ໃນວັນທີ 23 ພືດສະພາ 2023 ຜ່ານມາ, ຄະນະວິທະຍາສາດສັງຄົມ (ຄສຄ) ມະຫາວິທະຍາໄລແຫ່ງຊາດ(ມຊ)ໄດ້ຈັດພິທີເປີດຫຼັກສູດການຮຽນ-ການສອນ ໃນລະດັບປະລິນຍາເອກ ສາຂາການພັດທະນາສັງຄົມ ທີ່ຫ້ອງປະຊຸມສະໂມສອນ ມຊ, ໂດຍການເປັນປະທານຂອງທ່ານ ຮສ. ປອ. ເດຊານຸລາດ ແສນດວງເດດ ຮອງອະທິການບໍດີ ມຊ, ມີທ່ານ ຮສ. ປອ. ໄກສອນ ເພັງໂສພາ ຫົວໜ້າຫ້ອງການ ການສຶກສາຫຼັງປະລິນຍາຕີ, ພ້ອມດ້ວຍແຂກຖືກເຊີນ ພະນັກງານ, ຄູ-ອາຈານ ແລະ ນັກສຶກສາເຂົ້າຮ່ວມ.

      ໃນພິທີ, ທ່ານ ອຸດອນ ວົງສົມມີ ຫົວໜ້າພະແນກການສຶກສາ ຫຼັງປະລິນຍາຕີ ໄດ້ຂຶ້ນຜ່ານຂໍ້ຕົກລົງຂອງທ່ານລັດຖະມົນຕີກະຊວງສຶກສາທິການ ແລະກິີລາ ສະບັບເລກທີ 1321/ສສກ, ລົງວັນທີ 10 ເມສາ 2023, ວ່າດ້ວຍການຮອງຮັບ ແລະອະນຸມັດນໍາໃຊ້ຫຼັກສູດ ລະດັບປະລິນຍາເອກ ວິທະຍາສາດສັງຄົມ ສາຂາ ການພັດທະນາສັງຄົມ ຢູ່ຄະນະວິທະຍາສາດສັງຄົມ ມຊ; ເຊິ່ງອະນຸມັດໃຫ້ສາມາດຮັບນັກສຶກສາໄດ້ 7 ຄົນ/ຫຼັກສູດຕໍ່ປີ; ເຊິ່ງຈະໄດ້ຈັດການຮຽນ-ການສອນແບບເປັນໜ່ວຍກິດ ແບບເຕັມເວລາ (ຮຽນພາກທິດສະດີວັນເສົາ-ວັນອາທິດ ພາກເຊົ້າແຕ່ເວລາ 8:00 – 11:30, ພາກບ່າຍ 13:00 – 16:30 ນາທີ) ໃຊ້ເວລາຮຽນທັງໝົດ 3 ປີ (6 ພາກຮຽນ). ສຳລັບຂັ້ນຕອນການສະໝັກ 1.) ຄັດເລືອກເອກະສານສະໝັກຕາມເງື່ອນໄຂ, 2.) ສອບເສັງ (ພາກຂຽນ) ແລະ 3.) ສຳພາດ (ພາກປາກເປົ່າ); ໄລຍະເວລາເປີດຮັບສະໝັກ ເລີ່ມແຕ່ 1 ມີຖຸນາ ຫາ 13 ສິງຫາ 2023 ເຊິ່ງມື້ສອບເສັງ ແລະສຳພາດ ແມ່ນວັນທີ 19 ສິງຫາ 2023 ສຳລັບຄ່າຮຽນແມ່ນ 58,000,000 ກີບຕໍ່ຄົນ.

