ໃນຕອນບ່າຍ ວັນທີ 27 ມີນາ 2024 ຜ່ານມາ, ຄະນະອັກສອນສາດ (ຄອສ) ມະຫາວິທະຍາໄລແຫ່ງຊາດ (ມຊ) ໄດ້ຈັດງານປາຖະກະຖາໃນຫົວຂໍ້ “ບົດບາດຊີ້ນຳໆພາຂອງພັກ ຕໍ່ກັບວຽກງານການສຶຶກສາ ແລະວັດທະນະທຳ” ທີ່ຫ້ອງປະຊຸມ ສະໂມສອນໃຫຍ່ ມຊ ໂດຍການປາຖະກະຖາຂອງທ່ານ ສຈ. ປອ. ບໍ່ແສງຄຳ ວົງດາລາ ປະທານສະພາ ມຊ ອະດີດອະທິການບໍດີ ມຊ, ໂດຍມີທ່ານ ທອງສຸກ ແກ້ວມະນີ ຄະນະພັກ ມຊ, ເລຂາຄະນະພັກຮາກຖານ ຄອສ ພ້ອມດ້ວຍຄະນະ, ພະນັກງານ, ຄູ-ອາຈານ ແລະນັກສຶກສາເຂົ້າຮ່ວມຮັບຟັງ.
ໃນພິທີ, ທ່ານ ສຈ. ປອ. ບໍ່ແສງຄຳ ວົງດາລາ ໄດ້ຍົກໃຫ້ເຫັນເຖິງປະຫວັດສາດອັນຍາວນານ ທີ່ມີມູນເຊື້ອໃນການຕໍ່ສູ້-ນໍາພາ ປວງຊົນລາວ ດໍາເນີນການຕໍ່ສູ້ຕ້ານພວກຈັກກະພັດລ່າເມືອງຂຶ້ນ ເພື່ອນໍາເອົາຄວາມເປັນເອກະລາດ ມາໃຫ້ປະເທດຊາດ ແລະ ສິດເປັນເຈົ້າມາໃຫ້ປະຊາຊົນ, ໃນການສ້າງສາ ແລະ ພັດທະນາປະເທດຊາດ ຈົນສາມາດຍາດໄດ້ເອກະລາດ ແລະສະຖາປະນາເປັນ ສປປ ລາວ ໃນວັນທີ 2 ທັນວາ ປີ 1975 ຢ່າງເປັນທາງການ. ໄຊຊະນະ ແລະມູນເຊືອໃນຄັ້ງນີ້ ຈຶ່ງເປັນຂີດໝາຍສຳຄັນ ແຫ່ງເຫດການປະຫວັດສາດ ໄດ້ກາຍເປັນເຫດການສຳຄັນຂອງການປະຕິວັດຊາດ ປະຊາທິປະໄຕຢ່າງສົມບູນ ກ້າວສູ່ຈຸດໝາຍສັງຄົມນິຍົມ, ພາຍໃຕ້ການນຳພາຂອງພັກປະຊາຊົນ ປະຕິວັດລາວ ໂດຍສະເພາະ ກໍແມ່ນມະຕິກອງປະຊຸມໃຫຍ່ຄັ້ງທີ 11 ຂອງພັກ ກ່ຽວກັບແຜນພັດທະນາເສດຖະກິດສັງຄົມແຫ່ງຊາດ 5 ປີ ພັກໄດ້ກຳນົດວ່າ: ການພັດທະນາຂະແໜງການສຶກສາ ແລະກີລາເປັນວຽກຈຸດສຸມໂດຍຖືເອົາການຜັນຂະຫຍາຍຍຸດທະສາດ ການພັດທະນາຊັບພະຍາກອນມະນຸດແຫ່ງຊາດ ເພື່ອຍົກສູງຄຸນນະພາບຂອງການພັດທະນາຊັບພະຍາກອນມະນຸດ ແລະ ໜຶ່ງ ໃນເປົ້າໝາຍໃຫຍ່ ຂອງມະຕິກອງປະຊຸມໃຫຍ່ ກໍແມ່ນການພັດທະນາຊັບພະຍາກອນມະນຸດໃຫ້ມີຄຸນະພາບສູງຂຶ້ນ ເພື່ອຕອບສະໜອງໄດ້ຄວາມຕ້ອງການຂອງການພັດທະນາ, ດ້ານວຽກງານວັດທະນະທຳ ກໍແມ່ນວຽກງານໜຶ່ງທີ່ພັກເອົາໃຈໃສ່ ສົ່ງເສີມພັດທະນາ ແລະອານຸລັກຮັກສາມູນເຊື້ອວັດທະນະທຳອັນດີງາມຂອງຊາດ ເຊິ່ງການປາຖະກະຖາໃນຄັ້ງນີ້, ໄດ້ເຮັດໃຫ້ ພະນັກງານ, ຄູ-ອາຈານ ແລະນັກສຶກສາໄດ້ຮັບຮູ້ ແລະ ເຂົ້າໃຈບົດບາດຊີ້ນຳພາຂອງພັກ ຕໍ່ກັບວຽກງານການສຶຶກສາ ແລະວັດທະນະທຳ.
