ກອງປະຊຸມ ຄົບຄະນະກາງສະໄໝທີ V ຂອງຄະນະພັກຮາກຖານ ຄະນະສຶກສາສາດ(ຄສສ), ມະຫາວິທະຍາໄລແຫ່ງຊາດ(ມຊ) ໄດ້ຈັດຂຶ້ນໃນວັນທີ 21 ເມສາ 2023 ຜ່ານມານີ້, ທີ່ຫ້ອງປະຊຸມສະໂມສອນໃຫຍ່ ມຊ, ໂດຍພາຍໃຕ້ການເປັນປະທານ ຂອງສະຫາຍ ສຈ.ປອ ຮຸ່ງເພັດ ຈັນທະວົງ ຮອງເລຂາຄະນະພັກ ມຊ, ມີສະຫາຍ ຮສ.ປອ ສີຖານ ສຸຂະວົງ ຄະນະພັກ ມຊ, ເລຂາຄະນະພັກຮາກຖານ ຄສສ, ບັນດາສະຫາຍ ຄະນະພັກຮາກຖານ, ຄະນະໜ່ວຍພັກ, ບັນດາສະຫາຍສະມາຊິກພັກ ພາກສ່ວນພະນັກງານ, ຄຸ-ອາຈານ ແລະສະມາຊິກພັກນັກສຶກສາ ຄະນະດັ່ງກ່າວເຂົ້າຮ່ວມ.

      ກອງປະຊຸມກາງສະໄໝ ຄສສ ໄດ້ຈັດຂຶ້ນເປັນເວລາ 1 ວັນ; ເຊິ່ງໄດ້ແບ່ງອອກເປັນ ສອງພາກ, ພາກເຊົ້າ ທີ່ປະຊຸມ ໄດ້ເຊື່ອມຊຶມເອກະສານ: ຄໍາສັ່ງຂອງຄະນະເລຂາທິການສູນກາງພັກ ສະບັບເລກທີ 268/ຄລສພ, ລົງວັນທີ 20 ມັງກອນ 2023 ວ່າດ້ວຍການດໍາເນີນກອງປະຊຸມ ຄົບຄະນະກາງສະໄໝ ຂອງຄະນະບໍລິຫານງານພັກ ແຕ່ລະຂັ້ນ, ເຊື່ອມຊຶມເອກະສານ: ຄໍາແນະນໍາຂອງຄະນະຈັດຕັ້ງສູນກາງພັກ ສະບັບເລກທີ 025/ຄຈສພ, ລົງວັນທີ 24 ມັງກອນ 2023 ວ່າດ້ວຍການຈັດຕັ້ງ ປະຕິບັດຄໍາສັ່ງ ຂອງຄະນະເລຂາທິການສູນກາງພັກ ວ່າດ້ວຍການດໍາເນີນກອງປະຊຸມ ຄົບຄະນະກາງສະໄໝ ຂອງຄະນະບໍລິຫານງານພັກ ແຕ່ລະຂັ້ນ; ເຊື່ອມຊຶມເອກະສານ: ມະຕິຂອງກົມການເມືອງສູນກາງພັກ ສະບັບເລກທີ 030/ກມສພ, ລົງວັນທີ 3 ມັງກອນ 2018 ວ່າດ້ວຍມາດຕະຖານ ພະນັກງານນໍາພາ-ຄຸ້ມຄອງ; ເຊື່ອມຊຶມເອກະສານ: ມາດຕະຖານຂອງສະມາຊິກພັກ, ຂໍ້ຫ້າມສໍາລັບສະມາຊິກພັກ, ສິດ ແລະໜ້າທີ່ ຂອງຄະນະພັກແຕ່ລະຂັ້ນ ໂດຍການບັນຍາຍ ຂອງສະຫາຍ ຮສ.ປອ ສີຖານ ສຸຂະວົງ ຄະນະພັກ ມຊ, ເລຂາຄະນະພັກຮາກຖານ ຄສສ, ຈາກນັ້ນ ໄດ້ຮັບຟັງປາຖະກະຖາ ວັນສ້າງຕັ້ງພັກ ປະຊາຊົນ ປະຕິວັດລາວ ຄົບຮອບ 68 ປີ, ໄດ້ຮັບຟັງ ການປາຖະກະຖາ ວັນນັກຮົບເສຍອົງຄະ ແລະເສຍສະຫຼະຊີວິດ ເພື່ອປະເທດຊາດຄົບຮອບ 77 ປີ ໂດຍການບັນຍາຍ ຂອງສະຫາຍ ປະທານກວດກາພັກ ຮາກຖານ ຄສສ ແລະສະຫາຍ ຮອງເລຂາ ຄະນະພັກ ຄສສ.

