ຂ່າວ

ສະມາຄົມ ຄະນິດສາດລາວ ສະຫຼຸບຄືນຜົນງານ 1 ປີ

ໃນວັນທີ 1 ເມສາ 2025 ສະມາຄົມ ຄະນິດສາດລາວ ໄດ້ຈັດກອງປະຊຸມສະຫຼຸບວຽກງານພົ້ນເດັ່ນໃນໄລຍະ 1 ປີທີ່ຜ່ານມາ ໂດຍການເຂົ້າຮ່ວມຂອງທ່ານ ຮສ. ປອ. ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະກິລາ, ທ່ານ ນາງ ແສງເດືອນ ຫຼ້າຈັນທະບູນ ອະດີດລັດຖະມົນຕີກະຊວງສຶກສາທິການ ແລະກີລາ ປະທານທີ່ປຶກສາຂອງສະມາຄົມ ຄະນິດສາດລາວ, ພ້ອມນັ້ນຍັງມີ ທ່ານ ພູວົງ ພະມີສິດ ປະທານບໍລິສັດ ຄຳພູວົງ ເຊິ່ງເປັນຜູ້ສະໜັບສະໜູນຫຼັກ ແລະມີທ່ານຄະນະບໍດີ, ຮອງຄະນະບໍດີ, ແຂກຖືກເຊີນ, ພະນັກງານ, ຄູ-ອາຈານ ແລະນັກຮຽນ-ນັກສຶກສາເຂົ້າຮ່ວມ.

ທ່ານ ຮສ. ສັກມອນ ສິຣິສັກ ປະທານ ສະມາຄົມ ຄະນິດສາດລາວ ໄດ້ຫຼຸບຫຍໍ້ພາບລວມຂອງການດຳເນີນງານຕະຫຼອດໄລຍະ 1 ປີ ຂອງສະມາຄົມຄະນິດສາດລາວ ໂດຍທ່ານໃຫ້ຮູ້ວ່າ: ກ່ອນການສ້າງຕັ້ງສະມາຄົມຄະນິດສາດລາວ ຄະນະຜູ້ບໍລິຫານໄດ້ເຂົ້າຮ່ວມສັງເກດການໃນກອງປະຊຸມຂອງສະພາ SRAME ແລະຈັດຕັ້ງກອງປະຊຸມພາຍໃນໂດຍເຕົ້າໂຮມເອົາອາຈານ ແລະນັກຄົ້ນຄວ້າຄະນິດສາດເພື່ອລະດົມແນວຄວາມຄິດໃນການສ້າງຕັ້ງສະມາຄົມ ແລະໄດ້ມີໂອກາດເຂົ້າຮ່ວມກອງປະຊຸມໃນການປຶກສາຫາລືເພື່ອແລກປ່ຽນໃນການສ້າງຕັ້ງສະມາຄົມຄະນິດສາດລາວ ທີ່ປະເທດເກົາຫຼີ ໃນກອງປະຊຸມປະຊຸມ International Congress of Mathematicians (ICM) ປີ 2014, ນັບແຕ່ມື້ສ້າງຕັ້ງ ສະມາຄົມ ຄະນິດສາດລາວ (ວັນທີ 29 ກຸມພາ 2024) ເປັນຕົ້ນມາ ສະມາຄົມໄດ້ຮ່ວມມືກັບພາກວິຊາຄະນິດສາດ ແລະສະຖິຕິ ຄະນະວິທະຍາສາດທຳມະຊາດ (ຄວທ) ແລະບໍລິສັດ BrightPath ແລະພາກສ່ວນອື່ນໆເພື່ອດຳເນີນວຽກງານທີ່ກ່ຍວຂ້ອງ, ພ້ອມນັ້ນຍັງໄດ້ຈັດສຳມະນາ ແລະກອງປະຊຸມທີ່ກ່ຽວຂ້ອງກັບຄະນິດສາດ. ສຳລັບ ໃນຕໍ່ໜ້າສະມາຄົມຄະນິດສາດລາວ ຍັງມີແຜນທີ່ຈະຈັດການແຂ່ງຂັນ ແລະກິດຈະກຳທີ່ກ່ຽວກັບຄະນິດສາດ ເພື່ອເປີດໂອກາດໃຫ້ນ້ອງໆນັກຮຽນ, ນັກສຶກສາໄດ້ເຂົ້າຮ່ວມອີກດ້ວຍ.

