ຂ່າວ

ສະມາຄົມ ຄົນຈີນ ກວາງຊີ ສປ ຈີນ ປະຈຳ ສປປ ລາວ ພົບປະຄະນະນຳ ມຊ

ໃນວັນທີ 21 ກັນຍາ 2023 ທີ່ຫ້ອງປະຊຸມ ຕຶກສຳນັກງານອະທິການບໍດີ ມະຫາວິທະຍາໄລແຫ່ງຊາດ(ມຊ), ທ່ານ ຖາງ ປ່ຽວ ເຫວິນ ຫົວໜ້າພະແນກຊັບພະຍາກອນມະນຸດ ແລະ ປະກັນສັງຄົມ ເຂດປົກຄອງກວາງຊີ ສປ ຈີນ ພ້ອມຄະນະ ໄດ້ເຂົ້າຢ້ຽມຢາມ ແລະພົບປະຄະນະນຳ ມຊ ໂດຍມີ ທ່ານ ຮສ. ປອ. ເດຊານຸລາດ ແສນດວງເດດ ຮອງອະທິການບໍດີ ມຊ ພ້ອມດ້ວຍຄະນະໃຫ້ການຕ້ອນຮັບ; ຈຸດປະສົງຂອງການພົບປະຄະນະນໍາ ມຊ ໃນຄັ້ງນີ້ແມ່ນເພື່ອປຶກສາຫາລື ການຮ່ວມມື ວາງສະແດງກ່ຽວກັບການບໍລິການ ດ້ານຊັບພະຍາກອນມະນຸດ ຈີນ-ອາຊຽນ ແລະ ກອງປະຊຸມ ປຶກສາຫາລືການຮ່ວມມືດ້ານການພັດທະນາຊັບພະຍາກອນມະນຸດ ຈີນ-ອາຊຽນ ປີ 2023 ທີ່ຈະຈັດຂຶ້ນ ລະຫວ່າງວັນທີ 3-4 ພະຈິກ ທີ່ີເມືອງນານນິງ, ແຂວງກວາງຊີ ສປ ຈີນ.

ໃນໂອກາດດັ່ງກ່າວ, ທ່ານ ຮສ. ປອ. ເດຊານຸລາດ ແສນດວງເດດ ໄດ້ກ່າວສະແດງຄວາມຊົມເຊີຍ ແລະຕ້ອນຮັບຢ່າງອົບອຸ່ນ ຕໍ່ການມາຢ້ຽມຢາມ; ພ້ອມທັງໄດ້ນໍາສະເໜີ ສະພາບລວມໂດຍຫຍໍ້ກ່ຽວກັບ ມຊ ໃຫ້ແກ່ຄະນະ ສະມາຄົມຄົນຈີນ ກວາງຊີ ໄດ້ຮັບຊາບ, ເຊິ່ງການພົບປະກັນຂອງສອງຝ່າຍ ເປັນການຊ່ວຍເສີມຂະຫຍາຍສາຍພົວພັນ ການຮ່ວມມືລະຫວ່າງ ສປ ຈີນ ແລະ ສປປ ລາວ ໂດຍສະເພາະແມ່ນຂະແໜງການສຶກສາ ແລະພັດທະນາຊັບພະຍາກອນມະນຸດເປັນຕົ້ນ.

