ໃນລະຫວ່າງວັນທີ 5-6 ກໍລະກົດ 2023,  ສະຖາບັນຂົງຈື ມະຫາວິທະຍາໄລແຫ່ງຊາດ ແລະ ສະພາການຄ້າກວາງຊີ ສປ ຈີນ ໄດ້ຮ່ວມກັນຈັດງານຕະຫຼາດນັດແຮງງານ ແລະ ວາງສະແດງສິນຄ້າຂອງບໍລິສັດຈີນຄັ້ງທີ III ປະຈຳປີ 2023 ຂຶ້ນ ທີ່ມະຫາວິທະຍາໄລແຫ່ງຊາດ, ໂດຍການເຂົ້າຮ່ວມຂອງທ່ານ ຮສ. ໂພສີ ທິບດາວັນ ຮອງອະທິການບໍດີ ມະຫາວິທະຍາໄລແຫ່ງຊາດ ແລະ ທ່ານ Chen Qinru ປະທານສະພາການຄ້າກວາງຊີ ສປ ຈີນ ປະຈຳ ສປປ ລາວ, ​ທ່ານ Chen Zhaolin  ຫົວໜ້າຄະນະດຳເນີນງານສະພາການຄ້າກວາງຊີ ພ້ອມດ້ວຍຜູ້ອໍານວຍການຝ່າຍຈີນ-ຝ່າຍລາວ, ບັນດາຫົວໜ້າຫ້ອງການ, ຕາງໜ້າບໍລິສັດ, ພະນັກງານຄູອາຈານ ແລະ ນັກສຶກສາກໍໄດ້ເຂົ້າຮ່ວມຢ່າງພ້ອມພຽງກັນ.

ຈຸດປະສົງຂອງການຈັດງານໃນຄັ້ງນີ້ ແມ່ນເພື່ອໃຫ້ນັກສຶກສາທີ່ກໍາລັງຈະຈົບການສຶກສາ ແລະ ຜູ້ທີ່ກຳລັງຊອກວຽກເຮັດງານທໍາໄດ້ມີໂອກາດມາຊອກວຽກ, ໃນສາຂາທີ່ກ່ຽວກັບສາຍການຮຽນຂອງຕົນເອງ ພ້ອມທັງເປັນການເປີດໂອກາດໃຫ້ແກ່ນັກສຶກສາ ມຊ ໄດ້ຮູ້ຈັກບັນດາບໍລິສັດຕ່າງໆ ໂດຍສະເພາະກໍແມ່ນບັນດາບໍລິສັດຈາກ ສປ ຈີນ ທີ່ມາລົງທຶນໃນ ສປປ ລາວ, ເຊິ່ງໃນປີນີ້ກໍຄືກັນກັບປີຜ່ານໆມາມີບໍລິສັດເຂົ້າຮ່ວມຫຼາຍກວ່າ 48 ບໍລິສັດ ແລະມີຜູ້ເຂົ້າຮ່ວມງານຫຼາຍກວ່າ 2 ພັນຄົນ.

ພາບບັນຍາກາດ

           ໃນຕອນເຊົ້າວັນທີ 28 ມິຖຸນາ ປີ2023 ນີ້, ທີ່ຫ້ອງປະຊຸມ ຕຶກສໍານັກງານອະທິການບໍດີ ມະຫາວິທະຍາໄລແຫ່ງຊາດ(ມຊ) ໄດ້ມີພິທີເຊັນສັນຍາ ຮ່ວມມືດ້ານວິຊາການ ລະຫວ່າງ ມະຫາວິທະຍາໄລແຫ່ງຊາດ ແລະມະຫາວິທະຍາໄລ Université Paris-Est Créteil Val-de-Mame UPEC ປະເທດຝຣັ່ງ; ຝ່າຍ ມຊ ເຊັນໂດຍ ທ່ານ ສຈ.ປອ. ຮຸ່ງເພັດ ຈັນທະວົງ ຮອງອະທິການບໍດີ ມຊ ແລະຝ່າຍ ມະຫາວິທະຍາໄລ   Université Paris-Est Créteil Val-de-Mame UPEC  ປະເທດຝຣັ່ງ ເຊັນໂດຍ ທ່ານ  Prof. Dr Laurent THEVENET ຮອງອະທິການບໍດີ, ມີບັນດາ ທ່ານ ຄະນະບໍດີ, ຫົວໜ້າຫ້ອງການ ແລະພະນັກງານທີ່ກ່ຽວຂ້ອງທັງສອງຝ່າຍເຂົ້າຮ່ວມ.