ສຳລັບທ່ານໃດທີ່ມີຄວາມສົນໃຈກ່ຽວກັບສະມາຄົມ ຄະນິດສາດລາວ ກໍສາມາດຕິດຕາມໄດ້ຜ່ານທາງສື່ສັງຄົມອອນລາຍ ເຟສບຸກເພສ: Lao Mathematics Association ຫຼື ສາມາດມາພົວພັນໄດ້ທີ່ຫ້ອງການສະມາຄົມຄະນິດສາດລາວ (ຕຶກ MA ພາກວິຊາຄະນິດສາດ ແລະສະຖິຕິ ຄວທ, ມະຫາວິທະຍາໄລແຫ່ງຊາດ ວິທະຍາເຂດດົງໂດກ)

ອົງຄະນະພັກ ມຊ ຈັດກອງປະຊຸມໃຫຍ່ ຄັ້ງທີ VI

ກອງປະຊຸມໃຫຍ່ຜູ້ແທນອົງຄະນະພັກ ມະຫາວິທະຍາໄລແຫ່ງຊາດ (ມຊ) ຄັ້ງທີ VI ໄດ້ໄຂຂຶ້ນໃນວັນທີ 28 ມີນາ 2025 ນີ້, ທີ່ສະໂມສອນ ຄະນະເສດຖະສາດ ແລະບໍລິຫານທຸລະກິດ ມຊ ພາຍໃຕ້ການເປັນປະທານຂອງສະຫາຍ ສຈ.ປອ ເດຊານຸລາດ ແສນດວງເດດ ເລຂາຄະນະພັກ ວ່າການແທນອະທິການບໍດີ ມຊ, ໃຫ້ກຽດເຂົ້າຮ່ວມຂອງສະຫາຍ ຮສ.ປອ ພຸດ ສິມມາລາວົງ ກຳມະການສູນກາງພັກ ເລຂາຄະນະພັກ, ລັດຖະມົນຕີ ກະຊວງສຶກສາທິການ ແລະກີລາ, ມີບັນດາສະຫາຍຄະນະປະຈຳພັກ, ຄະນະບໍລິຫານງານພັກ, ຄະນະພັກຮາກຖານ, ໜ່ວຍພັກຮາກຖານ, ພະນັກງານຫຼັກແຫຼ່ງ, ຜູ້ແທນສົມບູນ ພ້ອມດ້ວຍ ແຂກຖືກເຊີນເຂົ້າຮ່ວມ.

ສະຫາຍ ສຈ.ປອ ເດຊານຸລາດ ແສນດວງເດດ ໄດ້ໃຫ້ກຽດກ່າວເປີດກອງປະຊຸມ, ຜ່ານບົດສຳຫຼວດການນໍາພາລວມຂອງຄະນະບໍລິຫານງານພັກ ມຊ ຄັ້ງທີ V; ຈາກນັ້ນ, ສະຫາຍ ຮສ.ປອ ສິນທະວອນ ດາລາວົງ ຮອງເລຂາຄະນະພັກ ຮອງອະທິການບໍດີ ມຊ ໄດ້ຜ່ານບົດຄຸນລັກສະນະຜູ້ແທນກອງປະຊຸມ, ຜ່ານຮ່າງບົດລາຍງານການເມືອງ ແລະ ແຜນພັດທະນາ ມຊ 5 ປີຕໍ່ໜ້າ, ສະຫາຍ ສຈ.ປອ ພູເພັດ ກ້ຽວພິລາວົງ ຄະນະປະຈຳພັກ ຮອງອະທິການບໍດີ ມຊ ຜ່ານຮ່າງແຜນພັດທະນາ ມຊ 2026-2030, ກອງປະຊຸມໄດ້ຮັບຟັງການປະກອບຄໍາເຫັນຈາກຕົວແທນຂອງ 3 ອົງການຈັດຕັ້ງມະຫາຊົນ ແລະ 3 ຮາກຖານພັກ; ໃນພິທີ, ສະຫາຍ ປອ. ຕຸດາວັນ ໜໍ່ເມືອງເສດ ຄະນະປະຈຳພັກກະຊວງ ຫົວໜ້າກົມຈັດຕັ້ງ ແລະ ພະນັກງານ ກະຊວງສຶກສາທິການ ແລະກີລາ ໄດ້ຜ່ານມາດຖານເງື່ອນໄຂຜູ້ອອກສະໝັກເລືອກຕັ້ງ, ຜ່ານມະຕິຕົກລົງ ວ່າດ້ວຍການອະນຸມັດລາຍຊື່ຜູ້ອອກສະໝັກຮັບເລືອກຕັ້ງຄະນະບໍລິຫານງານພັກ ມຊ ຄັ້ງທີ VI.

