ໃນຕອນບ່າຍວັນທີ 21 ມິຖຸນາ 2023 ນີ້, ຄະນະສະຖາປັດຕະຍະກໍາສາດ (ຄສປ) ມະຫາວິທະຍາໄລແຫ່ງຊາດ(ມຊ) ໄດ້ຈັດງານຕັດສິນການແຂ່ງຂັນອອກແບບ ໃນຫົວຂໍ້ “ເພື່ອສັງຄົມຢູ່ດີກິນດີໃນ ສປປ ລາວ” ໂດຍການກ່າວເປີດພິທີຂອງທ່ານ ຮສ. ປອ. ມະໂນລົດ ພິນິດ ຮອງຄະນະບໍດີ ຄະນະສະຖາປັດຕະຍະກຳສາດ ມຊ, ເຂົ້າຮ່ວມມີບັນດາທ່ານ ຫົວໜ້າພະແນກ, ບັນດາຄະນະກໍາມະການ ຈາກບໍລິສັດຫຍ້າສີຟ້າ, ຈາກສະມາຄົມສະຖາປະນິກ ແລະວິສະວະກອນໂຍທາ, ຈາກບໍລິສັດມາລາລາວ, ຈາກມະຫາວິທະຍາໄລລາດກະບັງປະເທດໄທ ແລະບັນດາພະນັກງານ,  ຄູ-ອາຈານ  ແລະນັກສຶກສາ ຄສປ ເຂົ້າຮ່ວມຢ່າງພ້ອມພຽງ.

          ຈຸດປະສົງໃນການຈັດງານ ແມ່ນເພື່ອເປັນການແລກປ່ຽນ ແລະສົ່ງເສີມຄວາມຄິດສ້າງສັນທາງດ້ານການອອກແບບຂອງນັກສຶກສາ ທຸກສາຂາທີ່ກ່ຽວຂ້ອງດ້ານການອອກແບບໃນ ສປປ ລາວ, ເພື່ອເປັນການກະຕຸກຊຸກຍູ້ໃຫ້ນັກສຶກສາມີສ່ວນຮ່ວມໃນການຄົ້ນຄິດເພື່ອພັດທະນາເສດຖະກິດ-ສັງຄົມໃນ ສປປ ລາວ, ທັງເປັນການສ້າງວັດທະນະທຳດ້ານການອອກແບບທີ່ພິຈາລະນາເພື່ອສັງຄົມທີ່ຢູ່ດີກິນດີ ແລະຄວາມຜາສຸກ, ເປັນການສ້າງຮູບແບບການພັດທະນາລະບົບການສຶກສາແບບມີສ່ວນຮ່ວມລະຫວ່າງພາກສ່ວນຜະລິດແຮງງານ, ນຳໃຊ້ແຮງງານ ແລະພັດທະນາວິຊາຊີບ.

