ໃນຕອນບ່າຍວັນທີ 12 ມິຖຸນາ 2024, ຄະນະພັກຮາກຖານ ສະຖາບັນຂົງຈື (ສຂຈ) ມະຫາວິທະຍາໄລແຫ່ງຊາດ(ມຊ) ໄດ້ຈັດກອງປະຊຸມໃຫຍ່ ຄະນະພັກຄັ້ງທີ III ທີ່ຫ້ອງປະຊຸມສະຖາບັນດັ່ງກ່າວ, ໂດຍການເປັນປະທານຂອງ ສະຫາຍ ຮສ. ປອ. ສິນທະວອນ ດາລາວົງ ຄະນະບໍລິຫານງານພັກ, ຮອງອະທິການບໍດີ ມຊ,  ສະຫາຍ ຄຳເຟືອງ ລໍວັນໄຊ ຄະນະບໍລິຫານງານພັກ ມຊ, ຫົວໜ້າຫ້ອງການຈັດຕັ້ງ ແລະຄຸ້ມຄອງພະນັກງານ,  ສະຫາຍ ຄຳຮຸ່ງ ຈັນທະວົງ ເລຂາຄະນະພັກຮາກຖານ ສຂຈ, ມີບັນດາແຂກຖືກເຊີນ, ພະນັກງານ, ຄູ-ອາຈານ ສະມາຊິກພັກເຂົ້າຮ່ວມ.

ໃນທີ່ປະຊຸມ ສະຫາຍ ຄຳຮຸ່ງ ຈັນທະວົງ ໄດ້ຂຶ້ນຜ່ານບົດລາຍງານການເມືອງ ໂດຍສະຫາຍໄດ້ຍົກໃຫ້ເຫັນບາງຜົນງານພົ້ນເດັ່ນຂອງຄະນະບໍລິຫານງານພັັກ ສຂຈ ທີ່ສາມາດນຳພາສະຖາບັນ ເຮັດສຳເລັດໃນຫຼາຍໜ້າວຽກສຳຄັນເຊິ່ງສະແດງໃຫ້ເຫັນຈາກບັນດາຜົນສຳເລັດຕ່າງໆເຊັ່ນ: ການສ້າງຫຼັກສູດການຮຽນ-ການສອນ ລະດັບປະລິນຍາຕີ ຄູພາສາຈີນລະບົບ 2+2, ການເຄື່ອນໄຫວກິດຈະກຳແລກປ່ຽນດ້ານວັດທະນະທຳ, ກິດຈະກຳຕ່າງໆ ລວມເຖິງການຍາດແຍ່ງໄດ້ທຶນການຊ່ວຍເຫຼືອຕ່າງໆຈາກ ສປ ຈີນ ເປັນຕົ້ນ. ສຳລັບແຜນງານໃນອະນາຄົດ ສຂຈ ຈະສືບຕໍ່ສ້າງຄວາມເຂັ້ມແຂງທາງດ້ານພື້ນຖານໂຄງລ່າງ ແລະສືບຕໍ່ພັດທະນາຫຼັກສູດການຮຽນ-ການສອນ ເລັ່ງໃສ່ການພັດທະນາຫຼັກສູດໃນລະດັບປະລິນຍາໂທ ແລະໜ້າທີ່ຕ່າງໆໃຫ້ສຳເລັດຜົນ.

ຈາກນນັ້ນ ໃນທີ່ປະຊຸມໄດ້ມີການປ່ອນບັດຄັດເລືອກເອົາຄະນະພັກຮາກຖານຊຸດໃໝ່ໂດຍເລືອກເອົາ 3 ສະຫາຍຈາກຜູ້ສະໝັກ 6 ສະຫາຍ; ຜົນການປ່ອນບັດຄັດເລືອກ ແລະກອງປະຊຸມປະຖົມມະລຶກ ທີ່ປະຊຸມໄດ້ເລືອກເອົາ ສະຫາຍ ຄຳຮຸ່ງ ຈັນທະວົງ ເປັນເລຂາຄະນະພັກຮາກຖານ, ສະຫາຍ ນາງ ນິພາພອນ ກັນຍາວົງ ເປັນຮອງເລຂາ, ສະຫາຍ ນາງ ວຽງຄຳ ໄຊມະນີ ເປັນປະທານກວດກາ ແລະໄດ້ເລືອກເພີ່ມເອົາ ສະຫາຍ ນາງ ມະນີສຸກ ຈຽມສີສຸລາດ ເປັນຜູ້ຊ່ວຍປະທານກວດກາ.

