ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີສອບເສັງຄັດເລືອກເອົານັກສຶກສາເຂົ້າຮຽນປະຈຳສົກສຶກສາ 2024-2025 ຂຶ້ນໃນວັນທີ 10 ສິງຫາ 2024 ນີ້, ທີ່ວິທະຍາເຂດດົງໂດກ ໂດຍການເຂົ້າຮ່ວມຂອງທ່ານ ຮສ. ປອ. ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະກິລາ, ທ່ານ ຮສ. ປອ. ເດຊານຸລາດ ແສນດວງເດດ ວ່າການແທນອະທິການບໍດີ ມຊ ພ້ອມດ້ວຍທ່ານຮອງອະທິການບໍດີ, ຄະນະກຳມະການຮັບຜິດຊອບວຽກງານສອບເສັງ, ພະນັກງານຄູ-ອາຈານ ແລະນັກຮຽນເຂົ້າຮ່ວມ.

ທ່ານ ຮສ. ປອ. ເດຊານຸລາດ ແສນດວງເດດ ວ່າການແທນອະທິການບໍດີ ມຊ ໄດ້ໃຫ້ສໍາພາດວ່າ: ໃນສົກສຶກສາ 2024-2025 ນີ້ ມຊ ໄດ້ຈັດການສອບເສັງຄັດເລືອກເອົານັກສຶກສາເຂົ້າຮຽນໂດຍມີ 1 ສູນຄື: ວິທະຍາເຂດດົງໂດກ ປະກອບມີ 6 ຈຸດຕົ້ນຕໍ ແລະ 1 ຈຸດສໍາຮອງ ຊຶ່ງມີຈໍານວນຫ້ອງທັງໝົດມີ 230 ຫ້ອງ ແບ່ງອອກເປັນ 2 ປະເພດຄື: ຫ້ອງບັນຈຸນັກສອບເສັງໄດ້ 30 ຄົນ ມີ 89 ຫ້ອງ ແລະ ຫ້ອງບັນຈຸນັກສອບເສັງ 20 ຄົນ ມີ 141 ຫ້ອງ, ມີກຳມະການຍາມຫ້ອງສອບເສັງຈໍານວນ 460 ຄົນ, ກໍາມະການສໍາຮອງ 30 ຄົນ ຊຶ່ງໄດ້ເປີດໃຫ້ນັກຮຽນລົງທະບຽນທາງອອນລາຍທັງໝົດ 6.551 ຄົນ. ໃນນັ້ນສາຍທໍາມະຊາດ (A) ມີ 1.862 ຄົນ ແລະ ສາຍສັງຄົມ (B) ມີ 4.689 ຄົນ. ໂຕເລກຜູ້ທີ່ລົງທະບຽນມາສອບເສັງຕົວຈິງມີ 5.463 ຄົນ. ໃນນັ້ນສາຍສາຍທໍາມະຊາດ (A) ມີ 1.584 ຄົນ ແລະ ສາຍສັງຄົມ (B) ມີ 3.879 ຄົນ. ຄາດຄະເນແຜນຮັບນັກສຶກສາເຂົ້າຮຽນໃນສົກສຶກສາ 2024-2025 ລະດັບປະລິນຍາຕີທັງໝົດຈໍານວນ 5.815 ຄົນ ແລະ ອະນຸປະລິນຍາຈໍານວນ 110 ຄົນ. ນອກຈາກນີ້, ຍັງມີຫຼັກສູດຕໍ່ເນື່ອງປະລິນຍາຕີຈໍານວນ 1.525 ຄົນ, ຫຼັກສູດປະລິນຍາຕີນາໆຊາດ 100 ຄົນ ແລະ ຫຼັກສູດຄູພາສາຈີນ 105 ຄົນ, ຈໍານວນຫຼັກສູດດັ່ງກ່າວນີ້ຈະໄດ້ຈັດຕັ້ງການສອບເສັງຕ່າງຫາກ. ການສອບເສັງແບ່ງອອກເປັນ 2 ກຸ່ມຄື: ສາຍທໍາມະຊາດ (ກຸ່ມ A) ແລະ ສາຍສັງຄົມ (ກຸ່ມ B). ສຳລັບກຸ່ມ A ສອບເສັງວິຊາຄະນິດສາດ A + ຟິຊິກສາດ, ພາສາລາວ + ວັນນະຄະດີ, ເຄມີສາດ, ຊີວະສາດ, ພາສາອັງກິດ, ກຸ່ມ B ສອບເສັງວິຊາຄະນິດສາດ B + ພາສາລາວ - ພູມີສາດ, ປະຫວັດສາດ, ພາສາອັງກິດ.

