ໃນຕອນບ່າຍວັນທີ 3 ພຶດສະພາ 2023 ຜ່ານມານີ້, ພາກວິຊາພາສາເຢຍລະມັນ ຄະນະອັກສອນສາດ (ຄອສ) ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີມອບ-ຮັບ ຫ້ອງນໍ້າໃໝ່ ສໍາລັບພາກວິຊາພາສາເຢຍລະມັນ ຂຶ້ນທີ່ພາກວິຊາຂອງຕົນ. ຕາງໜ້າມອບໂດຍ ທ່ານ ນາງ Annette knobloch ເອກອັກຄະລັດຖະທູດເຢຍລະມັນ ປະຈໍາ ສປປ ລາວ, ຕາງໜ້າຮັບໂດຍ ທ່ານ ອຈ. ທອງສຸກ ແກ້ວມະນີ ຄະນະບໍດີ ຄອສ, ມຊ ໃຫ້ກຽດເຂົ້າຮ່ວມ ໂດຍທ່ານ ຮສ. ປອ. ນາງ ສົມຈັນ ບຸນພັນມີ ຮອງອະທິການບໍດີ ມຊ, ທ່ານ ປອ. ຄໍາລຽນ ພົນເສນາ ປະທານສະມາຄົມມິດຕະພາບລາວ-ເຢຍລະມັນ, ມີບັນດາທ່ານແຂກທີ່ຖືກເຊີນ ພ້ອມດ້ວຍນັກສຶກສາພາກວິຊາພາສາເຢຍລະມັນຮ່ວມ.

          ໃນພິທີ, ທ່ານ ອຈ. ສອນຄໍາ ແສນຄໍາຕາ ຫົວໜ້າພາກວິຊາພາສາເຢຍລະມັນ ໄດ້ໃຫ້ຮູ້ວ່າ: ອາຄານຮຽນຂອງພາກວິຊາພາສາເຢຍລະມັນ, ຄອສ, ມຊ ເປັນອາຄານ ຊັ້ນດຽວ ຕັ້ງຢູ່ທາງຂ້າງຂອບຮົ້ວ ມຊ ລຽບຕາມເສັ້ນທາງປ່າສັກ ເຊິ່ງປະກອບມີທັງໝົດ 6 ຫ້ອງ ຄື ຫ້ອງ L01-L06. ໄລຍະຜ່ານມາທາງພາກວິຊາ ໄດ້ມີການປັບປຸງ-ສ້ອມແປງອາຄານຮຽນບາງສ່ວນ, ໂດຍໄດ້ຮັບທຶນຊ່ວຍເຫຼືອຈາກສະຖານທູດເຢຍລະມັນປະຈໍາ ສປປ ລາວ ແລະ ສະມາຄົມມິດຕະພາບເຢຍລະມັນ-ລາວ ປະຈໍາເມືອງແບັກແລັງ ປະເທດ ເຢຍລະມັນ ໂດຍຜ່ານສະມາຄົມມິດຕະພາບລາວ-ເຢຍລະມັນ.

ຫຼັງຈາກທີ່ໄດ້ມີການມອບ-ຮັບໂຄງການປັບປຸງອາຄານຮຽນເປັນທີ່ຮຽບຮ້ອຍໃນເດືອນກັນຍາ 2022 ທີ່ຜ່ານມາ ພາກວິຊາ ໄດ້ນໍາໃຊ້ອາຄານຮຽນຢ່າງເປັນທາງການຕັ້ງແຕ່ນັ້ນເປັນຕົ້ນມາ. ຫຼັງຈາກທີ່ມີການນໍາໃຊ້ອາຄານຮຽນແລ້ວເຫັນວ່າ ຍັງພົບບັນຫາທີ່ບໍ່ມີຫ້ອງນໍ້າໃຊ້; ເນື່ອງຈາກຫ້ອງນ້ຳທີ່ຢູ່ໃກ້ຄຽງແມ່ນໃຊ້ບໍ່ໄດ້ ເຮັດໃຫ້ຄູອາຈານ, ນັກສຶກສາ ແລະແຂກທີ່ມາຢ້ຽມຢາມພາກວິຊາ ຕ້ອງໄປຂໍນໍາໃຊ້ນໍາພາກສ່ວນອື່ນ ເຊິ່ງເຮັດໃຫ້ມີຄວາມຫຍຸ້ງຍາກ ແລະໄລຍະທີ່ຜ່ານມາ ທາງພາກວິຊາກໍໄດ້ຮັບນັກສຶກສາເພີ່ມຂຶ້ນ ທັງນີ້ກໍເພື່ອຮອງຮັບການຂະຫຍາຍຕົວ, ເພື່ອປັບປຸງອາຄານໃຫ້ຈົບງາມ ແລະທັນສະໄໝຍິ່ງຂຶ້ນ.  

