ໃນວັນທີ 24 ກຸມພາ 2023 ນີ້, ຫ້ອງການ ການສຶກສາຫຼັງປະລິນຍາຕີ (ມຊ) ໄດ້ເປີດກອງປະຊຸມເຝິກອົບຮົມຂະບວນການຂໍຕຳແໜ່ງວິຊາການຄູ ຄັງທີ I ປະຈຳປີ 2023 ທີ່ຫ້ອງປະຊຸມສະໂມສອນໃຫຍ່ ມຊ ໂດຍການເປັນປະທານຂອງທ່ານ ຮສ. ປອ. ໄກສອນ ເພັງໂສພາ ຫົວໜ້າຫ້ອງການ ການສຶກສາຫຼັງປະລິນຍາຕີ, ມີຫົວໜ້າພະແນກການທີ່ກ່ຽວຂ້ອງກັບວຽກງານສະພາມະຫາວິທະຍາໄລແຫ່ງ ພາຍໃນຄະນະວິຊາ ແລະ ສະຖາບັນ, ພ້ອມນັ້ນ ຍັງມີ ບັນດາລັດຖະກອນຄູ ທົວ ມຊ ຜູ້ທີ່ສົນໃຈ ສະໝັກຕຳແໜ່ງວິຊາການຄູ ເຂົ້າຮ່ວມທັງໝົດ ເກືອບ 200 ກ່ວາທ່ານ.

ປັດຈຸບັນ ມຊ ມີລັດຖະກອນຄູ ທີ່ໄດ້ຮັບຕຳແໜ່ງ ວີຊາການຄູຂັ້ນຕ່າງໆ ລວມທັງໝົດ ຫຼັງກ່ວາ 500 ຄົນ ແລະ ຍັງມີພະນັກງານລັດຖະກອນຄູທີ່ຍັງບໍ່ທັນໄດ້ຮັບຕຳແໜ່ງ ປະມານ 900 ຄົນ. ດັ່ງນັ້ນ ການຈັດກອງປະຊຸມໃນຄັ້ງນີ້ ແມ່ນເພື່ອໃຫ້ບັນດາພະນັກງານ, ຄູ-ອາຈານ ຜູ້ທີ່ສົນໃຈຂໍຕຳແໜ່ງວິຊາການຄູ ແລະ ພາກສ່ວນຮັບຜິດຊອບໃນວຽກງານດັ່ງກ່າວ ໄດ້ມີຄວາມເຂົ້າໃຈຢ່າງເລິກເຊິ່ງ ກ່ຽວກັບຂະບວນການການຂໍຕຳແໜ່ງວິຊາການຄູ; ໃຫ້ເຂົ້າໃຈກ່ຽວກັບ ບັນດານິຕິກຳຕ່າງໆ ທີ່ເປັນບ່ອນອີງ ໂດຍສະເພາະກໍ່ແມ່ນ ດຳລັດ ເລກທີ 03/ລບ ວ່າດ້ວຍ ຕຳແໜ່ງວິຊາການຄູຢູ່ ສະຖານການສຶກສາຊັ້ນສູງ ແລະ ຄຳແນະ ເລກທີ 1054/ສສກ ວ່າດ້ວຍ ການຄັດເລືອກ ແລະ ຮັບຮອງຕຳແໜ່ງວິຊາການຄູ ຢູ່ສະຖານການສຶກສາຊັ້ນສູງ, ນອກນັ້ນກໍ່ຈະມີການນຳສະເໜີ ບັນດາວິທີ່ການ ແລະ ຂັ້ນຕອນເປັນອັນລະອຽດໂດຍການນຳສະເໜີຂອງທ່ານ ປທ. ໂສພາພອນ ສຸລິຍະວົງ, ປອ ເກສອນ ກັນຫາລິຄຳ ແລະ ປທ. ອາລິຕ້າ ຂັນທະວົງໄຊ.