ທ່ານ ຮສ. ປອ. ເດຊານຸລາດ ແສນດວງເດດ ກ່າວໃຫ້ຮູ້ອີກວ່າ: ສໍາລັບສົກສຶກສາ 2024-2025 ຈໍານວນສາຂາວິຊາທີ່ໃຫ້ນັກສອບເສັງເລືອກຮຽນລະດັບປະລິນຍາຕີປະກອບມີ 109 ສາຂາ. ໃນນັ້ນສາຍທໍາມະຊາດ 59 ສາຂາ ແລະ ສາຍສັງຄົມ 50 ສາຂາ. ຫຼັກສູດອະນຸປະລິນຍາ 4 ສາຂາ. ເພື່ອໃຫ້ສາມາດຄັດເລືອກເອົານັກຮຽນທີ່ມີຄຸນນະພາບເຂົ້າຮຽນ ມຊ ພວກເຮົາມີມາດຕະການຄວບຄຸມຫ້ອງສອບເສັງຄື: ມຊ ໄດ້ມີລະບຽບ ແລະ ຂໍ້ແນະນໍາການສອບເສັງສໍາລັບນັກສອບເສັງ; ລະບຽບ ແລະ ຂໍ້ແນະນໍາສໍາລັບກຳມະການຍາມຫ້ອງສອບເສັງ; ລະບຽບການຄຸ້ມຄອງການສອບເສັງເອົານັກສຶກສາເຂົ້າຮຽນ ມຊ; ກຳມະການປະຈໍາຈຸດສອບເສັງ ແລະ ຍາມຫ້ອງສອບເສັງທຸກຄົນຕ້ອງໄດ້ເຂົ້າຮ່ວມການປະຖົມນິເທດກ່ຽວກັບການຄຸ້ມຄອງຈຸດສອບເສັງ, ຄຸ້ມຄອງຫ້ອງສອບເສັງ. ຄາດວ່າຈະປະກາດຜົນສອບເສັງໃນວັນທີ 9 ກັນຍາ 2024 ນີ້.

ໃນຕອນເຊົ້າ ວັນທີ 5 ສິງຫາ 2024 ຜ່ານມາ, ສູນສົ່ງເສີມວາລະສານວິທະຍາສາດ, ຫ້ອງການຄົ້ນ ຄວ້າວິທະຍາສາດ ແລະ ບໍລິການວິຊາການ  ມະຫາວິທະຍາໄລແຫ່ງຊາດ (ມຊ) ໄດ້ຕ້ອນຮັບການຢ້ຽມຢາມຂອງທ່ານ ສຈ. ຮ້ອຍຕໍາຫຼວດເອກ. ດຣ. ສຸທຳ ເຊື້ອປະກອບກຣິດ ຮອງຄະນະບໍດີ ຄະນະສັງຄົມສາດ ແລະ ມະນຸດສາດ ຝ່າຍການຄົ້ນຄວ້າ ແລະ ບໍລິການວິຊາການ ມະຫາວິທະຍາໄລ ມະຫິດົນ ປະເທດໄທ ພ້ອມດ້ວຍຄະນະ ທີ່ໄດ້ເດີນທາງມາແລກປ່ຽນທາງດ້ານວິຊາການ ແລະ ຮ່ວມງານສຳມະນາໃນຫົວຂໍ້: ນະໂຍບາຍຝຸ່ນ PM 2.5 ແລະ ການຈັດການຂີ້ເຫຍື້ອໃນຊຸມຊົນ ທີ່ຫ້ອງປະຊຸມ ມະຫາວິທະຍາໄລແຫ່ງຊາດ, ໂດຍການຕ້ອນຮັບຂອງ ທ່ານ ສຈ. ປອ. ພູເພັດ ກ້ຽວພິລາວົງ ຮອງອະທິການບໍດີ ມຊ ພ້ອມດ້ວຍ ທ່ານຫົວໜ້າຫ້ອງການ, ຜູ້ອຳນວຍການສູນສົ່ງເສີມວາລະສານ, ພະນັກງານ, ຄູ-ອາຈານ ແລະ ນັກສຶກສາເຂົ້າຮ່ວມ.