          ໂອກາດນີ້, ທ່ານ ອຈ. ທອງສຸກ ແກ້ວມະນີ ໄດ້ຕາງໜ້າໃຫ້ຄະນະນຳຂອງ ຄອສ ກໍຄື ຄະນະນໍາ ມຊ. ສະແດງຄວາມຂອບໃຈໄປຍັງລັດຖະບານ ແລະເອກອັກຄະລັດຖະທູດເຢຍລະມັນ ປະຈໍາ ສປປ ລາວ ທີ່ເຫັນເຖິງຄວາມສໍາຄັນຂອງການສຶກສາຮ່ຳຮຽນ ແລະຄວາມສະດວກຂອງພະນັກງານ, ຄູ-ອາຈານ ແລະນ້ອງນັກຮຽນໃນ ມຊ. ໂດຍສະເພາະ ພາກວິຊາພາສາເຢຍລະມັນ, ຄອສ, ມຊ. ເພື່ອເຮັດໃຫ້ນັກສຶກສາມີຫ້ອງນໍ້າທີ່ສະອາດໃຊ້ໃຫ້ຖືກຫຼັກສຸຂະອະນາໄມ, ພ້ອມທັງຢືນຢັນວ່າ ຈະປົກປັກຮັກສາ ແລະນໍາໃຊ້ຫ້ອງນໍ້າທີ່ໄດ້ຮັບໃນຄັ້ງນີ້ໄດ້ເປັນຢ່າງດີ.

 ຫ້ອງນໍ້າທີ່ສ້າງໃໝ່ມີທັງໝົດ 4 ຫ້ອງ ຄື: ຫ້ອງນໍ້າສໍາລັບຄູ-ອາຈານ 1 ຫ້ອງ, ຫ້ອງນໍ້ານັກສຶກສາຍິງ 1 ຫ້ອງ, ຫ້ອງນໍ້ານັກສຶກສາຊາຍ 1 ຫ້ອງ ແລະຫ້ອງນໍ້າສໍາລັບຄົນພິການ 1 ຫ້ອງ; ເຊິ່ງຫ້ອງດັ່ງກ່າວ ຄົນພິການຈາກພາກສ່ວນຕ່າງໆ ພາຍໃນ ມຊ ສາມາດມານໍາໃຊ້ໄດ້. ນອກຈາກນັ້ນ, ຍັງມີຫ້ອງເກັບອຸປະກອນອີກ 1 ຫ້ອງ, ບ່ອນທາງເຂົ້າຫ້ອງນ້ຳມີອ່າງລ້າງຖ້ວຍ ເພື່ອເປັນບ່ອນຊັກລ້າງອຸປະກອນຕ່າງໆພາຍໃນພາກວິຊາ ແລະຢູ່ໜ້າຫ້ອງນ້ໍາທາງນອກມີອ່າງລ້າງມື 1 ອ່າງເພື່ອໃຫ້ນັກສຶກສາສາມາດນໍາໃຊ້ໄດ້. ໂຄງການກໍ່ສ້າງຫ້ອງນໍ້າດັ່ງກ່າວແມ່ນໄດ້ຮັບທຶນຊ່ວຍເຫຼືອລ້າຈາກລັດຖະບານເຢຍລະມັນ, ເຊິ່ງໃຊ້ເວລາໃນການກໍ່ສ້າງ 11 ອາທິດ, ລວມມູນຄ່າທັງໝົດ 6.000 ຢູໂຣ.