ນຕອນເຊົ້າ ຂອງວັນທີ 28 ມີນາ 2024 ຜ່ານມາ, ຄະນະເສດຖະສາດ ແລະ ບໍລິຫານທຸລະກິດ (ຄສບ) ມະຫາວິທະຍາໄລແຫ່ງຊາດ (ມຊ) ໄດ້ຈັດງານວັນນັດພົບແຮງງານ ຄສບ ຄັ້ງທີ 11 ຂຶ້ນ ທີ່ເດີ່ນຈອດລົດ ຕໍ່ໜ້າ ຄສບ ໂດຍການເຂົ້າຮ່ວມ ຕັດແຖບຜ້າເປີດງານ ຂອງທ່ານ ຄຳພັນ ພົມມະຈັນ ຮອງຄະນະບໍດີ ຄສບ, ທ່ານ ຮສ. ອູ່ຄຳ ສີສູນົນທ໌ ຫົວນ້າພະແນກຄຸ້ມຄອງນັກສຶກສາ ຄສບ ມີບັນດາແຂກຖືກເຊີນ, ພະນັກງານ, ຄູ-ອາຈານ, ຕາງໜ້າຈາກບໍລິສັດ ແລະນັກສຶກສາເຂົ້າຮ່ວມ.
ຈຸດປະສົງຂອງການຈັດງານ ບໍລິສັດສາມາດສະໜອງຂໍ້ມູນ ຂອງບໍລິສັດ, ການເຝິກງານ ແລະ ການໃຫ້ຂໍ້ມູນຕຳແໜ່ງວ່າງ ໃຫ້ແກ່ນັກສຶກສາ ແລະ ຜູ້ຢ້ຽມຊົມງານ ທີ່ມີຄວາມສົນໃຈໃນໜ້າທີ່ ແລະ ຄວາມຮັບຜິດຊອບໃນຕຳແໜ່ງເຫຼົ່ານັ້ນ. ບໍລິສັດສາມາດສອບສຳພາດ ແລະ ຮັບຮູ້ພະນັກງານບົ່ມຊ້ອນທີ່ກຳລັງສຶກສາຢູ່ ພ້ອມນັ້ນ, ເພື່ອໃຫ້ນັກສຶກສາທີ່ສຶກສາຢູ່ ແລະ ຈົບໃໝ່ສາມາດເຂົ້າເຖິງຂໍ້ມູນຕ່ຳແໜ່ງວ່າງ (ທັງເຕັມເວລາ ແລະ ວຽກເສີມ) ແລະ ສົ່ງໃບສະໝັກພ້ອມຊີວະປະຫວັດ (CV) ຂອງຕົນໃຫ້ບໍລິສັດ. ອີກດ້ານໜຶ່ງ, ນັກສຶກສາທີ່ກຳລັງສຶກສາຢູ່ ສາມາດເຂົ້າເຖິງຂໍ້ມູນການເຝິກງານຂອງບໍລິສັດ ແລະ ສາມາດກຽມຄວາມພ້ອມຂອງຕົນເພື່ອລົງເຝິກງານ, ເພີ່ມທະວີການຮ່ວມມື ລະຫວ່າງຄະນະວິຊາ ແລະ ບັນດາບໍລິສັດ ໂດຍການເຊີນບັນດາຄະນະວິຊາ ແລະ ສະຖາບັນຕ່າງໆ ເພື່ອເຂົ້າຮ່ວມອອກຮ້ານວາງສະແດງຫຼັກສູດການຮຽນ - ການສອນ, ເສີມສ້າງທັກສະດ້ານຕ່າງໆໃຫ້ແກ່ຜູ້ທີ່ຊອກຫາວຽກເຮັດງານທຳ ແລະ ພະນັກງານຫ້ອງການຕ່າງໆ ໂດຍການຈັດເຝິກປະຕິບັດໃນຫົວຂໍ້ທີ່ໜ້າສົນໃຈຕ່າງໆ. ການຈັດງານໃນຄັ້ງນີ້ແມ່ນດຳເນີນໂດຍໜ່ວຍງານໃຫ້ຄຳແນະນຳທາງດ້ານອາຊີບ (Career Counseling Office) ເຊິ່ງເປັນ 1 ໃນໜ່ວຍງານທີ່ຂຶ້ນກັບ ຄສບ ໜ່ວຍງານດັ່ງກ່າວ ມີບົດບາດສໍາຄັນໃນການໃຫ້ບໍລິການ ແລະ ຊ່ວຍເຫຼືອນັກສຶກສາໃນການຊອກຫາວຽກເຮັດງານທຳ.