            ໃນການພົບປະຄັ້ງນີ້, ທ່ານ ສຈ. ປອ. ພູເພັດ ກ້ຽວພິລາວົງ ໄດ້ສະແດງຄວາມຍິນດີຕໍ່ການມາຢ້ຽມຢາມ ແລະ ແລກປ່ຽນຄວາມຮູ້ດ້ານວິຊາການ ເຊິ່ງໃນໄລຍະຜ່ານມາ ມຊ ກໍມີຫຼາຍວຽກງານທີ່ພົ້ນເດັ່ນໂດຍສະເພາະວຽກງານການຄົ້ນຄວ້າກໍໄດ້ມີການຮ່ວມມືກັບບັນດາ ມະຫາວິທະຍາໄລ, ອົງການ, ສະຖາບັນຕ່າງໆ ໃນພາກພື້ນ ແລະ ສາກົນ ທີ່ໄດ້ລົງນາມການຮ່ວມມືຮ່ວມກັນ, ເຊິ່ງການຄົ້ນຄວ້າວິໄຈ ກໍມີຫຼາຍຂະ   ແໜງການເຊັ່ນ ດ້ານວິທະຍາສາດ, ສັງຄົມ ແລະ ສິ່ງແວດລ້ອມ ເປັນຕົ້ນ.