ເນື່ອງຈາກວ່າ ຄສປ ມີຈຸດພິເສດສະເພາະທາງດ້ານການຮຽນ-ການສອນ ໃນແຕ່ລະພາກວິຊາ ກໍຄື: ພາກວິຊາ ສະຖາປັດຕະຍະກຳສາດ, ພາກວິຊາ ອອກແບບສະພາບແວດດລ້ອມຜັງເມືອງ, ພາກວິຊາ ວິທະຍາການອາຄານ ແລະພາກວິຊາ ອອກແບບຜະລິດຕະພັນ-ຕົກແຕ່ງ ແມ່ນໄດ້ຮຽນດ້ານທິດສະດີ ພ້ອມກັບ ການປະຕິບັດຕົວຈິງຕາມແນວຄວາມຄິດທີ່ວ່າ ຄິດເປັນ ເຮັດໄດ້. ໃນແຕ່ລະປີທາງ ຄສປ ໄດ້ມີການຈັດການແຂ່ງຂັນການອອກແບບຢ່າງເປັນປະຈຳ, ເພື່ອເສີມສ້າງທັກສະດ້ານການຮຽນຮູ້ຕະຫຼອດຊີວິດ ຂອງນັກສຶກສາ ແລະເພື່ອເປັນການ ປະກອບສ່ວນ ຊ່ວຍສັງຄົມທາງ ຄສປ ຈຶ່ງມີແນວຄວາມຄິດສ້າງແຮງຈູງໃຈ ແລະກະຕຸກຊຸກຍູ້ ໃຫ້ນັກສຶກສາ ທີ່ກ່ຽວຂ້ອງກັບການອອກແບບໃຫ້ມີແນວຄິດທີ່ຄວນຮັບຜິດຊອບຕໍ່ສັງຄົມໃນອະນາຄົດ. ນອກນີ້ ຍັງໄດ້ສ້າງມຸມມອງດ້ານຄວາມຄິດເບື້ອງຕົ້ນຕໍ່ກັບການແກ້ໄຂບັນຫາທີ່ເກີດຂຶ້ນໃນສັງຄົມລາວ ບໍ່ວ່າຈະເປັນດ້ານເສດຖະກິດທີ່ຫຼຸດຖອຍ ແລະສິ່ງຫຍໍ້ທໍ້ ທາງດ້ານຊ່ອງຫວ່າງຂອງສັງຄົມລາວ.  ໃນການແຂ່ງຂັນ ການອອກແບບນີ້ແມ່ນ ໄດ້ຖືກດຳເນີນ ແລະລະດົມທຶນ ໂດຍຫ້ອງຄົ້ນຄວ້າການພັດທະນາເມືອງ ແລະສິ່ງແວດລ້ອມທີ່ສ້າງຂຶ້ນ ຂອງ ຄສປ. ມຊ. ຮ່ວມກັບພາກສ່ວນນັກສຶກສາ ເກົາຫຼີ ທີ່ມາສຶກສາໃນປະເທດລາວ ແລະບໍລິສັດທີ່ປຶກສາເອຣິ. ກິດຈະກຳການແຂ່ງຂັນນີ້, ແມ່ນໄດ້ລິເລີ່ມຕັ້ງແຕ່ ເດືອນເມສາ 2023 ເຖິງ ທ້າຍເດືອນ ມິຖຸນາ 2023. ໃນຫົວຂໍ້ທີ່ມີຄວາມສຳຄັນຕໍ່ກັບສັງຄົມລາວໃນປັດຈຸບັນ “ Design for Social Well-Being in Laos ”. ຫົວຂໍ້ດັ່ງກ່າວນີ້ແມ່ນເພື່ອໃຫ້ນັກສຶກສາຮ່ວມລະດົມຄວາມຄິດກັນອອກແບບເພື່ອພັດທະນາ ທາງດ້ານການອອກແບບຊ່ວຍເຫຼືອ ແລະ ແກ້ໄຂບັນຫາໃນສັງຄົມ; ເຊິ່ງຫົວຂໍ້ດັ່ງກ່າວນີ້ ແມ່ນໄດ້ເຫັນເຖິງຄວາມສຳຄັນໃນລະດັບພາກພື້ນ ແລະສາກົນ ເຊິ່ງຄັ້ງນີ້ ແມ່ນຄັ້ງທຳອິດສຳລັບຫົວຂໍ້ ການແຂ່ງຂັນດັ່ງກ່າວ ເຊິ່ງ​ມີນັກສຶກສາສົ່ງຜົນງານເຂົ້າຮ່ວມທັງໝົດ 43 ຄົນ, ເຊິ່ງແບ່ງຕາມຫົວຂໍ້ ຍ່ອຍທີ່ຫຼາກຫຼາຍເຊັ່ນ: ການອອກແບບສຳລັບຜູ້ສູງອາຍຸ, ສຳລັບກຸ່ມຄົນພິການ, ກ່ຽວກັບສຸຂະພາບທີ່ດີ, ຄອບຄຸມທຸກເພດທຸກໄວ, ຄວາມປອດໄພ ແລະເຂົ້າເຖິງໄດ້ຂອງຄົນທີ່ມີລາຍໄດ້ຕ່ຳອີກດ້ວຍ.