ພາບບັນຍາກາດ

ໃນຕອນເຊົ້າວັນທີ 26 ເມສາ 2023  ທີ່ຫ້ອງການວິຊາການ ມະຫາວິທະຍາໄລແຫ່ງຊາດ(ມຊ) ໄດ້ຈັດພິທີເປີດສູນສຶກສາຮຽນຮ່ວມ ລາວ-ອົດສະຕຣາລີ ຢ່າງເປັນທາງການ. ໂດຍການເປັນປະທານຮ່ວມຂອງທ່ານ ຮສ. ປອ. ອຸດົມ ພອນຄໍາເພັງ ອະທິການບໍດີ ມຊ, ທ່ານ ແດນ ເຮວເດີນ ຮອງເອກອັກຄະລັດຖະທູດອົດສະຕຣາລີ, ເຂົ້າຮ່ວມມີ ສຈ. ປອ. ຮຸ່ງເພັດ ຈັນທະວົງ ຮອງອະທິການບໍດີ, ຜູ໊ຊີ້ນໍາວຽກງານວິຊາການ ມຊ, ມີເລຂາເອກ ເອກອັກຄະລັດຖະທູດອົດສະຕຣາລີ, ມີບັນດາຄະນະບໍດີ, ຫົວໜ້າຫ້ອງການ, ຫົວໜ້າພະແນກສູນການສຶກສາຮຽນຮ່ວມ ລາວ-ອົດສະຕຣາລີ ພ້ອມດ້ວຍພາກສ່ວນທີ່ກ່ຽວຂ້ອງ ແລະນ້ອງໆນັກສຶກສາພິການທາງສາຍຕາ ແລະນັກສຶກສາປົກກະຕິທີ່ໄດ້ຮັບທຶນ LANS ເຂົ້າຮ່ວມ.