ຫຼັກສູດປະລິນຍາເອກວິທະຍາສາດສັງຄົມ ສາຂາການພັດທະນາສັງຄົມ ຖືເປັນຫຼັກສູດປະລິນຍາເອກທີ 8 ຂອງ ມຊ ແລະ ເປັນຫຼັກສູດປະລິນຍາເອກ ສາຂາທຳອິດທີ່ກ່ຽວກັບວິທະຍາສາດສັງຄົມ. ຈຸດປະສົງຂອງຫຼັກສູດແມ່ນເພື່ອສ້າງນັກວິຊາການດ້ານການພັດທະນາສັງຄົມ ທີ່ໜັກແໜ້ນດ້ານພື້ນຖານທິດສະດີ, ມີຄວາມຮູ້ຄວາມເຂົ້າໃຈກວ້າງຂວາງເລິກເຊິ່ງ, ມີທັກສະດ້ານການຄົ້ນຄວ້າວິທະຍາສາດ ເພື່ອເປັນພື້ນຖານໃນການພັດທະນາໃຫ້ກາຍເປັນຜູ້ຊ່ຽວຊານໃນດ້ານການຄົ້ນຄວ້າວິທະຍາສາດ ໃຫ້ຖືກຕ້ອງຕາມຫຼັກວິທະຍາ; ເພື່ອສ້າງ ແລະຍົກລະດັບດ້ານວິທະຍາສາດ ໃຫ້ແກ່ອະດີດນັກສຶກສາທີ່ສໍາເລັດການສຶກສາໃນລະດັບປະລິນຍາໂທ ວິທະຍາສາດສັງຄົມ ໄດ້ມີໂອກາດກັບມາຍົກລະດັບວິຊາສະເພາະໃຫ້ສູງຂຶ້ນ; ຍົກລະດັບນັກຄົ້ນຄວ້າໃຫ້ມີຄວາມຮູ້-ຄວາມສາມາດເທົ່າທຽມກັບພາກພື້ນ ແລະສາກົນ ໂດຍຜ່ານການຖ່າຍທອດຄວາມຮູ້ຈາກຜູ້ຊ່ຽວຊານສະເພາະດ້ານ.

ສຳລັບຂໍ້ມູນເພີ່ມເຕີມແມ່ນສາມາດສອບຖາມໄດ້ທີ່ ໂທລະສັບ: 021 770876; 030 5713642 ຄະນະວິທະຍາສາດສັງຄົມ ໃນໂມງ ແລະເວລາລັດຖະການ.

ພາບບັນຍາກາດ

ກິດຈະກໍາສົ່ງເສີມທັກສະການເວົ້າພາຍໃຕ້ຫົວຂໍ້ “ເວົ້າມີວາທະເພື່ອສົ່ງເສີມທັກສະການໃຊ້ພາສາ ແລະວັດທະນະທໍາລາວ” ໄດ້ຈັດຂຶ້ນໃນວັນທີ 17 ພຶດສະພາ 2023 ທີ່ສະໂມສອນມະຫາວິທະຍາໄລແຫ່ງຊາດ ໂດຍການເຂົ້າຮ່ວມເປັນປະທານຂອງທ່ານ ອຈ. ໄມພອນ ດວງພະສີ ຫົວໜ້າພາກວິຊາພາສາ-ວັດທະນະທໍາລາວ, ຄະນະອັກສອນສາດ ມະຫາວິທະຍາໄລແຫ່ງຊາດ(ມຊ), ເຂົ້າຮ່ວມມີບັນດາພະນັກງານ, ຄູ-ອາຈານ, ຜູ້ໃຫ້ການອຸປະຖໍາ, ມີນັກສຶກສາທົ່ວພາກວິຊາ ແລະນັກສຶກສາອ້ອມຂ້າງ ມຊ. ເຂົ້າຮ່ວມຢ່າງພ້ອມພຽງ.

ການຈັດກິດຈະກໍາໃນຄັ້ງນີ້ ແມ່ນເພື່ອເປັນການປະຕິບັດຕາມແຜນການສຶກສາປະຈໍາສົກສຶກສາ 2022-2023 ຂອງພາກວິຊາພາສາ-ວັດທະນະທໍາລາວ ກໍຄືນອນຢູ່ໃນ 5 ຫຼັກມູນການສຶກສາທີ່ທາງກະຊວງສຶກສາທິການ ແລະກີລາວາງອອກ. ທັງເປັນການສົ່ງເສີມໃຫ້ຄົນລາວ ກໍຄືໄວໜຸ່ມລາວໃຫ້ຫັນມາສົນໃຈໃນການປົກປັກຮັກສາ ແລະສົ່ງເສີມການນໍາໃຊ້ພາສາລາວໃນຊີວິດປະຈໍາວັນ ແລະສື່ຕ່າງໆຢ່າງຖືກຕ້ອງ ແລະເໝາະສົມ, ພ້ອມທັງຍົກຄຸນຄ່າໃຫ້ສັງຄົມເຫັນຄວາມສໍາຄັນຂອງວັດທະນະທໍາທີ່ເປັນເອກະລັກຂອງຊາດໃຫ້ນັບມື້ນັບຫຼາຍຂຶ້ນ.

