ພິທີສະເຫຼີມສະຫຼອງວັນສ້າງຕັ້ງສະຖາບັນການສຶກສາກະເສດນາບົງ-ຄະນະກະເສດສາດ ຄົບຮອບ 50 ປີ ໄດ້ຈັດຂຶ້ນໃນລະຫວ່າງ ວັນທີ 9-11 ທັນວາ 2025 ທີ່ຄະນະກະເສດສາດ (ຄກສ) ມະຫາວິທະຍາໄລແຫ່ງຊາດ (ມຊ), ເຊິ່ງໄດ້ມີພິທີເປີດໃນວັນທີ 9 ທັນວາ 2025 ໂດຍການເຂົ້າຮ່ວມຂອງທ່ານ ສຈ. ປອ. ເດຊານຸລາດ ແສນດວງເດດ ຜູ້ອຳນວຍການໃຫຍ່ ມຊ, ມີທ່ານ ຮສ. ປອ. ວັນນະພອນ ພຸດທະນາ ຫົວໜ້າຄະນະວິຊາ ຄກສ, ມີທ່ານຮອງຫົວໜ້າຄະນະວິຊາ, ມີຫົວໜ້າ ແລະຮອງພາກວິຊາ, ແຂກຖຶືກເຊີນທັງພາຍໃນ ແລະຕ່າງປະເທດ, ອະດີດພະນັກງານ, ຄູ-ອາຈານ ແລະນັກສຶກສາຄະນະດັ່ງກ່າວເຂົ້າຮ່ວມ.

ໃນພິທີ, ທ່ານ ຮສ. ປອ. ວັນນະພອນ ພຸດທະນາ ກໍໄດ້ຫວນຄືນປະຫວັດຄວາມເປັນມາແຕ່ອະດີດຮອດປັດຈຸບັນຂອງການສ້າງຕັ້ງ ສະຖາບັນການສຶກສາກະເສດນາບົງ-ຄະນະກະເສດສາດ ຄົບຮອບ 50 ປີ ເຊິ່ງທ່ານໄດ້ໃຫ້ຮູ້ວ່າ: ເມື່ອຫວນຄືນ 50 ປີກ່ອນໜ້ານີ້ ຄືວັນທີ 9 ທັນວາ 1975 ກະຊວງກະສິກໍາໄດ້ຕົກລົງຍົກຍ້າຍວິທະຍາໄລກະເສດວຽງຈັນ ເຊິ່ງຕັ້ງຢູ່ສະຖາບັນຄົ້ນຄວ້າກະສິກຳ-ປ່າໄມ້ ແລະພັດທະນາຊົນນະບົດ (ປັດຈຸບັນ) ມາຢູ່ທີ່ທົ່ງຮາບນາບົງ ແລະໃສ່ຊື່ວ່າ: ວິທະຍາໄລກະເສດສາດ ນາບົງ. ໃນນັ້ນມີນັກສຶກສາທີ່ສະໝັກເຂົ້າໄປຮຽນໃໝ່ປະມານ 300ຄົນ ທີ່ມາຈາກຫຼາຍພາກສ່ວນ ພ້ອມດ້ວຍນັກສຶກສາຮຸ່ນທີ 4 ແລະ 5 ຂອງວິທະຍາໄລກະເສດວຽງຈັນ, ປີ 1995 ລັດຖະບານໄດ້ຕົກລົງໃຫ້ກະຊວງສຶກສາເຕົ້າໂຮມເອົາບັນດາໂຮງຮຽນຊັ້ນສູງແຫ່ງຕ່າງໆມາໂຮມເຂົ້າກັນເພື່ອສ້າງເປັນມະຫາວິທະຍາໄລແຫ່ງຊາດ ແລະໂຮງຮຽນກະສິກໍາຊັ້ນສູງ ນາບົງ ພາຍໃຕ້ການຄຸ້ມຄອງຂອງກະຊວງກະສິກຳເປັນເວລາ 20 ປີ ກໍໄດ້ຖືກມອບໂອນໃຫ້ກະຊວງສຶກສາທິການພາຍໃຕ້ການຄຸ້ມຄອງຂອງມະຫາວິທະຍາໄລແຫ່ງຊາດ ແລະມີຊື່ວ່າ: ຄະນະກະເສດສາດ-ປ່າໄມ້ ເຊິ່ງພາລະກິດຂອງມະຫາວິທະຍາໄລແຫ່ງຊາດມີ 4 ໜ້າທີ່ຕົ້ນຕໍຄື: 1)ການຮຽນ-ການສອນ, 2) ການຄົ້ນຄວ້າວິທະຍາສາດ,3) ການບໍລິການວິຊາການ ແລະ4) ການສົ່ງເສີມວັດທະນະທໍາອັນດີງາມຂອງຊາດ ປີ 2.000 ຄະນະກະເສດສາດ-ປ່າໄມ້ ກໍໄດ້ແຍກອອກເປັນ 2 ຄະນະວິຊາຄື: ຄະນະກະເສດສາດ ແລະຄະນະວິທະຍາສາດປ່າໄມ້ ຕາມການຕົກລົງເຫັນດີຂອງລັດຖະມົນຕີວ່າການກະຊວງສຶກສາທິການ. ມາຮອດປີ 2025 ຄະນະກະເສດສາດໄດ້ສ້າງ ແລະເປີດຫຼັກສູດການຮຽນ-ການສອນທັງໝົດດັ່ງນີ້: ລະດັບຊັ້ນກາງມີ 5 ຫຼັກສູດຄື: ປູກຝັງ, ລ້ຽງສັດ ແລະສັດຕະວະແພດ, ປ່າໄມ້, ຊົນລະປະທານ ແລະກົນຈັກກະສິກໍາ; ລະດັບຊັ້ນສູງມີ 2 ຫຼັກສູດຄື: ປູກຝັງ ແລະລ້ຽງສັດ; ລະດັບປະລິນຍາຕີເຊື່ອມຕໍ່ມີ 2 ຫຼັກສູດຄື: ປູກຝັງ ແລະລ້ຽງສັດ; ລະດັບປະລິນຍາຕີຕໍ່ເນື່ອງມີ 2 ຫຼັກສູດຄື: ປູກຝັງ ແລະລ້ຽງສັດ; ລະດັບປະລິນຍາຕີມີ 6 ຫຼັກສູດຄື: ປູກຝັງ, ປ້ອງກັນພືດ, ລ້ຽງສັດ, ການປະມົງ, ສັດຕະວະແພດ ,ເສດຖະກິດກະສິກຳ ແລະເຕັກໂນໂລຊີອາຫານ; ລະດັບປະລິນຍາຕີຕໍ່ເນື່ອງມີ 2 ຫຼັກສູດຄື: ປູກຝັງ ແລະລ້ຽງສັດ; ລະດັບປະລິນຍາໂທມີ 6 ຫຼັກສູດຄື: ສາຂາການຄຸ້ມຄອງຊັບພະຍາກອນກະສິກຳແບບຍືນຍົງ, ວິທະຍາສາດການລ້ຽງສັດ 2 ຫຼັກສູດ, ວິທະຍາສາດການປູກຝັງ 2 ຫຼັກສູດ ແລະການພັດທະນາບໍລິເວນເຂື່ອນໄຟຟ້າພະລັງນໍ້າແບບຍືນຍົງ; ລະດັບປະລິນຍາເອກມີ 1 ຫຼັກສູດຄື: ສາຂາວິທະຍາສາດກະສິກໍາ ໄດ້ສ້າງບຸກຄະລາກອນອອກມາຮັບໃຊ້ສັງຄົມທັງໝົດ 10,065 ຄົນ, ຍິງ 3,239 ຄົນ .