           ຈຸດປະສົງການເຊັນສັນຍາຮ່ວມມືດ້ານວິຊາການທັງສອງຝ່າຍຄັ້ງນີ້, ແມ່ນເພື່ອສ້າງຄວາມເຂັ້ມແຂງດ້ານວຽກງານການຄົ້ນຄວ້າ ແລະການແລກປ່ຽນວຽກງານການຄົ້ນຄວ້າ ແລະສິດສອນ ຂອງອາຈານ ແລະນັກສຶກສາ ຂອງສອງສະຖາບັນ, ແລກປ່ຽນບົດຮຽນ ດ້ານການເຝິກອົບຮົມບຸກຄະລາກອນ, ການຄົ້ນຄວ້າວິທະຍາສາດ, ການສ້າງຄວາມອາດສາມາດ ຂອງຄູ-ອາຈານ, ເພີ່ມທະວີການຮ່ວມມື ການແລກປ່ຽນນັກສຶກສາ, ການແລກປ່ຽນ ພະນັກງານ, ຄູ-ອາຈານ, ນັກວິໄຈ, ແລກປ່ຽນການຈັດສໍາມະນາ ແລະກອງປະຊຸມຄົ້ນຄວ້າວິຊາການຕ່າງໆ ລວມທັງການແລກປ່ຽນ ຂໍ້ມູນຂ່າວສານ, ການຕີພິມ ເຜີຍແຜ່ຜົນການຄົ້ນຄວ້າຮ່ວມກັນ. ການຮ່ວມມືດັ່ງກ່າວນີ້ ຈະເປັນຜົນດີໃຫ້ແກ່ ສອງມະຫາວິທະຍາໄລ ກໍຄື ສອງປະເທດ ລາວ-ຝຣັ່ງ; ຝຣັ່ງ-ລາວ ໃຫ້ມີຄວາມສາມັກຄີແໜ້ນແຟ້ນຍິ່ງຂຶ້ນ. ເຊິ່ງການຮ່ວມມືທີ່ທັງສອງຝ່າຍໄດ້ລົງນາມຮ່ວມກັນ ສະບັບນີ້ ແມ່ນຈະໄດ້ດໍາເນີນໄປເປັນເວລາ 5 ປີ ຈຶ່ງຈະສິ້ນສູດລົງ.

ພາບບັນຍາກາດ

ໃນຕອນບ່າຍວັນທີ 3 ກໍລະກົດ 2023 ຜ່ານມານີ້, ຄະນະພັກ ມະຫາວິທະຍາໄລແຫ່ງຊາດ(ມຊ), ໄດ້ຈັດພິທີ ມອບ-ຮັບ ໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ປະຈໍາປີ 2022 ຂຶ້ນ ທີ່ຫ້ອງປະຊຸມ ສະໂມສອນໃຫຍ່ ມຊ, ໂດຍການໃຫ້ກຽດເປັນປະທານ ຂອງ ສະຫາຍ ນາງ ຂັນທະລີ ສີຣິພົງພັນ, ຮອງເລຂາ ຄະນະພັກ, ຮອງລັດຖະມົນຕີ ກະຊວງສຶກສາທິການ ແລະກີລາ, ສະຫາຍ ຮສ.ປອ ອຸດົມ ພອນຄໍາເພັງ ຄະນະປະຈໍາພັກ ກະຊວງສຶກສາທິການ ແລະກີລາ, ເລຂາຄະນະພັກ, ອະທິການບໍດີ ມຊ, ມີບັນດາສະຫາຍ ຄະນະພັກ ມຊ, ຄະນະພັກຮາກຖານ, ຄະນະໜ່ວຍພັກ ແລະປະທານສາມອົງການຈັດຕັ້ງ ມະຫາຊົນ (ຊາວໜຸ່ມ, ກໍາມະບານ ແລະສະຫະພັນແມ່ຍິງ) ຂອງ ມຊ ເຂົ້າຮ່ວມ.