ໃນຕອນທ້າຍກອງປະຊຸມ ຍັງໄດ້ຮັບຟັງການໂອ້ລົມຈາກ ສະຫາຍ ຮສ. ປອ. ສິນທະວອນ ດາລາວົງ ເຊິ່ງກ່ອນອື່ນ ສະຫາຍໄດ້ກ່າວສະແດງຄວາມຍ້ອງຍໍຊົມເຊີຍຕໍ່ການຊີ້ນຳໆພາ ຂອງຄະນະພັກ ຄະນະອໍານວຍການ ສຂຈ ທີ່ໄດ້ພ້ອມກັນຈັດຕັ້ງປະຕິບັດໜ້າທີ່ຂອງຕົນເອງດ້ວຍຕວາມຮັບຜິດຊອບ ແລະມີປະສິດທິຜົນ, ພ້ອມນັ້ນຍັງເຫັນວ່າ ສະມາຊິກພັກທຸກສະຫາຍແມ່ນມີແນວຄິດການເມືອງທີ່ໜັກແໜ້ນ ແລະສືບຕໍ່ຜັນຂະຫຍາຍການຮ່ວມມືກັບສາກົນໂດຍສະເພາະ ກັບ ສປ ຈີນ ໃຫ້ມີການຂະຫຍາຍຕົວຍິ່ງຂຶ້ນ.

ພາບບັນຍາກາດ

ເພື່ອເປັນການສ້າງຂະບວນການປູກຈິດສຳນຶກການປົກປັກຮັກສາສິ່ງແວດລ້ອມ ເພື່ອໃຫ້ທຸກຄົນໃນສັງຄົມ ກໍ່ຄື ພະນັກງານ-ນັກສຶກສາ ໃນທົ່ວ ມະຫາວິທະຍາໄລແຫ່ງຊາດ ໄດ້ຮັບຮູ້ ເຖິງຄວາມໝາຍ ຄວາມສຳຄັນຂອງວັນດັ່ງກ່າວ. ເພື່ອຮ່ວມແຮງຮ່ວມໃຈກັນ ຖະນຸຖະໜອມໂລກຂອງພວກເຮົາ ດ້ວຍການຄຸ້ມຄອງ ແລະ ການນຳໃຊ້ຊັບພະຍາກອນທໍາມະຊາດ ໃຫ້ມີຄວາມຍືນຍົງ ແລະ ປົກປັກຮັກສາສິ່ງແວດລ້ອມ ບໍ່ໃຫ້ຖືກທຳລາຍ ເພື່ອຮັກສາລະບົບນິເວດ, ສຸຂະພາບທີ່ດີຂອງຄົນ ແລະ ສິ່ງທີມີຊີວິດອື່ນໆ ໃນວັນທີ 5 ມິຖຸນາ 2024 ຜ່ານມາ, ຄະນະວິທະຍາສາດສິ່ງແວດລ້ອມ (ຄສວ) ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີສະເຫຼີງສະຫຼອງວັນສິ່ງແວດລ້ອມໂລດພາຍໃຕ້ຫົວຂໍ້: “Land restoration, desertification, and drought resilience” “ການຟຶ້ນຟູດິນ ທີ່ກາຍເປັນທະເລຊາຍ ແລະການຕ້ານໄພແຫ້ງແລ້ງ” ທີ່ຄະນະ ໂດຍການເຂົ້າຮ່ວມຂອງທ່ານ ສຈ. ປອ. ພູເພັດ ກ້ຽວພິລາວົງ ຮອງອະທິການບໍດີ ມຊ, ທ່ານ ນິນ ລີໂອນາດ ອຸປະທູດ ສະຫະພາບ ເອີຣົບ ປະຈຳລາວ ພ້ອມດ້ວຍທ່ານ ຄະນະບໍດີ ຄສວ, ພະນັກງານ, ຄູ-ອາຈານ ແລະນັກສຶກສາເຂົ້າຮ່ວມ.