ກອງປະຊຸມໄດ້ປ່ອນບັດເລືອກຕັ້ງເອົາຄະນະບໍລິຫານງານພັກ ມຊ ຊຸດໃໝ່ ຊຶ່ງມີຜູ້ສະໝັກທັງໝົດ 19 ສະຫາຍ ຍິງ 4 ສະຫາຍ, ເລືອກເອົາ 15 ສະຫາຍ, ກອງປະຊຸມຄັ້ງປະຖົມມະລຶກໄດ້ເປັນເອກະພາບເລືອກເອົາຄະນະປະຈຳພັກ 5 ສະຫາຍຄື: ສະຫາຍ ສຈ.ປອ ເດຊານຸລາດ ແສນດວງເດດ, ສະຫາຍ ຮສ.ປອ ສິນທະວອນ ດາລາວົງ, ສະຫາຍ ສຈ.ປອ ພູເພັດ ກ້ຽວພິລາວົງ, ສະຫາຍ ທອງສຸກ ແກ້ວມະນີ ແລະ ສະຫາຍ ຮສ.ປອ ອຸ່ນຫຼ້າ ສີວັນເພັງ; ເລືອກເອົາສະຫາຍ ສຈ.ປອ ເດຊານຸລາດ ແສນດວງເດດ ເປັນເລຂາອົງຄະນະພັກ, ສະຫາຍ ຮສ.ປອ ສິນທະວອນ ດາລາວົງ ເປັນຮອງເລຂາ, ສະຫາຍ ຮສ.ປອ ນາງ ສົມຄິດ ບູລິດໍາ, ສະຫາຍ ຮສ.ປອ ໄກສອນ ເພັງໂສພາ, ສະຫາຍ ຮສ.ປອ ສຸກັນ ຈິດປັນຍາ, ສະຫາຍ ຮສ.ປອ ວັນນະພອນ ພຸດທະນາ, ສະຫາຍ ຮສ.ປອ ຄໍາປະເສີດ ເທບວົງສາ, ສະຫາຍ ປອ. ສົມເດດ ແກ້ວວົງສັກ, ຮສ.ປອ. ນາງ ວັນແສງ ຈຸນລະມະນີ, ສະຫາຍ ສຈ.ປອ ສີທອງ ທອງມະນີວົງ, ສະຫາຍ ຄໍາເຟືອງ ລໍວັນໄຊ ແລະສະຫາຍ ປອ. ຊາຍຄໍາ ວັນນະໄຊ ເປັນຄະນະ; ພ້ອມດຽວກັນນີ້ ຍັງໄດ້ເລືອກເອົາປະທານ ແລະຮອງປະທານກວດກາພັກ ມຊ ຄື: ສະຫາຍ ທອງສຸກ ແກ້ວມະນີ ເປັນປະທານກວດກາ, ສະຫາຍ ຄຳເຟືອງ ລໍວັນໄຊ, ສະຫາຍ ປອ. ຊາຍຄຳ ວັນນະໄຊ ແລະ ສະຫາຍ ຄຳພາ ຫວ່າງດວງນະພາ ເປັນຮອງປະທານກວດກາ.

ໂອກາດນີ້, ສະຫາຍ ຮສ.ປອ ພຸດ ສິມມາລາວົງ ໄດ້ໃຫ້ກຽດມີຄຳເຫັນໂອ້ລົມຕໍ່ກອງປະຊຸມ; ເຊິ່ງສະຫາຍໄດ້ເນັ້ນໜັກໃຫ້ຄະນະພັກຊຸດໃໝ່ຈົ່ງຊີ້ນຳ-ນຳພາ ມຊ ໃຫ້ມີການຫັນປ່ຽນໃໝ່ຢ່າງຕັ້ງໜ້າ, ຕ້ອງເຮັດໃຫ້ວຽກງານພັກເຂັ້ມແຂງ, ເພີ່ມທະວີຄວາມເປັນແບບຢ່າງ ແລະ ຄວາມຮັບຜິດຊອບ, ເພີ່ມທະວີຄວາມສາມັກຄີ ພ້ອມທັງນໍາໜ້າດ້ານວຽກງານວິຊາສະເພາະ, ນໍາພາວິທະຍາສາດໃຫ້ທັນສະໄໝ, ເອົາໃຈໃສ່ວຽກງານຕິດຕາມກວດກາໃຫ້ມີຄຸນນະພາບ; ພາຍຫຼັງສຳເລັດກອງປະຊຸມຄັ້ງນີ້ແລ້ວ ໃຫ້ນໍາເອົາເນື້ອໃນ-ຈິດໃຈກອງປະຊຸມໄປເຜີຍແຜ່ ຈັດຕັ້ງຜັນຂະຫຍາຍຢ່າງມີຜົນສຳເລັດ ເພື່ອພັດທະນາ ມຊ ໃຫ້ຈະເລີນຮຸ່ງເຮືອງຂຶ້ນໄປເລື້ອຍໆ.

ພາບບັນຍາກາດ

ຄສຄ ຈັດງານງານສະເຫຼີມສະຫຼອງວັນສັງຄົມສົງເຄາະອາຊຽນ

ໃນວັນທີ 25 ມີນາ 2025 ຜ່ານມາ, ຄະນະວິທະຍາສາດສັງຄົມ (ຄສຄ) ມະຫາວິທະຍາໄລແຫ່ງຊາດ (ມຊ) ໄດ້ຈັດງານສະເຫຼີມສະຫຼອງວັນສັງຄົມສົງເຄາະອາຊຽນ ທີ່ສະໂມສອນໃຫຍ່ ມຊ, ໂດຍການເຂົ້າຮ່ວມຂອງ ທ່ານ ສຈ. ປອ. ເດຊານຸລາດ ແສນດວງເດດ ວ່າການແທນອະທິການບໍດີ ມະຫາວິທະຍາໄລແຫ່ງຊາດ ແລະ ທ່ານ ນາງ ມາກະລີ ໂຣເມເດັນ ຮອງຜູ້ຕາງໜ້າອົງການສະຫະປະຊາຊາດສຳລັບເດັກ ປະຈຳ ສປປ ລາວ, ພ້ອມນັ້ນ ຍັງມີທ່ານຮອງຫົວໜ້າກົມສັງຄົມສົງເຄາະ ກະຊວງແຮງງານ ແລະສະຫວັດດິການສັງຄົມ, ແຂກຖືກເຊີນຈາກພາກສ່ວນຕ່າງໆ, ພະນັກງານ, ຄູ-ອາຈານ ແລະນັກສຶກສາເຂົ້າຮ່ວມ.