ທ່ານ ຖາງ ປ່ຽວ ເຫວິນ Tang Biaowen( 唐标文) ກໍໄດ້ນໍາສະເໜີສະພາບລວມໂດຍຫຍ້ ຂອງພະແນກຊັບພະຍາກອນມະນຸດ ແລະ ປະກັນສັງຄົມ ເຂດປົກຄອງກວາງຊີ ສປ ຈີນ, ນໍາສະເໜີກິດຈະກໍາຕ່າງໆ ໃນງານວາງສະແດງ ແລະເວທີປຶກສາຫາລື ກ່ຽວກັບການຮ່ວມມືພັດທະນາຊັບພະຍາກອນມະນຸດ ທີ່ຈະຈັດຂືຶ້ນໃນເດືອນພະຈິກ ທີ່ຈະມາເຖິງ ພ້ອມທັງຖືໄດ້ເຊື້ອເຊີນ ຄະນະນຳ ມຊ ເຂົ້າຮ່ວມ ແລະຂື້ນປະກອບຄໍາເຫັນໃນເວທີປຶກສາຫາລືການຮ່ວມມືດ້ານຊັບພະຍາກອນ ຈີນ-ອາຊຽນ; ທັງສະເໜີໃຫ້ ມຊ ແນະນໍາ ແລະປຸກລະດົມຂົນຂວາຍບັນດານັກວິທະຍາສາດ, ຊ່ຽວຊານ, ໄວໜຸ່ມນັກສຶກສາ ເຂົ້າຮ່ວມ ແລະມີສ່ວນຮ່ວມໃນງານວາງສະແດງ ການບໍລິການທາງດ້ານຊັບພະຍາກອນມະນຸດ ຈີນ-ອາຊຽນ, ພ້ອມນັ້ນ ພາຍໃນງານຍັງຈະມີການຈັດເວທີສົນທະນາການຮ່ວມມື ແລະພັດທະນາບຸກຄະລາກອນທີ່ມີຄຸນະພາບສູງ ຈີນ-ອາຊຽນ, ເວທີສົນທະນານັກສຶກສາໜຸ່ມ ຈີນ-ອາຊຽນ, ກອງປະຊຸມສຸດຍອດ ຊັບພະຍາກອນມະນຸດຈີນ (ກວາງຊີ) ຄັ້ງທີ 6 ແລະ ກອງປະຊຸມຍ່ອຍອື່ນໆທີ່ກ່ຽວຂ້ອງ ເພື່ອເປັນການພົບປະ-ແລກປ່ຽນ ກັບບັນດານັກຊ່ຽວຊານທີ່ມາຈາກມະຫາວິທະຍາໄລແຫ່ງຕ່າງໆມີມີຊື່ສຽງຂອງຈີນ ແລະບັນດາປະເທດສະມະຊິກອາຊຽນ.

ໃນຕອນທ້າຍ, ທ່ານ ຖາງປ່ຽວເຫວິນ Tang Biaowen( 唐标文) ໄດ້ມອບເຄື່ອງໃຊ້ຫ້ອງການປະກອບມີ: ຄອມພິວເຕີ 2 ໝ່ວຍ ，ປຣິນເຕີ 2 ໝ່ວຍ ມູນຄ່າ 38,000,000 ກີບ ໃຫ້ແກ່ ສູນຄົ້ນຄວ້າຈີນ ມຊ ອີກດ້ວຍ.

ພາບບັນຍາກາດ

ມຊ ປະກາດແຕ່ງຕັ້ງຮອງອະທິການບໍດີ ຄົນໃໝ່

ໃນຕອນເຊົ້າ ວັນທີ 20 ກັນຍາ 2023 ນີ້, ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີປະກາດຕໍາແໜ່ງ ຮອງອະທິການບໍດີ ທີ່ຫ້ອງປະຊຸມສະໂມສອນຊັ້ນ II ມຊ. ໂດຍການເປັນປະທານຂອງທ່ານ ຮສ. ປອ. ພຸດ ສິມມາລາວົງ ກໍາມະການສູນກາງພັກ, ເລຂາຄະນະພັກ, ລັດຖະມົນຕີກະຊວງສຶກສາທິການ ແລະ ກິລາ, ເຂົ້າຮ່ວມມີ ທ່ານ ຮສ. ປອ. ອຸດົມ ພອນຄໍາເພັງ ຄະນະປະຈໍາພັກກະຊວງສຶກສາທິການ ແລະກິລາ, ເລຂາຄະນະພັກ, ອະທິການບໍດີ ມຊ, ພ້ອມດ້ວຍຄະນະ, ມີບັນດາທ່ານຄະນະບໍລິຫານງານພັກ ມຊ, ຄະນະພັກຮາກຖານ, ຄະນະໜ່ວຍພັກ ແລະ 3 ອົງການຈັດຕັ້ງມະຫາຊົນ ມຊ ແລະພະນັກງານທີ່ກ່ຽວຂ້ອງເຂົ້າຮ່ວມ.