           ໃນທີ່ປະຊຸມ ສະຫາຍ ຄໍາເຟືອງ ລໍວັນໄຊ ຄະນະພັກ ມຊ, ຫົວໜ້າຫ້ອງການຈັດຕັ້ງ ແລະຄຸ້ມຄອງ ພະນັກງານ ໄດ້ຂຶ້ນຜ່ານບົດສະຫຼຸບ ການກໍ່ສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ປະຈໍາປີ 2022 ຕໍ່ທີ່ປະຊຸມ; ເຊິ່ງສະຫາຍໄດ້ໃຫ້ຮູ້ວ່າ: ຄະນະພັກ ມຊ ແມ່ນອົງຄະນະພັກໜຶ່ງ ທີ່ຢູ່ພາຍໃຕ້ການຊີ້ນໍາ ນໍາພາ ຂອງອົງຄະນະພັກ ກະຊວງສຶກສາທິການ ແລະກີລາ, ມີຄະນະບໍລິຫານງານພັກ ທັງໝົດ 16 ສະຫາຍ, ຍິງ 2 ສະຫາຍ, ມີຄະນະພັກຮາກຖານ 13 ຮາກຖານ, 4 ໜ່ວຍພັກຮາກຖານ ແລະ ມີ 85 ໜ່ວຍພັກຂຶ້ນກັບ; ມີສະມາຊິກພັກທັງໝົດ 1,737 ສະຫາຍ, ຍິງ 785 ສະຫາຍ; ມີສະມາຊິກພັກສໍາຮອງ 51 ສະຫາຍ, ຍິງ 25 ສະຫາຍ; ມີສະມາຊິກພັກ ບໍານານ 308 ສະຫາຍ, ຍິງ 122 ສະຫາຍ; ສະມາຊິກພັກນັກສຶກສາ 68 ສະຫາຍ, ຍິງ 11 ສະຫາຍ.

          ຂອບເຂດການນໍາພາ ຄະນະພັກ ມຊ ແມ່ນອົງການຈັດຕັ້ງທີ່ຢູ່ພາຍໃຕ້ການຊີ້ນໍາ ນໍາພາ ໂດຍກົງຕໍ່ຄະນະພັກຮາກຖານ, ໜ່ວຍພັກຮາກຖານ ແລະສະມາຊິກພັກ ເປັນຕົ້ນແມ່ນວຽກງານການເມືອງແນວຄິດ, ວຽກງານກໍ່ສ້າງ ແລະພັດທະນາຊັບພະຍາກອນມະນຸດ, ວຽກວິຊາການ, ການຄົ້ນຄວ້າວິທະຍາສາດ ແລະການບໍລິການວິຊາການ, ວຽກງານກໍ່ສ້າງ-ບໍາລຸງພະນັກງານ ແລະກົງຈັກການຈັດຕັ້ງ, ວຽກງານປັບປຸງຂະຫຍາຍພັກ, ວຽກງານກວດກາ ແລະປ້ອງກັນພັກ, ການຊີ້ນໍາອົງການຈັດຕັ້ງມະຫາຊົນ, ວຽກງານປ້ອງກັນຊາດ-ປ້ອງກັນຄວາມສະຫງົບ ແລະວຽກງານພົວພັນຕ່າງປະເທດ; ພ້ອມທັງໄດ້ຍົກໃຫ້ເຫັນດ້ານດີ-ດ້ານອ່ອນ ໃນແຕ່ລະວຽກເຊັ່ນ: ການນໍາພາດ້ານການເມືອງ, ດານນໍາພາດ້ານແນວຄິດ, ການນໍາພາດ້ານການຈັດຕັ້ງ, ດ້ານແບບແຜນການນໍາພາ, ການນໍາພາການປະຕິບັດໜ້າທີ່ການເມືອງ. ເຊິ່ງຜ່ານການປະເມີນການຈັດຕັ້ງ ປະຕິບັດວຽກງານ ກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2022 ອົງຄະນະພັກ ມຊ ສະຫຼຸບໄດ້ດັ່ງນີ້: ໃນຈໍານວນສະມາຊິກພັກທັງໝົດ 1,737 ສະຫາຍ, ມີສະມາຊິກພັກແຂງ 1,343 ສະຫາຍ, ຍິງ 625 ສະຫາຍ, ກວມ 77,31%; ສະມາຊິກພັກກາງ 35 ສະຫາຍ, ຍິງ 13 ສະຫາຍ, ກວມ 2,03%; ສະມາຊິກພັກອ່ອນ, ສະມາຊິກເສຍທາດ 0 ສະຫາຍ ແລະບໍ່ໄດ້ຕີລາຄາ 359 ສະຫາຍ, ຍິງ 147 ສະຫາຍ ກວມ 20,66%.