ຄກສ ມີຜົນງານ ແລະການຄົ້ນຄວ້າທີ່ໂດດເດັ່ນ ໂດຍມີກນາສົມທົບກັບສະຖາບັນພາຍໃນປະເທດເຮັດການຄົ້ນຄວ້າໄດ້ຫຼາຍກວ່າ 60 ໂຄງການ ແລະໄດ້ເຮັດການຄົ້ນຄວ້າແລ້ວ 333 ຫົວຂໍ້, ຮ່ວມມືກັບສາກົນ ການເຮັດການຄົ້ນຄວ້າ 128 ຫົວຂໍ້, ຜ່ານການເຮັດວຽກງານຄົ້ນຄວ້າຢ່າງຕັ້ງໜ້າຈຶ່ງເຮັດໃຫ້ອາຈານຈໍານວນ 7 ທ່ານໄດ້ຮັບການຍ້ອງຍໍເປັນນັກຄົ້ນຄວ້າດີເດັ່ນລະດັບສາກົນ ແລະລະດັບມະຫາວິທະຍາໄລແຫ່ງຊາດໄດ້ແກ່: ທ່ານ ຮສ. ປອ. ອຸດົມ ພອນຄໍາເພັງ, ທ່ານ ຮສ. ປອ. ນາງ ສິລິນທອນ ສັກລໍຄໍາ, ທ່ານ ຮສ. ປອ. ວຽງສະກຸນ ນາປະເສີດ, ທ່ານ ຮສ. ປອ. ນາງ ມາລາວັນ ຈິດຕະວົງ, ທ່ານ ຮສ. ປອ. ນາງດາວວີ ກອງມະນີລາ, ທ່ານ ປອ. ນາງ ລໍາເພີຍ ແກ່ນສົມບັດ ແລະທ່ານ ປອ. ນາງ ພຸດທະສອນ ສີບຸນນະວົງ.