ໃນພິທີ ທ່ານ ນາງ ວຽງແກ້ວ ພົມມະວົງ ຫົວໜ້າກົມຈັດຕັ້ງ ແລະພະນັກງານກະຊວງສຶກສາທິການ ແລະກີລາ ໄດ້ຂຶ້ນຜ່ານຂໍ້ຕົກລົງ ວ່າດ້ວຍການແຕ່ງຕັ້ງຮອງອະທິການບໍດີ ມຊ. ສະບັບ ເລກທີ 272/ນຍ, ລົງວັນທີ 29 ສິງຫາ 2023 ໂດຍໄດ້ແຕ່ງຕັ້ງ ທ່ານ ສິນທະວອນ ດາລາວົງ ເປັນຮອງອະທິການບໍດີ ມຊ.

ພ້ອມດຽວກັນນັ້ນ, ທ່ານ ຮສ. ປອ. ພຸດ ສິມມາລາວົງ ກໍໄດ້ໂອ້ລົມຕໍ່ພິທີ ເຊິ່ງບາງຕອນທ່ານໄດ້ກ່າວວ່າມະຫາວິທະຍາໄລແຫ່ງຊາດ ເປັນມະຫາວິທະຍາໄລທີ່ພັກ ແລະລັດຖະບານ ເອົາໃຈໃສ່ເປັນພິເສດ ເປັນແຫຼ່ງສ້າງຊັບພະຍາກອນມະນຸດທີ່ມີຄຸນນະພາບຂັ້ນສູງເພື່ອສະໜອງສະໃຫ້ແກ່ການພັດທະນາປະເທດຊາດ ເຊິ່ງເປັນມະຫາວິທະຍາໄລທີ່ສໍາຄັນ, ສະນັ້ນ ເພື່ອໃຫ້ມະຫາວິທະຍາໄລໄດ້ຕາມຈຸດປະສົ່ງທີ່ພັກ ແລະລັດວາງໄວ້ນັ້ນ ແມ່ນເປັນຄວາມຮັບຜິດຊອບຂອງບັນດາຄູ-ອາຈານທົ່ວ ມຊ. ເວົ້າລວມ ກໍແມ່ນບັນດາຄະນະພັກ-ຄະນະນໍາຂອງ ມຊ ທັງຊຸດເກົ່າ ແລະຊຸດໃໝ່ ທີ່ໄດ້ຮັບພາລະໜ້າທີ່ສ້າງສາ ແລະພັດທະນາ ມຊ. ຕະຫຼອດມາ ແລະມາເຖິງປັດຈຸບັນຄະນະນໍາບາງທ່ານໄດ້ຮັບບໍານານ ຈຶ່ງໄດ້ສ້າງຜູ້ສືບທອດປ່ຽນແທນຈຶ່ງໄດ້ແຕ່ງຕັ້ງຄະນະນໍາຊຸດໃໝ່ ເຊິ່ງ ທ່ານ ສິນທະວອນ ດາລາວົງ ກໍແມ່ນຜູ້ທີ່ໄດ້ຮັບຄວາມໄວ້ເນື້ອເຊື່ອໃຈຈາກຄະນະນໍາ ແລະຈາກຄູ-ອາຈານທົ່ວ ມຊ. ຈຶ່ງໄດ້ຮັບການຄັດເລືອກມາເປັນຄະນະນໍາຊຸດໃໝ່ ແລະກໍຫວັງວ່າຜູ້ທີ່ໄດ້ຮັບການແຕ່ງຕັ້ງໃໝ່ຈະພ້ອມກັນສືບຕໍ່ພັດທະນາ ມຊ. ຮ່ວມກັບຄະນະຊຸດເກົ່າໄດ້ເປັນຢ່າງດີ ແລະໃນໂອກາດນີ້ທ່ານຍັງໄດ້ຮຽກຮ້ອງມາຍັງຄະນະນໍາ ແລະບັນດາຄູ-ອາຈານທົ່ວ ມຊ. ຈົ່ງເອົາໃຈໃສ່ສືບຕໍ່ສ້າງວຽກງານຮັບປະກັນຄຸນນະພາບການສຶກສາ, ການພັດທະນາກ່ຽວກັບບຸກຄະລາກອນ ໃຫ້ຫັນໄປສູ່ການຄົ້ນຄວ້າ ແລະການສ້າງນະວັດຕະກໍາໃໝ່ ໂດຍສະເພາະການແກ້ໄຂບັນຫາຂອງສັງຄົມ ແລະໃນໂອກາດນີ້ທ່ານຍັງໄດ້ຮຽກຮ້ອງມາຍັງບັນດາຄູ-ອາຈານ, ພະນັກງານທັງໝົດທົ່ວ ມຊ. ຈົ່ງໃຫ້ການຮ່ວມແຮງຮ່ວມໃຈພ້ອມກັນສືບຕໍ່ ພັດທະນາ ມຊ. ໂດຍສະເພາະແມ່ນວຽກງານການຄົ້ນຄວ້າ ແມ່ນໃຫ້ຄຽງຄູໄປກັບວຽກງານກາສອນສິດສອນ ແລະໃຫ້ມີການປະສານງານກັບມະຫາວິທະຍາໄລຢູ່ຕ່າງປະເທດ ເພື່ອໄປພົບປະແລກປ່ຽນຄວາມຮູ້ດ້ານວິຊາການຕື່ມອີກ.