ໃນວັນທີ 23 ກຸມພາ 2023 ຜ່ານມາ, ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີປິດບັ້ນເຝິກອົບຮົມທິດສະດີການເມືອງ ແລະ ການປົກຄອງໄລຍະສັ້ນ 45 ວັນ ຊຸດທີ 15 ທີ່ສະໂມສອນ ມຊ, ໂດຍການເປັນປະທານຂອງ ສະຫາຍ ຮສ. ພູວົງ ອຸ່ນຄຳແສນ ຫົວໜ້າສະຖາບັນການເມືອງ ແລະການປົກຄອງແຫ່ງຊາດ ແລະ ສະຫາຍ ຮສ. ປອ. ອຸດົມ ພອນຄຳເພັງ ເລຂາຄະນະພັກ, ອະທິການບໍດີ ມຊ, ບັນດາ ສະຫາຍ ຄະນະພັກ ມຊ, ພ້ອມດ້ວຍບັນດາແຂກຖືກເຊີນຈາກພາກສ່ວນຕ່າງໆ ອ້ອມຂ້າງ ມຊ ແລະ ນັກສຳມະນາກອນເຂົ້າຮ່ວມ.

ການເຝິກອົບຮົມຄັ້ງນີ້ແມ່ນພາຍໃຕ້ການຊີ້ນໍາ-ນຳພາ ແລະ ຄວາມຮັບຜິດຊອບໂດຍກົງ ຂອງຄະນະປະຈໍາພັກ ມຊ. ໂດຍມອບໃຫ້ພະແນກກໍ່ສ້າງພັກຫ້ອງການຈັດຕັ້ງ ແລະພະນັກງານ ຮັບຜິດຊອບ, ມີນັກສໍາມະນາກອນຈາກ 17ຮາກຖານພັກທົ່ວ ມຊ ທັງໝົດ 165 ສະຫາຍ, ຍິງ 73 ສະຫາຍ, ດ້ານວຸດທິການສຶກສາປະລິນຍາເອກ 12 ສະຫາຍ, ຍິງ 3 ສະຫາຍ; ປະລິນຍາໂທ 116 ສະຫາຍ, ຍິງ 53 ສະຫາຍ; ປະລິນຍາຕີ 34 ສະຫາຍ, ຍິງ 20 ສະຫາຍ; ຊັ້ນສູງ 3 ສະຫາຍ; ດ້ານຕໍາແໜ່ງທາງວິຊາການ ຂັ້ນ ອາຈານ ຈໍານວນ 12 ສະຫາຍ, ຍິງ 5 ສະຫາຍ; ຂັ້ນຜູ້ຊ່ວຍອາຈານ 35 ສະຫາຍ, ຍິງ 20 ສະຫາຍ; ໄດ້ແບ່ງອອກເປັນ 9 ໜ່ວຍ, ເຊິ່ງມີຄະນະໜ່ວຍໆລະ 3 ສະຫາຍ ແລະ ແຕ່ງຕັ້ງຄະນະຫ້ອງ 7 ສະຫາຍ, ຍິງ 2 ສະຫາຍເພື່ອສະດວກໃນການຄຸ້ມຄອງ, ນໍາພາຈັດຕັ້ງການເຄື່ອນໄຫວວຽກງານຕົວຈິງ; ຜ່ານການຮຽນ-ການສອນຕະຫຼອດໄລຍະ 45 ວັນຜູ້ເຂົ້າຮ່ວມ ໄດ້ຮຽນຮູ້ເນື້ອໃນຫຼັກສູດຕາມໂຄງການຫຼັກສູດ ແລະຕາມຕາຕະລາງຂອງສະຖາບັນການເມືອງ ແລະການປົກຄອງແຫ່ງຊາດທີ່ກໍານົດໄວ້, ເຊິ່ງລວມມີ 5 ວິຊາຄື: ວິຊາປັດຊະຍາ 6 ບົດ, ວິຊາເສດຖະສາດການເມືອງ 