      ໃນພາກບ່າຍ ທີີ່ປະຊຸມໄດ້ຮັບຟັງການຜ່ານບົດສະຫຼຸບການຊີ້ນໍາ-ນໍາພາ ກາງສະໄໝ 2019-2022 ຂອງຄະນະພັກຮາກຖານ ຄສສ ສະໄໝທີ V ແລະທິດທາງແຜນການໃນໄລຍະ ກາງສະໄໝ 2022-2024 ໂດຍສະຫາຍ ຮສ.ປອ ສີຖານ ສຸຂະວົງ ຄະນະພັກ ມຊ, ເລຂາຄະນະພັກຮາກຖານ ຄສສ; ເຊິ່ງສະຫາຍໄດ້ໃຫ້ຮູ້ວ່າ: ຄະນະພັກຮາກຖານ ຄສສ ປະກອບມີ 5 ສະຫາຍ, ຍິງ 1 ສະຫາຍ, ມີ 10 ໜ່ວຍພັກ ແລະ 33 ຈຸພັກ, ມີສະມາຊິກພັກເປັນພະນັກງານ ແລະນັກສຶກສາ ທັງໝົດ 237 ສະຫາຍ, ຍິງ 149 ສະຫາຍ(ບໍານານ 33 ສະຫາຍ, ຍິງ 12 ສະຫາຍ, ສໍາຮອງ 14 ສະຫາຍ, ຍິງ 11 ສະຫາຍ); ພະນັກງານຄຸ້ມຄອງທັງໝົດ 217 ທ່ານ, ຍິງ 144 ທ່ານ, ມີນັກສຶກສາທັງໝົດ 832 ຄົນ, 566 ຄົນ, ມີນັກຮຽນ 3 ໂຮງຮຽນ ສາທິດ 3,219 ຄົນ, ຍິງ 1,665 ຄົນ; ຕະພຼອດໄລຍະກາງສະໄໝ ການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ V ຂອງຄະນະພັກຮາກຖານ ຄສສ ມີຜົນສໍາເລັດຫຼາຍດ້ານເຊັ່ນ: ວຽກງານດ້ານການເມືອງ-ແນວຄິດ, ວຽກງານປັບປຸງກໍ່ສ້າງພັກ ແລະຂະຫຍາຍພັກ, ວຽກງານຈັດຕັ້ງ-ພະນັກງານ ແລະຍະໂຍບາຍ, ວຽກງານວິຊາສະເພາະ, ວຽກງານອົງການຈັດຕັ້ງມະຫາຊົນ, ວຽກງານຕິດຕາມ-ກວດກາ, ວຽກງານປ້ອງກັນຊາດ-ປ້ອງກັນຄວາມສະຫງົບ ແລະວຽກງານພົວພັນຕ່າງປະເທດ.