     ຫ້ອງການວິຊາການໄດ້ລາຍງານໃຫ້ຮູ້ວ່າ ແຕ່ກ່ອນພະແນກການສຶກສາຮຽນຮ່ວມເປັນໜ່ວຍງານບໍລິການໜຶ່ງທີ່ຂຶ້ນກັບໜ່ວຍງານຂອງພາກວິຊາພາສາອັງກິດ, ຄະນະອັກສອນສາດ ເຊິ່ງໃຫ້ບໍລິການກ່ຽວກັບເອກະສານການຮຽນ-ການສອນ ແກ່ນັກສຶກສາພິການທາງສາຍຕາທີ່ເຂົ້າມາຮຽນຄັ້ງທຳອິດຈຳນວນ 3 ຄົນ ໃນສົກຮຽນ 2015 – 2016 ຢູ່ພາກວິຊາ ພາສາອັງກິດ ຂອງຄະນະອັກສອນສາດ ແລະ ຕໍ່ມາໃນສົກຮຽນ 2017-2018 ແລະ 2018-2019 ກໍໄດ້ມີຈຳນວນນັກສຶກສາພິການຕາຈຳນວນໜຶ່ງເຂົ້າມາຮຽນເພີ່ມຂຶ້ນອີກ ແລະໄດ້ຮັບອະນຸຍາດເຂົ້າຮຽນຢູ່ 6 ຄະນະວິຊາຄື: ຄະນະອັກສອນສາດ, ຄະນະສຶກສາສາດ, ຄະນະນິຕິສາດ ແລະລັດຖະສາດ, ຄະນະວິທະຍາສາດການກີລາ-ກາຍະກຳ, ຄະນະເສດຖະສາດ ແລະບໍລິການທຸລະກິດ ແລະຄະນະວິທະຍາສາດສັງຄົມ. ເນື່ອງຈາກຈຳນວນນັກສຶກສາພິການຕາເຂົ້າມາຮຽນຢູ່ ມະຫາວິທະຍາໄລແຫ່ງຊາດເພີ່ມຂຶ້ນ, ການຈັດຕັ້ງປະຕິບັດກິດຈະກໍາການຮຽນ-ການສອນການສຶກສາຮຽນຮ່ວມບາງຄະນະໄດ້ພົບຄວາມຫຍຸ້ງຍາກໃນການໃຫ້ບໍລິການເອກະສານການຮຽນ-ການສອນ ແລະການສະໜອງສິ່ງອຳນວຍຄວາມສະດວກອື່ນໃຫ້ແກ່ເຂົາເຈົ້າ. ນອກນັ້ນຍັງພົບຄວາມຫຍຸ້ງຍາກໃຫ້ແກ່ຄູ-ອາຈານທີ່ສອນນັກສຶກພິການຕາຢູ່ຫ້ອງຮຽນຮ່ວມ ເພາະອາຈານຂາດປະສົບການ (ບໍ່ໄດ້ຮັບການເຝິກອົບຮົມການສອນຄົນພິການມາກ່ອນ) ແລະການຈັດຕັ້ງປະຕິບັດໃນເວລານັ້ນ ອາຈານສອນແຕ່ລະຄະນະວິຊາກໍໄດ້ຈັດຕັ້ງການຮຽນ-ການສອນຕາມສາມາດຂອງຕົນເອງ. ໃນເວລານັ້ນ, ຄະນະອັກສອນສາດໄດ້ຮັບການສະໜັບສະໜູນຈາກໂຄງການ ສະພາການສຶກສາເພື່ອຄົນພິການຕາໂລກ ຫຼື ICEVI (International Council for Education of People with Visual Impairment).  ຈາກບັນຫາດັ່ງກ່າວ, ພະແນກການສຶກສາຮຽນຮ່ວມຈິ່ງມີຄວາມຈຳເປັນຕ້ອງໄດ້ສ້າງໃຫ້ເປັນສູນກາງໃນການໃຫ້ບໍລິການກິດຈະກໍາທັງໝົດຂອງການສຶກສາຮຽນຮ່ວມທີ່ໄດ້ເຂົ້າມາຮຽນຢູ່ ມຊ. ສະນັ້ນ ໃນປີ 2020 ຫ້ອງການວິຊາການຈິ່ງໄດ້ສະເໜີໃຫ້ຈັດຕັ້ງພະແນກການສຶກສາຮຽນຮ່ວມຂຶ້ນເພື່ອຕອບສະໜອງຄວາມຕ້ອງການຂອງນັກສຶກສາພິການຕາໃນທົ່ວ ມຊ. ເພື່ອເຮັດໃຫ້ການຈັດຕັ້ງປະຕິບັດກິດຈະກຳການສຶກສາຮຽນ ກໍຄືການໃຫ້ບໍລິການມີຄວາມເປັນເອກະພາບກັນ. 

     ການສ້າງສູນຮຽນຮ່ວມລາວ-ອົດສະຕຣາລີ ມີຈຸດປະສົງເພື່ອເຮັດໃຫ້ເປັນສູນລວມໃນການໃຫ້ບໍລິການດ້ານການຮຽນຂອງຄົນພິການທີ່ເຂົ້າມາຮຽນຢູ່ຄະນະວິຊາຕ່າງໆ ພາຍໃນ ມຊ ໄດ້ຢ່າງທົ່ວເຖິງ ແລະມີຄວາມເປັນເອກະພາບ, ເພື່ອສ້າງໂອກາດໃຫ້ຄົນພິການທີ່ຮຽນຈົບຈາກມັດທະຍົມຕອນປາຍ ຫຼືທຽບເທົ່າ ສາມາດສຶກສາຮຽນຕໍ່ໃນລະດັບມະຫາວິທະຍາໄລແຫ່ງຊາດໄດ້ ໂດຍຜ່ານການໃຫ້ຄຳປຶກສາດ້ານຫຼັກສູດການຮຽນເພື່ອໃຫ້ແທດເໝາະກັບເງື່ອນໄຂ ແລະ ຄວາມສາມາດຂອງຄົນພິການແຕ່ລະປະເພດ ກ່ອນຕັດສິນໃຈເຂົ້າຮຽນໃນສາຂາວິຊາໃດໜຶ່ງ, ເພື່ອເຮັດນັກສຶກສາພິການ ແລະຄູອາຈານມີຄວາມຮັບຮູ້ ແລະເຂົ້າໃຈກ່ຽວກັບວິທີການສອນ, ການເອົາໃຈໃສ່ດ້ານອື່ນໆ ໄດ້ຢ່າງຖືກຕ້ອງເໝາະສົມ ແລະເປັນເອກະພາບກັນໃນດ້ານການຮຽນ. ການສ້າງສູນຮຽນຮ່ວມລາວ-ອົດສະຕຣາລີ ແມ່ນໄດ້ຮັບທຶນຊ່ວຍເຫຼືອຈາກລັດຖະບານອົດສະຕາລີ ໃນການຊື້ອຸປະກອນ ແລະສ້ອມແປງພະແນກສຶກສາຮຽນຮ່ວມເພື່ອໃຫ້ເປັນສູນການສຶກສາຮຽນຮ່ວມ ລາວ-ອົດສະຕຣາລີ ລວມໝູນຄ່າທັງໝົດ 544.043.564 ກີບ (41.611 ໂດລາສະຫະລັດ).