ໃນການແລກປ່ຽນຄັ້ງນີ້, ແມ່ນເປັນການປະຕິບັດບັນດາກິດຈະກໍາຄວາມຮ່ວມມືພາຍໃຕ້ການ MOA ຂອງຫ້ອງການຄົ້ນຄວ້າວິທະຍາສາດ ແລະ ບໍລິການວິຊາການ ມຊ ກັບ ຄະນະສັງຄົມສາດ ແລະ ມະນຸດສາດ ມະຫາວິທະຍາໄລ ມະຫິດົນ ຣາຊະອານາຈັກໄທ ຄົບຮອບ 1 ປີ ເຊິ່ງກິດຈະກໍາໃນຄັ້ງນີ້ແມ່ນໄດ້ມີການຈັດງານສຳມະນາແລກປ່ຽນທາງດ້ານວິຊາການໂດຍມີການນຳສະເໜີຫົວຂໍ້ບົດຄົ້ນຄວ້າທີ່ກ່ຽວກັບ: ນະໂຍບາຍຝຸ່ນ PM 2.5 ແລະ ການຈັດການຂີ້ເຫຍື້ອແບບຍືນຍົງ ໂດຍມີທັງໝົດ 4 ຫົວຂໍ້ຄື ຫົວຂໍ້ທີ 1: ຄວາມໝັ້ນຄົງໃນການບໍລິຫານຈັດການສິ່ງແວດລ້ອມໃນຂອບເຂດນະຄອນຫຼວງວຽງຈັນ ນຳສະເໜີໂດຍທ່ານ ນາງ ສຸວັນນາ ເພັງສີຊົມພູ ຈາກຄະນະວິທະຍາສາດສິ່ງແວດລ້ອມ; ຫົວຂໍ້ທີ 2: ນະໂຍບາຍໃນການແກ້ໄຂບັນຫາຝຸ່ນຄວັນ PM 2.5 ໃນຄະຄອນຫຼວງ ນຳສະເໜີໂດຍ ນາງ ສຸພາພອນ ທຳມະວົງສາ ນັກສຶກສາປະລິນຍາໂທ ຄະນະວິສະວະກຳສາດ ແລະ ຫົວຂໍ້ທີ 3: ຂໍ້ສະເໜີດ້ານນະໂຍບາຍເພື່ອແກ້ໄຂບັນຫາຜົນກະທົບຈາກຝຸ່ນຄວັນ PM2.5 ຢູ່ກຸງເທບມະຫານະຄອນ ປະເທດໄທ ແລະນະຄອນຫຼວງວຽງຈັນ ປະເທດລາວ ໂດຍທ່ານ ຮສ. ດຣ, ສົມສັກ ອາມອນສິລິພົງ ຈາກມະຫາວິທະຍາໄລ ມະຫິດົນ ແລະທ່ານ ອຈ. ແກ້ວພູທອນ ຫາທາລົງ, ພ້ອມນັ້ນ ໃນທີ່ປະຊຸມ ຍັງໄດ້ເປີດໂອກາດໃຫ້ນັກສຶກສາທີ່ໄດ້ເຂົ້າຮ່ວມແລກປ່ຽນຄວາມຄິດເຫັນເຊິ່ງກັນ ແລະກັນອີກດ້ວຍ ແລະ ຫົວຂໍ້ທີ່ 4 ແມ່ນ Development of Model for Effective Local Waste Management and Environmental Preservation Under Sustainable Development Goals (SDGs):  A Case Study of Tha Muang District, Kanchanaburi Province ຈາກນັກວິໄຈຂອງມະຫາວິທະຍາໄລມະຫິດົນ.

ພາບບັນຍາກາດ

ໃນລະຫວ່າງວັນທີ 29-31 ກໍລະກົດ 2024, ຄະນະເສດຖະສາດ ແລະບໍລິຫານທຸລະກິດ (ຄສບ) ມະຫາວິທະຍາໄລແຫ່ງຊາດ (ມຊ) ຮ່ວມກັບ ມະຫາວິທະຍາໄລຊອງຄຸນກວານ ປະເທດເກົາຫຼີ (SungKyunKwan University, Korea) ໄດ້ຈັດກອງປະຊຸມ ນະວັດຕະກຳດ້ານການບໍລິຫານຄວາມສ່ຽງ ແລະການປະກັນໄພ ໃນເຂດອາຊີປາຊີຟິກ ທີ່ຫ້ອງປະຊຸມ ຄສບ; ໂດຍມີທ່ານ Hongjoo JUNG  ສະມາຄົມຄວາມສ່ຽງ ແລະການປະກັນໄພອາຊີປາຊີຟິກ (Asia-Pacific Risk and Insurance Association APRIA), ທ່ານ ສຈ. ປອ. ພູເພັດ ກ້ຽວພິລາວົງ ຮອງອະທິການບໍດີ ມຊ ພ້ອມດ້ວຍຜູ້ຊ່ຽວຊານ, ນັກວິຊາການ ຈາກ 102 ສະຖາບັນໃນ 20 ປະເທດທົ່ວໂລກເຂົ້າຮ່ວມ;