ການແຂ່ງຂັນໃນຄັ້ງນີ້ ມີຜູ້ເຂົ້າຮ່ວມແຂ່ງຂັນທັງໝົດ 14 ຄົນ ໃນນັ້ນມີນັກສຶກລາວ, ຫວຽດນາມ, ກໍາປູເຈຍ ແລະ ມຽນມາ ທີ່ກໍາລັງສຶກສາຢູ່ປີທີ 1 - 4 ຂອງພາກວິຊາພາສາ-ວັດທະນະທໍາລາວ ຄະນະອັກສອນສາດ ມຊ. ເຊິ່ງການແຂ່ງຂັນໄດ້ແບ່ງອອກເປັນ 3 ຮອບຄື ຮອບທີ 1 ແມ່ນການເວົ້າໂດຍການກະກຽມລ່ວງໜ້າ ທີ່ມີເນື້ອໃນສື່ເຖິງການປົກປັກຮັກສາ ແລະສົ່ງເສີມວັດທະນະທໍາລາວເຊັ່ນຫົວຂໍ້ ຄົນລາວຮຽນພາສາລາວເພື່ອຫຍັງ?, ນັກສຶກສາຕ່າງປະເທດໄດ້ຫຍັງຈາກການຮຽນພາສາລາວ, ໄວໜຸ່ມຍຸກໃໝ່ ຄວນໃສ່ໃຈວັດທະນະທໍາ, ຮອຍຍິ້ມຂອງວັດທະນະທໍາ ເປັນຕົ້ນ. ຮອບທີ 2 ແມ່ນເວົ້າໂດຍບໍ່ໄດ້ກຽມ ໂດຍການຈົກສະຫຼາກເອົາຫົວຂໍ້ໃດໜຶ່ງ ແລະ ຮອບທີ 3 ແມ່ນຮອບຕອບຄໍາຖາມສະແດງທັດສະນະຄະຕິເພື່ອຊິງຊະນະເລີດ.

ຜົນການແຂ່ງຂັນ ລາງວັນຊະນະເລີດ ໄດ້ແກ່ ທ້າວ ຈັບ ວິໄລວອນ ນັກສຶກສາຫ້ອງ ປີ 3 ຂ. ເວົ້າສະແດງທັດສະນະພາຍໃຕ້ຫົວຂໍ້: ການແນະນໍາ ແລະເຊີນຊວນໃຫ້ໄວໜຸ່ມຫັນມາປົກປັກຮັກສາ ແລະສົ່ງເສີມວັດທະນະທໍາລາວ, ລາງວັນທີ 2 ໄດແກ່ ທ້າວ ຫງວຽນຍືກວາງຮຸ່ຍ ນັກສຶກສາຫວຽດນາມ ປີ 4 ຂ. ຫົວຂໍ້: ການແນະນໍາ ແລະ ສະເໜີວິທີແກ້ໄຂບັນຫາການໃຊ້ພາສາລາວທີ່ຜິດພາດໃນສື່ສັງຄົມອອນລາຍຂອງໄວໜຸ່ມປັດຈຸບັນ ແລະ ລາງວັນທີ 3 ໄດ້ແກ່ ນາງ ສາພອນ ພົມມະຈັນ ນັກສຶກສາຫ້ອງ ປີ 3 ກ. ເວົ້າໃນຫົວຂໍ້: ບົດບາດຂອງວັນນະຄະດີ ກັບການນໍາມາປະຍຸກໃຊ້ໃນການດໍາລົງຊີວິດ ເຊິ່ງຕະຫຼອດງານແມ່ນເຕັມໄປດ້ວຍບັນຍາກາດຄຶກຄື້ນ ແລະມ່ວນຊື່ນ.