            ການແຂ່ງຂັນມີ 44 ແບບສົ່ງເຂົ້າປະກວດ ແລະຄັດເຂົ້າຮອບ 10 ແບບ ເຊິ່ງຜົນການແຂ່ງຂັນອອກແບບ ເພື່ອສັງຄົມຢູ່ດີກິນດີໃນ ສປປ ລາວ ຄັ້ງນີ້, ຊະນະເລີດໄດ້ແກ່ ນາງ ທະນາພອນ ຊວ້ານສວນດາວ ສາຂາສະຖາປັດຕະຍະກໍາ ປີທີ 4 ໄດ້ຮັບເງິນລາງວັນ 22.000.000 ກີບ, ໄດ້ອັນດັບທີ 2 ໄດ້ແກ່ ນາງອານິສະຣາ ໄຊຍະກອນ ສາຂາ ອອກແບບຜະລິດຕະພັນ ປີທີ 2 ໄດ້ຮັບເງິນລາງວັນ 15.200.000 ກີບ ແລະອັນດັບທີ 3 ໄດ້ແກ່ທ້າວ ກີມສາຣິດ ປາດ  ສາຂາ ສະຖາປັດຕະຍະກໍາສາດ ປີທີ 3 ໄດ້ຮັບເງິນລາງວັນ 9.500.000 ກີບ ແລະໄດ້ມີນັກສຶກສາໄດ້ຮັບລາງວັນຊົມເຊີຍ 7 ນ້ອງ ໄດ້ເງິນລາງວັນຜູ້ລະ 760.000 ກີບ.

ພາບບັນຍາກາດ

ສະຖາບັນຂົງຈື ມະຫາວິທະຍາໄລແຫ່ງຊາດ(ມຊ) ໄດ້ຈັດກິດຈະກຳແຂ່ງຂັນຂົວພາສາຈີນ ຄັ້ງທີ 22 ປະຈຳປີ 2023 ເພື່ອສ້າງໂອກາດໃຫ້ແກ່ນັກສຶກສາ, ເປັນເວທີທີ່ສະແດງຄວາມຮູ້-ຄວາມສາມາດ ແລະ ຢັ້ງຢືນລະດັບຄວາມສາມາດຂອງຕົນເອງ, ເພື່ອຄັດເລືອກເອົາຜູ້ທີ່ດີເດັ່ນເຂົ້າຮ່ວມແຂ່ງຂັນລະດັບໂລກ ທີ່ ສປ ຈີນ.

ການແຂ່ງຂັນດັ່ງກ່າວ, ໄດ້ຈັດຂຶ້ນເມື່ອວັນທີ 20 ມິຖຸນາ 2023 ທີ່ສະຖາບັນຂົງຈື ໂດຍໃຫ້ກຽດເຂົ້າຮ່ວມຂອງທ່ານ ຮສ. ປອ. ອຸດົມ ພອນຄຳເພັງ ອະທິການບໍດີ ມະຫາວິທະຍາໄລແຫ່ງຊາດ, ທ່ານ ຕູ້ສາງຊິງ ຫົວໜ້າຫ້ອງການ ການເມືອງ ສະຖານເອກອັກຄະລັດຖະທູດ ສປ ຈີນ ປະຈຳ ສປປ ລາວ, ທ່ານ ຄຳຮຸ່ງ ຈັນທະວົງ ຜູ້ອຳນວຍການສະຖາບັນຂົງຈືຝ່າຍລາວ, ພ້ອມດ້ວຍແຂກຖືກເຊີນ ພະນັກງານ, ຄູ-ອາຈານ ແລະ ນັກສຶກສາເຂົ້າຮ່ວມຢ່າງພ້ອມພຽງ.

