ໃນວັນທີ 18 ກຸມພາ 2026 ຜ່ານມານີ້, ຄະນະວິທະຍາສາດສັງຄົມ(ຄສຄ) ມະຫາວິທະຍາໄລແຫ່ງຊາດ (ມຊ) ໄດ້ຈັດກອງປະຊຸມສໍາມະນາທາງວິຊາການ ກ່ຽວກັບການຄົ້ນຄວ້າບູຮານຄະດີ ຂອງເຄື່ອງຈັກສານກະຕ່າໃນລາວ ລະຫວ່າງ ພາກວິຊາປະຫວັດສາດ ແລະ ບູຮານວິທະຍາ ຄສຄ. ມຊ ຮ່ວມກັບຊ່ຽວຊານດ້ານບູຮານວິທະຍາຂອງຍີ່ປຸ່ນ ທີ່ຫ້ອງປະຊຸມຂອງ ຄສຄ, ໂດຍການເຂົ້າຮ່ວມຂອງທ່ານ ຮສ.ປອ ນາງ ສົມຄິດ ບູລິດຳ ຫົວໜ້າຄະນະວິຊາ ຄສຄ, ທ່ານ ດຣ. ຍູກະ ຊາຊາກິ ຈາກມະຫາວິທະຍາໄລການາຊາວະ ປະເທດຍີ່ປຸ່ນ, ມີຫົວໜ້າພາກວິຊາ, ຜູ້ຊ່ຽວຊານ ແລະ ພະນັກງານ, ຄູ-ອາຈານ ແລະນັກສຶກສາ ເຂົ້າຮ່ວມ.

ກອງປະຊຸມຄັ້ງນີ້ ຈັດຂຶ້ນເພື່ອລາຍງານຜົນຂອງການຄົ້ນຄວ້າ, ການເກັບກຳຂໍ້ມູນ ແລະ ການສຳຫຼວດພາກສະໜາມກ່ຽວກັບຫັດຖະກຳຈັກສານໄມ້ປ່ອງໃນປີ 2022-2025; ນັບແຕ່ປີ 2012 ເປັນຕົ້ນມາ ພາກວິຊາປະຫວັດສາດ ແລະ ບູຮານວິທະຍາ ຮ່ວມກັບຊ່ຽວຊານທາງດ້ານບູຮານວິທະຍາຂອງຍີ່ປຸ່ນ ໃນການສຳຫຼວດເຄື່ອງຈັກສານຂອງປະຊາຊົນລາວບັນດາເຜົ່າ ແມ່ນຕິດພັນກັບການດຳລົງຊີວິດ ແລະ ວັດທະນະທຳ ຂອງແຕ່ລະທ້ອງຖິ່ນ. ເຊິ່ງປີ 2022 ໄດ້ມີການສຳຫຼວດຢູ່ແຂວງ ອັດຕະປື ແລະ ເມືອງໂພນໂຮງ ແຂວງວຽງຈັນ, ປີ 2024 ໄດ້ລົງສຳຫຼວດຢູ່ເມືອງສິງ, ເມືອງລອງ ແຂວງຫຼວງນໍ້າທາ, ປີ 2025 ໄດ້ລົງສຳຫຼວດທີ່ບ້ານທ່າໄຜ່ບ້ານ, ບ້ານກໍປົງ ແລະ ບ້ານສອງແຫຼກ ເມືອງນາກາຍ ແຂວງຄຳມ່ວນ ແລະ ການລົງສຳຫຼວດລ່າສຸດ ແມ່ນໃນລະຫວ່າງວັນທີ 12-17 ກຸມພາ 2026, ທີ່ບ້ານພຽງເຜື້ອ, ບ້ານປາວໃຕ້, ບ້ານປາວເໜືອ ເມືອງຊໍາໃຕ້ ແຂວງຫົວພັນ, ເຄື່ອງຈັກສານທີ່ລົງໄປສຳຫຼວດແມ່ນ ກະຕ່າ, ການສານມວຍ (ຫວດ) ໜຶ້ງເຂົ້າ, ກະຕິບເຂົ້າ, ກະບູງ ແລະ ອື່ນໆ ທີ່ເປັນເອກະລັກ ແລະ ລວດລາຍສະເພາະຂອງແຕ່ລະເຂດ.