ງານສະເຫຼີມສະຫຼອງວັນສັງຄົມສົງເຄາະອາຊຽນ ປະຈຳປີ 2025 ນີ້ໄດ້ຈັດຂຶ້ນພາຍໃຕ້ຫົວຂໍ້: " ບົດບາດຂອງນັກສັງຄົມສົງເຄາະໃນຫານຫຼຸດຜ່ອນຄວາມສ່ຽງຈາກໄພພິບັດ ແລະ ການສ້າງຄວາມທົນທານຕໍ່ກັບສະພາບດິນຟ້າອາກາດ " ໃນໂອກາດນີ້, ທ່ານ ສຈ. ປອ. ເດຊານຸລາດ ແສນດວງເດດ ກໍໄດ້ມີຄຳເຫັນກ່າວວ່າ: ໃນຊຸມປີຜ່ານມາ, ປະເທດລາວເຮົາໄດ້ປະສົບກັບຜົນກະທົບທີ່ເພີ່ມຂຶ້ນຈາກການປ່ຽນແປງຂອງດິນຟ້າອາກາດ ແລະ ໄພພິບັດທາງທໍາມະຊາດເຊັ່ນ: ໄພນໍ້າຖ້ວມ, ໄພແຫ້ງແລ້ງ ແລະ ດິນເຈື່ອນ ເຊິ່ງບໍ່ພຽງແຕ່ໄດ້ທຳລາຍຊຸມຊົນເທົ່ານັ້ນ ແຕ່ຍັງເປັນສິ່ງທ້າທາຍອັນໃຫຍ່ຫຼວງຕໍ່ສະຖຽນລະພາບທາງດ້ານເສດຖະກິດ ແລະ ສັງຄົມ. ຕໍ່ກັບສິ່ງທ້າທາຍດັ່ງກ່າວ, ນັກສັງຄົມສົງເຄາະ ແລະບຸກຄະລາກອນທາງສັງຄົມສົງເຄາະໄດ້ມີບົດບາດທີ່ສຳຄັນຫຼາຍໃນການຕອບໂຕ້ວິກິດການ, ພ້ອມທັງຊ່ວຍເຫຼືອປະຊາກອນທີ່ມີຄວາມສ່ຽງ ແລະ ຮັບປະກັນວ່າຊຸມຊົນທີ່ຖືກຜົນກະທົບຈະໄດ້ຮັບການເບິ່ງແຍງ, ການປົກປ້ອງ ແລະ ການຊ່ວຍເຫຼືອໃນການສ້າງຄວາມທົນທານທີ່ແທດເໝາະກັບພວກເຂົາ. ໂດຍການຈັດງານໃນຄັ້ງນີ້ ແມ່ນເພື່ອແບ່ງປັນຄວາມຮູ້, ການດຳເນີນງານທີ່ດີທີ່ສຸດ ແລະປະສົບການພວກເຮົາຮັບຮູ້ວ່ານັກສັງຄົມສົງເຄາະບໍ່ພຽງແຕ່ເປັນຜູ້ທີ່ໃຫ້ການຊ່ວຍເຫຼືອໃນເວລາທີ່ເກີດໄພພິບັດເທົ່ານັ້ນ ແຕ່ພວກເຂົາເປັນຜູ້ສະຫນັບສະຫນູນ, ຜູ້ອໍານວຍຄວາມສະດວກ ແລະຜູ້ສ້າງການປ່ຽນແປງ ໂດຍມີບັນດາອົງການຈັດຕັ້ງພາກລັດ, ສະຖາບັນການສຶກສາ, ອົງການຈັດຕັ້ງສາກົນ, ອົງການຈັດຕັ້ງທາງສັງຄົມ ແລະ ພະນັກງານປະຕິບັດວຽກງານສັງຄົມສົງເຄາະ ໄດ້ມີໂອກາດໃນການເຂົ້າຮ່ວມການສົນທະນາທີ່ມີຄວາມໝາຍຄວາມສຳຄັນ ເພື່ອໃຫ້ພວກເຮົາສາມາດເຊື່ອມໂຍງວຽກງານສັງຄົມສົງເຄາະເຂົ້າໃນຍຸດທະສາດການຫຼຸດຜ່ອນຄວາມສ່ຽງໄພພິບັດ ແລະ ສ້າງຄວາມທົນທານຕໍ່ການປ່ຽນແປງດິນຟ້າອາກາດ.