ໃນພິທີທ່ານ ສຈ. ປອ. ເດຊານຸລາດ ແສນດວງເດດ ກໍໄດ້ມີຄຳເຫັນຕໍ່ທີ່ປະຊຸມໂດຍທ່ານກ່າວວ່າ: ຕະຫຼອດໄລຍະທີ່ຜ່ານມາ ຄກສ ແມ່ນໄດ້ເອົາໃຈໃສ່ໃນການພັດທະນາບໍ່ວ່າເປັນວຽກງານການນຽນການສອນ, ການພັດທະນາຫຼັກສູດ ເພື່ອຕອບສະໜອງໄດ້ຄວາມຕ້ອງການຂອງຕະຫຼາດແຮງງານ, ມີຫຼາຍຜົນງານທີ່ພົ້ນເດັ່ນໂດຍສະເພາະກໍແມ່ນວຽກງານການຄົ້ນຄວ້າ ເຊິ່ງສະແດງໃຫ້ເຫັນໄດ້ໃນການຮ່ວມມືກັບສາກົນ ແລະມີອາຈານ ຫຼາຍທ່ານທີ່ນອກເໜືອຈາກການສິດສອນແລ້ວ ຍັງໄດ້ປະກອບສ່ວນດ້ານວິຊາການຊ່ວຍສັງຄົມ ໂດຍການເຂົ້າຮ່ວມເປັນວິທະຍາກອນໃນການຝຶກອົບຮົມໃນຫົວຂໍ້ຕ່າງໆ. ນອກນັ້ນ, ທ່ານຍັງໄດ້ເນັ້ນໃຫ້ພະນັກງານ, ຄູ-ອາຈານ ເອົາໃຈໃສ່-ສືບຕໍ່ສ້າງຄວາມເຂັ້ນແຂງໃນຫຼາຍດ້ານທີ່ສຳຄັນຄື: ວຽກງານການພັດທະນາດ້ານບຸດຄະລາກອນ, ເອົາໃຈໃສ່ຍົກສູງວຽກງານການຮຽນການສອນ ໃຫ້ທຽບເທົ່າພາກພື້ນຕາມແນວທາງຂອງສວິໄສທັດ ມຊ, ວຽກງານການຄົ້ນຄວ້າ ແລະ ບໍລິການວິຊາການ ສ້າງນັກຄົ້ນຄວ້າດີເດັ່ນໃຫ້ຫຼາຍຂຶ້ນ, ເອົາໃຈໃສ່ວຽກງານບໍລິຫານຄຸ້ມຄອງ, ພ້ອມທັງ ສືບຕໍ່ປັບປຸງພັດທະນາພື້ນຖານໂຄງລ່າງ ອາຄານຫ້ອງຮຽນ, ຫໍພັກນັກສຶກສາ ແລະສືບຕໍ່ຍາດແຍ່ງເອົາການຊ່ວຍເຫຼືອ, ການຮ່ວມມືຈາກຕ່າງປະເທດ ຂະຫຍາຍການພົວພັນກັບຕ່າງປະເທດໃຫ້ຫຼາຍຂຶ້ນເປັນຕົ້ນ.

ງານສະເຫຼີມສະຫຼອງດັ່ງກ່າວ ຈະໄດ້ຈັດຂຶ້ນເປັນໄລຍະເວລາ 3 ວັນ (ວັນທີ 9-11 ທັນວາ 2025) ເຊິ່ປະກອບມີກອງປະຊຸມວິຊາການໃນລະດັບສາກົນ, ງານພົບປະອະດີດນັກສຶກສາ, ການວາງສະແດງຜົນງານການຄົ້ນຄວ້າວິທະຍາສາດ, ການຈັດບູດນຳສະເໜີຜົນງານວິຊາການຂອງນັກສຶກສາ ແລະຫ້າງຮ້ານບໍລິສັດຕ່າງໆທີ່ເຂົ້າຮ່ວມ.

ພາບບັນຍາກາດ

ຄະນະວິທະຍາສາດສັງຄົມ (ຄສຄ) ມະຫາວິທະຍາໄລແຫ່ງຊາດ (ມຊ) ໄດ້ຈັດເວທີສຳມະນາລະດັບຊາດກ່ຽວກັບວຽກງານປົກປ້ອງສັງຄົມ ພາຍໃຕ້ຫົວຂໍ້ “ການຫັນເປັນດິຈິຕອນ, ເພື່ອກ້າວຜ່ານການປ່ຽນແປງ ແລະການບໍລິການຍຸກໃໝ່” ໃນຕອນບ່າຍວັນທີ 8 ພະຈິກ 2025 ທີ່ຫ້ອງປະຊຸມສະໂມສອນໃຫຍ່ ມຊ, ໂດຍການເຂົ້າຮ່ວມຂອງທ່ານ ຮສ. ປອ. ອຸ່ນຫຼ້າ ສີວັນເພັງ ຮອງຜູ້ອຳນວຍການໃຫຍ່ ມຊ, ທ່ານ ວິໄລພົງ ສີສົມຫວັງ ຫົວໜ້າກົມແຜນການ ແລະ ການຮ່ວມມືສາກົນ ຫົວໜ້າກອງເລຂາ ຄະນະກຳມະການປົກປ້ອງສັງຄົມ ຂັ້ນສູນກາງ, ຫົວໜ້າຄະນະວິຊາ-ຮອງຫົວໜ້າຄະນະວິຊາ ຄະນະວິທະຍາສາດສັງຄົມ, ຜູ້ອຳນວຍການຈາກອົງການ OXFAM, ອົງການແຮງງານສາກົນ (ILO) ແລະອົງການຈັດຕັ້ງສາກົນທີ່ກ່ຽວຂ້ອງ, ພະນັກງານ, ຄູ-ອາຈານ ແລະນັກສຶກສາ ເຂົ້າຮ່ວມ.