ໃນວັນທີ 12 ກຸມພາ 2026, ມະຫາວິທະຍາໄລແຫ່ງຊາດ (ມຊ) ໄດ້ມິພິທີປະກາດ ການຈັດຕັ້ງຂັ້ນຫົວໜ້າຫ້ອງການຂອງ 4 ຫ້ອງການຄື: ຫ້ອງການສັງລວມ ແລະພົວພັນຕ່າງປະເທດ, ຫ້ອງການວິຊາການ ແລະຄຸ້ມຄອງນັກສຶກສາ, ຫ້ອງການຈັດຕັ້ງ-ພະນັກງານ ແລະກວດກາ ແລະຫ້ອງການແຜນການ ແລະການເງິນ ທີ່ຫ້ອງປະຊຸມສະໂມສອນໃຫຍ່ ມຊ, ໂດຍການເປັນປະທານຂອງທ່ານ ສຈ. ປອ. ເດຊານຸລາດ ແສນດວງເດດ ຜູ້ອຳນວຍການໃຫຍ່ ມຊ, ມີທ່ານຮອງຜູ້ອຳນວຍການໃຫຍ່, ຫົວໜ້າຄະນະວິຊາ, ພະນັກງານ, ຄູ-ອາຈານ ເຂົ້າຮ່ວມ.

ໃນພິທີ, ທ່ານ ວຽງທອງ ພົນທະຈັກ ຮອງຫົວໜ້າກົມຈັດຕັ້ງກະຊວງສຶກສາທິການ ແລະກິລາ ກໍໄດ້ຂຶ້ນຜ່ານຂໍ້ຕົກລົງ ຂອງທ່ານລັດຖະມົນຕີກະຊວງສຶກສາທິການ ແລະກິລາ ສະບັບເລກທີ 5430/ສສກ, ລົງວັນທີ 12 ກັນຍາ 2025, ວ່າດ້ວຍການແຕ່ງຕັ້ງພະນັກງານດໍາລົງຕໍາແໜ່ງບໍລິຫານ ຂອງມະຫາວິທະຍາໄລແຫ່ງຊາດ ໂດຍແຕ່ງຕັ້ງ ທ່ານ ຮສ. ປອ. ບຸນທອນ ສຸຂະວົງ ຮອງຫົວໜ້າຄະນະວິຊາ ຄະນະເສດຖະສາດ ແລະບໍລິຫານທຸລະກິດ ເປັນຫົວໜ້າຫ້ອງການສັງລວມ ແລະພົວພັນຕ່າງປະເທດ; ຂໍ້ຕົກລົງ ຂອງທ່ານລັດຖະມົນຕີກະຊວງສຶກສາທິການ ແລະກິລາ ສະບັບເລກທີ 558/ສສກ, ລົງວັນທີ 30 ມັງກອນ 2026, ວ່າດ້ວຍການແຕ່ງຕັ້ງພະນັກງານດໍາລົງຕໍາແໜ່ງບໍລິຫານ ຂອງມະຫາວິທະຍາໄລແຫ່ງຊາດ ໂດຍແຕ່ງຕັ້ງ ທ່ານ ປອ. ຊາຍຄຳ ວັນນະໄຊ ເປັນຫົວໜ້າຫ້ອງການການຈັດຕັ້ງ-ພະນັກງານ ແລະກວດກາ; ຂໍ້ຕົກລົງ ຂອງທ່ານລັດຖະມົນຕີກະຊວງສຶກສາທິການ ແລະກິລາ ສະບັບເລກທີ 559/ສສກ, ລົງວັນທີ 30 ມັງກອນ 2026, ວ່າດ້ວຍການແຕ່ງຕັ້ງພະນັກງານດໍາລົງຕໍາແໜ່ງບໍລິຫານ ຂອງມະຫາວິທະຍາໄລແຫ່ງຊາດ ໂດຍແຕ່ງຕັ້ງ ທ່ານ ປອ. ທະນົງສັກ ດວງມາລາ ເປັນຫົວໜ້າຫ້ອງການວິຊາການ ແລະຄຸ້ມຄອງນັກສຶກສາ; ຂໍ້ຕົກລົງ ຂອງທ່ານລັດຖະມົນຕີກະຊວງສຶກສາທິການ ແລະກິລາ ສະບັບເລກທີ 557/ສສກ, ລົງວັນທີ 30 ມັງກອນ 2026, ວ່າດ້ວຍການແຕ່ງຕັ້ງພະນັກງານດໍາລົງຕໍາແໜ່ງບໍລິຫານ ຂອງມະຫາວິທະຍາໄລແຫ່ງຊາດ ໂດຍແຕ່ງຕັ້ງ ທ່ານ ເຢຍລໍ່ ເຍ່ຍວື ເປັນຫົວໜ້າ ຫ້ອງການແຜນການ ແລະການເງິນ.