ງານວັນນັດພົບແຮງງານຄັ້ງທີ 11 ມີບໍລິສັດເຂົ້າຮ່ວມເປີດບູດເພື່ອຮັບສະໝັກພະນັກງານທັງໝົດ 35 ບໍລິສັດ ພ້ອມນັ້ນ ພາຍໃນງານມີກິດຈະກຳການເປີດເຝິກອົບຮົມໃນຫົວຂໍ້: ການເຝິກຂຽນ CV ຮັບສະໝັກພະນັກງານ, ການສຳພາດແນວໃດໃຫ້ຖືກໃຈ HR ແລະມີເວທີສົນທະນາແລກປ່ຽນໃນຫົວຂໍ້ທີ່ກ່ຽວກັບແຮງງານທີ່ໜ້າສົນໃຈ. ເຊິ່ງງານດັ່ງກ່າວໄດ້ຈັດຂືຶ້ນເປັນເວລາ 3 ວັນແຕ່ວັນທີ 28-30 ມີນາ 2024 ຈຶ່ງໄດ້ປິດລົງ.
ໃນຕອນເຊົ້າ ຂອງວັນທີ 27 ມີນາ 2024 ນີ້, ຄະນະຊັບພະຍາກອນນໍ້າ(ຄຊນ) ມະຫາວິທະຍາໄລແຫ່ງຊາດ(ມຊ)ໄດ້ຈັດກອງປະຊຸມ ດໍາເນີນຫຼາຍກິດຈະກໍາຂຶ້ນ ທີ່ຫ້ອງປະຊຸມ ສໍານັກງານຄະນະບໍດີ ຂອງຄະນະຕົນ, ໂດຍການເປັນປະທານ ຂອງທ່ານ ຮສ.ປອ. ເດຊານຸລາດ ແສນດວງເດດ ຮອງອະທິການບໍດີ ມຊ, ມີທ່ນ ຮສ. ປອ. ອຸ່ນຫຼ້າ ສີວັນເພັງ ຄະນະບໍດີ ຄຊນ, ມີບັນດາຮອງຄະນະບໍດີ, ຫົວໜ້າພາກ, ຮອງພາກວິຊາ, ຫົວໜ້າພະແນກ, ຮອງພະແນກ, ພະນັກງານ, ຄູ-ອາຈານ ແລະນັກສຶກສາເຂົ້າຮ່ວມ.
ໃນກອງປະຊຸມໄດ້ດໍາເນີນ 4 ກິດຈະຄໍາສໍາຄັນຄື: ກິດຈະກໍາທີ 1.ຈັດປະຖົມນິເທດໃຫ້ນັກສຶກສາໃໝ່ ປະລິນຍາເອກ ສາຂາ ການຄຸ້ມຄອງຊັບພະຍາກອນນໍ້າ ຮຸ່ນທີ 1 ຈໍານວນ 09 ຄົນ, ນັກສຶກສາ ປະລິນຍາໂທ ສາຂາ ການຄຸ້ມຄອງ ຊັບພະຍາກອນນໍ້າ ແບບປະສົມປະສານ ຮຸ່ນທີ 7, ຈໍານວນ 07 ຄົນ, ນັກສຶກສາ ປະລິນຍາໂທ ສາຂາ ອຸທົກກະສາດ ເພື່ອການຄຸ້ມຄອງຊັບພະຍາກອນນໍ້າ ຮຸ່ນທີ 4, ຈໍານວນ 03 ຄົນ; ບັນຍາຍໂດຍ ທ່ານ ອຈ. ປອ. ແກ້ວດວງໃຈ ແກ້ວຄໍາຜຸຍ ຮອງຄະນະບໍດີ ຄຊນ ຜູ້ຊີ້ນໍາວຽກງານການສຶກສາຫຼັງປະລິນຍາຕີ, ທ່ານ ປທ.