ໃນພິທີ, ທ່ານ ຮສ. ປອ. ອຸ່ນຫຼ້າ ສີວັນເພັງ ກໍໄດ້ມີຄຳເຫັນໃນທີ່ປະຊຸມໂດຍທ່ານໄດ້ກ່າວວ່າ: ໃນໄລຍະຜ່ານມາ ອົງການຈັດຕັ້ງສາກົນ ໂດຍສະເພາະ ອົງການແຮງງານສາກົນ (ILO) ແລະ ອົງການ OXFAM ໂດຍສົມທົບຮ່ວມມືກັບພາກລັດຖະບານ ໄດ້ປະກອບສ່ວນສຳຄັນໃນພັດທະນາ ນະໂຍບາຍປົກປ້ອງສັງຄົມ ແລະສ້າງກົນໄກ-ເຄື່ອງມືຕ່າງໆ ເພື່ອຊຸກຍູ້ ແລະພັດທະນາກົນໄກການເຂົ້າເຖິງສະຫວັດດີການສັງຄົມແບບທາງການ ແລະບໍ່ເປັນທາງການ ໂດຍສະເພາະການເຜີຍແຜ່, ການໃຫ້ຂໍ້ມູນກ່ຽວກັບວຽກງານປົກປ້ໍອງສັງຄົມ. ແນວໃດກໍຕາມໃນທາງປະຕິບັດແມ່ນມີຄວາມຈຳເປັນໃນການຈັດເວທີສຳມະນາແລກປ່ຽນທາງວິຊາການເພື່ອເປັນການທົບທວນ ການຈັດຕັ້ງປະຕິບັດການເຜີຍແຜ່ວຽກງານສະຫວັດດີການສັງຄົມ ເຊິ່ງໃນໄລຍະຜ່ານອົງການແຮງງານສາກົນ ໂດຍສົມທົບກັບກະຊວງແຮງງານ ແລະສະຫວັດດີການສັງຄົມ, ດັ່ງນັ້ນ ການຈັດງານໃນຄັ້ງນີ້ຖືເປັນເວທີສຳມະນາລະດັບຊາດທີ່ສຳຄັນ ເພື່ອເປີດໂອກາດໃຫ້ໄວໜຸ່ມນັກສຶກສາ ມຊ ມີສ່ວນຮ່ວມ ແລະເຂົ້າໃຈວຽກງານປົກປ້ອງສັງຄົມຫຼາຍຂຶ້ນ.

ວຽກງານປົກປ້ອງສັງຄົມ ເປົ້າໝາຍແມ່ນເພື່ອສະໜອງການບໍລິການທາງສັງຄົມໃຫ້ແກ່ປະຊາຊົນ ໂດຍສະເພາະຜູ້ທຸກຍາກ ແລະ ຜູ້ທີ່ເປັນກຸ່ມເປົ້າໝາຍທີ່ມີຄວາມບອບບາງທີ່ສຸດ ທີ່ອາໄສຢູ່ເຂດຊົນນະບົດ ຫຼື ເຂດຫ່າງໄກສອກຫຼີກ. ທັງນີ້ເປັນການປະກອບສ່ວນສຳຄັນເຂົ້າໃນການສ້າງຄວາມເຂັ້ມແຂງໃຫ້ແກ່ລະບົບສະຫວັດດີການສັງຄົມ ເພື່ອເຮັດໃຫ້ຜູ້ດ້ອຍໂອກາດ, ຜູ້ທຸກຍາກ ແລະ ຜູ້ໄດ້ຮັບຜົນກະທົບຈາກໄພພິບັດໃນຊຸມຊົນ ໄດ້ເຂົ້າເຖິງການບໍລິການ ແລະ ອຸດໜູນດ້ານສະຫວັດດີການສັງຄົມຢ່າງທົ່ວເຖິງ ເຊິ່ງຈະເປັນການຊ່ວຍສົ່ງເສີມການດໍາລົງຊີວິດ ແລະ ການພັດທະນາຊັບພະຍາກອນມະນຸດ.