ໃນໂອກາດນີ້, ທ່ານ ຮສ. ປອ. ໄກສອນ ເພັງໂສພາ ຄະນະບໍດີ ຄສວ ກໍໄດ້ຂຶ້ນອ່ານສານ ຂອງທ່ານນາຍົກລັດຖະມົນຕີ ແຫ່ງ ສປປ ລາວ ເນື່ອງໃນວັນສິ່ງແວດລ້ອມແຫ່ງຊາດ ທີ 5 ມິຖຸນາ ເຊິ່ງມີເນື້ອໃນບາງຕອນກ່າວວ່າ: ປັດຈຸບັນນີ້ ພື້ນທີ່ດິນຂອງໂລກຫຼາຍກວ່າ 40 ສ່ວນຮ້ອຍ ແມ່ນຖືກເສື່ອມໂຊມ, ໃນຂະນະດຽວກັນ ປະຊາກອນຈຳນວນ 3,2 ຕື້ຄົນ ໃນທົ່ວໂລກ ໄດ້ຮັບຜົນກະທົບຈາກການກາຍເປັນທະເລຊາຍ ແລະ ຄາດວ່າ ຫຼາຍກວ່າ 3 ສ່ວນ 4 ຂອງປະຊາກອນໂລກ ຈະໄດ້ຮັບຜົນກະທົບຈາກໄພແຫ້ງແລ້ງ ໃນປີ 2050. ເພື່ອແກ້ໄຂບັນຫາດັ່ງກ່າວນັ້ນ, ໃນກອງປະຊຸມລັດພາຄີ ຄັ້ງທີ 15 ຂອງສົນທິສັນຍາ ສະຫະປະຊາຊາດ ວ່າດ້ວຍການຕ້ານການກາຍເປັນທະເລຊາຍ, ບັນດາປະເທດພາຄີ ໄດ້ໃຫ້ຄຳໝັ້ນສັນຍາວ່າ ຈະຕ້ອງແກ້ໄຂບັນຫາການເສື່ອມໂຊມຂອງດິນ ໃຫ້ໄດ້ 1 ພັນລ້ານ ເຮັກຕາ ພາຍໃນປີ 2030. ສໍາລັບ ສປປ ລາວ ພວກເຮົາ ກໍ່ຈໍາເປັນຕ້ອງໄດ້ມີການຟື້ນຟູດິນ ແລະ ລະບົບນິເວດໃຫ້ມີຄວາມສົມ ບູນ ແລະ ທົນທານ ເພື່ອສາມາດຮັບມືກັບບັນຫາການປ່ຽນແປງດິນຟ້າອາກາດ ແລະ ຊ່ວຍປົກປັກຮັກສາສິ່ງທີ່ມີຊີວິດເທິງໜ້າໂລກນີ້ ບໍ່ໃຫ້ສູນພັນໃນອະນາຄົດ.