       ຈາກນັ້ນ ກໍໄດ້ຮັບຟັງການຜ່ານບົດສໍາຫຼວດ ການຊີ້ນໍາ-ນໍາພາ ລວມຂອງຄະນະພັກຮາກຖານ ສະໄໝທີ V; ເຊິ່ງຜົນງານ ອັນພົ້ນເດັ່ນ ຄະນະພັກຮາກຖານ ໄດ້ເອົາໃຈໃສ່ຢ່າງຕັ້ງໜ້າໃນການຄຸ້ມຄອງ, ກໍ່ສ້າງ, ຊີ້ນໍາ-ນໍາພາ ສະມາຊິກພັກ ພະນັກງານ ເປັນຕົ້ນແມ່ນໄດ້ສົ່ງເສີມ, ນໍາສົ່ງພະນັກງານໄປຍົກລະດັບວິຊາສະເພາະຢູ່ພາຍໃນ ແລະຕ່າງປະເທດ, ນໍາສົ່ງພະນັກງານລົງກໍ່ສ້າງຮາກຖານ, ນໍາສົ່ງພະນັກງານໄປເຝິກອົບຮົມ ທິດສະດີການເມືອງ ແລະການປົກຄອງໄລຍະສັ້ນ 45 ວັນ; ດ້ານວິຊາສະເພາະ ຄສສ ໄດ້ເອົາໃຈໃສ່ຊີ້ນໍາ-ນໍາພາ ປັບປຸງ ແລະພັດທະນາຫຼັກສູດການຮຽນ-ການສອນ ທັງໝົດ 31 ຫຼັກສູດ ແລະ1 ແຜນງານ ຄື: ຫຼັກສູດລະດັບອະນຸບານ 1 ຫຼັກສູດ ແລະ1 ແຜນການລ້ຽງດູເດັກ ອາຍຸ 3 ເດືອນ ຫາ 36 ເດືອນ, ຫຼັກສູດ ລະດັບປະຖົມ 5 ຫຼັກສູດ, ຫຼັກສູດລະດັບ ມັດທະຍົມ 7 ຫຼັກສູດ, ຫຼັກສູດປະລິນຍາຕີ 12 ຫຼັກສູດ, ຫຼັກສູດປະລິນຍາໂທ 5 ຫຼັກສູດ ແລະຫຼັກສູດລະດັບປະລິນຍາເອກອີກ 1 ຫຼັກສູດ ແລະໃນຕອນທ້າຍຂອງກອງປະຊຸມ; ທີ່ປະຊຸມໄດ້ຮັບຟັງການໃຫ້ກຽດໂອ້ລົມຂອງ ສະຫາຍ ສຈ.ປອ ຮຸ່ງເພັດ ຈັນທະວົງ ເພື່ອເປັນເຂັມຊີ້ທິດເຍືອງທາງໃຫ້ແກ່ການປະຕິບັດວຽກງານ ຂອງຄະນະພັກຮາກຖານ ຄສສ ອີກດ້ວຍ.

ພາບບັນຍາກາດ

ໃນຕອນເຊົ້າ ວັນທີ 7 ເມສາ 2023 ຜ່ານມານີ້, ມະຫາວິທະຍາໄລແຫ່ງຊາດ(ມຊ) ໄດ້ຈັດພິທີມອບ-ຮັບຕຳແໜ່ງວິຊາການຄູ ຂັ້ນສາດສະດາຈານ, ຮອງສາດສະດາຈານ, ອາຈານ ແລະ ຜູ້ຊ່ວຍອາຈານ ທີ່ສະໂມສອນຄະນະເສດຖະສາດ ມຊ, ໂດຍການເຂົ້າຮ່ວມຂອງທ່ານ ຮສ. ປອ. ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະກີລາ, ທ່ານ ສຈ. ປອ. ບໍ່ແສງຄຳ ວົງດາລາ ປະທານສະພາ ມຊ, ທ່ານ ຮສ. ປອ. ອຸດົມ ພອນຄຳເພັງ ອະທິການບໍດີ ມຊ, ມີບັນດາທ່ານຮອງອະທິການບໍດີ,  ຄະນະບໍດີ, ແຂກຖືກເຊີນ, ພະນັກງານ, ຄູ-ອາຈານ ເຂົ້າຮ່ວມ.