ພາບບັນຍາກາດ

ມະຫາວິທະຍາໄລກະເສດສາດ ຣາຊະອານາຈັກໄທ ຮ່ວມກັບ ມຊ ຈັດເຝິກອົບຮົມການຈັດການທາດອາຫານພືດ ແລະ ດິນຢ່າງມີປະສິດທິພາບ

ໃນວັນທີ 19 ກັນຍາ 2023 ຜ່ານມາ, ມະຫາວິທະຍາໄລກະເສດສາດ ຣາຊະອານາຈັກໄທ ຮ່ວມກັບ ມະຫາວິທະຍາໄລແຫ່ງຊາດ (ມຊ) ຈັດໂຄງການເຝິກອົບຮົມການຈັດການທາດອາຫານພືດ ແລະ ດິນຢ່າງມີປະສິດທິພາບ, ພາຍໃຕ້ການຮ່ວມມືກັບບໍລິສັດ ໄທເຊັນທັນເຄມີ ຈຳກັດ ທີ່ຫ້ອງປະຊຸມສະໂມສອນ ມຊ, ໂດຍການເຂົ້າຮ່ວມຂອງ ທ່ານ ນາງ ມໍລະກົດ ສີສະຫວັດ ເອກອັກຄະຣາຊະທູດໄທ ປະຈຳ ສປປ ລາວ, ທ່ານ ຮສ. ປອ. ອຸດົມ ພອນຄຳເພັງ ອະທິການບໍດີ ມຊ ພ້ອມດ້ວຍແຂກຖືກເຊີນ, ພະນັກງານ, ຄູ-ອາຈານ ແລະຊາວກະສິກຳຂອບເຂດນະຄອນຫຼວງວຽງຈັນ ເຂົ້າຮ່ວມ.

