ໃນວັນທີ 6 ສິງຫາ 2023, ທີ່ ຄະນະເສດຖະສາດ ແລະ ບໍລິຫານທຸລະກິດ (ຄສບ) ມະຫາວິທະຍາໄລແຫ່ງຊາດ ໄດ້ມີພິທີເຊັນບົດບັນທຶກຂໍ້ຕົກລົງຄວາມເຂົ້າໃຈທາງດ້ານວິຊາການ (MOA) ຮ່ວມກັບອົງກອນວິຊາຊີບລະດັບສາກົນ (ACCA Cambodia and Laos ເຊິ່ງລົງນາມຕາງໜ້າ ຄສບ ໂດຍ ທ່ານ ຮສ. ທອງເພັດ ຈັນທະນີວົງ ຮອງຄະນະບໍດີ ຄສບ ແລະ ຕາງໜ້າອົງກອນວິຊາຊີບລະດັບສາກົນ ໂດຍ ທ່ານ Ratna Neou ປະທານອົງກອນວິຊາຊີບລະດັບສາກົນ (ACCA Cambodia and Laos) ມີແຂກທີ່ຖືກເຊີນ ແລະ ພະນັກງານຄູອາຈານຂອງ ຄສບ ເຂົ້າຮ່ວມເປັນສັກຂີພະຍານ.

ຈຸດປະສົງ MOA ຄັ້ງນີ້ແມ່ນເພື່ອກຳນົດຄວາມເຂົ້າໃຈລະຫວ່າງສອງຝ່າຍບົນຈິດໃຈຮ່ວມມືເຊິ່ງກັນ ແລະ ກັນ ທຸກໆການຮ່ວມທຸລະກິດ ທີ່ອາດຈະຜູກມັດຝ່າຍຕ່າງໆແມ່ນຂຶ້ນກັບການຈັດສັນຍາແຍກຕ່າງຫາກ. ບົດບັນທຶກຄວາມເຂົ້າໃຈສະບັບນີ້ໄດ້ກຳນົດຂອບເຂດເພື່ອໃຫ້ຝ່າຍຕ່າງໆຊອກຫາໂອກາດຮ່ວມມືເພື່ອຜົນປະໂຫຍດຂອງກັນ ແລະ ກັນ ໃຫ້ລະອຽດກ່ຽວກັບບົດບາດ ແລະ ຄວາມຮັບຜິດຊອບຂອງແຕ່ລະຝ່າຍໃນການເຮັດວຽກຮ່ວມມືເພື່ອເພີ່ມທະວີຜົນປະໂຫຍດຂອງກັນ ແລະກັນ. ພ້ອມນັ້ນ ອົງກອນວິຊາຊີບລະດັບສາກົນ ແລະ ຄສບ, ມຊ ຕົກລົງເຫັນດີທີ່ຈະປຶກສາຫາລື ແລະ ຕົກລົງແຜນການເຮັດວຽກປະຈໍາປີເພື່ອຄວາມຄືບໜ້າຂອງການຮ່ວມມືສະເພາະ ເຊິ່ງທັງສອງຝ່າຍຕົກລົງເຫັນດີວ່າກິດຈະກໍາຕ່າງໆຈະຖືກທົບທວນຄືນຢ່າງໜ້ອຍ ສອງປີເພື່ອຮັບປະກັນວ່າຈະຖືກສົ່ງຕາມການ.

ພ້ອມນັ້ນໃນພິທີຍັງໄດ້ມີການເປີດເວທີສົນທະນາກ່ຽວກັບ ການເງິນ ແລະ ການບັນຊີ ເຊິ່ງມີນ້ອງໆນັກສຶກສາ ແລະ ຄູອາຈານຮັບຟັງອີກດ້ວຍ.