      ໃນພິທີ ທ່ານ ຮສ. ປອ. ໄກສອນ ເພັງໂສພາ ຫົວໜ້າຫ້ອງການ ການສຶກສາຫຼັງປະລິນຍາຕີ ໄດ້ຂຶ້ນຜ່ານດຳລັດ ນາຍົກລັດຖະມົນຕີ ສະບັບເລກທີ 107/ນຍ, ລົງວັນທີ 1 ມີນາ 2023 ວ່າດ້ວຍການແຕ່ງຕັ້ງສາສະດາຈານ(ສຈ) ໂດຍແຕ່ງຕັ້ງ ທ່ານ ຮສ. ປອ ວິຈິດ ລຳໄຊ ເປັນສາດສະດາຈານ ສາຂາຊີວະວິທະຍາ; ດຳລັດ ນາຍົກລັດຖະມົນຕີ ສະບັບເລກທີ 108-118/ນຍ, ລົງວັນທີ 1 ມີນາ 2023 ວ່າດ້ວຍການແຕ່ງຕັ້ງ ຮອງສາດສະດາຈານ(ຮສ) ຈຳນວນ 12 ທ່ານ ໂດຍແຕ່ງຕັ້ງ: 1. ທ່ານ ປອ. ນາງ ວັນແສງ ຈຸນລະມະນີ ເປັນຮອງສາສະດາຈານ ສາຂາເຄມີ, 2. ທ່ານ ປອ. ແຫລມທອງ ລັດດາວົງ ເປັນຮອງສາສະດາຈານ ສາຂາ ຟີຊິກສາດ, 3. ທ່ານ ປອ. ສູນທອນ ສິງສຸໂພ ເປັນຮອງສາສະດາຈານ ສາຂາ ຟີຊິກສາດ, 4. ທ່ານ ປອ. ນາງ ມາລາວັນ ຈິດຕະວົງ ເປັນຮອງສາສະດາຈານ ສາຂາວິທະຍາສາດການລ້ຽງສັດ, 5. ທ່ານ ປອ. ສາຍທອງ ວິໄລວົງ ເປັນຮອງສາສະດາຈານ ສາຂາ ລະບົບຜະລິດພືດ, 6. ທ່ານ ປອ. ວຽງສະກຸນ ນາປະເສີດ ເປັນຮອງສາສະດາຈານ ສາຂາ ວິທະຍາສາດການລ້ຽງສັດ, 7. ທ່ານ ປອ. ນາງ ດວງມາລາ ກຸນຊະນະ ເປັນຮອງສາສະດາຈານ ສາຂາ ໂຄງສ້າງສະຖາປັດຕະະຍກຳສາດ, 8. ທ່ານ ປອ. ດອນແກ້ວ ຫຼ້າແກ່ນຈັນ ເປັນຮອງສາສະດາຈານ ສາຂາວິສະວະກໍາໂທລະຄົມມະນາຄົມ, 9. ທ່ານ ປອ. ໄຊພອນ ກອງມະນີລາ ເປັນຮອງສາສະດາຈານ ສາຂາ ບໍລິຫານທຸລະກິດ, 10. ທ່ານ ແກ້ວກັນລະຍາ ສີຫາລາດ ເປັນຮອງສາສະດາຈານ ສາຂາ ວິສະວະກຳອີເລັກໂຕຣນິກ, 11. ທ່ານ ອູ່ຄຳ ສີສຸນົນທ໌ ເປັນຮອງສາສະດາຈານ ສາຂາ ເສດຖະສາດ, 12. ທ່ານ ບຸນທອນ ສຸຂະວົງ ເປັນຮອງສາສະດາຈານ ສາຂາ ເສດຖະສາດພັດທະນາ ແລະນະໂຍບາຍ ເປັນກຽດມອບໂດຍທ່ານ ຮສ. ປອ ພຸດ ສິມມາລາວົງ.

       ທ່ານ ນາງ ບຸນນໍາ ຊົມວິມານ ຮອງຫົວໜ້າຫ້ອງການ ການສຶກສາຫຼັງປະລິນຍາຕີ ໄດ້ຂຶ້ນຜ່ານຂໍ້ຕົກລົງວ່າດ້ວຍການແຕ່ງຕັ້ງຕຳແໜ່ງວິຊາການຂັ້ນອາຈານ(ອຈ) ແລະຜູ້ຊ່ວຍອາຈານ(ຊອຈ) ຂອງມະຫາວິທະຍາໄລແຫ່ງຊາດ ທີ່ໄດ້ຮັບແຕ່ງຕັ້ງ 02 ສະບັບຄື: ຄັ້ງທີ 01 ສະບັບທີເລກ 5231/ສກກ, ລົງວັນທີ 10 ກັນຍາ 2022 ເຊິ່ງມີຜູ້ໄດ້ຮັບ ຕໍາແໜ່ງຂັ້ນອາຈານ 18 ທ່ານ, ຍິງ 6 ທ່ານ; ຂັ້ນຜູ້ຊ່ວຍອາຈານ 76 ທ່ານ, ຍິງ 36 ທ່ານ; ຄັ້ງທີ 02 ສະບັບທີເລກ 7345/ສກກ, ລົງວັນທີ 22 ທັນວາ 2022 ມີຜູ້ໄດ້ຮັບຕໍາແໜ່ງຂັ້ນອາຈານ 6 ທ່ານ, ຍິງ 1 ທ່ານ; ຂັ້ນຜູ້ຊ່ວຍອາຈານ ຈຳນວນ 33 ທ່ານ, ຍິງ 18 ທ່ານ ເປັນກຽດມອບໂດຍ ທ່ານ ສຈ. ປອ. ບໍ່ແສງຄຳ ວົງດາລາ ປະທານສະພາ ມຊ.