ໃນພິທີ ທ່ານ ຮສ. ປອ. ອຸດົມ ພອນຄຳເພັງ ໄດ້ກ່າວຕ້ອນຮັບ ຄະນາຈານຈາກໂຄງການ ພ້ອມດ້ວຍຄະນະທີ່ເຂົ້າຮ່ວມຢ່າງອົບອຸ່ນ; ພ້ອມທັງກ່າວເຖິງຄວາມສໍາຄັນ ໃນໂຄງການດັ່ງກ່າວນີ້ວ່າ: ກະສິກຳຖືເປັນວຽກງານໜື່ງທີ່ສຳຄັນເປັນຫົວໃຈຫຼັກໃນການພັດທະນາເສດຖະກິດ-ສັງຄົມຂອງປະເທດ ພ້ອມທັງເປັນທ່າແຮງຫຼັກທີ່ຊຸກຍູ້-ສົ່ງເສີມການຂະຫຍາຍຕົວຂອງເສດຖະກິດໃນແຕ່ລະຂົງເຂດ ແລະເປັນແຫຼ່ງອາຫານຂອງປະຊາກອນ, ຍ້ອນແນວນັ້ນ ເພື່ອໃຫ້ການຜະລິດສາມາດຕອບສະໜອງໄດ້ທັງປະລິນມານ ແລະຄຸນນະພາບ ການຫັນເອົານະວັດຕະກຳທີ່ທັນສະໄໝມາໜູນໃຊ້ເຂົ້າໃນການຜະລິດກະສິກຳ ຖືເປັນສິ່ງທີ່ຊາວກະສິກຳຕ້ອງໄດ້ມີການຮຽນຮູ້ ເຊິ່ງການຈັດເຝິກອົບຮົມໃນຄັ້ງນີ້ຖືເປັນການເລີ່ມຕົ້ນການຮ່ວມມືທີ່ດີ ເພາະຜູ້ທີ່ເຂົ້າຮ່ວມສາມາດນຳເອົາບົດຮຽນຈາກ ອາຈານ ແລະ ຜູ້ຊ່ຽວຊານມາ ປັບໃຊ້ເຂົ້າໃນການປະຕິບັດຕົວຈິງ ໃນການຜະລິດກະສິກຳເຊັ່ນ: ປູກເຂົ້າ, ສາລີ, ປູກຜັກ, ມັນຕົ້ນ...

ການເຝິກອົບຮົມໃນຄັ້ງນີ້ມີທັງໝົດ 4 ຫົວຂໍ້ຄື: ການຈັດການທາດອາຫານພືດ ແລະກິນຢ່າງມີປະສິດທິພາບ, ທາດອາຫານທີ່ຈຳເປັນສຳລັບການຈະເລີນເຕີບໂຕຂອງພືດ, ຂະບວນການສ້າງທາດອາຫານໃຫ້ກັບພືດ, ການແປຮູບຜະລິດຕະພັນຈາກພືດເພື່ອສ້າງມູນຄ່າເພີ່ມ ເຊິ່ງນຳສະເໜີໂດຍ ອາຈານຈາກມະຫາວິທະຍາໄລກະເສດສາດ ຣາຊະອານາຈັກໄທ.

ພາບບັນຍາກາດ

ພິທີລົງນາມການຮ່ວມມືເພື່ອສ້າງໂຄງການ “NUOL Integrated Smart Energy Project”

ໃນຕອນບ່າຍ ວັນທີ 19 ກັນຍາ 2023 ຜ່ານມາ, ມະຫາວິທະຍາໄລແຫ່ງຊາດ (ມຊ) ຮ່ວມກັບ ບໍລິສັດພັດທະນາວັດສະດຸ ແລະການຄ້າ ຢຸນນານຈຳກັ (YUNAN cuiyuan materials and Trading development Co., Ltd) ໄດ້ລົງນາມການຮ່ວມມືທາງດ້ານວິຊາການພາຍໃຕ້ໂຄງການ “NUOL Integrated Smart Energy Project” ທີ່ມະຫາວິທະຍາໄລແຫ່ງຊາດ ວິທະຍາເຂດດົງໂດກ, ຕາງໜ້າລົງນາມຝ່າຍ ມະຫາວິທະຍາໄລແຫ່ງຊາດ ໂດຍທ່ານ ຮສ. ປອ. ອຸດົມ ພອນຄຳເພັງ ອະທິການບໍດີ ມະຫາວິທະຍາໄລແຫ່ງຊາດ ແລະ ຕາງໜ້າໃຫ້ບໍລິສັດ ພັດທະນາວັດສະດຸ ແລະການຄ້າ ຢຸນນານຈຳກັດ ໂດຍທ່ານ ເຊິງກວານ ເຈົ່າເຝີງ (Shengguan Zhaofeng) ພາຍໃຕ້ການເປັນສັກຂີພິຍານຂອງທັງສອງຝ່າຍ ມີທ່ານຫົວໜ້າຫ້ອງການ, ຄະນະບໍດີ, ພະນັກງານ, ຄູ-ອາຈານ ເຂົ້າຮ່ວມ.