ພາບບັນຍາກາດ

ໃນຕອນບ່າຍວັນທີ 26 ເມສາ 2023 ຜ່ານມານີ້, ສູນຮ່ວມມືພາສາຕ່າງປະເທດ ກະຊວງສຶກສາທິການແຫ່ງ ສປ ຈີນ ແລະມະຫາວິທະຍາໄລຊົນເຜົ່າກວາງຊີ ສປ ຈີນ ຮ່ວມກັບ ມະຫາວິທະຍາໄລແຫ່ງຊາດລາວ (ມຊ) ໄດ້ຈັດພິທີເຊັນສັນຍາຮ່ວມສ້າງຫຼັກສູດຄູພາສາຈີນລະບົບ 2+2 ຢູ່ທີ່ສະຖາບັນຂົງຈື ມຊ, ໂດຍຝ່າຍຈີນເປັນຜູ້ສະໜອງທຶນການສຶກສາ 60 ທຶນໃຫ້ແກ່ນັກສຶກສາລາວ. ເຂົ້າຮວ່ມໃນການເຊັນສັນຍາດັ່ງກ່າວ,  ຕາງໜ້າຝ່າຍລາວແມ່ນທ່ານ ຮສ.ປອ. ພຸດ ສິມມະລາວົງ ລັດຖະມົນຕີ ກະຊວງສຶກສາທິການ  ແລະກີລາ ແລະຝ່າຍຈີນແມ່ນທ່ານ ຈ່ຽງຈ້າຍຕົ່ງ ເອກອັກຄະລັດຖະທູດ ສປຈີນ ປະຈໍາ ສປປ ລາວ ພ້ອມດ້ວຍສາມພາກສ່ວນທີ່ກ່ຽວຂ້ອງເຂົ້າຮ່ວມ.

           ການເຊັນສັນຍາຮ່ວມມືຂອງ 3 ພາກສ່ວນ ແມ່ນແນໃສ່ການພັດທະນາທາງດ້ານພາສາ ແລະວັດທະນະທໍາຈີນ ເຊິ່ງສູນຮ່ວມມືພາສາຕ່າງປະເທດຂອງຈີນ ແລະມະຫາວິທະຍາໄລຊົນເຜົ່າກວາງຊີ ໄດ້ໃຫ້ທຶນການສຶກສາ 60 ທຶນ ລວມມູນຄ່າ 2,3 ລ້ານກວ່າຢວນ, ເຊິ່ງມີລະບົບຮຽນຢູ່ ມຊ 2 ປີ ຫຼັງຈາກນັ້ນຮຽນຢູ່ ສປ ຈີນອີກ 2 ປີ.