          ໃນກອງປະຊຸມ ທ່ານ Hongjoo JUNG ໄດ້ກ່າວວ່າ: ກອງປະຊຸມໃນຄັ້ງນີ້ຖືວ່າເປັນຂີດໝາຍສໍາຄັນກ່ຽວກັບຂົງເຂດວຽກງານປະກັນໄພ ເຊິ່ງໄດ້ລວມເອົາບັນດານັກຊ່ຽວຊານ ແລະນັກວິຊາການ ທີ່ມີປະສົບການມາເຂົ້າຮ່ວມ ເຊິ່ງໃນໄລຍະທີ່ຜ່ານມາສະມາຄົມຄວາມສ່ຽງ ແລະການປະກັນໄພອາຊີປາຊີຟິກ (Asia-Pacific Risk and Insurance Association) ໄດ້ເຕີບໂຕ ແລະປ່ຽນແປງຢ່າງໂດດເດັ່ນ, ມີສະມາຊິກທີເປັນບຸກຄົນເພີ່ມຂື້ນຈາກ 96 ຄົນເປັນ 102 ຄົນ, ແລະ ສະມາຊິກ ທີ່ເປັນສະຖາບັນຂະຫຍາຍຈາກ 8 ສະຖາບັນເປັນ 11 ສະຖານບັນ, ເຊິ່ງສະທ້ອນໃຫ້ການເຕີີບໂຕຂອງ APRIA. ໃນປີນີ້, ແມ່ນມີຫຼາຍກວ່າ 60 ຫົວຂໍ້ຄົ້ນຄວ້າທີ່ໄດ້ນໍາສະເໜີ ແລະ ຫວັງຢ່າງຍິ່ງວ່າ ກອງປະຊຸມຄັ້ງນີ້ ຈະຊຸກຍູ້ໃຫ້ເກີດ ແນວຄວາມຄິດໃໝ່, ການຂະຫຍາຍຄຸນຄ່າຂອງການຮ່ວມມືເຊິ່ງກັນ ແລະ ກັນ ແລະ ການປະກອບສ່ວນເຂົ້າໃນຜົນສຳເລັດຂອງ APRIA.

          ພ້ອມນັ້ນ, ທ່ານ ສຈ. ປອ. ພູເພັດ ກ້ຽວພິລາວົງ ກໍໄດ້ຕີລາຄາສູງ ຕໍ່ການເປັນເຈົ້າພາບກອງປະຊຸມດັ່ງກ່າວ ໂດຍບາງຄວາມຄິດເຫັນຂອງເພິ່ນໄດ້ກ່າວວ່າ: “ມະຫາວິທະຍາໄລແຫ່ງຊາດ ໄດ້ທຸ້ມເທຢ່າງໜັກເພື່ອໃຫ້ບັນລຸຕາມຈຸດປະສົງເປົ້າໝາຍ, ມີຄູ່ຮ່ວມຍຸດທະສາດ ແລະ ຮ່ວມມືນຳບັນດາມະຫາວິທະຍາໄລ, ສະຖາບັນ, ແລະ ອົງການສາກົນຕ່າງໆ ຈາກບັນດາປະເທດຕ່າງໆທົ່ວໂລກ. ດັ່ງທີ່ພວກເຮົາໄດ້ຮັບຮູ້ ການປ່ຽນແປງຂອງ ສັງຄົມ, ເທັກໂນໂລຍີ ແລະ ເສດຖະກິດ ໃນປັດຈຸບັນແມ່ນມີຄວາມວ່ອງໄວ. ພ້ອມດຽວກັນນັ້ນ, ຍັງໄດ້ຮັບຜົນກະທົບຈາກການປ່ຽນແປງດິນຟ້າອາກາດ, ຄວາມສ່ຽງທາງພູມສາດ, ຄວາມບໍ່ແນ່ນອນທາງການເງິນ ແລະ ເສດຖະກິດ, ສົງຄາມ ແລະ ຄວາມຂັດແຍ່ງຕ່າງໆ. ດັ່ງນັ້ນ, ບົດຄົ້ນຄວ້າກ່ຽວກັບຄວາມສ່ຽງ ແລະ ປະກັນໄພ ແມ່ນມີຄວາມສຳຄັນຕໍ່ເຫດການຕ່າງໆເຫຼົ່ານີ້. ກອງປະຊຸມຄັ້ງນີ້ແມ່ນໄດ້ຮີບໂຮມບົດນຳສະເໜີຕ່າງໆທີ່ມີຄວາມຫຼາກຫຼາຍ ແລະ ມີການສົນທະນາແລກປ່ຽນ ກ່ຽວກັບປະເດັນ ຄວາມສ່ຽງ ແລະ ປະກັນໄພໃນອາຊີ - ປາຊີຟິກ ແລະ ສາກົນ. ແລະ ພວກເຮົາຍັງໄດ້ຮັບກຽດຕ້ອນຮັບ ບັນດານັກຄົ້ນຄວ້າ, ນັກຊ່ຽວຊານ ແລະ ແຂກຈາກພາກພື້ນອາຊີ - ປາຊີຟິກ ແລະ ສາກົນອີກດ້ວຍ.