ການລົງນາມການຮ່ວມມືໃນຄັ້ງນີ້ແມ່ນເພື່ອສ້າງ ໂຄງການພະລັງງານອັດສະລິຍະປະສົມປະສານໃນ ມຊ ເພື່ອເກັບກຳຂໍ້ມູນການນຳໃຊ້ພະລັງງານໄຟຟ້າໃນມະຫາວິທະຍາໄລແຫ່ງຊາດ, ສຶກສາການກໍ່ສ້າງໂຄງການໄຟຟ້າພະລັງງານແສງອາທິດ ໂດຍມີການອອກແບບຮ່ວມກັນຈາກທັງສອງຝ່າຍ. ໂຄງການດັ່ງກ່າວຖືເປັນອີກໜື່ງໂຄງການທີ່ຈະຊ່ວຍໃຫ້ ມະຫາວິທະຍາໄລແຫ່ງຊາດ ກາຍເປັນມະຫາວິທະຍາໄລທີ່ມີຄວາມທັນສະໄໝດ້ານພະລັງງານແບບຍືນຍົງ

ອົງການ HAPPY PEOPLE ມອບຄອມພິວເຕີ ພ້ອມອຸປະກອນຮັບໃຊ້ ໃຫ້ໂຮງຮຽນພອນສະຫວັນແລະ ຊົນເຜົ່າ ກຽມມະຫາວິທະຍາໄລ

ໃນຕອນເຊົ້າວັນທີ 8 ກັນຍາ 2023 ອົງການ HAPPY PEOPLE ໄດ້ນໍາເອົາຄອມພິວເຕີ ພ້ອມອຸປະກອນຮັບໃຊ້ ໄປມອບໃຫ້ແກ່ ໂຮງຮຽນພອນສະຫວັນ ແລະ ຊົນເຜົ່າ ກຽມມະຫາວິທະຍາໄລ ມະຫາວິທະຍາໄລແຫ່ງຊາດ, ພິທີມອບ-ຮັບ ໄດ້ຈັດຂຶ້ນທີ່ຫ້ອງປະຊຸມ ໂຮງຮຽນພອນສະຫວັນ ແລະຊົນເຜົ່າ ກຽມມະຫາວິທະຍາໄລ; ເຊິ່ງມອບໂດຍ ທ່ານ ອີຊິຄວງ ຜູ້ອຳນວຍການ HAPPY PEOPLE ແລະ ຮັບໂດຍ ທ່ານ ຮສ.ປອ. ຄຳພຸດ ພົມມະສອນ ຜູ້ອຳນວຍການ ໂຮງຮຽນພອນສະຫວັນ ແລະ ຊົນເຜົ່າ ກຽມມະຫາວິທະຍາໄລ; ມີບັນດາຮອງອໍານວຍການ, ຫົວໜ້າໜ່ວຍງານ, ພະນັກງານ, ຄູ-ອາຈານ ແລະຜູ້ກ່ຽວຂ້ອງຂອງສອງຝ່າຍເຂົ້າຮ່ວມ.