ພາບບັນຍາກາດ

ໃນວັນທີ 17 ພຶດສະພາ 2023 ນີ້, ສະຖາບັນພັດທະນາຊັບພະຍາກອນມະນຸດລາວ-ຢີ່ປຸ່ນ ມະຫາວິທະຍາໄລແຫ່ງຊາດ ຮ່ວມກັບ ຄະນະຊັບພະຍາກອນນໍ້າ ໄດ້ຈັດປະຖົມນິເທດລາງວັນຮອນດາ ສຳລັບນັກວິທະຍາສາດ ແລະນັກວິທະຍາສາດໜຸ່ມ ໃຫ້ນັກສຶກສາເພື່ອສະໝັກເຂົ້າຮ່ວມແຂ່ງຂັນຊີງລາງວັນຮອນດາ Y-E-S Award ປະຈຳປີ 2023, ໂດຍການນໍາສະເໜີໂດຍ ທ່ານ ປອ. ພອນແກ້ວ ຈັນທະມາລີ ຜູ້ອຳນວຍການ ສະຖາບັນພັດທະນາຊັບພະຍາກອນມະນຸດລາວ-ຍີ່ປຸ່ນ ມຊ, ມີທ່ານ ອຈ ຄຳເກັ່ງ ຈັນທະວົງສາ ຮອງຄະນະບໍດີ ຄຊນ ພ້ອມກັບພະນັກງານ, ຄູ-ອາຈານ ແລະນັກສຶກສາເຂົ້າຮ່ວມຮັບຟັງ.

ລາງວັນຮອນດາ Y-E-S Award ແມ່ນທຶນການສຶກສາ ຈາກມູນນິທິນຮອນດາ ປະເທດຍີ່ປຸ່ນ ສໍາລັບນັກວິທະຍາສາດ ແລະວິສະວະກອນໜຸ່ມ ເຊິ່ງໃນປະເທດລາວໄດ້ເລີ່ມມາແຕ່ປີ 2008 ໂດຍມີຈຸດປະສົງເພື່ອເຮັດໃຫ້ຄົນຮຸ່ນໜຸ່ມຫັນມາເອົາໃຈໃສ່ເລື່ອງເຕັກໂນໂລຊີ ກ່ຽວກັບສິ່ງແວດລ້ອມອ້ອມຂ້າງຫຼາຍຂຶ້ນ ແລະເພື່ອເຊື່ອມໂຍງລະຫວ່າງຜູ້ນໍາໃນອະນາຄົດຂອງປະເທດຢີ່ປຸ່ນ ແລະປະເທດອາຊຽນໃນຂົງເຂດວິທະຍາສາດ, ເຕັກໂນໂລຊີ ແລະອຸດສາຫະກໍາ. ໂຄງການດັ່ງກ່າວ ໄດ້ສະໜັບສະໜູນໃຫ້ນັກສຶກສາ ມຊ ໃນສາຂາຂະແໜງວິທະຍາສາດ ແລະວິສະວະກໍາສາດ, ຜູ້ທີມີພອນສະຫວັນ, ມີແນວຄິດໃນການສ້າງສິ່ງໃໝ່ໆ, ມີຄຸນສົມບັດ, ມີຄວາມສາມັກຄີກັບໝູຄູ່ ແລະມີຜົນການຮຽນທີ່ດີ ເພື່ອຈະນໍາຄວາມຮູ້ທາງດ້ານວິທະຍາສາດຂອງ ສປປ ລາວ ນໍາໄປຂະຫຍາຍໃນອະນາຄົດ.

ໃນພິທີ, ທ່ານ ປອ. ພອນແກ້ວ ຈັນທະມາລີ ໄດ້ແນະນໍາເຖິງວິທີການສະໝັກທຶນ, ການຄັດເລືອກ ແລະຄວາມສໍາຄັນຂອງທຶນການສຶກສາ ຈາກມູນນິທິຮອນດາ, ໂດຍເປີດຮັບສະໝັກນັກສຶກສາປີລະຄັ້ງ ແລະເປັນນັກສຶກສາທີ່ກໍາລັງສຶກສາມະຫາວິທະຍາໄລແຫ່ງຊາດ ຢູ່ໃນປີ 3, ປີ 4 ຂອງຄະນະວິສະວະກຳສາດ, ຄະນະວິທະຍາສາດທຳມະຊາດ ແລະຄະນະຊັບພະຍາກອນນໍ້າເທົ່ານັ້ນ, ເຊິ່ງການສະໝັກແມ່ນເລີ່ມແຕ່ ວັນທີ 19 ພືດສະພາ ໄປຈົນເຖິງ 30 ມິຖຸນາ 2023. ຫຼັງຈາກນັ້ນ ທາງຄະນະກໍາມະການຂອງໂຄງການລາງວັນຮອນດາ ຈະຄັດເລືອກຜ່ານການສອບເສັງຂຽນບົດຄວາມຕາມຫົວຂໍ້ທີ່ກຳນົດ ເປັນພາສາລາວ ໃນວັນທີ 2 ສິງຫາ; ສອບເສັງຂຽນບົດຄວາມຕາມຫົວຂໍ້ທີ່ກຳນົດ ເປັນພາສາອັງກິດ ໃນວັນທີ 30 ສິງຫາ; ແລະສຳພາດເປັນພາສາອັງກິດໃນວັນທີ 27 ກັນຍາ 2023. ເພື່ອຄັດເອົາ ນັກສຶກສາພຽງ 2 ຄົນເທົ່ານັ້ນເປັນຜູ້ຊະນະ. ນັກສຶກສາຜູ້ຊະນະ ຈະໄດ້ຮັບທຶນການສຶກສາຈຳນວນ 3.000 ໂດລາສະຫະລັດ ພ້ອມທັງໄດ້ຮັບສິດທິໃນການເລືອກສຶກສາຕໍ່ໃນລະດັບ ປະລິນຍາໂທ ຫຼື ປະລິນຍາເອກ ທີ່ປະເທດຍີ່ປຸ່ນ ໂດຍການໃຫ້ທຶນຂອງມູນນິທິຮອນດາອີກດ້ວຍ.