ພາບບັນຍາກາດ

ໃນລະຫວ່າງ ວັນທີ 2-3 ສິງຫາ 2023, ໂຮງຮຽນພອນສະຫວັນ ແລະ ຊົນເຜົ່າກຽມມະຫາວິທະຍາໄລ (ຮພຊ) ຈັດການສອບເສັງຄັດເລືອກນັກຮຽນໃນລະດັບຊັ້ນມັດທະຍົມສຶກສາ ໃນລະດັບຊັ້ນ ມ1 ແລະ ມ5 ປະຈຳສົກສຶກສາ 2023-2024 ທີ່ໂຮງຮຽນພອນສະຫວັນ ແລະ ຊົນເຜົ່າກຽມມະຫາວິທະຍາໄລ;

ໃນໂອກາດນີ້ ທ່ານ ຮສ. ປອ. ຄຳພຸດ ພົມມະສອນ ຜູ້ອຳນວຍການ ຮພຊ ໄດ້ໃຫ້ຂໍ້ມູນກັບທີມຂ່າວ ມຊ ວ່າ: ໃນສົກສຶກສານີ້ມີນັກຮຽນສະໝັກເຂົ້າຮ່ວມສອບເສັງທັງໝົດ 486 ຄົນ, ເປັນຍິງ 269 ຄົນ (ໃນນີ້ມາຈາກຕ່າງແຂວງ 63 ຄົນ, ຍິງ 28 ຄົນ) ເຊິ່ງຈະຄັດເລືອກເອົານັກຮຽນທັງໝົດ ປະມານ 112-120 ຄົນ ປະຈຳສົກສຶກສານີ້, ສຳລັບຂະບວນການສອບເສັງແມ່ນ ທາງມະຫາວິທະຍາໄລແຫ່ງຊາດ ເປັນຜູ້ຊີ້ນໍາໂດຍກົງ ເຊິ່ງການອອກບົດສອບເສັງແມ່ນໃຫ້ຈັດຕັ້ງໃນມື້ທີ່ສອບເສັງ ເຊິ່ງກໍາມະການອອກບົດຕ້ອງໄດ້ມາອອກບົດຕັ້ງແຕ່ 5 ໂມງເຊົ້າຂອງແຕ່ລະມື້ສອບເສັງ. ສ່ວນມື້ສອບເສັງແບ່ງອອກເປັນສອງມື້ຄື: ວັນທີ 2 ສິງຫາ 2023 ແມ່ນສອບເສັງຄັດເລືອກລະດັບຊັ້ນ ມ5 ສອບເສັງໃນວິຊາຄະນິດສາດ, ພະສາລາວ-ວັນນະຄະດີ, ເຄມີສາດ-ຟີຊິກສາດ ແລະພາສາອັງກິດ; ວັນທີ 3 ສິງຫາ 2023 ແມ່ນສອບເສັງຄັດເລືອກລະດັບຊັ້ນ ມ1 ສອບເສັງໃນວິຊາ ພາສາລາວ, ພາສາອັງກິດ ແລະວິຊາຄະນິດສາດ; ແຕ່ລະຫ້ອງແມ່ນປະຈຸນັກຮຽນ ຫ້ອງລະ 15 ຄົນ. ສຳລັບການປະກາດຜົນການສອບເສັງຄາດວ່າຈະປະກາດໃຫ້ຮູ້ໃນຊ່ວງທ້າຍເດືອນສິງຫານີ້.

ພາບບັນຍາກາດ

ເພື່ອເປັນການຜ່ານແຜນການສ້າງເຄື່ອຂ່າຍ ແລະ ການຄົ້ນຄວ້າວິທະຍາສາດຂອງ ສປປ ລາວ (Lao Research and Education Network ຫຼື ເອີ້ນຊື່ຫຍໍ້ວ່າ (LERNET), ສູນເຕັກໂນໂລຊີ ແລະ ຂໍ້ມູນຂ່າວສານ ມະຫາວິທະຍາໄລແຫ່ງຊາດ (ມຊ) ໄດ້ຈັດກອງປະຊຸມປຶກສາຫາລືຂຶ້ນໃນວັນທີ 2-4 ສິງຫາ  2023, ທີ່ຫ້ອງປະຊຸມ ໂຮງແຮມແກຣນຣີເວີຊາຍ ເມືອງວັງວຽງ ແຂວງວຽງຈັນ, ໂດຍການເປັນປະທານຂອງທ່ານ ປອ. ສຸລິອຸດົງ ສູນດາລາ ຮອງລັດຖະມົນຕີ ກະຊວງສຶກສາທິການ ແລະກີລາ, ທ່ານ ຮສ. ປອ. ນາງ ສົມຈັນ ບຸນພັນມີ ຮອງອະທິການບໍດີ ມຊ, ມີບັນດາແຂກທີ່ຖືກເຊີນຈາກກະຊວງສຶກສາທິການ ແລະກີລາ, ກະຊວງເຕັກໂນໂລຊີ ແລະການສຶ່ສານ, ບໍລິສັດລາວໂທລະຄົມ, Unitel, ETL, Best, ຜູ້ຕາງໜ້າຈາກ  ມະຫາວິທະຍາໄລຕ່າງໆໃນລາວ ຄື: ມະຫາວິທະຍາໄລສຸພານຸວົງ, ມະຫາວິທະຍາໄລຈຳປາສັກ, ມະຫາວິທະຍາໄລສະຫວັນນະເຂດ, ມະຫາວິທະຍາໄລວິທະຍາສາດສຸຂະພາບ ແລະພະນັກງານຄູ-ອາຈານ ທີ່ກ່ຽວຂ້ອງເຂົ້າຮ່ວມ.