ຄອມພິວເຕີ ທີ່ອົງການ HAPPY PEOPLE ປະຈຳ ສ. ເກົາຫຼີ, ມອບໃຫ້ແກ່ ໂຮງຮຽນພອນສະຫວັນ ແລະຊົນເຜົ່າ ກຽມມະຫາວິທະຍາໄລຄັ້ງນີ້ ມີຈຳນວນ 30 ຊຸດ ລວມມູນຄ່າ 50.000 ໂດລາສະຫະລັດ. ທ່ານ ຮສ.ປອ ຄໍາພຸດ ພົມມະສອນ ໄດ້ອ້າງອີງການໃຫ້ຂໍ້ມູນ ຈາກທ່ານ ເອກອັກຄະລັດຖະທູດ ແຫ່ງ ສປປ ລາວ ປະຈຳ ສ. ເກົາຫຼີ ວ່າ : ໂຄງການດັ່ງກ່າວເປັນອົງການໜຶ່ງທີ່ໄດ້ຈົດທະບຽນຖືກຕ້ອງຕາມກົດໝາຍດຳເນີນທຸລະກິດຕັ້ງແຕ່ປີ 2017 ເປັນຕົ້ນມາ ແລະ ໄດ້ເສຍພາສີອາກອນຖືກຕ້ອງຕາມລະບຽບ ແລະ ກົດໝາຍຂອງ ສ.ເກົາຫຼີ ໃນປັດຈຸບັນ ສຳນັກງານຕັ້ງຢູ່ 215-1 Guro – gu, Seoul, Republic of Korea, ເຊິ່ງເປັນອົງການໜຶ່ງທີ່ດຳເນີນກິດຈະການໃນການພັດທະນາຂະແໜງການສຶກສາ, ພັດທະນາຊຸມຊົນ ຢູ່ປະເທດ ສ. ເກົາຫຼີ. ໃນໄລຍະຜ່ານມາ ອົງການເຄີຍດຳເນີນກິດຈະກຳຊ່ວຍເຫຼືອປະເທດຕ່າງໆເຊັ່ນ : ຫວຽດນາມ, ກຳປູເຈຍ, ຟິລິປິນ, ມຽນມາ, ອິນໂດເນເຊຍ ແລະ ເຄນຍາ; ການລົງມາປຶກສາຫາລືຂອງທີມງານດັ່ງກ່າວ ທາງຄະນະນໍາພວກເຮົາເຫັນວ່າການຊ່ວຍເຫຼືອຄັ້ງນີ້ມີຄຸນປະໂຫຍດຫຼາຍຕໍ່ການຮຽນ-ການສອນ ກໍຄື ພັດທະນາຄວາມຮູ້ດ້ານຄອມພິວເຕີໃຫ້ແກ່ນັກຮຽນໃນ ໂຮງຮຽນພອນສະຫວັນ ແລະຊົນເຜົ່າ ກຽມມະຫາວິທະຍາໄລ ມຊ ແລະ ນັກ ຮຽນຈາກໂຮງຮຽນອ້ອມຂ້າງສາມາດມານໍາໃຊ້ຮ່ວມກັນໄດ້ ເພື່ອພັດທະນາການສຶກສາໃນ ສປປ ລາວ ໃຫ້ມີການພັດທະນາກ້າວໄປສູ່ລະດັບສາກົນ.

ພາບບັນຍາກາດ

ບໍລິສັດໄຟຟ້າຫົງສາ ມອບ ທຶນການສຶກສາ ໃຫ້ນັກສຶກສາ ມຊ

ໃນຕອນບ່າຍວັນທີ 6 ກັນຍາ 2023 ນີ້, ທີ່ຫ້ອງປະຊຸມ ຕຶກສໍານັກງານອະທິການບໍດີ ມະຫາວິທະຍາໄລແຫ່ງຊາດ(ມຊ) ໄດ້ມີພິທີມອບ-ຮັບທຶນການສຶກສາ ຈາກບໍລິສັດໄຟຟ້າຫົງສາ ຈໍາກັດ ໃຫ້ແກ່ ນັກສຶກສາມະຫາວິທະຍາໄລແຫ່ງຊາດ ປະຈໍາສົົກສຶກສາ 2023-2024, ໂດຍການເປັນປະທານຂອງທ່ານ ຮສ. ໂພສີ ທິບດາວັນ ຮອງອະທິການບໍດີ ມຊ, ທ່ານ ຄະທາຍຸດ ຊູພູນ ຜູ້ອໍານວຍການໃຫຍ່ ບໍລິສັດໄຟຟ້າຫົງສາ, ມີບັນດາຫົວໜ້າຫ້ອງການ, ມີບັນດາຄະນະກໍາມະການຜູ້ຮັບຜິດຊອບທຶນ, ແຂກທີ່ຖືກເຊີນ, ພະນັກງານ, ຄູ-ອາຈານ, ພໍ່ແມ່ຜູ້ປົກຄອງ ທີ່ກ່ຽວຂ້ອງ ແລະ ນັກສຶກສາຜູ້ທີ່ໄດ້ຮັບທຶນເຂົ້າຮ່ວມ.