          ທ່ານ ຮສ.ປອ. ພຸດ ສິມມະລາວົງ ລັດຖະມົນຕີ ກະຊວງສຶກສາທິການ ແລະກີລາ  ສປປ ລາວ ໄດ້ສະແດງຄວາມຂອບໃຈເປັນຢ່າງສູງຕໍ່ສູນແລກປ່ຽນຮ່ວມມື ມະຫາວິທະຍາໄລຊົນເຜົ່າກວາງຊີ ແລະສຶກສາແຂວງກວາງຊີທີ່ຍາມໃດກໍໃຫ້ການຊ່ວຍເຫຼືອ ສປປ ລາວ ຕະຫຼອດມາ. ການເຊັນສັນຍາຄັ້ງນີ້ ແມ່ນຈັດຂຶ້ນເນື່ອງໃນໂອກາດວັນສ້າງຕັ້ງສາຍພົວພັນທາງການທູດລາວ-ຈີນ ຄົບຮອບ 62 ປີ (25/04/1961-25/04/2023) ອັນໄດ້ກາຍເປັນເຫດການທີ່ມີຄວາມໝາຍ-ຄວາມສໍາຄັນຫຼາຍ, ສປປ ລາວ ຍາມໃດກໍຍຶດໝັ້ນໃນຫຼັກການຈີນດຽວ, ຢືນຄຽງບ່າຄຽງໄຫຼ່ນໍາສະຫາຍຈີນຕາມທິດ 4 ດີ ແລະຄູ່ຮ່ວມຊະຕາກໍາດຽວກັນຕະຫຼອດມາ.

          ທ່ານ ຮສ. ປອ. ອຸດົມ ພອນຄໍາເພັງ ອະທິການບໍດີ ມຊ ກໍໄດ້ສະແດງຄວາມຮູ້ບຸນຄຸນ ແລະທ່ານໄດ້ກ່າວວ່າ ການຮ່ວມມືຄັ້ງນີ້ ເປັນການປູພື້ນຖານໃຫ້ແກ່ການສຶກສາດ້ານພາສາຈີນ, ສ້າງຄວາມເຂັ້ມແຂງດ້ານບຸກຄະລາກອນພາສາຈີນ ເຊິ່ງເປັນສິ່ງໜຶ່ງທີ່ສາມາດຮັບປະກັນຄຸນນະພາບການຮຽນ-ການສອນພາສາຈີນໃຫ້ແກ່ນັກສຶກສາລາວໃຫ້ມີຄຸນນະພາບສູງຂຶ້ນ.

          ໃນໂອກາດດຽວກັນທ່ານ ມາຈ້ຽນເຟີ່ຍ ອຳນວຍການໃຫຍ່ສູນຮ່ວມມືແລກປ່ຽນພາສາຈີນ-ພາສາຕ່າງປະເທດ ຝ່າຍຈີນ ກໍໄດ້ສະແດງຄວາມຊົມເຊີຍ ແລະດີໃຈທີ່ເຫັນຝ່າຍລາວແຕ່ລະຂັ້ນ ໄດ້ເອົາໃຈໃສ່ສະໜັບ-ສະໜູນເຮັດໃຫ້ຫຼັກສູດຄູພາສາຈີນ ແລະຫຼັກສູດພາສາຈີນໄດ້ຮັບການພັດທະນາຢ່າງວ່ອງໄວ, ເຊິ່ງເປັນການສ້າງສາຍພົວພັນການທູດມິດຕະພາບຂອງຄົນຮຸ້ນຕໍ່ໆໄປຕື່ມອີກ. ທ່ານກ່າວອີກວ່າ ສູນແລກປ່ຽນຮ່ວມມືພາສາຈີນ-ພາສາຕ່າງປະເທດແມ່ນສະຖາບັນໜຶ່ງໃນການສະໜອງການຮຽນພາສາຈີນໃຫ້ແກ່ປະຊາຄົມໂລກ, ເພື່ອເຂົ້າໃຈຈີນ ພວກເຮົາພະຍາຍາມຍົກລະດັບການໃຫ້ບໍລິການທີ່ດີ, ພະຍາຍາມໃຫ້ການຮ່ວມມືໃຫ້ແກ່ຕ່າງປະເທດໃນການພັດທະນາການສຶກສາພາສາຈີນ. ໃນອະນາຄົດພວກເຮົາຈະຮ່ວມກັບສຶກສາແຂວງກວາງຊີ ແລະມະຫາວິທະຍາໄລຊົນເຜົ່າກວາງຊີສືບຕໍ່ຊຸກຍູ້ສົ່ງເສີມ ແລະຊ່ວຍເຫຼືອການພັດທະນາການສຶກສາພາສາຈີນຢູ່ ສປປ.ລາວ ເພື່ອສ້າງຜົນງານປະກອບສ່ວນເສີມສ້າງສາຍພົວພັນມິດຕະພາບ ລະຫວ່າງສອງຊາດລາວ-ຈີນໃຫ້ດີຂຶ້ນໄປເລື້ອຍໆ.