8 ບົດ, ວິຊາລັດທິສັງຄົມນິຍົມວິທະຍາສາດ 6 ບົດ, ວິຊາບໍລິຫານສາດ 8 ບົດ ແລະ ວິຊາກໍ່ສ້າງພັກ 5 ບົດ ລວມທັງໝົດ 33 ບົດ, ນອກຈາກນີ້ ຄະນະພັກຄະນະນໍາ ມຊ ຍັງໄດ້ຂຶ້ນບັນຍາຍແຜນແມ່ບົດ, ແຜນຍຸດທະສາດໃນການພັດທະນາ ມຊ, ມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກ ມຊ. ຕະຫຼອດໄລຍະເວລາການເຝິກອົບຮົມສາມາດຕີລາຄາໄດ້ວ່າ: ນັກສໍາມະນາກອນເອົາໃຈໃສ່ຄົ້ນຄວ້າເຊື່ອມຊືມເອກະສານຕ່າງໆສະແດງອອກໃນການຂຶ້ນຫ້ອງ-ລົງຫ້ອງ ໂດຍລວມແມ່ນປະຕິບັດໂມງເວລາໄດ້ດີພໍສົມຄວນ,​ ມີຄວາມເປັນເຈົ້າການເກັບກໍາບົດຮຽນ, ເອກະສານຕໍາລາຮຽນດ້ວຍຕົນເອງ, ເຂົ້າຮ່ວມປະກອບສ່ວນຂະບວນການຮຽນ-ການສອນໃນແຕ່ລະວິຊາຢ່າງມີບັນຍາກາດ ແລະມີເນື້ອໃນດີ, ນອກຈາກການຮຽນ ການບັນຍາຍພາກທິດສະດີແລ້ວຍັງມີການສໍາມະນາຄົ້ນຄວ້າເປັນໜ່ວຍແລກປ່ຽນຄໍາຄິດເຫັນລົງເລິກບາງບັນຫາທີ່ສໍາຄັນໃນແຕ່ລະບົດແຕ່ລະວິຊາ ແລະຈັດຕັ້ງຂະບວນທັດສະນະສຶກສາ ຫໍພິພິທະພັນ ປະທານໄກສອນ ພົມວິຫານ ແລະ ສະພາແຫ່ງຊາດ. ພ້ອມກັນນີ້ ຍັງໄດ້ຢ້ຽມຢາມ ແລະ ຮັບຟັງການເຜີຍແຜ່ມູນເຊື້ອ ແລະ ປະຫວັດຄວາມເປັນມາ ຂອງສະຖາບັນການເມືອງ ແລະການປົກຄອງແຫ່ງຊາດ, ພົບປະກັບອາຈານເພື່ອສ້າງສາຍພົວພັນ, ຄວາມສາມັກຄີໃຫ້ໜັກແໜ້ນຂຶ້ນກວ່າເກົ່າ. ຈາກການເຝິກອົບຮົມ ຜົນການປະເມີນຄວາມຮັບຮູ້ ຂອງຜູ້ເຝິກອົບຮົມ ເຫັນວ່າ: 1. ຄວາມຮັບຮູ້ລະດັບດີຫຼາຍມີ 136 ສະຫາຍ; ສະເລ່ຍເທົ່າກັບ 82,42%; 2. ຄວາມຮັບຮູ້ລະດັບດີ ມີ 29 ສະຫາຍ ສະເລ່ຍເທົ່າກັບ 17,58%;  3. ຄວາມຮັບຮູ້ລະດັບດີປານກາງ     ມີ 0 ສະຫາຍ ສະເລ່ຍເທົ່າກັບ 0%; 4. ບໍ່ໄດ້ປະເມີນຜົນ ມີ 0 ສະຫາຍ ສະເລ່ຍເທົ່າກັບ 0%.