ການຈັດປະຊຸມຄັ້ງນີ້ແມ່ນເພື່ອລະດົມສະໝອງແລກປ່ຽນແນວຄິດ ແລະ ນຳສະເໜີຫົວຂໍ້ຕ່າງໆທີ່ກ່ຽວກັບ ຖານຂໍ້ມູນ, ການວິເຄາະ, ເທັກໂນໂລຊີການປະກັນໄພ, ການປ່ຽນແປງສະພາບດິນຟ້າອາກາດ, ຄວາມສ່ຽງທາງອອນລາຍ (cyber risks), ສະຫວັດດິການພະນັກງານ, ຄວາມຍືນຍົງ, ຄວາມຮູ້ທາງດ້ານການເງິນ ການປະກັນສຸຂະພາບ, ກົດລະບຽບຂໍ້ບັງຄັບກ່ຽວກັບປະກັນໄພ ລະຫວ່າງປະເທດ, ການປະກັນສັງຄົມ ແລະອື່ນໆ, ພາຍໃຕ້ທຶນການສະໜັບສະໜູນຈາກ ບໍລິສັດ Kyobo ປະກັນຊີວິດ ປະເທດເກົາຫຼີ  (Kyobo Life Insurance Company, Korea).

ພາບບັນຍາກາດ

ໃນວັນທີ 19 ກໍລະກົດ 2024, ສະຫະພັນແມ່ຍິງ ມະຫາວິທະຍາໄລແຫ່ງຊາດ (ມຊ) ໄດ້ຈັດກອງປະຊຸມໃຫຍ່ຄັ້ງທີ V ໂດຍການເຂົ້າຮ່ວມເປັນປະທານຂອງສະຫາຍ ນາງ ບົວຄຳ ດາວສະຫວັນ ຄະນະບໍລະຫານງານສູນກາງສະຫະພັນແມ່ຍິງລາວ, ປະທານສະຫະພັນແມ່ຍິງກະຊວງສືກສາທິການ ແລະກີລາ, ສະຫາຍ ນາງ ໃບສີ ວາເນັ່ງຈື ປະທານສະຫະພັນແມ່ຍິງ ມຊ, ສະຫາຍ ສີສຸພັນ ພົມມະນີວົງ ເລຂາຊາວໜຸ່ມ ມຊ, ສະຫາຍ ຮສ. ປອ. ບຸນທອນ ສຸຂະວົງ ປະທານສະຫະພັນກຳມະບານ ມຊ ແລະ ສະຫາຍ ຮສ. ປອ. ເດຊານຸລາດ ແສນດວງເດດ ເລຂາອົງຄະນະພັກ ມຊ ວ່າການແທນອະການທິການບໍດີ ມຊ ພ້ອມດ້ວຍບັນດາຄະນະບໍລິຫານງານ ສະຫະພັນແມ່ຍິງ ມຊ, ປະທານສະຫະພັນແມ່ຍິງຮາກຖານພ້ອມດ້ວຍຄະນະ, ແຂກຖືກເຊີນ ແລິສະມາຊິກແມ່ຍິງເຂົ້າຮ່ວມ.