ການຈັດກອງປະຊຸມຄັ້ງດັ່ງກ່າວນີ້ແມ່ນມີຜົນເນື່ອງມາຈາກການດຳເນີນງານຕໍ່ຈາກກອງປະຊຸມ ‘ ປຶກສາຫາລືກ່ຽວກັບການສ້າງຕັ້ງໂຄງການເຄືອຂ່າຍການສຶກສາ ແລະຄົ້ນຄວ້າວິທະຍາສາດລາວເພື່ອຮ່າງແຜນແມ່ບົດການສ້າງຕັ້ງໂຄງການ (Lao Education and Research Network (LERNET) ທີ່ໄດ້ຈັດຕັ້ງຂື້ນໃນວັນທີ 25-26 ເມສາ 2023 ທີ່ຜ່ານມາ, ຄະນະຮັບຜິດຊອບໂຄງການຈື່ງໄດ້ຈັດກອງປະຊຸມ ປຶກສາຫາລື ແລະຜ່ານແຜນແມ່ບົດຖືເປັນການດຳເນີນງານຊ່ວງທີ 2 ຂອງໂຄງການເຊິ່ງປະກອບມີ: ພາກທີ I ຄວາມເປັນມາຂອງເຄື່ອຂ່າຍການສືກສາ ແລະ ການຄົ້ນຄ້ວາ; ພາກທີ II ກ່ຽວກັບເຄື່ອຂ່າຍການສຶກສາ ແລະ ການຄົ້ນຄ້ວາຂອງ ສປປ ລາວ; ພາກທີ III ສະເຫນີການສ້າງຕັ້ງແຜນແມ່ບົດຂອງເຄື່ອຂ່າຍການສຶກສາ ແລະ ການຄົ້ນຄວ້າຂອງ ສປປ ລາວ; ພາກທີ IV  ຍຸດທະສາດ ແລະ ແຜນງານ ແລະ ພາກທີ V ການຈັດຕັ້ງປະຕິບັດ. ພ້ອມນັ້ນໃນທີ່ປະຊຸມຍັງໄດ້ຮັບຟັງການບັນຍາຍໃນສາມຫົວຂໍ້ເຊັ່ນ: ຫົວຂໍ້: “ການບໍລິການດ້ານເຄື່ອຂ່າຍເພື່ອການສືກສາ ແລະ ການຄົ້ນຄ້ວາວິທະຍາສາດຂອງປະເທດໄທ” ນຳສະເຫນີໂດຍທ່ານ Dr. Chalermpol Charnsripinyo ຈາກສະມາຄົມເຄື່ອຂ່າຍໄທເພື່ອການສຶກສາ; ຫົວຂໍ້: “Introduction to Bangkok Neutral Internet exchange and its services” ນຳສະເຫມີໂດຍ ທ່ານ Kittinan Sriprasert BKNIX; ແລະ ຫົວຂໍ້: “Cyber-infrastructure for research and education” ໂດຍທ່ານ PhD. Suhaimi Napis ຈາກມະຫາວິທະຍາໄລບູຕາ ປະເທດມາເລເຊຍ. ນອກນັ້ນ, ທີ່ປະຊຸມຍັງໄດ້ຮ່ວມກັນແລກປ່ຽນຄຳຄິດເຫັນເພື່ອປະກອບໃສ່ໃນຮ່າງແຜນແມ່ບົດເພື່ອຈັດຕັ້ງປະຕິບັດໃນຕໍ່ຫນ້າອີກດ້ວຍ.