ພາຍໃນງານຍັງໄດ້ຮັບການນຳສະເໜີ ຄຳແນະນຳຂອງອາຊຽນກ່ຽວກັບ ບົດບາດຂອງນັກສັງຄົມສົງເຄາະໃນການຫຼຸດຜ່ອນຄວາມສ່ຽງຈາກໄພພິບັດ ແລະຄວາສາມາດໃນປັບຕົວຕໍ່ສະພາບ ດິນຟ້າ ອາກາດ ໂດຍທ່ານ ນາງ ຄຳໃສ ອ່ຽມສຸດທິ ຊ່ຽວຊານປົກປ້ອງເດັກຈາກອົງການ UNICEF; ເວທີສົນມະນາໃນຫົວຂໍ້ “ບົດບາດຂອງບຸກຄະລາກອນສັງຄົມສົງເຄາະໃນວຽກງານໄພພິບັດ ແລະການປ່ຽແປງດິນຟ້າອາກາດ”

ມຊ ຈັດການແຂ່ງຂັນກີລາປີ່ງປ່ອງ

ເພື່ອເປັນການສ້າງຂະບວນການຕ້ອນຮັບກອງປະຊຸມໃຫຍ່ຂອງອົງຄະນະພັກ ມະຫາວິທະຍາໄລແຫ່ງຊາດ (ມຊ) ຄັ້ງທີ VI ທີ່ຈະມາເຖິງນີ້, ຄະນະວິທະຍາສາດການກີລາ-ກາຍະກຳ ມຊ ໄດ້ຈັດການແຂ່ງຂັນກີລາປິ່ງປ່ອງຂຶ້ນທີ່ສູນເຝິກກິລາປິ່ງປ່ອງຂອງຄະນະ, ໂດຍການເຂົ້າຮ່ວມຂອງທ່ານ ຮສ. ປອ. ເດຊານຸລາດ ແສນດວງເດດ ວ່າການແທນອະທິການບໍດີ ມຊ, ທ່ານ ນາງ ສົມໃຈ ວົງສາ ເລຂາທິການສະຫະພັນກີລາປິ່ງປ່ອງແຫ່ງຊາດລາວ, ພ້ອມດ້ວຍຄະນະພັກ, ຄະນະນຳ, ຄະນະບໍດີ-ຮອງຄະນະບໍດີ, ພະນັກງານ, ຄູ-ອາຈານ ທີ່ມາຈາກ 13 ຄະນະວິຊາ ແລະ 2 ສະຖາບັນ (ສະຖາບັນຂົງຈື ແລະສະຖາບັນພັດທະນາຊັບພະຍາກອນມະນຸດລາວ-ຍີ່ປຸ່ນ) ເຂົ້າຮ່ວມ.

ໃນໂອກາດນີ້, ທ່ານ ນາງ ສົມໃຈ ວົງສາ ຕາງໜ້າສະຫະພັນກີລາປິ່ງປ່ອງແຫ່ງຊາດລາວ ໄດ້ມອບອຸປະກອນການເຝິກຊ້ອມກີລາປິ່ງປ່ອງ ມູນຄ່າ 45,000,000 ກີບ (ສີ່ສິບຫ້າລ້ານກີບ) ເພື່ອໃຫ້ຄະນະວິທະຍາສາດການກີລາ-ກາຍະກໍາ ໄດ້ໜູນໃຊ້ເຂົ້າໃນການເຝິກຊ້ອມ, ການຮຽນ-ການສອນ ແລະຜູ້ທີ່ມີຄວາມສົນໃຈໃນກີລາປິ່ງປ່ອງ ກໍສາມາດມານໍາໃຊ້ໄດ້, ຕາງໜ້າມອບໂດຍທ່ານ ທອງຈັນ ສີຊົມພູ ຮັກສາການຄະນະບໍດີ ຄະນະວິທະຍາສາດການກີລາ-ກາຍະກຳ.

ການຈັດການແຂ່ງຂັນກີລາປີ່ງປ໋ອງໃນຄັ້ງນີ້ໄດ້ແບ່ງອອກເປັນ 3 ປະເພດການແຂ່ງຂັນຄື: ປະເພດດ່ຽວຍິງ, ດ່ຽວຊາຍ ແລະຄູ່ປະສົມຍິງ-ຊາຍ. ສຳລັບຜົນການແຂ່ງຂັນປະເພດດ່ຽວຍິງ ອັນດັບທີ 1ໄດ້ແກ່: ຮາກຖານຄະນະເສດຖະສາດ ແລະບໍລິຫານທຸລະກິດ, ອັນດັບທີ 2 ໄດ້ແກ່: ຄະນະກະເສດສາດ, ອັນດັບທີ 3 ໄດ້ແກ່: ຄະນະສຶກສາສາດ; ປະເພດດ່ຽວຊາຍອັນດັບທີ 1 ໄດ້ແກ່: ຄະນະວິທະຍາສາດການກີລາ-ກາຍະກຳ, ອັຍດັບທີ 2 ໄດ້ແກ່ ຄະນະວິທະຍາສາດປ່າໄມ້, ອັບດັບທີ 3 ໄດ້ແກ່ ຄະນະວິສະວະກຳສາດ; ປະເພດຄູ່ປະສົມຍິງ-ຊາຍ ອັນດັບທີ 1 ໄດ້ແກ່: ຄະນະວິສະວະກຳສາດ, ອັນດັບທີ 2 ໄດ້ແກ່ ສຳນັກງານອະທິການບໍດີ ແລະອັບດັບທີ 3 ໄດ້ແກ່ ຄະນະເສດຖະສາດ ແລະບໍລິຫານທຸລະກິດ.

