມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກ ເຊິ່ງສະຫາຍໄດ້ໃຫ້ຮູ້ກ່ຽວກັບໂຄງຮ່າງການຈັດຕັ້ງຂອງຄະນະບໍລິຫານສູນກາງພັກ; ພ້ອມທັງເຜີຍແຜ່ມະຕິກອງປະຊຸມໃຫຍ່ຜູ້ແທນຄັ້ງທີ VI ຂອງອົງຄະນະພັກ ມຊ ໂດຍກອງປະຊຸມໄດ້ເປັນເອກະພາບ ຮັບຮອງເອົາທິດທາງແຜນການ 5 ປີ ນັບແຕ່ປີ 2025 ຮອດ ປີ 2030 ແລະ ໄດ້ກໍານົດ 9 ວຽກງານຈຸດສຸມ, ເພື່ອໃຫ້ບັນລຸຈຸດໝາຍລວມ ແລະ ວິໄສທັດ ຂອງ ມຊ ໃນການພັດທະນາຄຸນະພາບການສຶກສາ, ກອງປະຊຸມໄດ້ກຳນົດ 7 ເປົ້າໝາຍສູ້ຊົນດັ່ງນີ້: 1. ສ້າງ ມຊ ແລະ ພັດທະນາບຸກຄະລາກອນ; 2. ພັດທະນາ ມຊ ໃຫ້ເປັນສູນກາງການສຶກສາທີ່ມີຄຸນະພາບ; 3. ພັດທະນາ ມຊ ໃຫ້ເປັນສູນກາງການຄົ້ນຄວ້າວິທະຍາສາດ ແລະ ການບໍລິການວິຊາການ; 4. ສ້າງ ແລະ ພັດທະນາກົນໄກບໍລິຫານ ແລະຄຸ້ມຄອງບໍລິຫານທີ່ດີ ແລະ ທັນສະໄໝ; 5. ປັບປຸງ, ຂະຫຍາຍ ແລະ ພັດທະນາພື້ນຖານໂຄງລ່າງສູ່ຄວາມເປັນສາກົນ; 6. ສ້າງຄວາມເຂັ້ມແຂງທາງດ້ານການເງິນ; 7. ສ້າງຄວາມເຂັ້ມແຂງທາງດ້ານວຽກງານພົວພັນຕ່າງປະເທດ ເພື່ອຫັນໄປສູ່ຄວາມເປັນສາກົນ.

ພ້ອມນັ້ນ, ສະຫາຍ ໂພໄຊ ເທບວິໄລວົງ ປະທານກວດກາພັກ-ຮອງຫົວໜ້າຄະນະວິຊາ ຄອສ ກໍໄດ້ຜ່ານແຜນພັດທະນາ 5 ປີ ຂອງ ຄອສ (ແຕ່ປີ 2026-2030) ເຊິ່ງສະຫາຍ ໄດ້ຍົກໃຫ້ເຫັນວິໄລທັດຂອງ ຄອສ ເປັນສູນກາງການສຶກສາ ແລະ ຄົ້ນຄວ້າວິທະຍາສາດດ້ານພາສາ, ວັດທະນະທຳ ແລະ ສື່ສານມວນຊົນ ທີ່ເຊື່ອມໂຍງເຕັກໂນໂລຊີ ທັນສະໄໝສູ່ມາດຕະຖານພາກພື້ນ ແລະ ສາກົນ, ໂດຍໄດ້ກຳນົດໄວ້ 7 ແຜນງານ ( ປະກອບມີ 29 ໂຄງການ, 54 ກິດຈະກຳຫຼັກ, 150 ກິດຈະກຳຍ່ອຍ) ທີ່ກໍານົດໄວ້ຢ່າງລະອຽດໃນການຈັດຕັ້ງປະຕິບັດ.

ນອກນັ້ນ, ໃນທີ່ປະຊຸມຍັງໄດ້ເປີດໂອກາດໃຫ້ຜູ້ເຂົ້າຮ່ວມໄດ້ປະກອບຄຳຄິດເຫັນ ແລະ ແລກປ່ຽນຄໍາຄິດເຫັນເຊິ່ງກັນ ແລະ ກັນອີກດ້ວຍ.