      ໃນພິທີອັນມີຄວາມໝາຍສຳຄັນນີ້, ທ່ານ ຮສ. ປອ. ພຸດ ສິມມາລາວົງ ໄດ້ໃຫ້ກຽດໂອ້ລົມຕໍ່ພິທີທ່ານກ່າວບາງຕອນວ່າ: ໃນໄລຍະຜ່ານມາ ລັດຖະບານກໍໄດ້ເອົາໃຈໃສ່ວຽກງານພັດທະນາ ຊັບພະຍາກອນມະນຸດເປັນປັດໄຈສຳຄັນ; ການພັດທະນາ ຊັບພະຍາກອນມະນຸດແມ່ນມາຈາກຫຼາຍພາກສ່ວນບໍ່ວ່າຈະເປັນ ຄອບຄົວ, ສັງຄົມ ແລະສະຖາບັນການສຶກສາ, ເຊິ່ງຕໍາແໜ່ງວິຊາການຄູຂັ້ນສາດສະດາຈານ ແລະຮອງສາດສະດາຈານ, ອາຈານ ແລະຜູ້ຊ່ວຍອາຈານ ທີ່ບັນດາທ່ານໄດ້ຮັບ ລ້ວນແຕ່ແມ່ນຜົນງານທາງດ້ານວິຊາການເຊັ່ນ: ຜົນງານການສິດສອນ, ຜົນງານການຄົ້ນຄວ້າວິທະຍາສາດ ເພື່ອສ້າງອົງຄວາມຮູ້ໃໝ່ໆອອກສູ່ສັງຄົມ ແລະປະເທດຊາດ.

ພາບບັນຍາກາດ

ໃນລະຫວ່າງ ວັນທີ 30–31 ມີນາ 2023 ແລະ 2–4 ເມສາ 2023 ຄະນະອາຈານ ຄະນະວິສະວະກໍາສາດ ມະຫາວິທະຍາໄລແຫ່ງຊາດ(ມຊ) ນໍາໂດຍທ່ານ ອຈ. ປທ ແສງລັດສະໝີ ຈັນທະມີນາວົງ, ຮອງຫົວໜ້າພາກວິຊາ ວິສະວະກຳຄອມພິວເຕີ ແລະເຕັກໂນໂລຊີຂໍ້ມູນຂ່າວສານ ແລະທ່ານ ອຈ. ປອ ຄຳເພັດ ບຸນນະດີ ຫົວໜ້າໜ່ວຍວິຊາຊ໋ອບແວ ພາກວິຊາວິສະວະກຳຄອມພິວເຕີ ແລະ ເຕັກໂນໂລຊີຂໍ້ມູນຂ່າວສານ, ຄະນະວິສະວະກຳສາດ, ມະຫາວິທະຍາໄລແຫ່ງຊາດ ໄດ້ນໍາພາ ທີມນັກສຶກສາ 6 ນ້ອງ ຄື: ທ້າວ ພອນປະເສີດ ສີໃສແກ້ວ, ທ້າວ ເກດສະໜາ ດວງປັນຍາ, ທ້າວ ສີພະຈັນ ສະຫວັດວົງ, ທ້າວ ບຸນພອນ ໂກສະດາ, ນາງ ມະນີເພັດ ມີໄຊ ແລະ ນາງ ຊາລິສາ ຈັນທະວົງ ຈາກ ພາກວິຊາວິສະວະກຳຄອມພິວເຕີ ແລະເຕັກໂນໂລຊີຂໍ້ມູນຂ່າວສານ, ຄະນະວິສະວະກຳສາດ ເຂົ້າຮ່ວມແຂ່ງຂັນນະວັດຕະກຳ ໂຄງການ MRC River Monitoring Technology Competition ທີ່ໄດ້ຈັດຂຶ້ນທີ່ ນະຄອນຫລວງວຽງຈັນ, ສປປ ລາວ.