ມຊ ທາບທາມບຸກຄະລາກອນກະກຽມດຳເນີນກອງປະຊຸມໃຫຍ່ຄັ້ງທີ VI ອົງຄະນະພັກ ຮອບທີ II

ມະຫາວິທະຍາໄລແຫ່ງຊາດ(ມຊ) ໄດ້ຈັດທາບທາມ ເອົາບຸກຄະລາກອນ ກະກຽມດໍາເນີນກອງປະຊຸມໃຫຍ່ຄັ້ງທີ VI ຂອງອົງຄະນະພັກຮອບທີ II, ກອງປະຊຸມໄດ້ຈັດຂຶ້ນໃນຕອນເຊົ້າ ວັນທີ 4 ມີນາ 2025 ທີ່ສະມໂສອນໃຫຍ່ ມຊ, ໂດຍການໃຫ້ກຽດເປັນປະທານຂອງທ່ານ ຮສ. ປອ. ພຸດ ສິມມາລາວົງ ກຳມະການສູນກາງພັກ ເລຂາອົງຄະນະພັກ, ລັດຖະມົນຕີ ກະຊວງສຶກສາທິການ ແລະກີລາ ແລະ ທ່ານ ຮສ. ປອ. ເດຊານຸລາດ ແສນດວງເດດ ເລຂາອົງຄະນະພັກ ວ່າການແທນອະທິການບໍດີ ມຊ, ມີບັນດາສະຫາຍຄະນະພັກ ມຊ, ຄະນະພັກຮາກຖານ, ແຂກຖືກເຊີນ, ສະມາຊິກພັກພະນັກງານ, ຄູ-ອາຈານທີ່ມີຕໍາແໜ່ງບໍລິຫານປະເພດ 1-4, ມີຜູ້ແທນສົມບູນ ແລະຜູ້ແທນສໍາຮອງເຂົ້າຮ່ວມ.

ໃນພິທີ ທ່ານ ຮສ. ປອ. ສິນທະວອນ ດາລາວົງ ໄດ້ຜ່ານຮ່າງບົດລາຍງານການເມືອງຂອງອົງຄະນະພັກ ມຊ ໂດຍຫຍໍ້, ຫຼັງຈາກນັ້ນ ທ່ານ ຮສ. ປອ. ເດຊານຸລາດ ແສນດວງເດດ ກໍໄດ້ຜ່ານຮ່າງບົດສຳຫຼວດການນຳພາລວມ ຂອງຄະນະບໍລິຫານງານພັກ ແລະ ຮ່າງແຜນພັດທະນາ ມຊ 5ປີຕໍ່ໜ້າ(2025-2030) ໂດຍໄດ້ສັງຮວບເອົາຜົນງານຕະຫຼອດໄລຍະເວລາ 5 ປີ (ສະໄໝທີ V ຜ່ານມາ).

ໃນພິທີອັນມີຄວາມໝາຍສໍາຄັນນີ້, ທີ່ປະຊຸມຍັງໄດ້ ຮັບຟັງການໂອ້ລົມຂອງ ທ່ານ ຮສ. ປອ. ພຸດ ສິມມາລາວົງ ໂດຍທ່ານໄດ້ເນັ້ນ 3 ເນື້ອໃນສຳຄັນຄື: 1. ເພີ່ມທະວີຄວາມຮັບຜິດຊອບໃຫ້ເລືອກເອົາການນຳຜູ້ທີ່ມີວິໃສທັດເບິ່ງກວ້າງມອງໄກ, ເພີ່ມຄວາມຮັບຜິດຊອບພິຈາລະນາໃຫ້ຖີ່ຖ້ວນ ທີ່ສຳຄັນຕ້ອງຮັບປະກັນໃຫ້ໄດ້ 3 ຮຸ່ນ (ຮຸ່ນອາວຸໂສ, ຮຸ່ນກາງ ແລະຮຸ່ນໜຸ່ມ) ພ້ອມທັງມີເພດ, ເຜົ່າ ເພື່ອກະຈາຍໃຫ້ການນຳພາ-ຊີ້ນຳທົ່ວເຖິງ ເພື່ອໃຫ້ໄດ້ບຸກຄະລາກອນທີ່ມີຄຸນນະພາບ ເພື່ອໃຫ້ບັ້ນທາບທາມຄັ້ງນີ້ປະສົບຜົນສຳເລັດ; 2. ຍົກສູງດ້ານວຽກງານວິຊາການ ການປະຕິບັດໜ້າທີ່ໃຫ້ມີຜົນສຳເລັດໂດຍມຸ່ງເນັ້ນ ໃຫ້ມີການແຂ່ງຂັນຜົນງານດ້ານວິຊາການໃຫ້ເປັນວົງກວ້າງ ແລະເຜີຍແຜ່ອອກສູ່ສັງຄົມ ແລະ 3. ເພີ່ມຄວາມສາມັກຄິ ແລະເຮັດວຽກເປັນໝູ່ຄະນະລວມສູນປະຊາທິປະໄຕ.