ພ້ອມນັ້ນ, ໃນພິທີຍັງມີການນຳສະເໜີແຜນໂຄງການຂອງນັກສຶກສາ ຄສຄ ພາຍໃຕ້ຫົວຂໍ້ “ພວກເຮົາຈະສະໜອງການບໍລິການດ້ານການຊ່ວຍເຫຼືອສັງຄົມ ແລະການອຸດໜູນດ້ານການເງິນໃຫ້ແກ່ຊຸມຊົນໄດ້ຄືແນວໃດ” ໂດຍມີນັກສຶກສາ ສົ່ງແຜນໂຄງການ ເຂົ້າຮ່ວມແຂ່ງຂັນທັງໝົດ 5 ທີມ ໂດຍມີຄະນະກຳມະການຈາກພາກສ່ວນທີ່ກ່ຽວເຂົົ້າຮ່ວມຕັດສິນ ໂດຍແບ່ງການໃຫ້ຄະນະແນນອອກເປັນ 4 ສ່ວນຄື: ຄວາມກ່ຽວຂ້ອງ 20% ແນວຄວາມຄິດສ້າງສັນ 25% ຜົນກະທົບ 20% ການນໍາສະເໜີ 15%. ຜ່ານການນໍາສະເໜີທີມທີໄດ້ຮັບລາງວັນຊະນະເລີດອັນດັບທີ 1 ໄດ້ແກ່ນັກສືກສາທີ່ນໍາສະເໜີຫົວຂໍ້ “ໂຄງການສະໜັບສະໜູນທຶນການສຶກສາໃຫ້ກັບເດັກນ້ອຍດ້ອຍໂອກາດຢູ່ເຂດຊົນນະບົດໂດຍການນຳໃຊ້ ບັດຮັບການອຸດໜູນ ຜ່ານການລາຍງານຂໍ້ມູນແບບຕິຈິຕອລ”, ອັບດັບທີ 2 ໄດ້ແກ່ນັກສືກສາທີ່ນໍາສະເໜີຫົວຂໍ້ “ຄວາມຫວັງເລີ່ມຕົ້ນຈາກແມ່”, ອັນດັບທີ 3 ໄດ້ແກ່ນັກສືກສາທີ່ນໍາສະເໜີຫົວຂໍ້ “ເຄື່ອຂ່າຍບັນເທົາທຸກຊຸມຊົນ ວິລະຊົນຫຼຸດຜ່ອນຄວາມສ່ຽງຈາກໄພພິບັດໃນ ສປປ ລາວ”

ຮູບພາບບັນຍາກາດ

ໃນວັນທີ 4 ທັນວາ 2025 ຜ່ານມາ, ມະຫາວິທະຍາໄລແຫ່ງຊາດ (ມຊ) ໄດ້ຮ່ວມລົງນາມການຮ່ວມມືສືບຕໍ່ມອບທຶນການສຶກສາໃຫ້ກັບນັກສຶກສາ ມຊ ຮ່ວມກັບບໍລິສັດເຄບີໂຄລາວ ເຊົ່າສິນເຊື່ອ ທີ່ສຳນັກງານອະທິການບໍດີ ມຊ, ໂດຍການລົງນາມຕາງໜ້າຝ່າຍ ມຊ ໂດຍທ່ານ ສຈ. ປອ. ເດຊານຸລາດ ແສນດວງເດດ ຜູ້ອຳນວຍການໃຫຍ່ ມຊ ແລະລົງນາມຕາງໜ້າຝ່າຍບໍລິສັດເຄບີໂຄລາວ ເຊົ່າສິນເຊື່ອ ໂດຍທ່ານ ຮຽນຈູອິນ ຜູ້ອຳນວຍການໃຫຍ່ ບໍລິສັດເຄບີໂຄລາວ ເຊົ່າສິນເຊື່ອ, ມີບັນດາທ່ານຫົວໜ້າຫ້ອງການ, ຕາງໜ້າຄະນະວິຊາ, ພະນັກງານ, ຄູ-ອາຈານທີ່ກ່ຽວຂ້ອງເຂົ້າຮ່ວມ.

ການຮ່ວມມືໃນຄັ້ງນີ້ ບໍລິສັດຈະໄດ້ມອບທຶນການສຶກສາໃຫ້ກັບນັກສຶກສາ ມຊ ທັງໝົດ 20 ທຶນ ໂດຍແບ່ງໃຫ້ກັບນັກສຶກສາທີ່ກຳລັງສຶກສາຢູ່ຄະນະນິຕິສາດ ແລະລັດຖະສາດ ຈຳນວນ 5 ທຶນ, ຄະນະວິສະວະກຳສາດ ຈຳນວນ 5 ທຶນ ແລະຄະນະວິຊາຕ່າງໆຈຳນວນ 10 ທຶນ ເຊິ່ງຈະຄັດເອົານັກສຶກສາຜູ້ທີ່ຜົນການຮຽນດີ, ມີຄວາມຫ້າວຫັນ ແຕ່ຫຍຸ້ງທາງດ້ານຄອບຄົວ ເພື່ອເປັນການສົ່ງເສີມໃຫ້ນັກສຶກສາໄດ້ສຶກສາຮໍ່າຮຽນ ແລະແບ່ງເບົາພາລະ. ສຳລັບການສະໝັກແມ່ນຈະເລີ່ມເປີດໃນນັກສຶກສາໄດ້ສະໝັກຢູ່ຄະນະ ເຊິ່ງຈະມີການແຈ້ງຜ່ານຄະນະວິຊາ.