ໃນທີ່ປະຊຸມສະຫາຍ ນາງ ໃບສີ ວາເນັ່ງຈື ກໍໄດ້ຂຶ້ນຜ່ານບົດລາຍງານການເມືອງ ກອງປະຊຸມໃຫຍ່ຄັ້ງທີ V ແຕ່ປີ (2019-2024) ເຊິ່ງມີເນື້ອໃນບາງຕອນວ່າ: ສະຫະພັນແມ່ຍິງ ມະຫາວິທະຍາໄລແຫ່ງຊາດ ເປັນສະຫະພັນແມ່ຍິງໜຶ່ງທີ່ຂຶ້ນກັບສະຫະພັນແມ່ຍິງກະຊວງສຶກສາທິການ ແລະ ກິລາ, ມີຄະນະບໍລິຫານງານທັງໝົດ 15 ສະຫາຍ, ໃນນັ້ນ ມີ 1 ສະຫາຍເປັນຄະນະບໍລິຫານງານສູນກາງສະຫະພັນແມ່ຍິງລາວ, 1 ສະຫາຍເປັນຮອງປະທານ ສະຫະພັນແມ່ຍິງກະຊວງສຶກສາທິການ ແລະ ກີລາ, 2  ສະຫາຍເປັນຄະນະບໍລິຫານງານສະຫະພັນແມ່ຍິງກະຊວງສຶກສາທິການ ແລະ ກີລາ. ສະຫະພັນແມ່ຍິງ ມະຫາວິທະຍາໄລແຫ່ງຊາດ ມີ 17 ຮາກຖານຂຶ້ນກັບ (13 ຄະນະວິຊາ, 2 ສະຖາບັນ, ສໍານັກງານອະທີການບໍດີ ແລະ ໂຮງຮຽນພອນສະຫັວນກຽມມະຫາວິທະຍາໄລ ແລະ ຊົນເຜົ່າ), ປະກອບມີ 85 ໜ່ວຍ  ແລະ 389 ຈຸ. ປະຈຸບັນທົ່ວ ມຊ ມີແມ່ຍິງທັງໝົດ 5.911 ສະຫາຍ ໃນນັ້ນ, ເປັນສະມາຊິກແມ່ຍິງ 5.673 ສະຫາຍ, ເປັນພະນັກງານ ແລະ ຄູອາຈານ 752 ສະຫາຍ; ນັກສຶກສາ ແລະ ນັກຮຽນ 5.011 ສະຫາຍ; ໃນ 5 ປີຜ່ານມາ ສະຫະພັນແມ່ຍິງ ມະຫາວິທະຍາໄລແຫ່ງຊາດ ໄດ້ນໍາພາ-ຊີີ້ນໍາ ນໍາພາ ສະຫະພັນແມ່ຍິງຮາກຖານທີ່ຂຶີ້ນກັບ ສຍ.ມຊໃນການເອົາໃຈໃສ່ ສຶກສາອົບຮົມການເມືອງ-ແນວຄິດໃຫ້ສະມາຊິກແມ່ຍິງ, ພະນັກງານ, ຄູ ອາຈານ, ນັກຮຽນ, ນັກສຶກສາ ດ້ວຍຫຼາຍຮູບຫຼາຍແບບ; ດ້ານວຽກງານການສົ່ງເສີມ ແລະສະຫວັດດີການ ໄດ້ເບິ່ງແຍງເອື້ອຍນ້ອງແມ່ຍິງກ່ຽກັບນະໂຍບາຍຕ່າໆ ແລະຊຸກຍູ້ສົ່ງເສີມເອື້ອຍນ້ອງແມ່ຍິງໃນການເຂົ້າຍົກລະດັບຄວາມຮູ້ຄວາມສາມາດ ແລະການສົ່ງເສີມຄວາມກ້າວໜ້າຂອງແມ່ຍິງ, ຄວາມສະເໝີພາບຍິງ-ຊາຍ, ວຽກແມ່ ແລະ ເດັກ, ໄດ້ເຂົ້າຮ່ວມກິດຈະກໍາ ແລະຝືກອົບຮົມໃນວຽກງານຕ່າງໆ ເປັນຕົ້ນ; ພ້ອມນັ້ນ ສ້າງຄວາມເຂັ້ມແຂງໃຫ້ສະມາຊິກແມ່ຍິງ ທີ່ເປັນພະນັກງານລັດຖະກອນ ,ສົ່ງເສີມເພດຍິງໃຫ້ເປັນນັກຄົ້ນຄວ້າວິທະຍາສາດ-ເຕັກໂນໂລຊີ, ສ້າງຄວາມເຂັ້ມແຂງໃຫ້ຄະນະບໍລິຫານງານສະຫະພັນແມ່ຍິງ ແຕ່ລະຂັ້ນ ມີຄວາມເຂົ້າໃຈ, ສາມາດ ນໍາພາ-ຊີ້ນຳ ແລະ ບໍລິຫານ-ຄຸ້ມຄອງ ອົງການຈັດຕັ້ງສະຫະພັນແມ່ຍິງ,ສົ່ງເສີມ ສະມາຊິກແມ່ຍິງ ໃຫ້ໄດ້ບັນຈຸເຂົ້າໃນຕໍາແໜ່ງບໍລິຫານ, ສ້າງຄວາມເຂັ້ມແຂງໃຫ້ແກ່ນັກສຶກສາຍິງທາງດ້ານວິທະຍາສາດ-ເຕັກໂນໂລຊີ ແລະ ນະວັດຕະກໍາ.