ການມອບທຶນການສຶກສາ ຈາກບໍລິສັດໄຟຟ້າຫົງສາ ຈໍາກັດ ໃຫ້ແກ່ນັກສຶກສາ ມຊ ແມ່ນເລີ່ມມາແຕ່ສົກສຶກສາ 2020-2021 ເປັນຕົ້ນມາ. ສໍາສັບສົກສຶກສາ 2022-2023 ນີ້ແມ່ນເປັນປີທີ 3. ໂດຍມີຈຸດປະສົງເພື່ອຊຸກຍູ້ ແລະສົ່ງເສີມທຶນການສຶກສາໃຫ້ແກ່ນັກສຶກສາປີທີ 3; ນັກສຶກສາຜູ້ໄດ້ຮັບທຶນ ແມ່ນຜູ້ທີ່ມີຄຸນສົມບັດດີ, ຮຽນດີ-ຮຽນເກັ່ງ ໄດ້ມີໂອກາດສຶກສາຕໍ່ໃຫ້ສໍາເລັດການສຶກສາໃນລະດັບມະຫາວິທະຍາໄລ, ເຊິ່ງທຶນທີ່ບໍລິສັດ ໄຟຟ້າຫົງສາ ມອບໃຫ້ແກ່ ນັກສຶກສາ ມຊ ໃນປີນີ້ມີຈໍານວນ 5 ຄົນ, ຍິງ 2 ຄົນ ຄັດເລືອກມາຈາກ 3 ຄະນະວິຊາຄື: ນາງ ໂພເງິນ ໄຊຍະພັນ ສາຂາວິຊາ ສື່ສານມວນຊົນ ຄະນະອັກສອນສາດ, ທ້າວ ເຢ້ ທໍ່ ສາຂາວິຊາ ກົດໝາຍທຸລະກິດ ຄະນະນິຕິສາດ ແລະ ລັດຖະສາດ, ນາງ ຈີ ຈ້າງ ສາຂາວິຊາ ວິສະວະກຳກົນຈັກ, ທ້າວ ຊໍາເຢັ້ງ ລໍໄຟຈົງ ສາຂາວິຊາ ວິສະວະກຳໂຍທາ ແລະ ທ້າວ ວິລະສັກ ຄຳສີວໍລະວົງ ສາຂາວິຊາ ວິສະວະກຳໄຟຟ້າ ຄະນະວິສະວະກໍາສາດ ເຊິ່ງທຶນທີ່ໄດ້ຮັບ ແມ່ນ 14.000.000 ກີບ (ສິບສີ່ລ້ານກີບ)ຕໍ່ຄົນ/ຕໍ່ປີ ແລະ ນັກສຶກສາຜູ້ທີ່ໄດ້ຮັບທຶນຍັງໄດ້ເຂົ້າເຝິກງານຢູ່ບໍລິສັດໄຟຟ້າຫົງສາປີລະ 1 ຄັ້ງ ເພື່ອຮຽນຮູ້ ແລະ ເຝິກຝົນປະສົບການການເຮັດວຽກກັບບໍລິສັດ, ຫຼັງຈາກຈົບການສຶກສາຜູ້ຮັບທຶນຈະຕ້ອງໄດ້ເຂົ້າເປັນສັນຍາຈ້າງງານກັບບໍລິສັດໄຟຟ້າຫົງສາໃນໄລະເວລາ 2 ປີ.

ພາບບັນຍາກາດ

ບົດຄວາມອື່ນ ໆ...

Page 29 of 48