ໃນໂອກາດນີ້, ທ່ານ ສຈ. ປອ. ເດຊານຸລາດ ແສນດວງເດດ ໄດ້ກ່າວເນັ້ນວ່າ: ການປັບປຸງການຈັດຕັ້ງໃນຄັ້ງນີ້ຖືເປັນບາດກ້າວສຳຄັນທີ່ສຸດນັບແຕ່ມື້ສ້າງຕັ້ງ ມຊ ເປັນຕົ້ນມາ. ນີ້ຄືການປະຕິຮູບໂຄງຮ່າງການບໍລິຫານຄັ້ງໃຫຍ່ ໂດຍການຮ່ວມເອົາ 11 ຫ້ອງການໃນເມື່ອກ່ອນ ເຂົ້າມາເປັນ 4 ຫ້ອງການ ເພື່ອໃຫ້ກົງຈັກມີຄວາມກະທັດຮັດ, ສອດຄ່ອງກັບໜ້າວຽກ ແລະ ມີປະສິດທິພາບສູງຂຶ້ນ. ພ້ອມທັງໄດ້ມອບໝາຍໃຫ້ຜູ້ທີ່ໄດ້ຮັບການແຕ່ງຕັ້ງໃໝ່ ຈົ່ງຍົກສູງຄວາມຮັບຜິດຊອບ ເພື່ອເປັນກຳລັງແຮງຫຼັກໃນການຂັບເຄື່ອນວຽກງານຂອງ ມຊ ໃຫ້ມີຄວາມເຂັ້ມແຂງ.

ໃນວັນທີ 9 ກຸມພາ 2026, ມະຫາວິທະຍາໄລແຫ່ງຊາດ (ມຊ) ໄດ້ມີພິທີປະກາດພະນັກງານລັດຖະກອນ ອອກພັກການ-ຮັບອຸດໜູນບຳນານງວດທີ 1 ປະຈຳປີ 2026 ທີ່ສະໂມສອນໃຫຍ່ ມຊ, ໂດຍການເຂົ້າຮ່ວມຂອງທ່ານ ສຈ. ປອ. ເດຊານຸລາດ ແສນດວງເດດ ຜູ້ອຳນວຍການໃຫຍ່ ມຊ, ມີບັນດາຫົວໜ້າຄະນະວິຊາການ, ຫົວໜ້າຫ້ອງການ, ພະນັກງານ, ຄູ-ອາຈານ ເຂົ້າຮ່ວມ.