ການທາບທາມຄັ້ງນີ້ໄດ້ແບ່ງອອກເປັນ 2 ວາລະຄື: ວາລະທີ 1 ແມ່ນການທາບທາມເອົາຄະນະບໍລິຫານງານພັກ ມຊ; ວາລະທີ 2 ແມ່ນການທາບທາມເອົາຄະນະປະຈຳພັກ, ເລຂາ, ຮອງເລຂາ, ປະທານກວດກາ ແລະ ຮອງປະທານກວດກາ, ສຳລັບຜູ້ລົງສະໝັກມີຈຳນວນ 34 ສະຫາຍ, ຍິງ 7 ສະຫາຍ ການຂີດບັດທາບທາມແມ່ນບໍ່ກຳນົດຈຳນວນທີ່ຂີດອອກ ໃນກໍລະນີຂີດອອກໝົດ ຫຼື ບໍ່ຂີດຖືວ່າບັດໃຊ້ການບໍ່ໄດ້(ເປັນບັດຕາຍ).

ມຊ ເປີດໂຄງການພັດທະນາຫຼັກສູດການຈັດການສິ່ງເສດເຫຼືອໃນຂະແໜງການທ່ອງທ່ຽວ ແລະ ການບໍລິການ

ພິທີເປີດໂຄງການພັດທະນາຫຼັກສູດສົ່ງເສີມການຈັດການສິ່ງເສດເຫຼືອເປັນສູນ ໃນຂະແໜງການທ່ອງທ່ຽວ ແລະ ການບໍລິການ (Tourism-Zero Project) ໄດ້ຈັດຂຶ້ນໃນວັນທີ 28 ກຸມພາ 2025 ທີ່ສະຖາບັນພັດທະນາຊັບພະຍາກອນມະນຸດ ລາວ-ຍີ່ປຸ່ນ ມະຫາວິທະຍາໄລແຫ່ງຊາດ (ມຊ), ໂດຍການເຂົ້າຮ່ວມຂອງທ່ານ ຮສ. ປອ. ອຸ່ນຫຼ້າ ສີວັນເພັງ ຮອງອະທິການບໍດີ ມຊ; ທ່ານ ນາງ ມະນີຈັນ ຜັນຫວາດວົງສຸກ ຮອງປະທານສະມາຄົມການທ່ອງທ່ຽວນະຄອນຫຼວງວຽງຈັນ ແລະ ການ ທ່ອງທ່ຽວລາວ ພ້ອມດ້ວຍແຂກຖືກເຊີນ, ພະນັກງານ, ຄູ-ອາຈານ ແລະນັກສຶກສາ ເຂົ້າຮ່ວມ.

ໃນພິທີ ທ່ານ ຮສ. ປອ. ອຸ່ນຫຼ້າ ສີວັນເພັງ ໄດ້ກ່າວວ່າ: ໂຄງການພັດທະນາຫຼັກສູດສົ່ງເສີມການຈັດການສິ່ງເສດເຫຼືອເປັນສູນໃນຂະແໜງການທ່ອງທ່ຽວ ແລະ ການບໍລິການໄດ້ຈັດຕັ້ງປະຕິບັດຢູ່ ມຊ ໄລຍະ 2024-2027 ໃນຮູບແບບສົມທົບທຶນ (co-finance) ໂດຍໄດ້ຮັບທຶນສະໜັບສະໜູນຫຼັກຈາກສະຫະພາບເອີຣົບ ພາຍໃຕ້ຂອບໂຄງການອິຣັດສມູດພັດ (Erasmus+) ເພື່ອສ້າງຄວາມເຂັ້ມແຂງໃນຂະແໜງການສຶກສາຊັ້ນສູງ. ພາຍໃຕ້ໂຄງການ Tourism-Zero, ມຊ ໄດ້ຮັບຜິດຊອບນໍາພາບັນດາມະຫາວິທະຍາໄລຄູ່ຮ່ວມມືໃນ ສປປ ລາວ, ສປ ຈີນ ແລະ ປະເທດໄທ ສ້າງກິດຈະກຳເຜີຍແຜ່ຂໍ້ມູນຂ່າວສານໂຄງການ ແລະ ຮ່ວມມືພັດທະນາຫຼັກສູດ, ນໍາໃຊ້ຮ່ວມກັນຢ່າງຍືນຍົງ. ຫຼັກສູດສົ່ງເສີມການຈັດການສິ່ງເສດເຫຼືອ ເພື່ອສ້າງຄວາມຍືນຍົງໃນຂະແໜງການທ່ອງທ່ຽວ ແລະ ການບໍລິການ, ໃນໂຄງການ Tourism-Zero ຈະເປັນຫຼັກສູດທີ່ມີນະວັດຕະກຳດ້ານເນື້ອໃນ ແລະ ວິທີການຮຽນ-ການສອນໃນຮູບແບບອອນລາຍ ແລະ ເຊິ່ງໜ້າ ພາຍໃຕ້ຂອບການສອນທີ່ເນັ້ນຜົນການຮຽນ-ການສອນ ແລະ ສົ່ງເສີມການຮ່ວມມືກັບຜູ້ປະກອບການ, ການພັດທະນາຫຼັກສູດດັ່ງກ່າວຈະປະກອບສ່ວນສ້າງ ມຊ ທີ່ຈະຫັນເປັນທັນສະໄໝ ແລະ ກ້າວສູ່ສາກົນ ໂດຍສະເພາະຮັດແໜ້ນການຮ່ວມມືໃນພາກພື້ນອາຊຽນ ແລະ ເອີຣົບ.