          ຄະນະພັກ ມຊ ມີໜ່ວຍພັກຂຶ້ນກັບທັງໝົດ 85 ໜ່ວຍພັກ, ຜົນການປະເມີນ ໄດ້ໜ່ວຍພັກປອດໃສ, ເຂັ້ມແຂງ, ໜັກແໜ້ນ 74 ໜ່ວຍ ກວມ 87,05%; ໜ່ວຍພັກແຂງ 10 ໜ່ວຍ ກວມ 11,76%; ໜ່ວຍພັກກາງ ແລະໜ່ວຍພັກອ່ອນ 0 ໜ່ວຍ. ໂດຍແມ່ນ ສະຫາຍ ນາງ ຂັນທະລີ ສີຣິພົງພັນ ຮອງເລຂາຄະນະພັກ, ຮອງລັດຖະມົນຕີ  ກະຊວງສຶກສາທິການ ແລະກີລາ ແລະສະຫາຍ ຮສ.ປອ ອຸດົມ ພອນຄໍາເພັງ ຄະນະປະຈໍາພັກ ກະຊວງສຶກສາທິການ ແລະກີລາ, ເລຂາຄະນະພັກ, ອະທິການບໍດີ ມຊ ເປັນກຽດມອບ.

ພາບບັນຍາກາດ

ໃນຕອນເຊົ້າ ວັນທີ 29 ມິຖຸນາ 2023 ຜ່ານມາ, ຄະນະວິທະຍາສາດສັງຄົມ (ຄສຄ) ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີເຜີຍແຜ່ ແລະ ສະຫຼຸບຜົນການປະເມີນຫຼັກສູດປະລິນຍາໂທ ວິທະຍາສາດສັງຄົມ ສາຂາການສຶກສາປະຊາກອນ ແລະການພັດທະນາ ທີ່ຫ້ອງປະຊຸມຂອງຄະນະ, ໂດຍການເປັນປະທານຂອງທ່ານ ຮສ. ປອ. ເດຊານຸລາດ ແສນດວງເດດ ຮອງອະທິການບໍດີ ມຊ ແລະ ທ່ານ ປອ. ສາຍໃຈ ສີລາເດດ ຮອງຄະນະບໍ ຄສຄ,  ມີບັນດາ ພະນັກງານ, ຄູ-ອາຈານ, ຜູ້ຕາງໜ້າຈາກອົງການ ສະຫະປະຊາຊາດ ກອງທຶນສຳລັບປະຊາກອນ UNFPA ແລະນັກສຶກສາເຂົ້າຮ່ວມ.

          ຈຸດປະສົງຂອງການຈັດກອງປະຊຸມໃນຄັ້ງນີ້ແມ່ນເພື່ອເຜີຍແຜ່ ແລະ ລາຍງານຜົນການປະເມິນຫຼັກສູດປະລິນຍາໂທວິທະຍາສາດສັງຄົມ ສາຂາການສຶກສາປະຊາກອນ ແລະ ການພັດທະນາຂອງ ຄສຄ ພ້ອມທັງເປັນການແລກປ່ຽນຄວາມຄິດເຫັນຈາກຜູ້ທີ່ເຂົ້າຮ່ວມກອງປະຊຸມ, ເພື່ອປັບປຸງຫຼັກສູດດັ່ງກ່າວໃຫ້ສອດຄ່ອງຕາມມາດຕະຖານຫຼັກສູດແຫ່ງຊາດ. ເຊິ່ງການປະເມີິນຫຼັກສູດໃນຄັ້ງນີ້ ແມ່ນອີງໃສ່ການຮ່ວມມືທາງດ້ານວິຊາການລະຫວ່າງ ຄສຄ ກັບ ອົງການສະຫະປະຊາຊາດ ກອງທຶນສຳລັບປະຊາກອນ (UNFPA).

          ພ້ອມນັ້ນ ໃນກອງປະຊຸມຍັງໄດ້ຮ່ວມກັນແລກປ່ຽນຄຳຄິດເຫັນໃນການພັດທະນາ ແລະ ປັບປຸງຫຼັກສູດໃຫ້ແທດເໝາະກັບການຮຽນ-ການສອນໃນປັດຈຸບັນອີກດ້ວຍ.