ໂຄງການດັ່ງກ່າວ ຄາດວ່າ ສປປ ລາວ (ໂດຍສະເພາະກໍແມ່ນ ກະຊວງສືກສາທິການ ແລະ ກີລາ) ຂະແໜງການສຶກສາທົ່ວປະເທດ ຈະໄດ້ຮັບເຊື່ອມໂຍງເຂົ້າເປັນສະມາຊິກເຄືອຂ່າຍຂອງອົງກອນໃນພາກພື້ນ ແລະສາກົນ; ເປັນການເປີດກວ້າງໃຫ້ອົງກອນສາກົນໄດ້ເຫັນບົດບາດ ແລະເຫັນໄດ້ເຖິງຄວາມຕ້ອງການຂອງເຄືອຂ່າຍການສຶກສາ ແລະການຄົ້ນຄວ້າວິທະຍາສາດລາວຫຼາຍຂື້ນ, ຊຶ່ງໃນນີ້ ມຊ ກໍຈະມີເວັບໄຊທ ແລະສື່ອອນລາຍຕ່າງໆທີ່ໃຫ້ຂໍ້ມຸນຂ່າວສານກ່ຽວກັບວຽກງານ LERNET ອອກສູ່ພາຍນອກກໍຄືພາກພື້ນ ແລະສາກົົນ.

ພາບບັນຍາກາດ

ໃນຕອນເຊົ້າວັນທີ 21 ກໍລະກົດ 2023 ສະຖາບັນພັດທະນາຊັບພະກອນມະນຸດ ລາວ-ຢີ່ປຸ່ນ(ສລຍ) ມະຫາວິທະຍາໄລແຫ່ງຊາດ ໄດ້ຈັດກອງປະຊຸມກອງປະຊຸມວຽກງານຄະນະປະສານງານ ໂຄງການສ້າງຄວາມເຂັ້ມແຂງເພື່ອການພັດທະນານັກທຸລະກິດ ແລະເຄື່ອຂ່າຍທາງທຸລະກິດ ຂຶ້ນທີ່ຫ້ອງປະຊຸມຂອງ ສລຍ. ໂດຍການເປັນປະທານຮ່ວມລະຫວ່າງ ທ່ານ ຮສ. ປອ. ອຸດົມ ພອນຄໍາເພັງ ອະທິການບໍດີ ມຊ, ທ່ານ Mr. Toshio NAGASE ຫົວໜ້າອົງການໄຈກາ ປະຈໍາລາວ, ເຂົ້າຮ່ວມມີທ່ານ Mr. Mika OMORI ເລຂາສອງຈາກສະຖານທູດຍີ່ປຸ່ນປະຈໍາລາວ, ທ່ານ Mr. Funabashi GAKU ທີ່ປຶກສາອາວຸໂສ ຂະແໜ່ງພັດທະນາທຸລະກິດ ຈາກອົງການໄຈກາຍີ່ປຸ່ນປະຈໍາປະເທດຍີ່ປຸ່ນ ພ້ອມດ້ວຍຄະນະ, ມີຮອງຫົວໜ້າຫ້ອງການ ຮ່ວມມື ແລະກົມພົວພັນ, ກະຊວງສຶກສາທິການ ແລະກິລາ, ຈາກກະຊວງແຜນການ ແລະການລົງທຶນ, ມີບັນດາຫົວໜ້າຫ້ອງການຕ່າງໆພາຍໃນ ມຊ ແລະຄະນະບໍລິຫານ-ຊ່ຽວຊານຂອງ ສລຍ ເຂົ້າຮ່ວມ.