ພາບບັນຍາກາດ

          ໃນຕອນບ່າຍວັນທີ 12 ພຶດສະພາ 2023 ນີ້, ໂຮງຮຽນພອນສະຫວັນ ແລະຊົນເຜົ່າ ກຽມມະຫາວິທະຍາໄລ  (ຮພຊ) ມະຫາວິທະຍາໄລແຫ່ງຊາດ ໄດ້ຈັດພິທີສະຫຼຸບຜົນການສອບເສັງນັກຮຽນເກັ່ງປະຈໍາສົກສຶກສາ 2022-2023 ຂຶ້ນທີ່ສະໂມສອນ ຮພຊ ໂດຍການເປັນປະທານ ຂອງທ່ານ ຮສ.ປອ. ເດຊານຸລາດ ແສນດວງເດດ ຮອງອະທິການບໍດີ ມຊ, ທ່ານ ຮສ. ປອ. ຄໍາພຸດ ພົມມະສອນ ຜູ້ອໍານວຍການ ຮພຊ, ມີຫົວໜ້າພະແນກສຶກສາ ແລະກີລານະຄອນຫຼວງ ວຽງຈັນ, ທ່ານແຂກທີ່ຖືກເຊີນ, ບັນດາພະນັກງານ, ຄູ-ອາຈານ, ພໍ່ແມ່ຜູ້ປົກຄອງນັກຮຽນ ພ້ອມດ້ວຍນ້ອງນັກຮຽນເຂົ້າຮ່ວມຢ່າງພ້ອມພຽງ.

          ໃນພິທີ ຮສ. ປອ. ຄໍາພຸດ ພົມມະສອນ ໄດ້ຜ່ານບົດສະຫຼຸບໂຄງການສອນບໍາລຸງນັກຮຽນເກັ່ງ ສົກສຶກສາ 2022-2023 ເຊິ່ງທ່ານໃຫ້ຮູ້ວ່າ ໂຄງການສອບເສັງນັກຮຽນເກັ່ງ ຮພຊ ເປັນໂຄງການຕົ້ນຕໍ ຂອງໂຮງຮຽນ ເພື່ອບໍາລຸງນັກຮຽນເກັ່ງຊັ້ນ ມັດທະຍົມຕົ້ນ(ມ4) ແລະຊັ້ນມັດທະຍົມປາຍ(ມ7) ຂອງໂຮງຮຽນ ຜູ້ທີ່ມີພອນສະຫວັນສະເພາະດ້ານ ເຂົ້າຮ່ວມການສອບເສັງນັກຮຽນເກັ່ງຂັ້ນ ໂຮງຮຽນ, ຂັ້ນເມືອງໄຊທານີ, ຂັ້ນນະຄອນຫຼວງ ແລະລະດັບຊາດ ໃນ 4 ວິຊາຫຼັກຄື: ຄະນິດສາດ, ພາສາລາວ-ວັນນະຄະດີ, ຟີຊິກສາດ ແລະເຄມີສາດ ລວມທັງຊັ້ນ ມ4  ແລະ ມ7 ທັງໝົດ 8 ວິຊາ.