ມຊ. ຖືເອົາການຮ່ວມມືດ້ານວິຊາການກັບຕ່າງປະເທດເປັນໜຶ່ງໃນວຽກບຸລິມະສິດ ແລະ ເປັນຍຸດທະສາດເຊື່ອມໂຍງກັບສາກົນ, ຍາດແຍ່ງການຊ່ວຍເຫຼືອດ້ານເຕັກນິກວິຊາການ ແລະ ທຶນສະໜັບສະໜູນເພື່ອເສີມສ້າງຄວາມເຂັ້ມແຂງດ້ານການຄົ້ນຄວ້າ, ການຮຽນ-ການສອນ ແລະ ຍົກລະດັບຄຸນນະພາບຂອງນັກສຶກສາໃຫ້ສອດຄ່ອງກັບຄວາມຕ້ອງການຂອງຕະຫຼາດແຮງງານ ແລະ ໂຄງການດັ່ງກ່າວ ສອດຄ່ອງກັບແຜນພັດທະນາການສຶກສາທີ່ເນັ້ນຄຸນນະພາບຂອງຫຼັກສູດ ເພື່ອພັດທະນາຄວາມຮູ້ ແລະ ທັກສະຂອງນັກສຶກສາ, ປັບປຸງວິທີການສິດສອນໃຫ້ທັນສະໄໝ, ສ້າງນະວັດຕະກຳ ແລະ ຮັບປະກັນຄວາມສອດຄ່ອງກັບຄວາມຕ້ອງການໃນຕະຫຼາດແຮງງານ. ສະນັ້ນ, ຈຶ່ງມີຄວາມຈໍາເປັນຕ້ອງໄດ້ຮ່ວມມືກັບຜູ້ປະກອບການ ແລະ ທຸກພາກສ່ວນທີ່ກ່ຽວຂ້ອງໃນການປັບປຸງຫຼັກສູດ, ສ້າງສື່ການຮຽນ-ການສອນ ແລະ ຮ່ວມມືກັນໃນການສິດສອນ ລວມທັງການສ້າງປະສົບການຮຽນຮູ້ຜ່ານການເຮັດວຽກຕົວຈິງໃຫ້ແກ່ນັກສຶກສາ. ໂຄງການ Tourism-Zero ຈະປະກອບສ່ວນສົ່ງເສີມການຮ່ວມມືລະຫວ່າງມະຫາວິທະຍາໄລ ແລະ ພາກທຸລະກິດ ເພື່ອກຽມຄວາມພ້ອມນັກສຶກສາດ້ານຄວາມຮູ້ ແລະ ທັກສະທີ່ຈໍາເປັນສໍາລັບປະກອບອາຊີບໃນຂະແໜງການທ່ອງທ່ຽວ ແລະ ການບໍລິການ, ໂດຍສະເພາະການທ່ອງທ່ຽວແບບຍືນຍົງ ແລະ ຮັກສາສິ່ງແວດລ້ອມ. ນອກຈາກນີ້, ຍັງເປັນຂົວຕໍ່ໃຫ້ບັນດາອາຈານ, ນັກຄົ້ນຄວ້າ, ແລະ ຜູ້ປະກອບການໄດ້ເຮັດວຽກຮ່ວມກັນຫຼາຍຂຶ້ນເພື່ອສ້າງນະວັດຕະກຳໃໝ່ດ້ານການຮຽນ-ການສອນ, ສ້າງຜະລິດຕະພັນການບໍລິການ, ຍົກລະດັບທັກສະສີມືແຮງງານ ແລະ ສ້າງວຽກເຮັດງານທໍາໃຫ້ແກ່ນັກສຶກສາ.

ບົດຄວາມອື່ນ ໆ...

Page 2 of 53