ໂອກາດດັ່ງກ່າວ, ທ່ານ ຮສ. ປອ. ອຸດົມ ພອນຄຳເພັງ ກ່າວວ່າ: ການແຂ່ງຂັນຂົວພາສາຈີນ ເປັນກິດຈະກຳໜຶ່ງທີ່ສຳຄັນ, ເປັນການແຂ່ງຂັນຄວາມຮູ້ດ້ານພາສາຈີນ ແລະ ທັກສະພອນສະຫວັນດ້ານຕ່າງໆຂອງນັກສຶກສາ ມະຫາວິທະຍາໄລທົ່ວປະເທດ ເພື່ອຄັດເລືອກເອົາຜູ້ທີ່ດີເດັ່ນເຂົ້າຮ່ວມແຂ່ງຂັນຂົວພາສາຈີນ ຂອງນັກສຶກສາມະຫາວິທະຍາໄລທົ່ວໂລກ ໂດຍໄດ້ຈັດຕັ້ງແຂ່ງຂັນໃນແຕ່ລະປີ ແລະ ມາຮອດປີ 2023 ກໍເປັນຄັ້ງທີ 22. ສຳລັບຈັດການແຂ່ງຂັນຂົວພາສາຈີນ ໃນທົ່ວປະເທດລາວ ແລະ ການຈັດການແຂ່ງຂັນຄັ້ງນີ້ ຈະເປັນເວທີສຳຄັນໃຫ້ນັກສຶກສາໄດ້ສະແດງຄວາມສາມາດຂອງຕົນດ້ານພາສາ ແລະ ຈະຄັດເລືອກຜູ້ທີ່ດີເດັ່ນເປັນຕົວແທນຂອງນັກສຶກສາ ມະຫາວິທະຍາໄລຂອງລາວ ເຂົ້າຮ່ວມແຂ່ງຂັນລະດັບໂລກ ທີ່ ສປ ຈີນ ໂດຍຈະຈັດຂຶ້ນໃນຕໍ່ໜ້ານີ້.

ການຈັດກິດຈະກຳດັ່ງກ່າວນີ້, ຍັງເປັນການຊ່ວຍຊຸກຍູ້ການຮຽນຮູ້ພາສາຈີນຂອງນັກສຶກສາ ທັງໄດ້ຮຽນຮູ້ແລກປ່ຽນດ້ານວັດທະນະທຳອັນດີງາມຂອງສອງຊາດ ລາວ-ຈີນ ເພື່ອເປັນກໍາລັງແຮງທີ່ສໍາຄັນປະກອບສ່ວນເຂົ້າໃນການສ້າງຜົນງານໃຫ້ແກ່ການພົວພັນຮ່ວມມື ແລະ ມິດຕະພາບອັນດີງາມຂອງລາວ-ຈີນ ໃຫ້ນັບມື້ເຂັ້ມແຂງຫຼາຍຂຶ້ນກວ່າເກົ່າ. ພ້ອມກັນນີ້, ຍັງເປັນໜໍ່ແໜງຜູ້ສືບທອດທີ່ມີຄວາມຮູ້-ຄວາມສາມາດ ປະກອບສ່ວນສ້າງຜົນງານອັນໃຫຍ່ຫຼວງແກ່ປະເທດຊາດ ແລະ ເປັນຂົວຕໍ່ໃຫ້ແກ່ການພົວພັນຮ່ວມມືສອງປະເທດ ລາວ-ຈີນ ໃນຕໍ່ໜ້າໃຫ້ແໜ້ນແຟ້ນຍິ່ງຂຶ້ນ.

 ການແຂ່ງຂັນ ປີ 2023 ນີ້ ມີຜູ້ເຂົ້າຮ່ວມທັງໝົດ 15 ຄົນ ຊຶ່ງຜ່ານການແຂ່ງຂັນໃນດ້ານການເວົ້າ, ຖາມ-ຕອບ ແລະ ການສະແດງດີເດັ່ນ ຜົນປະກົດວ່າ: ຊະນະເລີດ ໄດ້ແກ່ ນາງ ພອນທິບ ລັດຕະນະວົງ ນັກສຶກສາປີທີ 1, ອັນດັບ 2 ນາງ ເຂັມອັກສອນ ພົມມະຈັນ ນັກສຶກສາປີທີ 2 ແລະ ລາງວັນທີ 3 ມີທັງໝົດ 13 ຄົນ. ສະເພາະຜູ້ຊະນະເລີດການແຂ່ງຂັນຄັ້ງນີ້, ຈະໄດ້ໄປເຂົ້າຮ່ວມແຂ່ງຂັນຂົວພາສາຈີນ ທີ່ຈັດຂຶ້ນຢູ່ ສປ ຈີນ ໃນມໍ່ໆນີ້.