ໃນພິທີ, ທ່ານ ປອ. ຊາຍຄຳ ວັນນະໄຊ ຮອງຫົວໜ້າຫ້ອງການຈັດຕັ້ງ ແລະພະນັກງານ ມຊ ກໍໄດ້ຂຶ້ນຜ່ານຂໍ້ຕົກລົງຂອງທ່ານລັດຖະມົນຕີ ກະຊວງສຶກສາທິການ ແລະກິລາ ວ່າດ້ວຍການອະນຸມັດໃຫ້ພະນັກງາລັດຖະກອນ ອອກພັກການ-ຮັບອຸດໜຸນບຳນານ ປະຈຳເດືອນ 1 ງວດ 1 ໃນສົກປີ 2026 ປະກອບມີ 11 ທ່ານຄື: ທ່ານ ນາງ ທອງຈັນ ສີຊົມພູ ຮອງຫົວໜ້າຄະນະວິຊາ ຄະນະວິທະຍາສາດການກີລາ ແລະກາຍະກຳ, ທ່ານ ຄຳໜູນ ອັກຄະໄຊ ຮອງຫົວໜ້າຄະນະວິຊາ ຈາກຄະນະຊັບພະຍາກອນນໍ້າ, ທ່ານ ກົງຄຳ ສີລາພົມ ຈາກຫົວໜ້າຫ້ອງການຄຸ້ມຄອງເຄຫາ ແລະບໍລິການ, ທ່ານ ທາ ບຸນທັນ ຫົວໜ້າພາກວິຊາ ຈາກຄະນະວິສະວະກຳສາດ, ທ່ານ ສຸລິຍັນ ລຸນຈັນທາ ຫົວໜ້າພາກວິຊາ ຈາກຄະນະນິຕິສາດ ແລະລັດຖະສາດ, ທ່ານ ນາງ ນິດສາຄອນ ພິຈິດ ຮອງຫົວໜ້າຫ້ອງການ ມຊ, ທ່ານ ນາງ ລຽນແສງ ເພັງສະຫວັດ ຮອງຫົວໜ້າຫ້ອງການພົວພັນຕ່າງປະເທດ, ທ່ານ ຮສ. ປອ. ທອງວັນ ສິຣິວັນ ຮອງຫົວໜ້າພາກວິຊາ ຈາກຄະນະເສດຖະສາດ ແລະບໍລິຫານທຸລະກິດ, ທ່ານ ສຸດໃຈ ຕົ້ນສະຫວັນ ຫົວໜ້າພະແນກ ຈາກຄະນະວິສະວະກຳສາດ, ທ່ານ ຫວັດສະດີ ແສງອິນທະວົງ ຫົວໜ້າພະແນກ ຈາກຫ້ອງການຄຸ້ມຄອງນັກສຶກສາ ແລະທ່ານ ສຸພາພອນ ລັດຕະນະລາສີ ຫົວໜ້າໜ່ວຍວິຊາ ຈາກຄະນະກະເສດສາດ.

ໃນໂອກາດດັ່ງກ່າວ, ທ່ານ ສຈ. ປອ. ເດຊານຸລາດ ແສນດວງເດດ ກໍໄດ້ມີຄຳເຫັນຕໍ່ທີ່ປະຊຸມໂດຍທ່ານກ່າວວ່າ: ໃນພິທີມື້ນີ້ ຖືເປັນອີກໜື່ງຄວາມພາກພູມໃຈຂອງອາຈານຜູ້ອາວຸໂສທີປະກອບສ່ວນໃນການສິດສອນໃຫ້ກັບ ມຊ ເຊິ່ງມີບາງທ່ານກໍໄດ້ຮັບນາມມະຍົດທາງວິຊາການເປັນຮອງສາດສະດາຈານ, ບາງທ່ານກໍປະກອບສ່ວນໃນການຄົ້ນຄວ້າວິທະຍາສາດ ຈົນເຮັດໃຫ້ ມຊ ມີການຈັດອັນດັບທີດີໃນລະດັບສາກົນ, ບາງທ່ານກໍປະກອບສ່ວນເຂົ້າໃນວຽກງານສາມອົງການຈັດຕັ້ງມະຫາຊົນ ຢ່າງເຕັມທີ່; ຕະຫຼອດໄລຍະ 30 ປີ ຂອງການສ້າງຕັ້ງ ມຊ ບັນດາທ່ານພະນັກງານຜູ້ອາວຸໂສ ໄດ້ກາຍເປັນກຳລັງແຮງສຳຄັນໃນການຊ່ວຍກັນເຕົ້າໂຮມບັນດາສະຖາບັນການສຶກສາ ແລະມະຫາວິທະຍາໄລຕ່າງໆ ເຂົ້າມາເປັນ ມຊ ໃນປະຈຸບັນ, ພວກເຮົາຜ່ານຜ່າອຸສັກຕ່າງໆນາໆ ບໍ່ວ່າຈະເປັນບັນຫາທາງດ້ານເສດຖະກິດ, ວິກິດການ ການແຜ່ລະບາດພະຍາດໂຄວິດ-19 ແລະອື່ນໆ ຕໍ່ກັບບັນຫາຕ່າງໆທີ່ກ່າວມານັ້ນ ບັນດາທ່ານທີ່ໄດ້ຮັບອຸດຫນູນບຳນານແມ່ນຜູ້ທີ່ເຮັດໜ້າທີ່ໄດ້ສຳເລັດໃນການເປັນພະນັກງານລັດຖະກອນຄູ ມີຄວາມຕັ້ງໃຈໃນອຸດົມການອັນຫນຽວແຫນ້ນຂອງການເປັນຄູ, ໃນນາມການຈັດຈັດຕັ້ງ ກໍຄື ມຊ ຂໍສະແດງຄວາມຊົມເຊີຍຕໍ່ກັບຜົນງານອັນໃຫຍ່ຫລວງໃນຄັ້ງນີ້ດ້ວຍ.