          ການສອບເສັງລະດັບຂັ້ນ ເມືອງໄຊທານີ ໃນວັນທີ 7 ກຸມພາ 2023   ຮພຊ ໄດ້ສົ່ງນັກຮຽນເຂົ້າສອບເສັງຈໍໍານວນ 40 ນ້ອງ, ຍິງ 25 ນ້ອງ. ຜົນການສອບເສັງ ມີຈໍານວນ 30 ນ້ອງໄດ້ຮັບລາງວັນ ແລະໄດ້ຜ່ານໄປເສັງຂັ້ນນະຄອນຫຼວງ ຊັ້ນ ມ4 ມີຈໍານວນ 13 ນ້ອງ, ຍິງ 11 ນ້ອງ ແລະ ມ7 ມີຈໍານວນ 17 ນ້ອງ, ຍິງ 7 ນ້ອງ.

          ການສອບເສັງຂັ້ນ ນະຄອນຫຼວງວຽງຈັນ ໃນວັນທີ 24 ກຸມພາ 2023 ຮພຊ ສົ່ງນັກຮຽນເຂົ້າຮ່ວມ 30 ນ້ອງ, ຍິງ 18 ນ້ອງ. ຜົນການສອບເສັງ ມີຈໍານວນ 23 ນ້ອງ ສາມາດຍາດໄດ້ລາງວັນຄື: ອັນດັບທີ 1 ຈໍານວນ 4 ນ້ອງ, ຍິງ 2 ນ້ອງ, ອັນດັບ 2 ຈໍານວນ 2 ນ້ອງ, ຍິງ 2 ນ້ອງ, ອັນດັບທີ 3 ຈໍານວນ 4 ນ້ອງ, ຍິງ 2 ນ້ອງ ແລະໄດ້ຮັບລາງວັນຊົມເຊີຍ 13 ນ້ອງ, ຍິງ 7 ນ້ອງ.

          ການສອບເສັງລະດັບຊາດ ໃນວັນທີ 4 ເມສາ 2023 ຮພຊ ໄດ້ສົ່ງນັກຮຽນເຂົ້າຮ່ວມການສອບເສັງ ຈໍານວນ 4 ນ້ອງ, ຍິງ 2 ນ້ອງ. ຜົນການສອບເສັງສາມາດຍາດໄດ້ 3 ຫຼຽນຄໍາ  ແລະ 1 ຫຼຽນເງິນຄື: ນາງ ປາຢີ ເຮີ່ ສອບເສັງວິຊາ ເຄມີສາດ ຊັ້ນ ມ7 ໄດ້ທີ 1 ຂັ້ນເມືອງ, ທີ1 ຂັ້ນນະຄອນຫຼວງ ແລະໄດ້ທີ 1 ລະດັບປະເທດ ໄດ້ຮັບຫຼຽນຄໍາ, ທ້າວ ໂອບີ ລໍ່ ສອບເສັງວິຊາ ຄະນິດສາດ ມ7 ໄດ້ທີ 4 ຂັ້ນເມືອງ, ໄດ້ທີ 1 ຂັ້ນນະຄອນຫຼວງ ແລະໄດ້ທີ 1 ລະດັບປະເທດ ໄດ້ຮັບຫຼຽນຄໍາ, ທ້າວ ວິລະພົນ ພັນທຸລະອາສາ ສອບເສັງວິຊາ ພາສາລາວ ມ7 ໄດ້ທີ 1 ຂັ້ນເມືອງ, ໄດ້ທີ 1 ຂັ້ນນະຄອນຫຼວງ ແລະໄດ້ທີ 1 ລະດັບປະເທດ ໄດ້ຮັບຫຼຽນຄໍາ ແລະນາງ ມະນີລິນ ໄຊທອງປານ ສອບເສັງວິຊາ ເຄມີສາດ ມ4 ໄດ້ທີ 1 ຂັ້ນເມືອງ, ທີ1 ຂັ້ນນະຄອນຫຼວງ ແລະໄດ້ທີ 2 ລະດັບປະເທດ ໄດ້ຮັບຫຼຽນເງິນ.

          ໃນພິທີຍັງໄດ້ມີການມອບ-ຮັບໃບຍ້ອງຍໍຂັ້ນ ໂຮງຮຽນ ຮພຊ ແລະຂັ້ນ ມຊ ໃຫ້ຄູສອນບໍາລຸງນັກເກັ່ງ ປະຈໍາສົກສຶກສາ 2022-2023 ລວມທັງໝົດ 16 ທ່ານ ຍິງ 5 ທ່ານ ແລະມອບໃບຍ້ອງຍໍໃຫ້ນ້ອງນັກຮຽນຜູ້ທີ່ໄດ້ຮັບລາງວັນອີກດ້ວຍ.

ພາບບັນຍາກາດ