ຜ່ານມາ, ລັດຖະບານ ກໍ່ໄດ້ຮ່ວມກັບປະຊາຄົມໂລກ ເພື່ອແກ້ໄຂບັນຫາດັ່ງກ່າວ ໂດຍເລີ່ມຈາກການເຂົ້າເປັນພາຄີ ຂອງຫຼາຍສົນທິສັນຍາທີ່ກ່ຽວຂ້ອງ, ຈາກນັ້ນ ກໍ່ໄດ້ວາງນະໂຍບາຍ, ຍຸດທະສາດ ແລະ ນິຕິກຳອື່ນໆ ຫຼາຍສະບັບ ໂດຍສະເພາະ: ໄດ້ອອກຄໍາສັ່ງ ເລກທີ 11/ນຍ, ລົງວັນທີ 21 ກໍລະກົດ 2023 ວ່າດ້ວຍການເພີ່ມທະວີຄວາມເຂັ້ມງວດ ໃນການຄຸ້ມຄອງ, ປົກປັກຮັກສາ, ພັດທະນາ ແລະ ນໍາໃຊ້ປ່າໄມ້, ທີ່ດິນປ່າໄມ້, ຕ້ານ ແລະ ສະກັດກັ້ນ ການບຸກລຸກທໍາລາຍປ່າໄມ້, ທີ່ດິນປ່າໄມ້ ແລະ ໄຟໄໝ້ລາມປ່າ ແນໃສ່ເພື່ອສະກັດກັ້ນ ແລະ ແກ້ໄຂ ປະກົດການຫຍໍ້ທໍ້ ໃນການຈັບຈອງ, ຊື້-ຂາຍ ທີ່ດິນປ່າໄມ້, ການຖາງປ່າ, ການຈຸດປ່າ ທີ່ແຜ່ລາມເປັນບໍລິເວນກວ້າງ ແລະ ມີທ່າອ່ຽງເພີ່ມຂຶ້ນໃນແຕ່ລະປີ ໃຫ້ຫຼຸດໜ້ອຍຖອຍລົງ ແລະ ກ້າວໄປເຖິງການຢຸດຕິ ຢ່າງສິ້ນເຊີງ. ເຊິ່ງທັງໝົດນີ້ ກໍ່ເພື່ອເເນໃສ່ການຄຸ້ມຄອງ, ປົກປັກຮັກສາ ແລະ ນຳໃຊ້ທີ່ດິນ, ປ່າໄມ້ ແລະ ຊັບພະຍາກອນທໍາມະຊາດອື່ນໆ ໃຫ້ເກີດຜົນປະໂຫຍດສູງສຸດ ແກ່ປະເທດຊາດ, ຮັບປະກັນຄວາມສົມສ່ວນ ລະຫວ່າງ ການພັດທະນາເສດຖະກິດ ກັບການພັດທະນາສັງຄົມ ແລະ ການປົກປັກຮັກສາສິ່ງແວດລ້ອມ ໄປຕາມທິດສີຂຽວ ແລະ ຍືນຍົງ.

ນອກນັ້ນ, ພາຍໃນງານຍັງມີກິດຈະກຳເກັບຂີ້ເຫຍື້ອໃນເຂດທາງສະພັງເມິກ-ໜອງວຽງຄຳ-ດົງໂດກ ອ້ອມຂ້າງຄະນະ ແລະປູກຕົ້ນໄມ້ ພ້ອມທັງຮັບຟັງການບັນຍາຍໃນຫົວຂໍ້ທີ່ສຳຄັນຕ່າງໆກ່ຽວກັບສິ່ງແວດລ້ອມ ອີກດ້ວຍ.

ພາບບັນຍາກາດ

ໃນຕອນເຊົ້າ ວັນທີ 5 ມິຖຸນາ 2024 ຜ່ານມາ, ມະຫາວິທະຍາໄລແຫ່ງຊາດ(ມຊ) ແລະ ມະຫາວິທະຍາໄລ ຕົນດຶກຖັງ ສສ. ຫວຽດນາມ ໄດ້ລົງນາມຮ່ວມມືທາງດ້ານວິຊາການ ທີ່ຫ້ອງປະຊຸມ ຕຶກສໍານັກງານອະທິການບໍດີ ມຊ; ຝ່າຍ ມຊ ລົງນາມໂດຍທ່ານ ຮສ. ປອ. ເດຊານຸລາດ ແສນດວງເດດ ວ່າການແທນອະທິການບໍດີ ມຊ ແລະຝ່າຍມະຫາວິທະຍາໄລຕົນດຶກຖັງ ສສ. ຫວຽດນາມ  ລົງນາມໂດຍ ທ່ານ Tran Trang Dao ອະທິການບໍດີ, ເຂົ້າຮ່ວມມີທ່ານ ປອ. ວູແອງດຶກ ປະທານສະພາ ມະຫາວິທະຍາໄລຕົນດຶກຖັງ ສສ. ຫວຽດນາມ,  ພ້ອມດ້ວຍແຂກຖືກເຊີນ, ພະນັກງານ, ຄູ-ອາຈານ ທີ່ກ່ຽວຂ້ອງເຂົ້າຮ່ວມ.