          ໃນພິທີ ທ່ານ ປອ. ພອນແກ້ວ ຈັນທະມາລີ ຜູ້ອໍານວຍການ ສລຍ ໄດ້ນໍາສະເໜີໃຫ້ຮູ້ວ່າ ວຽກງານຄະນະປະສານງານໃນໂຄງການສ້າງຄວາມເຂັ້ມແຂງເພື່ອການພັດທະນານັກທຸລະກິດ ແລະເຄື່ອຂ່າຍທາງທຸລະກິດ ແມ່ນໂຄງການທີ່ຜ່ານ ສລຍ ໄລຍະທີ 2 (2022-2026) ມາຮອດປັດຈຸປັນຖືວ່າເປັນໂຄງການທີ 5 ໄລຍະທີ 2. ເຊິ່ງທ່ານໄດ້ສະເໜີພາບລວມການຈັດຕັ້ງປະຕິບັດວຽກງານ ແລະຜົນສໍາເລັດໃນ 1 ປີຜ່ານມາຂອງໂຄງການທີ 5 ໄລຍະທີ 2( ກັນຍາ 2022 ເຖິງ ສິງຫາ 2023) ເຊິ່ງໃນໄລຍະທີ 2 ຂອງໂຄງການສ້າງຄວາມເຂັ້ມແຂງເພື່ອການພັດທະນານັກທຸລະກິດ ແລະເຄືອຂ່າຍທາງທຸລະກິດ ຊຶ່ງໄດ້ສືບຕໍ່ຜັນຂະຫຍາຍການປະຕິບັດວຽກງານທາງດ້ານວິຊາການ, ສືບຕໍ່ການພັດທະນາຊັບພະຍາກອນມະນຸດຕາມຄວາມຮຽກຮ້ອງຕ້ອງການຂອງສັງຄົມໂດຍສະເພາະທາງດ້ານການພັດທະນາທຸລະກິດ ແລະ ຜູ້ປະກອບການໃໝ່, ບັນດາຫົວໜ່ວຍທຸລະກິດໂດຍຜ່ານໂຄງການ LJI SUSU (Start-up and Scale-up) ໂຄງການດັ່ງກ່າວເພື່ອສົ່ງເສີມການພັດທະນາທຸລະກິດ ແລະການປັບປຸງຜະລິດຕະພັນຂອງບໍລິສັດເພື່ອສາມາດທົດເເທນສິນຄ້ານຳເຂົ້າ ແລະສາມາດສົ່ງອອກຕ່າງປະເທດ. ນອກນັ້ນ, ກໍ່ໄດ້ພັດທະນາຫຼັກສູດຝຶກອົບຮົມຜູ້ບໍລິຫານ ແລະສືບຕໍ່ດຳເນີນການຮຽນ-ການສອນຫຼັກສູດປະລິນຍາໂທບໍລິຫານແບບຍີ່ປຸ່ນ. ພ້ອມດຽວກັນນີ້ ກໍພັດທະນາຫຼັກສູດຕາມຄວາມຕອ້ງການຂອງອົງກອນທາງພາກລັດ ແລະເອກະຊົນ. ເພື່ອຕອບສະໜອງປະກອບສ່ວນໃນການສ້າງເສດຖະກິດລາວໂດຍຜ່ານການສ້າງທຸລະກິດ, ກຸ່ມນັກທຸລະກິດທີ່ເນັ້ນການສ້າງຜະລິດຕະພັນພາຍໃນ “ Made in Laos”  ໃຫ້ມີຄວາມເຂັ້ມເເຂງ, ມີສະຖຽນລະພາບສູງ. ສ່ວນທາງດ້ານແລກປຽ່ນວັດທະນະທໍາສະຖາບັນໄດ້ສ້າງຫຼັກສູດພາສາຍີ່ປຸ່ນໃຫ້ຄົນລາວທີ່ຈະໄປຝຶກອົບຮົມດ້ານເຕັກນິກທີ່ປະເທດຍີ່ປຸ່ນ ແລະຈັດງານແລກປຽ່ນທາງດ້ານວິຊາການ ແລະວັດທະນະທໍາຮ່ວມກັບນັກສຶກສາຈາກມະຫາວິທະຍາໄລຍີ່ປຸ່ນ ໂດຍຜ່ານລະບົບອອນລາຍ ແລະແບບເຊິ່ງໜ້າ.

          ສໍາລັບແຜນດໍາເນີນງານໂຄງການຕໍ່ໜ້າ ສລຍ ຈະໄດ້ສືບຕໍ່ຜັນຂະຫຍາຍວຽກງານການສົ່ງເສີມ ແລະການພັດທະນາຊັບພະຍາກອນມະນຸດທາງດ້າານນັກທຸລະກິດ ແລະຂະຫຍາຍເຄືອຂ່າຍທາງທຸລະກິດ ເພື່ອປະກອບສ່ວນໃນການພັດທະນາເສດຖະກິດສັງຄົມລາວຢ່າງຕໍ່ເນື່ອງ ເພື່ອພັດທະນາຫົວໜ່ວຍທຸລະກິດ ແລະປັບປຸງຜະລິດຕະພັນລາວອອກມາຮັບໃຊ້ສັງຄົມລາວ ແລະ ສາກົນ.

ພາບບັນຍາກາດ