ຮູບພາບບັນຍາກາດ

ສະຖາບັນຂົງຈື (ສຂຈ) ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີສະເຫຼີມສະຫຼອງວັນຂົງຈືໂລກ ຄົບຮອບ 11 ປີ ແລະ ວັນສ້າງຕັ້ງ ສຂຈ ມຊ ຄົບຮອບ 15 ປີ ຂຶ້ນໃນວັນທີ 4 ທັນວານີ້ທີ່ ສຂຈ ໂດຍການເປັນກຽດເຂົ້າຮ່ວມຂອງທ່ານ ນາງ ຟາງຫົງ ເອກອັກຄະລັດຖະທູດຜູ້ອຳນາດເຕັມ ສປ ຈີນ ປະຈຳ ສປປ ລາວ, ທ່ານ ປອ. ນາງ ດາລາວອນ ກິດຕິພັນ ຮອງລັດຖະມົນຕີກະຊວງສຶກສາທິການ ແລະ ກິລາ (ສສກ), ທ່ານ ສຈ. ປອ. ເດຊານຸລາດ ແສນດວງເດດ ຜູ້ອຳນວຍການໃຫຍ່ ມຊ, ມີຜູ້ຕາງໜ້າຈາກມະຫາວິທະຍາໄລຊົນເຜົ່າກວາງຊີ ສປ ຈີນ, ມີບັນດາຮອງຜູ້ອຳນວຍການໃຫຍ່ ມຊ, ຜູ້ອຳນວຍການ ສຂຈ ຝ່າຍລາວ-ຝ່າຍຈີນ, ພະນັກງານ, ຄູ-ອາຈານ ແລະ ນັກສຶກສາ, ແຂກຖືກເຊີນເຂົ້າຮ່ວມ.

ໃນພິທີ, ທ່ານ ຄຳຮຸ່ງ ຈັນທະວົງ ຜູ້ອຳນວຍການ ສຂຈ ຝ່າຍລາວ ໄດ້ຜ່ານບົດສະຫຼຸບການເຄື່ອນໄຫວວຽກງານຂອງສະຖາບັນຂົງຈື 15 ປີ ແລະ ແຜນການເຄື່ອນໄຫວປະຈຳສົກສືຶກສາ 2026 ວ່າ: ສະຖາບັນຂົງຈື (ຂຽນຫຍໍ້ວ່າ “ສຂຈ”) ມີສໍານັກງານຕັ້ງຢູ່ ວິທະຍາເຂດດົງໂດກ ຊຶ່ງໄດ້ ສ້າງຕັ້ງຂຶ້ນຢ່າງເປັນທາງການທີ່ ມຊ ໃນວັນທີ 23 ມີນາ 2010, ໂດຍ ແມ່ນການຮ່ວມມືຂອງມະຫາວິທະຍາໄລແຫ່ງຊາດລາວ ແລະ ມະຫາວິທະຍາໄລຊົນເຜົ່າກວາງຊີ ສປ ຈີນ, ເປັນສະຖາບັນແຫ່ງໜຶ່ງ ທີ່ ມີສະຖານະພາບ ເທົ່າກັບຄະນະວິຊາໜຶ່ງໃນກົງຈັກການຈັດຕັ້ງ ແລະ ຢູ່ພາຍໃຕ້ການຊີ້ນໍາດ້ານມະຫາພາກຂອງ ມຊ, ປັດຈຸບັນ ສຂຈ ມີຫ້ອງຮຽນຂົງຈືທີ່ຂຶ້ນກັບຈໍານວນ 5 ແຫ່ງຄື: ຫ້ອງຮຽນຂົງຈື ມສ ສາທິດ, ມສ ວຽງຈັນ, ໂຮງຮຽນຊົນເຜົ່າກິນນອນແຂວງວຽງຈັນ, ສະຖາບັນການເມືອງການປົກຄອງແຫ່ງຊາດ ແລະ ວິທະຍຸກະຈາຍສຽງແຫ່ງຊາດລາວ.