ພາບບັນຍາກາດ

ໃນຕອນບາ່ຍ ວັນທີ 7 ມິຖຸນາ 2023 ຜ່ານມາ, ພາກວິຊາພາສາຈີນ ຄະນະອັກສອນສາດ (ຄອສ) ມະຫາວິທະຍາໄລແຫ່ງຊາດ (ມຊ) ໄດ້ຈັດງານແຂ່ງຂັນຮ້ອງເພງຈີນ ຄັ້ງທີ I ທີ່ສະໂມສອນໃຫຍ່ ມຊ, ໂດຍການເຂົ້າຮ່ວມຂອງທ່ານ ໂພໄຊ ເທບວິໄລວົງ ຮອງຄະນະບໍດີ ຄອສ, ມີບັນແຂກຖືກເຊີນ, ຄະນະກຳມະການຕັດສິນການແຂ່ງຂັນ, ພະນັກງານ, ຄູ-ອາຈານ ແລະນັກສຶກສາ ເຂົ້າຮ່ວມ.

          ການຈັດກິດຈະກຳໃນຄັ້ງນີ້ ແມ່ນເພື່ອໃຫ້ນັກສຶກສາທີ່ຮຽນພາສາຈີນໄດ້ຮຽນຮູ້ພາສາ ແລະ ວັດທະນະທຳຂອງ ສປ ຈີນ ຢ່າງເລິກເຊິ່ງໂດຍຜ່ານບົດເພງ ແລະສຽງດົນຕີ, ການແຕ່ງກາຍ ທີ່ເປັນເອກະລັກສະເພາະຂອງ ສປ ຈີນ, ພ້ອມທັງເປັນການເຝິກຝົນໃຫ້ນັກສຶກສາໄດ້ກ້າສະແດງຄວາມສາມາດໃນການຮ້ອງເພງອອກສູ່ສັງຄົມ.

          ການແຂ່ງຂັນໃນຄັ້ງນີ້ ມີນັກສຶກສາເຂົ້າຮ່ວມທັງໝົດ 15 ຄົນ ເຊິ່ງລ້ວນແຕ່ແມ່ນນັກສຶກສາຈາກພາກວິຊາພາສາຈີນ ຄອສ; ຜ່ານການແຂ່ງຂັນຜົນປະກົດວ່າ ລາງວັນຊະນະເລີດໄດ້ແກ່ ນາງ ປີວື ໄຟທ່າວປາໄຈ ນັກສຶກສາປີທີ 3 ໄດ້ຮັບທຶນການສຶກສາ 2,000,000 ກີບ; ລາງວັນທີ 2 ມີ 3 ຄົນໄດ້ແກ່: ທ້າວ ເຢີເລົ່າ, ນາງ ດອກເຖ ແລະ ນາງ ໄມມົນກື ໄດ້ຮັບທຶນການສຶກສາ ຄົນລະ 1,500,000 ກີບ; ສ່ວນລາງວັນທີ 3 ມີ 5 ຄົນໄດ້ແກ່: ທ້າວ ບຸນຈັນ, ທ້າວ ຕຸທາວ, ທ້າວ ຢີເລັງລໍ່, ທ້າວ ວິໂຊຢ່າງ ແລະ ທ້າວ ບີປອຍ ໄດ້ຮັບທຶນການສຶກສາຄົນລະ 1,000,000 ກີບ.

ພາບບັນຍາກາດ

ໃນຕອນເຊົ້າ ວັນທີ 5 ມິຖຸນາ 2023 ຜ່ານມາ,  ຄະນະວິທະຍາສາດສິ່ງແວດລ້ອມ (ຄສວ) ມະຫາວິທະຍາໄລແຫ່ງຊາດ (ມຊ) ໄດ້ຈັດກິດຈະກຳສະເຫຼີມ-ສະຫຼອງວັນສິ່ງແວດລ້ອມໂລກ ຂຶ້ນທີ່ຄະນະຂອງຕົນ, ໂດຍການເປັນປະທານ ຂອງທ່ານ ຮສ. ໂພສີ ທິບດາວັນ ຮອງອະທິການບໍດີ ມຊ, ທ່ານ ຮສ. ປອ. ຈັນດາ ວົງສົມບັດ ຄະນະບໍດີ ຄສວ, ມີບັນດາທ່ານຜູ້ຕາງໜ້າຈາກອົງການຈັດຕັ້ງສາກົນ, ກະຊວງ, ກົມກອງທີ່ກ່ຽວຂ້ອງ, ພະນັກງານ, ຄູ-ອາຈານ ແລະ ນັກສຶກສາເຂົ້າຮ່ວມ.