ໃນໂອກາດສໍາຄັນນີ້, ສະຫາຍ ຮສ. ປອ. ອຸດົມ ພອນຄຳເພັງ ກໍໄດ້ໃຫ້ກຽດໂອ້ລົມຕໍ່ພິທີ; ເຊິ່ງກ່ອນອື່ນສະຫາຍໄດ້ກ່າວຍ້ອງຍໍ-ຊົມເຊີຍ ຕໍ່ຜົນສໍາເລັດ ບັ້ນການເຝິກອົບຮົມ ຕະຫຼອດໄລຍະ 45 ວັນ; ທັງໄດ້ກ່າວເນັ້ນໜັກໃຫ້ພະນັກງານ, ຄູ-ອາຈານ ທຸກສະຫາຍ ທີ່ໄດ້ສໍາເລັດການເຝິກອົບຮົມຊຸດທີ 15 ຈົ່ງສຸມສະຕິປັນຍາ ແລະກຳລັງແຮງ ເຂົ້າໃນການພັດທະນາການຮຽນ-ການສອນ ຂອງ ມຊ ແລະຈົ່ງນຳເອົາບົດຮຽນ ແລະ ແນວຄວາມຄິດຕ່າງໆທີ່ໄດ້ຈາກການເຂົ້າຮ່ວມເຝິກອົບຮົມຄັ້ງນີ້ ໄປໜູນໃຊ້ເຂົ້າໃນການດຳເນີນຊີວິດໃຫ້ເກີດດອກອອກຜົນ.

ພາບບັນຍາກາດ

          ໃນຕອນເຊົ້າ ວັນທີ 21 ກຸມພາ 2023 ນີ້, ຫ້ອງການ ມະຫາວິທະຍາໄລແຫ່ງຊາດ(ມຊ) ໄດ້ຈັດກອງປະຊຸມ ເປີດນໍາໃຊ້ ເວັບໄຊໃໝ່ ຂອງ ມຊ ຂຶ້ນທີ່ຫ້ອງປະຊຸມ ຂອງສະຖາບັນພັດທະນາຊັບພະຍາກອນມະນຸດ ລາວ-ຍີ່ປຸ່ນ ມຊ, ໂດຍການເປັນປະທານຂອງທ່ານ ຮສ.ປອ ນາງ ສົມຈັນ ບຸນພັນມີ ຮອງອະທິການບໍດີ ມຊ, ມີທ່ານ ຮສ.ປອ ບົວດໍາ ແສງຄໍາຄຸດລາວົງ ຫົວໜ້າຫ້ອງການ ມຊ, ມີບັນດາທ່ານຮອງຄະນະບໍດີ, ຜູ້ອໍານວຍການສະຖາບັນ, ຫົວໜ້າຫ້ອງການ, ຜູ້ອໍານວຍການສູນ, ຫໍສະໝຸດກາງ, ໂຮງໝໍ, ໂຮງຮຽນ ພ້ອມດ້ວຍພະນັກງານວິຊາການ ຜູ້ຮັບຜິດຊອບວຽກງານຂ່າວສານ ພາກສ່ວນຕ່າງໆອ້ອມຂ້າງ ມຊ ເຂົ້າຮ່ວມ.

          ໃນທີ່ປະຊຸມ ທ່ານ ນາງ ໃບສີ ວາເນັ່ງຈື ຮອງຫົວໜ້າຫ້ອງການ ມຊ, ຜູ້ຊີ້ນໍາພະແນກຂ່າວສານ ແລະປະຊາສໍາພັນ ໄດ້ຜ່ານ ຂໍ້ຕົກລົງຂອງອະທິການບໍດີ ມຊ ວ່າດ້ວຍການແຕ່ງຕັ້ງຄະນະຮັບຜິດຊອບ ວຽກງານຂ່າສວສານ ມຊ. ຈາກນັ້ນ ທ່ານ ຮສ.ປອ ບົວດໍາ ແສງຄໍາຄຸດລາວົງ ຫົວໜ້າຫ້ອງການ ມຊ ໄດ້ຂຶ້ນຜ່ານບົດສະຫຼຸບ ການດໍາເນີນການປັບປຸງເວັບໄຊໃໝ່ ຂອງ ມຊ ໃນໄລຍະຜ່ານມາ; ເຊິ່ງທ່ານໄດ້ຍົກໃຫ້ເຫັນຜົນສໍາເລັດໃນບັນດາໜ້າວຽກຕ່າງໆ, ຍົກໃຫ້ເຫັນຂໍ້ສະດວກ ແລະຂໍ້ຫຍຸ້ງຍາກໃນການປັບປຸງເວັບໄຊໃໝ່ ໃນໄລຍະຜ່ານມາ; ຂະນະດຽວກັນ ກໍໄດ້ນໍາສະເໜີ ຮູບແບບ ແລະໜ້າຕາ ຂອງເວັບໄຊ ທີ່ຜ່ານການປັບປຸງໃໝ່, ເຊິ່ງເຫັນວ່າ ຮູບແບບ ແລະໜ້າຕາ ຂອງເວັບໄຊໃໝ່ ຂອງ ມຊ ແມ່ນສົມບູນ ແລະກວ້າງຂວາງຫຼາກຫຼາຍ ຮູບແບບແທດເໝາະກັບ ສະພາບຄວາມເປັນຈິງຂອງ ມຊ ໃນປັດຈຸບັນ ແລະສາມາດເປັນແຫ່ຼງສະໜອງຂໍ້ມູນຕ່າງໆ ຂອງ ມຊ ແກ່ນັກຮຽນ-ນັກສຶກສາ ກໍຄື ສັງຄົມໄດ້ໃນລະດັບດີ.