ສຂຈ ມີພາລະບົດບາດ ສົ່ງເສີມການຮ່ວມມື ແລະ ການແລກປ່ຽນທາງດ້ານການສຶກສາ, ການສ້າງຫຼັກສູດ, ການຝຶກອົບຮົມ, ວັດທະນະທໍາ ແລະ ວິທະຍາສາດລະຫວ່າງ ສປປ ລາວ ກັບ ສປ ຈີນ ເວົ້າລວມ ເວົ້າສະເພາະແມ່ນລະຫວ່າງ ມະຫາວິທະຍາໄລແຫ່ງຊາດລາວ ກັບ ມະຫາວິທະຍາໄລຊົນເຜົ່າກວາງຊີ ສປ ຈີນ ແລະ ບັນດາສະຖາບັນຂົງຈື ຂອງ ສປ ຈີນ ເພື່ອ ພັດທະນາຊັບພະຍາກອນມະນຸດຢູ່ພາຍໃນ ແລະ ພາຍນອກມະຫາວິທະຍາໄລແຫ່ງຊາດ, ເປັນ ເສນາທິການໃຫ້ມະຫາວິທະຍາໄລແຫ່ງຊາດໃນການລະດົມທຶນ ແລະ ຍາດແຍ່ງເອົາການ ຊ່ວຍເຫຼືອດ້ານເຕັກນິກວິຊາການ, ດ້ານທຶນຮອນໃນການກໍ່ສ້າງໂຄງລ່າງພື້ນຖານ ແລະ ການ ພັດທະນາບຸກຄະລາກອນດ້ານພາສາຈີນ ແລະອື່ນໆ. ປັດຈຸບັນ ສຂຈ ປະກອບດ້ວຍສອງພາກສ່ວນຄື: ຝ່າຍ ລາວ ແລະ ຝ່າຍ ຈີນ, ມີພະນັກງານມີໜ້າທັງໝົດຈໍານວນ 15 ທ່ານ ພະນັກງານຕາມສັນຍາ 5 ທ່ານ, ພະນັກງານກໍາລັງສຶກສາຕໍ່ທີ່ຕ່າງປະເທດ 1 ທ່ານ ແລະ ມີພະນັກງານຄູອາຈານ-ອາສາສະໝັກທັງຫມົດ 42 ທ່ານ, ຍິງ 38 ທ່ານ. ໃນນີ້, ມີຊ່ຽວຊານ 6 ທ່ານ. ໃນຕະຫຼອດໄລຍະທີ່ຜ່ານມາມີຫຼາຍຜົນງານທີ່ພົ້ນເດັ່ນໂດຍສະເພາະດ້ານວິຊາການ ສຂຈ ມີຫຼັກສູດການຮຽນການສອນ 2 ລະບົບຄື: ລະບົບພາກບໍາລຸງພາສາຈີນ ທົ່ວໄປ ແລະ ລະບົບປະລິນຍາຕີສາຂາຄູພາສາຈີນ, ມາຮອດປັດຈຸບັນ ປີ 2025 ໄດ້ເປີດຊຸດຝຶກອົບຮົມພາສາຈີນ ເປັນຊຸດທີ 31, ຕະຫຼອດ 15 ປີມີນັກຮຽນທັງໝົດທີ່ເຂົ້າມາຮຽນຈໍານວນ 67,551 ເທື່ອຄົນ, ຍິງ 22,051 ເທື່ອຄົນ ແລະ ທີ່ຫ້ອງຮຽນຂົງຈືເປັນຈໍານວນ 30,000 ກວ່າຄົນ, ລວມທັງໝົດໄດ້ສ້າງ ບຸກຄະລາກອນພາສາຈີນຈໍານວນ 90,000 ກວ່າຄົນ, ນັບແຕ່ປີ 2011 ສະຖາບັນຂົງຈື ຈັດຝຶກອົບຮົມພາສາຈີນໃຫ້ບັນດາພາກສ່ວນຕ່າງໆ ເຊັ່ນ: ຝຶກອົບຮົມຄູພາສາຈີນທ້ອງຖິ່ນຈໍານວນ 14 ຊຸດ, ລວມມີນັກຝຶກອົບຮົມຈາກໂຮງຮຽນ ມັດທະຍົມ ແລະ ສະຖາບັນຕ່າງໆ, ຫ້ອງຮຽນຂົງຈື ແລະ ຈຸດສອນພາສາຈີນ ຈໍານວນ 307 ເທື່ອ ຄົນ ຍິງ 187 ຄົນ, ການຈັດຝຶກອົບຮົມພາສາຈີນສະເພາະໃຫ້ແກ່ບັນດາໜ່ວຍງານພາກລັດ ແລະ ເອກະຊົນ ໃນຮູບແບບໄລຍະສັ້ນ, ໄລຍະກາງ ແລະ ໄລຍະຍາວ. ນັບຕັ້ງແຕ່ປີ 2011 ເປັນຕົ້ນມາ ສຂຈ ໄດ້ຈັດການສອບເສັງ HSK ໃນລະດັບຕ່າງໆ, ເປັນຈຸດສອບເສັງທຽບລະດັບພາສາຈີນ HSK ແຫ່ງທໍາອິດ ແລະ ໃຫຍ່ທີ່ສຸດໃນ ສປປ ລາວ, ມາຮອດປັດຈຸບັນ ໄດ້ດໍາເນີນການສອບເສັງທັງໝົດ 38 ຄັ້ງ, ມີນັກສອບເສັງທັງໝົດ 13,370 ຄົນ, ໃນປີ 2024 ແລະ ປີ 2025 ໄດ້ຮັບລາງວັນເປັນ “ສະຖານທີ່ສອບເສັງ HSK ທີ່ ດີເດັ່ນ”ໃນທົ່ວໂລກ 2 ປີລຽນຕິດ; ໃນທ້າຍປີ 2021 ຫຼັກສູດຄູພາສາຈີນ ລະດັບປະລິນຍາຕີ ໄດ້ຮັບອະນຸມັດຈາກກະຊວງ ສສກ ຢ່າງເປັນທາງການ, ຊຶ່ງຖືເປັນຫຼັກສູດປະລິນຍາຕີ ສາຂາຄູພາສາຈີນແຫ່ງທໍາອິດຂອງ ສປປ ລາວ ແລະ ສຂຈ ກໍແມ່ນສະຖາບັນແຫ່ງທໍາອິດຂອງໂລກທີ່ເປີດຫຼັກສູດການຮຽນ-ການສອນລະດັບປະລິນຍາຕີ, ໂດຍເປັນຫຼັກສູດລະບົບ 2+2, ປີ 1-2 ແມ່ນຮຽນທີ່ສະຖາບັນຂົງຈື ແລະ ປີ 3-4 ຮຽນທີ່ມະຫາວິທະຍາໄລຊົນເຜົ່າກວາງຊີ ສປ ຈີນ ດ້ວຍທຶນ 100% ນັກສຶກສາຄູພາສາຈີນຈໍານວນ 74 ຄົນ ໄດ້ສໍາເລັດການສຶກສາ, ປັດຈຸບັນນັກສຶກສາ ປີ 1-4 ທີ່ກໍາລັງສຶກສາຢູ່ ສຂຈ ທັງຫມົດ 354 ຄົນ; ດ້ານການແລກປ່ຽນກິດຈະກຳ ສຂຈ ມີກິດຈະກໍາປິ່ນອ້ອມເພື່ອສົ່ງເສີມການຮຽນການ ສອນ ປະມານ 35 ກິດຈະກໍາໃນແຕ່ລະປີ ໂດຍສະເພາະແມ່ນຂົງເຂດວັດທະນະທຳຂອງສອງຊາດລາວ-ຈີນໂດຍຜ່ານສິລະປະ, ວັດທະນະທຳ ແລະຮີດຄອງປະເພນີຕ່າງໆ.