      ໃນໂອກາດນີ້, ທ່ານ ຮສ. ໂພສີ ທິບດາວັນ ໄດ້ຂຶ້ນກ່າວເປີດພິທີ, ເຊິ່ງທ່ານກ່າວວ່າ: ຄົນເຮົາອາໄສທຳມະຊາດ ກໍຄື ສິ່ງແວດລ້ອມໃນການດຳລົງຊີວິດ ແລະໄດ້ຮັບຜົນປະໂຫຍດຫຼາຍຢ່າງຈາກສິ່ງແວດລ້ອມ; ປັນຈຸບັນສິ່ງແວດລ້ອມໃນຫຼາຍເຂດ ໄດ້ຖືກທຳລາຍຈາກຄົນເຮົາ ຈຶ່ງພາໃຫ້ເກີດໄພທໍາມະຊາດຕາມມາ. ສະນັ້ນ, ພວກເຮົາທຸກຄົນຕ້ອງຊ່ວຍກັນເປັນເຈົ້າການໃນການອະນຸລັກ-ຮັກສາ ສິ່ງແວດລ້ອມໃຫ້ສະອາດ ປາສະຈາກມົນລະພິດ ເພື່ອການພັດທະນາແບບຍືນຍົງ.

      ວັນສິ່ງແວດລ້ອມໂລກ ແມ່ນໄດ້ຈັດຂຶ້ນໃນວັນທີ 5 ມິຖຸນາ ຂອງທຸກໆປີ ເຊິ່ງໃນປີນີ້, ຄສວ ກໍໄດ້ມີການຈັດກິດຈະກຳທີ່ຫຼາກຫຼາຍເພື່ອໃຫ້ຜູ້ທີ່ເຂົ້າຮ່ວມໄດ້ຮູ້ ແລະເຂົ້າໃຈກ່ຽວກັບການອະນຸລັກ ແລະປົກປັກຮັກສາສິ່ງແວດລ້ອມ, ເພື່ອເຜີຍແຜ່ຄວາມໝາຍຄວາມສໍາຄັນຂອງວັນສິ່ງແວດລ້ອມໂລກ ແລະເພື່ອສ້າງຂະ​ບວນການປຸກຈິດສໍານຶກອັນດີຕໍ່ສິ່ງແວດລ້ອມໃຫ້​ແກ່ນັກຮຽນນັກສຶກສາ ເຊິ່ງກິດຈະກໍາພາຍໃນງານມີ ການວາງບູດສະແດງຈາກ 4 ພາກວິຊາຂອງຄະນະ​, ອົງການຈັດສາກົນ ແລະໜ່ວຍງານຕ່າງໆ; ການບັນຍາຍກ່ຽວກັບຜົນກະທົບຂອງສິ່ງເສດເຫຼືອຂອງປາສຕິກ “Effect and Solution to Microplastic Pollution”, ຂະບວນການຫຼຸດຜ່ອນຂີ້ເຫຍື້ອປາສຕິກດ້ວຍຂະບວນການ Pyrolysis; ການສາຍສາລະຄະດີກ່ຽວກັບສິ່ງແວດລ້ອມ ເພື່ອສ້າງຂະບວນການທີ່ມີປະໂຫຍດໃຫ້ແກ່ນັກຮຽນນັກສຶກສາໃນຄະນະວິທະຍາສາດສິ່ງແວດລ້ອມ ແລະຜູ້ສົນໃຈທົ່ວໄປໃນສັງຄົມ ທີ່ໂຮງໜັງຊິດຕີ້ເພັກດົງໂດກ.

ພາບບັນຍາກາດ