ໃນວັນທີ 6 ກຸມພາ 2026 ນີ້, ທີ່ຫ້ອງຮັບແຂກ ສໍານັກງານຜູ້ອໍານວຍການໃຫຍ່ມະຫາວິທະຍາໄລແຫ່ງຊາດ(ມຊ) ທ່ານ ສຈ.ປອ. ພູເພັດ ກ້ຽວພິລາວົງ ຮອງຜູ້ອໍານວຍການໃຫຍ່ ມຊ ພ້ອມດ້ວຍຫົວໜ້າຫ້ອງການ ແລະ ພະນັກງານທີ່ກ່ຽວຂ້ອງ ໄດ້ຕ້ອນຮັບຄະນະຜູ້ແທນຈາກ Dongseo University ສາທາລະນະລັດ ເກົາຫຼີ ທີ່ເດີນທາງມາຢ້ຽມຢາມ ແລະ ປຶກສາຫາລື ເພື່ອແລກປ່ຽນບົດຮຽນດ້ານວິຊາການ.

          ໃນພິທີ ທ່ານ ສຈ. ປອ. ພູເພັດ ກ້ຽວພິລາວົງ ຮອງຜູ້ອໍານວຍການໃຫຍ່ ມຊ ໄດ້ກ່າວສະແດງຄວາມຍິນດີຕໍ່ການມາຢ້ຽມຢາມ ແລະ ກ່າວຕ້ອນຮັບຄະນະຜູ້ແທນດ້ວຍຄວາມອົບອຸ່ນ. ເຊິ່ງການພົບປະກັນໃນຄັ້ງນີ້ ທັງສອງຝ່າຍໄດ້ປຶກສາຫາລືກ່ຽວກັບການຮ່ວມມືດ້ານວິຊາການເຊິ່ງກັນ ແລະກັນໃນອະນາຄົດອັນໃກ້ນີ້, ເພື່ອສ້າງອະນາຄົດທີ່ດີ ແລະ ທັນສະໄໝໃຫ້ແກ່ວຽກງານການສຶກສາ ເວົ້າລວມ; ເວົ້າສະເພາະການຄົ້ນຄວ້າວິທະຍາສາດຂອງນັກວິຊາການທັງສອງ ມະຫາວິທະຍາໄລ. ຄະນະນໍາ ມຊ ມີຄວາມເຊື່ອໝັ້ນຢ່າງຍິ່ງວ່າ ການຮ່ວມມືລະຫວ່າງ ມຊ ແລະ Dongseo University ໃນປີ 2026 ນີ້ ຈະສົ່ງຜົນດີ ແລະ ສ້າງແຮງບັນດານໃຈໃຫ້ແກ່ຄູ-ອາຈານ ກໍຄືນັກສຶກສາໃນການກ້າວໄປສູ່ຄວາມເປັນເລີດໃນລະດັບສາກົນຢ່າງບໍ່ຢຸດຢັ້ງ.