ທ່ານ ຄຳຮຸ່ງ ຈັນທະວົງ ກ່າວຕື່ມວ່າ: ສໍາລັບທິດທາງແຜນການໃນຕໍ່ໜ້າ ສຂຈ ຈະສືບຕໍ່ເປັນເສນາທິການໃຫ້ ມຊ, ຍາດແຍ່ງການຮ່ວມມື ແລະ ຊ່ວຍເຫຼືອຈາກຄູ່ຮ່ວມມື ກໍຄືມະຫາວິທະຍາໄລຊົນເຜົ່າກວາງຊີ ກໍຄືສູນຮ່ວມມື ແລກປ່ຽນພາສາຈີນ-ພາສາຕ່າງປະເທດ ແຫ່ງຊາດຈີນ, ສືບຕໍ່ບັນດາວຽກງານຕໍ່ເນື່ອງໃນປີທີ່ຜ່ານມາ, ປະຕິບັດແຜນກິດຈະກໍາປະຈໍາປີ ແລະ ວຽກງານການຮຽນການສອນຂອງຝ່າຍຈີນວາງອອກໃຫ້ສໍາເລັດ ພ້ອມທັງກະກຽມແຜນການພັດທະນາຊັບພະຍາກອນມະນຸດໃຫ້ມີຄວາມຫຼາກຫຼາຍ, ໂດຍ ສະເພາະການເຈລະຈາ ແລະ ປຶກສາຫາລືນໍາມະຫາວິທະຍາໄລຊົນເຜົ່າກວາງຊີ ໃນການ ເປີດຫຼັກສູດລະດັບປະລິນຍາຕີ ແລະ ລະດັບປະລິນຍາໂທ ທີ່ສິດສອນດ້ວຍພາສາຈີນ.

ໂອກາດນີ້, ທ່ານ ປອ. ນາງ ດາລາວອນ ກິດຕິພັນ ກ່າວສະແດງຄວາມຍ້ອງຍໍຜົນງານ ແລະ ຜົນສໍາເລັດທີ່ ສຈຂ ຍາດມາໄດ້ຕະຫຼອດໄລຍະ 15 ປີ ຜ່ານມາ. ຊຶ້ງສະແດງໃຫ້ເຫັນໃນຕະຫຼອດໄລຍະຜ່ານມາ ສຂຈ ໄດ້ສ້າງບຸກຄະລາກອນອອກມາຮັບໃຊ້ສັງຄົມທັງພາຍໃນ ແລະ ຕ່າງປະເທດກວມເອົາໃນຫຼາຍຂົງເຂດວຽກງານ, ສົ່ງເສີມການແລກປ່ຽນວັດທະນະທຳຂອງສອງປະເທດລາວ-ຈີນ ໃຫ້ກາຍເປັນຂົວຕໍ່ແຫ່ງມິດຕະພາບ ແລະ ສົ່ງເສີມເຊື່ອມໂຍງວັດທະນະທຳຂອງປະຊາຊົນສອງຊາດຢ່າງເປັນຮູບປະທຳຫຼາຍຂຶ້ນ. ເວົ້າລວມແລ້ວຜົນງານອັນໃຫຍ່ຫຼວງຂອງ ສຂຈ ແມ່ນປາສະຈາກບໍ່ໄດ້ຈາກການປະກອບສ່ວນສຳຄັນຂອງພະນັກງານຄູ-ອາຈານທັງສອງຝ່າຍລາວ-ຈີນ ທີ່ເອົາໃຈໃສ່ໃນການປະຕິບັດໜ້າທີ່ໃນການສິດສອນ ແລະ ກິດຈະກຳຕ່າງໆດ້ວຍຄວາມຫ້າວຫັນ, ໃນເບື້ອງຂອງນັກສຶກສາກໍໄດ້ເອົາໃຈໃສ່ໃນການສຶກສາຮໍ່າຮຽນ, ຝຶກຝົນຫຼໍ່ຫຼອມຕົນເອງໃຫ້ກາຍເປັນຜູ້ມີຄວາມຮູ້ມີຄວາມສາມາດ.

ຮູບພາບບັນຍາກາດ