          ມະຫາວິທະຍາໄລ ຕົນດຶກຖັງ ສສ. ຫວຽດນາມ ເປັນສະຖາບັນຊັ້ນສູງຂອງລັດ, ສ້າງຕັ້ງໃນປີ 1997, ກຸ້ມຕົນເອງໃນການບໍລິຫານຈັດການພາຍໃຕ້ການຄຸ້ມຄອງຂອງ ສະຫະພັນແຮງງານນະຄອນໂຣຈີມິນ ສສ. ຫວຽດນາມ. ຈັດຢູ່ໃນອັບດັບທີ 193 ຈາກ 1.127 ມະຫາວິທະຍາໄລໃນອາຊີ ທີ່ນໍາໜ້າດ້ານການຄົ້ນຄວ້າວິໄຈ ແລະຮ່ວມມືກັບພາກອຸດສາຫະກໍາ(Time Higher Education Asia Ranking), ມີຫຼັກສູດການຮຽນ-ການສອນທັງໝົດ 40 ຫຼັກສູດໃນລະດັບປະລິນຍາຕີ, 6 ຫຼັກສູດລະດັບປະລິນຍາໂທ ແລະ ເອກ ໃນ 16 ຄະນະວິຊາເຊັ່ນ ເຕັກໂນໂລຊີຂໍ້ມູນຂ່າວສານ, ບໍລິຫານທຸລະກິດ, ວິສະວະກຳສາດ ແລະກົດໝາຍ. ມະຫາວິທະຍາໄລ ຕົນດຶກຖັງ ເນັ້ນໜັກ ການສ້າງບຸກຄະລາກອນຮັບໃຊ້ການພັດທະນາໃນນະຄອນໂຮຈີມິນ ແລະການຄົ້ນຄວ້ານໍາໃຊ້ applied research. ມະຫາວິທະຍາໄລດັ່ງກ່າວມີນັກສຶກສາທັງໝົດ ຈໍານວນ 25.000 ຄົນ ແລະມີພະນັກງານ, ຄູອາຈານ ຫຼາຍກວ່າ 800 ທ່ານ.

          ທັງສອງ​ຝ່າຍ​ໄດ້​ເຫັນ​ດີ​ເປັນ​ເອກະ​ພາບ​ໃນ​ການ​ຮ່ວມ​ມື​້ດ້ານການແລກປ່ຽນນັກສຶກສາກັບຄະນະນິຕິສາດ ແລະລັດຖະສາດ ແລະການແລກປ່ຽນນັກສຶກສາ ແລະອາຈານໃນສາຂາວິຊາທີ່ກ່ຽວຂ້ອງກັບກົດໝາຍ.

ພາບບັນຍາກາດ

ໃນຕອນເຊົ້າວັນທີ 3 ມິຖຸນາ 2024 ນີ້, ສູນເຕັກໂນໂລຊີຂໍ້ມູນຂ່າວສານ ມະຫາວິທະຍາໄລແຫ່ງຊາດ (ມຊ)ໄດ້ຈັດພິທີເຝິກອົບຮົມ ໃນຫົວຂໍ້ “The Internet Routing with Multihoming Workshop” ເພີ່ມຄວາມຮູ້ໃຫ້ແກ່ຜູ້ຮັບຜິດຊອບດ້ານເຕັກນິກເຄື່ອຂ່າຍຄອມພິວເຕີ ຂຶ້ນທີ່ຫ້ອງເຝິກອົບຮົມ T-Building ຂອງສູນເຕັກໂນໂລຊີຂໍ້ມູນຂ່າວສານ ໂດຍການເປັນປະທານຂອງທ່ານ ສຈ.ປອ. ພູເພັດ ກ້ຽວພິລາວົງ ຮອງອະທິການບໍດີ ມຊ ທັງເປັນຜູ້ຊີ້ນໍາວຽກງານວິຊາການ, ມີທ່ານ ຊາຈິດ ອິມເທຍ(Said IMTIAZ)ວິທະຍາກອນຈາກສູນຂໍ້ມູນເຄື່ອຂ່າຍອາຊີ-ປາຊີຟິກ(APNIC) ພ້ອມດ້ວຍນັກສໍາມະນາກອນທີ່ມາຈາກ ມຊ 13 ຄະນະ, ບໍລິສັດໂທລະຄົມມະນາຄົມ, ທະນາຄານທຸລະກິດ ແລະສູນອິນເຕີເນັດແຫ່ງຊາດ ຈໍານວນ 40 ທ່ານເຂົ້າຮ່ວມ.