               ໂຄງການນີ້ເປັນໂຄງການ MRC River Monitoring Technology Competition ເຊິ່ງຈັດຂຶ້ນໂດຍ ຄະນະກຳມາທິການແມ່ນ້ຳຂອງສາກົນ ເປັນໂຄງການທີ່ຈັດຂຶ້ນເພື່ອສ້າງແຮງບັນດານໃຈໃຫ້ນັກສຶກສາມະຫາວິທະຍາໄລໃນພູມມິພາກແມ່ນໍ້າຂອງ ໃນການອອກແບບເຄື່ອງມືທີ່ທັນສະໄໝ, ກຸ້ມຄ່າ ແລະຍືນຍົງ ເພື່ອກວດສອບຄຸນນະພາບນ້ຳ, ປະລິມານນ້ຳ, ປະລິມານນ້ຳຝົນ ແລະ ຄວາມຊຸ່ມຂອງດິນ. ການແຂ່ງຂັນກ່ຽວກັບເຕັກໂນໂລຊີ ນະວັດຕະກຳການຕິດຕາມແມ່ນ້ຳໃນບັນດາປະເທດສະມາຊິກ ຄະນະກໍາມາທິການແມ່ນໍ້າຂອງສາກົນ (ກຳປູເຈຍ, ລາວ, ໄທ, ແລະຫວຽດນາມ) ໃນວັນທີ 17 ຕຸລາ 2022, ທີ່ຜ່ານມາ; ພາຍຫຼັງທີ່ໄດ້ຜ່ານການຄັດເລືອກເປັນຕົວແທນປະເທດລາວ ກໍໄດ້ເຂົ້າຮ່ວມງານ MRC Pitching Workshop ທີ່ ບາງກອກ ປະເທດໄທ ໃນເດືອນມັງກອນ ປີ 2023, ພາຍຫຼັງທີ່ກັບມາຈາກບາງກອກ ປະເທດໄທ ທາງທີມງານ ອາຈານ ແລະນັກສຶກສາ ກໍໄດ້ເລີ່ມສ້າງນະວັດຕະກໍາເປັນຂອງຕົນເອງ ແລະໄດ້ຂຶ້ນນໍາສະເໜີໂຄງການໃນງານ MRC River Monitoring Technology Competition ໃນວັນທີ 30–31 ມີນາ 2023 ທີ່ Mekong River Commission Secretariat. ຫຼັງຈາກຈົບການນໍາສະເໜີ ທີມງານຂອງ ນັກສຶກສາ ຈາກ ພາກວິຊາວິສະວະກຳຄອມພິວເຕີ ແລະເຕັກໂນໂລຊີຂໍ້ມູນຂ່າວສານ, ຄະນະວິສະວະກຳສາດ ສາມາດຄວ້າລາງວັນທີ 1 ໃນໝວດຂອງ Soil Moisture ແລະ ໄດ້ວາງສະແດງຜົນງານນະວັດຕະກຳ ທີ່ຜ່ານການນໍາສະເໜີ ທີ່ໄດ້ຮັບລາງວັນດັ່ງກ່າວ ໃນງານປະຊຸມ The 4th MRC Summit Vientiane Lao PDR. ວັນທີ 2–4 ເມສາ 2023 ທີ່ ຫໍປະຊຸມແຫ່ງຊາດ.