ຈາກນັ້ນ, ໃນທີ່ປະຊຸມໄດ້ມີການສົນທະນາແລກປ່ຽນ ຄໍາຄິດ-ຄໍາເຫັນ ຕໍ່ກັບເວັບໄຊໃໝ່ ເພື່ອໃຫ້ມີຄວາມສົມບູນ, ສາມາດສະໜອງຂໍ້ມູນໃຫ້ແກ່ສັງຄົມໄດ້ຢ່າງກວ້າງຂວາງກວ່າເກົ່າ.

          ຕອນທ້າຍພິທີ, ທີ່ປະຊຸມໄດ້ຮັບຟັງການໂອ້ລົມ ຂອງທ່ານ ຮສ.ປອ ນາງ ສົມຈັນ ບຸນພັນມີ ຮອງອະທິການບໍດີ ມຊ; ເຊິ່ງທ່ານ ໄດ້ຍົກໃຫ້ເຫັນບົດບາດ ແລະຄວາມສໍາຄັນຂອງວຽກງານຂ່າວສານໃນສັງຄົມ ຍຸກປັດຈຸບັນ; ເວົ້າສະເພາະແມ່ນ ມຊ. ຍິ່ງມີຄວາມຈໍາເປັນໃນການເຜີຍແຜ່ຂໍ້ມູນຂ່າວສານ ຜ່ານສື່ ເພື່ອຕອບສະໜອງຄວາມຕ້ອງການຂອງນັກຮຽນ-ນັກສຶກສາ ກໍຄື ສັງຄົມ ໄດ້ຢ່າງກວ້າງຂວາງ; ເຊິ່ງທ່ານໄດ້ກ່າວເນັ້ນໃຫ້ທຸກພາກສ່ວນອ້ອມຂ້າງ ມຊ ຕ້ອງໄດ້ເອົາໃຈໃສ່ ວຽກງານຂ່າວສານ ແລະສ້າງຊ່ອງທາງໃນການໂຄສະນາ-ເຜີຍແຜ່ ຂໍ້ມູນຕ່າງໆຂອງພາກສ່ວນຕົນອອກສູ່ສັງຄົມໃຫ້ກວ້າງກວ້າງ ໂດຍສະເພາະແມ່ນ ທຸກພາກສ່ວນຕ້ອງມີ ເວັບໄຊເປັນຂອງຕົນເອງ.

ໃນຕອນບ່າຍວັນທີ 17 ກຸມພາ 2023 ຜ່ານມານີ້, ຫ້ອງການຄຸ້ມຄອງນັກສຶກສາ ມະຫາວິທະຍາໄລແຫ່ງຊາດ(ມຊ) ໄດ້ຈັດພິທີເປີດ-ປິດງານແຂ່ງຂັນກີລານັກສຶກສາທົ່ວ ມຊ. ຄັ້ງທີ 13 ປະຈໍາສົກສຶກສາ 2022-2023 ຂຶ້ນທີ່ເດີ່ນກີລາກາງ ມຊ. ໂດຍການເປັນປະທານຂອງທ່ານ ຮສ. ໂພສີ ທິບດາວັນ ຮອງອະທິການບໍດີ ມຊ ທັງເປັນປະທານຈັດ