ຜ່ານຜົນງານການຈັດຕັ້ງປະຕິບັດໃນໄລຍະ 5 ປີຜ່ານມາ ໄດ້ຮັບການຍ້ອງຍໍຂັ້ນກະຊວງສຶກສາທິການ ແລະ ກີລາ ທັງໝົດ 753 ສະຫາຍ; ໄດ້ຮັບການຍ້ອງຍໍຂັ້ນ ມຊ 109 ສະຫາຍ.

ທີ່ປະຊຸມຍັງໄດ້ມີການມີການຄັດເລືອກຄະນະບໍລິຫານງານສະຫະພັນແມ່ຍິງຊຸດໃໝ່ ໂດຍມີຜູ້ລົງສະໝັກທັງໝົດ 24 ສະຫາຍ, ເພື່ອເລືອກເອົາ 19 ສະຫາຍ. ຫຼັງຈາການການປ່ອນບັດຄັດເລືອກ ແລະກອງປະຊຸມຮອບປະຖົມມະເລິກທີ່ປະຊຸມໄດ້ເລືອກເອົາຄະນະບໍລິຫານສະຫະພັນກຳມະບານ ມຊ ທັງໝົດ 19 ສະຫາຍ ໂດຍໃຫ້ສະຫາຍ ສະຫາຍ ນາງໃບສີ ວ່າເນັ່ງຈື ເປັນປະທານ (ຄະນະປະຈຳ), ສະຫາຍ ນາງ ສົມສະໜຸກ ສີລິບຸນທັນ ຮອງປະທານ (ຄະນະປະຈຳ), ສະຫາຍ ນາງ ດາວວີ ກອງມະນີລາ ຮອງປະທານ (ຄະນະປະຈຳ),ສະຫາຍ ນາງ ສົມພອນ ວໍລະຈັກ ຮອງປະທານ (ຄະນະປະຈຳ), ສະຫາຍ ນາງ ຈັນທະຈອນ ສິງຫາລາດ ຮອງປະທານ (ຄະນະປະຈໍາ),ສະຫາຍ ນາງ ປິ່ນແກ້ວ ພົມມະຈັກ ປະທານກວດກາ (ຄະນະປະຈໍາ), ສະຫາຍ ນາງ ພິລາວັນ ອິນທະບົວລີ ຮອງປະທານກວດກາ (ຄະນະປະຈຳ) ແລະອີກ 12 ສະຫາຍເປັນຄະນະ.

ພາບບັນຍາກາດ