       ສຳຫລັບການນຳສະເໜີນະວັດຕະກຳໃນໂຄງການ MRC River Monitoring Technology Competition ພາຍໃນໂຄງການຈະປະກອບມີ 4 ປະເທດເຂົ້າຮ່ວມໄດ້ແກ່: ລາວ, ໄທ, ຫວຽດນາມ ແລະ ກຳປູເຈຍ. ເຊິ່ງການແຂ່ງຂັນໂຄງການດັ່ງກ່າວໄດ້ແບ່ງອອກເປັນ 4 ໝວດຄື : Soil Moisture , Water Level, Rainfall ແລະ Water Quality ມີທັງໝົດ 14 ທີມເຂົ້າຮ່ວມ. ທີມຂອງ ນັກສຶກສາ ພາກວິຊາວິສະວະກໍາຄອມພິວເຕີ ແລະເຕັກໂນໂລຊີຂໍ້ມູນຂ່າວສານ, ຄະນະວິສະວະກຳສາດ ສາມາດຍາດໄດ້ລາງວັນທີ 1 ໃນໝວດ Soil Moisture ໃນງານແຂ່ງຂັນອີກດ້ວຍ.

 ໃນຕອນເຊົ້າວັນທີ 3 ເມສາ 2023 ຜ່ານມານີ້, ທີ່ຫ້ອງປະຊຸມ ຕຶກສໍານັກງານອະທິການບໍດີ ມະຫາວິທະຍາໄລແຫ່ງຊາດ(ມຊ) ໄດ້ຈັດພິທີເຊັນບົດບັນທຶກຄວາມເຂົ້າໃຈ (MOA ) ການຮ່ວມມືດ້ານວິຊາການ  ລະຫວ່າງ ມຊ ແລະສະຫະພັນພາສາຣັດເຊຍ ປຸດສຼກິນ. ໂດຍການລົງນາມລະຫວ່າງ ທ່ານ ຮສ. ປອ. ອຸດົມ ພອນຄໍາເພັງ ອະທິການບໍດີ ມຊ ແລະທ່ານ ປອ. ນາງ ຕູຣຄານນອບສະກາຢາ  ອະທິການບໍດີ ສະຖາບັນພາສາຣັດເຊຍ ປູສກິນ, ມີທ່ານເອກອັກຄະລັດຖະທູດ ແຫ່ງສະຫະພັນລັດເຊຍ ປະຈໍາລາວ, ມີບັນດາທ່ານຮອງອະທິການບໍດີ ມຊ, ຫົວໜ້າຫ້ອງການ ແລະພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມ.

          ການລົງນາມຮ່ວມມືຄັ້ງນີ້ມີຈຸດປະສົງເພື່ອ 1. ຝ່າຍສະຫະພັນພາສາຣັດເຊຍ ປູສກິນ ຈະຕອບສະໜອງການຈັດຫຼັກສູດເຝິກອົບຮົມ, ການສອບເສັງວັດລະດັບພາສາຣັດເຊຍ ຜ່ານການນໍາໃຊ້ລະບົບການຮຽນ-ການສອນທາງໄກ, 2. ຮ່ວມປັບປຸງ ແລະພັດທະນາຫຼັກສູດການຮຽນ-ການສອນໃຫ້ທັນສະໄໝຂຶ້ນ, ແຕ່ລະຝ່າຍ ນໍາໃຊ້ຊັບສິນທາງປັນຍາທີ່ຕົນມີເຂົ້າໃນການສົ່ງເສີມການພັດທະນາທາງການສຶກສາ, 3. ຮ່ວມດໍາເນີນການຄົ້ນຄວ້າວິໄຈ ແລະໂຄງການ, 4. ແລກປ່ຽນຂໍ້ມູນ ແລະເອກະສານທີ່ເປັນຊັບສິນທາງປັນຍາໃນດ້ານວິຊາການທີ່ກ່ຽວຂ້ອງ, 5. ຮ່ວມຈັດກອງປະຊຸມ ແລະສໍາມະນາ, 6. ຈັດໂຄງການແລກປ່ຽນ ແລະເຝິກງານໃຫ້ແກ່ນັກສຶກສາ, 7. ຈັດງານແຂ່ງຂັນ ຫຼື ງານທີ່ກ່ຽວຂ້ອງກັບການສຶກສາອື່ນໆ, 8. ຊຸກຍູ້ການແລກປ່ຽນພະນັກງານ, ຄູ-ອາຈານ. ເຊິ່ງສັນຍາດັ່ງກ່າວນີ້ ມີໄລຍະເວລາຈັດຕັ້ງປະຕິບັດ 5 ປີ ນັບແຕ່ມື້ລົງນາມເຊັນສັນຍາເປັນຕົ້ນໄປ.

ພາບບັນຍາກາດ