ການແຂ່ງຂັນ, ເປັນກຽດເຂົ້າຮ່ວມມີທ່ານ ຮສ. ປອ. ອຸດົມ ພອນຄໍາເພັງ ອະທິການບໍດີ ມຊ, ທ່ານ ເປີນ ອິນທະໜໍ່ ຫົວໜ້າຫ້ອງການຄຸ້ມຄອງນັກສຶກສາ ຮອງປະທານຈັດງານແຂ່ງຂັນກີລາ, ມີບັນດາທ່ານຄະນະບໍດີ, ຫົວໜ້າຫ້ອງການ, ຕາງໜ້າບໍລິສັດ, ທະນາຄານ, ຫ້າງຮ້ານ ທີ່ສະໜັບສະໜູນງານກີລາ, ບັນດາແຂກທີ່ຖືກເຊີນ, ພ້ອມດ້ວຍພະນັກງານ, ຄູ-ອາຈານ ແລະນ້ອງໆນັກສຶກສາຈາກຄະນະວິຊາ ແລະສະຖາບັນທົ່ວ ມຊ  ເຂົ້າຮ່ວມ ຢ່າງເປັນຂະບວນການຟົດຟື້ນ.

          ໃນພິທີ ທ່ານ ສະຫວັນ ເງິນງາມ ຮອງຫົວໜ້າຫ້ອງການຄຸ້ມຄອງນັກສຶກສາ ທັງເປັນຮອງປະທານຈັດການແຂ່ງຂັນ ໄດ້ຂຶ້ນຜ່ານບົດສະຫຼຸບເຊິ່ງທ່ານໃຫ້ຮູ້ວ່າ: ການຈັດການແຂ່ງຂັນກີລານັກສຶກສາທົ່ວ ມຊ. ຄັ້ງທີ 13 ປະຈໍາສົກສຶກສາ 2022-2023 ນີ້ ກໍເພື່ອຈັດຕັ້ງການເຄື່ອນໄຫວ ແລະແຂ່ງຂັນກີລາປະເພດຕ່າງໆ ໃຫ້ເປັນຂະບວນຟົດຟື້ນທົ່ວ ມຊ,  ເປັນການສ້າງເງື່ອນໄຂສົ່ງເສີມໃຫ້ນັກສຶກສານໍາໃຊ້ເວລາວ່າງມາເຝິກແອບ ແລະພັດທະນາຕົນເອງທາງດ້ານປະເພດກີລາໃດໜຶ່ງ ໃນລະດັບສາຍສູງ ແລະສ້າງຊື່ສຽງໃຫ້ແກ່ຕົນເອງ ກໍຄື ມຊ ແລະປະເທດຊາດ, ເພື່ອເປັນການສ້າງໂອກາດໃຫ້ພະນັກງານ, ຄູ-ອາຈານ ແລະນັກສຶກສາຄະນະວິຊາ ແລະສະຖາບັນຕ່າງໆ ໄດ້ພົບປະກັນເພື່ອສ້າງຄວາມສາມັກຄີເຊິ່ງກັນ ແລະກັນ, ເປັນການຄັດເລືອກເອົານັກກີລາດີເດັ່ນປະເພດຕ່າງໆ ເຂົ້າເປັນນັກກີລາຂອງສະໂມສອນກີລາ ມຊ, ເພື່ອພັດທະນາຂະບວນການກີລາຂອງ ມຊ ໃຫ້ເຕີບໃຫຍ່ຂະຫຍາຍຕົວ ແລະເພື່ອໃຫ້ສາມາດເຂົ້າຮ່ວມແຂ່ງຂັນກີລາລະດັບຊາດ ກໍຄື ພາກພື້ນ ແລະສາກົນ ໃຫ້ນັບມື້ນັບຫຼາຍຂຶ້ນ.  ທ່ານໃຫ້ຮູ້ອີກວ່າ: ການຈັດການແຂ່ງຂັນຄັ້ງນີ້ ແມ່ນໄດ້ເລີ່ມແຂ່ງຂັນມາແຕ່ວັນທີ 11 ມັງກອນ 2023 ຫາວັນທີ 17 ກຸມພາ 2023 ເຊິ່ງມີ 13 ຄະນະວິຊາ ແລະ 1  ສະຖາບັນເຂົ້າຮ່ວມການແຂ່ງຂັນ, ມີຄະນະຄຸເຝິກ ແລະນັກກີລາເຂົ້າຮ່ວມທັງໝົດຈໍານວນ 1.534 ຄົນ, ຍິງ 427 ຄົນ. ຈັດແຂ່ງຂັນ  6 ປະເພດກີລາຄື 1. ກີລາ ບານເຕະ ຍິງ-ຊາຍ, 2. ກີລາ ຟຸດຊໍ ຊາຍ, 3. ກີລາ ບານສົ່ງໃນຮົ່ມ ຍິງ-ຊາຍ, 4. ກີລາ ກະຕໍ້ຫວາຍ ຍິງ-ຊາຍ, 5. ກີລາເປຕັງ ທີມຍິງ-ທີມຊາຍ ແລະທີມປະສົມ ແລະ 6. ກີລາແລ່ນ.