                ໃນພິທີທ່ານ ສຈ.ປອ ພູເພັດ ກ້ຽວພິລາວົງ ກ່າວເປີດພິທີບາງຕອນວ່າ: ກອງປະຊຸມຝຶກອົບຮົມໃນຄັ້ງນີ້ ແມ່ນໄດ້ຮັບການສະໜັບສະໜູນຈາກສະຫະພາບເອີຣົບ, Asia@Connect ແລະ APNIC. ນອກນັ້ນຍັງໄດ້ຮັບການສະໜັບສະໜູນຈາກບັນດາທະນາຄານ ແລະບໍລິສັດໃຫ້ບໍລິການອິນເຕີເນັດ ໃນ ສປປ ລາວ. ຊຶ່ງການຝຶກອົບຮົມດັ່ງກ່າວ ແມ່ນເພື່ອແນໃສ່ສ້າງຄວາມອາດສາມາດໃຫ້ກັບພະນັກວິຊາການທາງດ້ານເຕັກນິກເຄືອຂ່າຍຄອມພິວເຕີທີ່ມີໜ້າທີ່ຮັບຜິດຊອບໃນ ການອອກແບບ, ສ້າງລະບົບເຄືອຂ່າຍພາຍໃນອົງກອນ ພ້ອມທັງສ້າງການເຊື່ອມຕໍ່ກັບອົງກອນອື່ນໆ ທັງພາຍໃນ ແລະຕ່າງປະເທດ. ໂດຍຮູບແບບການຝຶກອົບຮົມ ແມ່ນຈະມີການບັນຍາຍ ແລະຝຶກພາກປະຕິບັດຕົວຈິງ ພາຍໃຕ້ແນວຄວາມຄິດໃນການອອກແບບ Internet routing ແລະການຝຶກປະຕິບັດໃນຮູບແບບອຸດສາຫະກໍາຕົວຈິງ ໂດຍເນັ້ນໃສ່ multihoming BGP ສໍາລັບເຄືອຂ່າຍ Internet Exchange Point (IXP).

          ທ່ານປະທານກອງປະຊຸມກ່າວອີກວ່າ: ຂ້າພະເຈົ້າເຊື່ອໝັ້ນວ່າ ພາຍຫຼັງສຳເລັດການຝຶກອົບຮົມໃນຄັ້ງນີ້ແລ້ວ ພວກເຮົາຈະສາມາດສ້າງລະບົບອິນເຕີເນັດ ທີ່ເຂັ້ມແຂງ ແລະຍືດຢຸ່ນ ສໍາລັບທຸກຄົນໄດ້. ສະນັ້ນ, ໃນນາມຜູ້ຊີ້ນໍາ ຈຶ່ງຫວັງວ່າ ຜູ້ເຂົ້າຮ່ວມຝຶກອົບຮົມທຸກທ່ານຈະຕັ້ງໜ້າ ເຂົ້າຮ່ວມການຝຶກອົບຮົມໃນຄັ້ງນີ້ ເພື່ອຄວາມຮູ້ ປະສົບການ ແລະ ສາມາດໝູນໃຊ້ຕົວຈິງໄດ້ພາຍໃນອົງກອນຢ່າງປາກົດຜົນເປັນຈິງ. ການຝຶກອົບຮົມ ຫົວຂໍ້ “The Internet Routing with Multihoming Workshop” ໃນຄັ້ງນີ້ ຈະດໍາເນີນເປັນເວລາ 5 ວັນ(ວັນທີ 3-7 ມິຖຸນາ 2024) ຈຶ່ງຈະສຳເລັດ.

ພາບບັນຍາກາດ