ພາບບັນຍາກາດ

ສູນເຕັກໂນໂລຊີ ແລະ ຂໍ້ມູນຂ່າວສານ ມະຫາວິທະຍາໄລແຫ່ງຊາດ(ມຊ) ໄດ້ຈັດກອງປະຊຸມ ສ້າງແຜນເຄື່ອຂ່າຍ ແລະ ການຄົ້ນຄວ້າວິທະຍາສາດລາວຄັ້ງທີ I (Lao Research and Education Network ຫຼື ເອີ້ນຊື່ຫຍໍ້ວ່າ (LERNET) ກອງປະຊຸມໄດ້ຈັດຂຶ້ນ ໃນວັນທີ 25 ເມສາ 2023, ທີ່ຫ້ອງປະຊຸມພັດຕະຄານຊົມວິວ ເມືອງວັງວຽງ ແຂວງວຽງຈັນ, ໂດຍການເປັນປະທານຂອງທ່ານ ປອ. ສຸລິອຸດົງ ສູນດາລາ ຮອງລັດຖະມົນຕີ ກະຊວງສຶກສາທິການ ແລະກີລາ, ທ່ານ ຮສ. ປອ. ນາງ ສົມຈັນ ບຸນພັນມີ ຮອງອະທິການບໍດີ ມຊ, ມີບັນດາແຂກທີ່ຖືກເຊີນຈາກກະຊວງສຶກສາທິການ ແລະກີລາ, ກະຊວງເຕັກໂນໂລຊີ ແລະການສຶ່ສານ, ບໍລິສັດລາວໂທລະຄົມ, Unitel, ETL, Best, ຜູ້ຕາງໜ້າຈາກ  ມະຫາວິທະຍາໄລຕ່າງໆໃນລາວ ຄື: ມະຫາວິທະຍາໄລສຸພານຸວົງ, ມະຫາວິທະຍາໄລຈຳປາສັກ, ມະຫາວິທະຍາໄລສະຫວັນນະເຂດ, ມະຫາວິທະຍາໄລວິທະຍາສາດສຸຂະພາບ ແລະພະນັກງານຄູ-ອາຈານ ທີ່ກ່ຽວຂ້ອງເຂົ້າຮ່ວມ.