ຈັດລໍາດັບການແຂ່ງຂັນ ອັນດັບທີ 1 ໄດ້ແກ່ຄະນະວິທະຍາສາດການກີລາ-ກາຍະກໍາ, ອັນດັບ 2 ຄະນະສຶກສາສາດ, ອັນດັບ 3 ຄະນະກະເສດສາດ, ອັນດັບ 4 ຄະນະວິທະຍາສາດສັງຄົມ, ອັນດັບ 5 ຄະນະວິສະວະກໍາສາດ, ອັນດັບ 6 ຄະນະນິຕິສາດ ແລະລັດຖະສາດ, ອັນດັບ 7 ຄະນະວິທະຍາສາດທໍາມະຊາດ, ອັນດັບ 8 ຄະນະເສດຖະສາດ ແລະບໍລິຫານທຸລະກິດ, ອັນດັບ 9 ຄະນະວິທະຍາສາດສິ່ງແວດລ້ອມ, ອັນດັບ 10 ຄະນະສະຖາປັດຕະຍະກໍາສາດ ແລະອັນດັບ 11 ຄະນະອັກສອນສາດ ແລະຄະນະຊັບພະຍາກອນນໍ້າ.

ໃນພິທີໄດ້ຮັບຊົມການຍ່າງຂອງຂະບວນກ້ອນກໍາລັງນັກກີລາ, ຮັບຊົມການສະແດງສິລະປະເປັນຕົ້ນແມ່ນການຮ້ອງເພງລວມໝູ່, ການສະແດງມວຍລາຍລາວ ແລະການສະແດງບົດຟ້ອນ ນອກຈາກນັ້ນຍັງໄດ້ຮັບຊົມການແຂ່ງຂັນບານເຕະຊາຍ ຄູ່ຊີງຊະນະເລີດລະຫວ່າງ ທີມນັກກີລາ ຄະນະວິທະຍາສາດການກີລາ-ກາຍະກໍາ ແລະທີມນັກກີລາຄະນະວິສະວະກໍາສາດ; ເຊິ່ງບັນຍາກາດຂອງງານແມ່ນເຕັມໄປດ້ວຍຄວາມຄຶກຄື້ນ-ມ່ວນຊື່ນທ່າມກາງສຽງຂອງກອງເຊຍແຕ່ລະພາກສ່ວນທີ່ເຂົ້າຊົມເຕັມຂອບສະໜາມ ຢ່າງເບີກບານມ່ວນຊື່ນຕະຫຼອດການແຂ່ງຂັນ ແລະຕອນທ້າຍພິທີໄດ້ມີການມອບລາງວັນໃຫ້ນັກກີລາບານເຕະຊາຍ ໂດຍການມອບຂອງທ່ານ ຮສ. ປອ. ອຸດົມ ພອນຄໍາເພັງ ອະທິການບໍດີ ມຊ.

ສໍາລັບລາງວັນ ກີລາບານເຕະຍິງ ແລະປະເພດອື່ນໆແມ່ນໄດ້ຈັດພິທີມອບ ໃນວັນທີ 15 ກຸມພາ 2023 ກ່ອນແລ້ວ.

ພາບບັນຍາກາດ