ການຈັດກອງປະຊຸມຄັ້ງດັ່ງກ່າວນີ້ແມ່ນມີຜົນເນື່ອງມາຈາກການດຳເນີນງານຕໍ່ຈາກກອງປະຊຸມ ‘ ປຶກສາຫາລືກ່ຽວກັບການສ້າງຕັ້ງອົງກອນເຄືອຂ່າຍການສຶກສາ ແລະຄົ້ນຄວ້າວິທະຍາສາດລາວ (Lao Education and Research Network (LERNET)) ’ ທີ່ໄດ້ຈັດຕັ້ງຂື້ນໃນວັນທີ 14 ທັນວາ 2022, ທີ່ຫ້ອງປະຊຸມຂອງໂຮງແຮມລາວພຣາຊາ ນະຄອນຫຼວງວຽງຈັນ. ດັ່ງນັ້ນ ເພື່ອເປັນການສືບຕໍ່ການດໍາເນີນໂຄງການໃຫ້ເກີດດອກອອກຜົນ, ຄະນະຮັບຜິດຊອບໂຄງການຈື່ງໄດ້ລິເລີ່ມຈັດກອງປະຊຸມ ສ້າງແຜນເຄື່ອຂ່າຍ ແລະການຄົ້ນຄວ້າວິທະຍາສາດລາວຄັ້ງທີ I ເພື່ອເປັນການຮີບໂຮມເອົາບັນດາພາກສ່ວນ, ກົມກອງທີ່ມີສ່ວນກ່ຽວຂ້ອງ ເຂົ້າມາພັດທະນາລະບົບເຄືອຂ່າຍການສຶກສາ ແລະຄົ້ນຄ້ວາຂອງລາວໃຫ້ໄດ້ປະສິດທິພາບ ແລະປະສິດທິຜົນສູງສຸດ ເພື່ອສ້າງແຜນ LERNet’s Master Proposal ຂອງລາວໃຫ້ມີເປົ້າໝາຍເພື່ອການຈັດຕັ້ງປະຕິບັດທີ່ເປັນຮູບຮ່າງ ແລະສາມາດນຳໃຊ້ປະຕິບັດໄດ້ໃນຕໍ່ໜ້າ ແລະເພື່ອເປັນການສ້າງກູ່ມຜູ້ກ່ຽວຂ້ອງ (Working Group) ເພື່ອຮ່ວມກັນຂຽນແຜນການສ້າງຕັ້ງອົງກອນເຄືອຂ່າຍການສຶກສາ ແລະຄົ້ນຄວ້າວິທະຍາສາດລາວ. ໂດຍຜ່ານການດຳເນີນງານຂອງ ສູນເທັກໂນໂລຊີ ຂໍ້ມູນຂ່າວສານ ມຊ ພາຍໃຕ້ໂຄງການ: Building Awareness for establishing and strengthening Lao research and education network (LERNET) ໃນໄລຍະເວລາ 9 ເດືອນ ໂດຍແບ່ງອອກເປັນ 4 ກິດຈະກຳຫຼັກຄື: 1. ການຈັດກອງປະຊຸມປຶກສາຫາລືເພື່ອກະກຽມຄວາມພ້ອມໃນການປະຕິບັດໂຄງການ (ກຳນົດກຸ່ມເປົ້າໝາຍ, ລາຍລະອຽດໂຄງການ, ແຜນກິດຈະກຳ), 2. ຄັດເລືອກຕົວແທນຈາກພາກສ່ວນທີ່ກ່ຽວຂ້ອງເພື່ອເຂົ້າຮ່ວມໃນການສ້າງແຜນແມ່ບົດ, 3. ສ້າງແຜນແມ່ບົດ ແລະຈັດຕັ້ງປະຕິບັດ ທີ່ມະຫາວິທະຍາໄລແຫ່ງຊາດ ແລະ 4. ຜ່ານແຜນແມ່ບົດ ແລະສະຫຼບໂຄງການໃນໄລຍະຜ່ານມາ.

ພາຍຫຼັງສຳເລັດໂຄງການດັ່ງກ່າວ ຄາດວ່າ ສປປ ລາວ (ໂດຍສະເພາະກໍແມ່ນ ກະຊວງສືກສາທິການ ແລະ ກີລາ) ຂະແໜງການສຶກສາທົ່ວປະເທດ ຈະໄດ້ຮັບເຊື່ອມໂຍງເຂົ້າເປັນສະມາຊິກເຄືອຂ່າຍຂອງອົງກອນໃນພາກພື້ນ ແລະສາກົນ; ເປັນການເປີດກວ້າງໃຫ້ອົງກອນສາກົນໄດ້ເຫັນບົດບາດ ແລະເຫັນໄດ້ເຖິງຄວາມຕ້ອງການຂອງເຄືອຂ່າຍການສຶກສາ ແລະການຄົ້ນຄວ້າວິທະຍາສາດລາວຫຼາຍຂື້ນ, ຊຶ່ງໃນນີ້ ມຊ ກໍຈະມີເວັບໄຊທ ແລະສື່ອອນລາຍຕ່າງໆທີ່ໃຫ້ຂໍ້ມຸນຂ່າວສານກ່ຽວກັບວຽກງານ LERNET ອອກສູ່ພາຍນອກກໍຄືພາກພື້ນ ແລະສາກົົນ.

ພາບບັນຍາກາດ