ນາງ ບຸນນໍາ ຊົມວິມານ ຮອງຫົວໜ້າຫ້ອງການສຶກສາຫຼັງປະລິນຍາຕີ ມຊ ແລະ ໄດ້ບັນຍາຍ ຫົວຂໍ້: 1. ທີ່ຕັ້ງ ແລະ ພາລະບົດບາດຫ້ອງການ ຫຼັງປະລິນຍາຕີ, 2. ໂຄງປະກອບການຈັດຕັ້ງ, 3. ຫຼັກສູດຫຼັງປະລິນຍາຕີ ມຊ, ນັກສຶກສາຫຼັງປະລິນຍາຕີ ມຊ, ຂໍ້ຕົກລົງ ວ່າດ້ວຍ ນັກສຶກສາລະດັບຫຼັງປະລິນຍາຕີ (ສະບັບປັບປຸງ ປີ 2022) ແລະ ທ່ານ ຮສ. ປທ. ນາງ ສົມສະໜຸກ ສີລິນບຸນທັນ ຫົວໜ້າພະແນກ ການສຶກສາຫຼັງປະລິນຍາຕີ ຄຂນ, ບັນຍາຍຫົວຂໍ້: ການຮຽນ-ການສອນ ການສຶກສາລະດັບຫຼັງປະລິນຍາຕີ ຄຊນ ແລະ ຂັ້ນຕອນກ່ອນການສໍາເລັດການສຶກສາ ຂອງນັກສຶກສາ ປະລິນຍາເອກ ແລະ ປະລິນຍາໂທ.
ກິດຈະກໍາທີ 2. ມອບປະກາສະນີຍະບັດໃຫ້ແກ່ ນັກສຶກສາປະລິນຍາໂທ ທີ່ສໍາເລັດການສຶກສາ ສົກສຶກສາ 2023-2024, ລວມທັງໝົດ ມີ 08 ຄົນ, ຍິງ 01 ຄົນ; ໃນ 2 ສາຂາຄື: ສາຂາ ການຄຸ້ມຄອງຊັບພະຍາກອນນໍ້າແບບປະສົມປະສານ ມີ 06 ຄົນ ແລະ ສາຂາ ອຸທົກກະສາດເພື່ອການຄຸ້ມຄອງຊັບພະຍາກອນນໍ້າ ຈໍານວນ 02 ຄົນ, ຍິງ 0 ຄົນ, ໂດຍການເປັນກຽດມອບ ຂອງທ່ານ ຮສ. ປອ. ເດຊານຸລາດ ແສນດວງເດດ ຮອງອະທິການບໍດີ ມຊ.
ກິດຈະກໍາທີ 3. ເປີດຫຼັກສູດປະລິນຍາເອກ ສາຂາ ການຄຸ້ມຄອງຊັບພະຍາກອນນໍ້າ ໂດຍໄດ້ຮັບການອະນຸມັດ ຂໍ້ຕົກລົງ ຈາກລັດຖະມົນຕີ ກະຊວງສຶກສາທິການ ແລະ ກີລາ ວ່າດ້ວຍການຮັບຮອງ ແລະອະນຸມັດນໍາໃຊ້ຫຼັກສູດ ປະລິນຍາເອກ ຊັບພະຍາກອນນໍ້າ ສາຂາ ການຄຸ້ມຄອງຊັບພະຍາກອນນໍ້າ, ສະບັບເລກທີ 5092/ສສກ, ລົງວັນທີ 19 ກັນຍາ 2023. ແລະໄດ້ຮັບການອະນຸມັດ ຂໍ້ຕົກລົງ ຈາກອະທິການບໍດີ ມຊ ກ່ຽວກັບການອະນຸມັດ ເປີດສອນຫຼັກສູດປະລິນຍາເອກ ຄຊນ, ສະບັບເລກທີ 4049/ມຊ, ລົງວັນທີ 19 ກັນຍາ 2023. ເຊິ່ງ ຄະນະຊີ້ນໍາ ຄຊນ ເຫັນດີເປັນເອກະພາບ ຈັດຕັ້ງເປີດການຮຽນ-ການສອນ ເລີ່ມແຕ່ເດືອນ ມີນາ (3) ປີ 2024 ເປັນຕົ້ນໄປ, ໂດຍມີການຄັດເລືອກເອົານັກສຶກສາ ຕາມມາດຖານເງື່ອນໄຂທີ່ລະບູໄວ້ໃນຫຼັກສູດ ໄດ້ຈໍານວນ 09 ຄົນ, ຍິງ 1 ຄົນ.
ກິກຈະກໍາທີ 4 ແມ່ນ ພິທີເຊັນບົດບັນທຶກຄວາມເຂົ້າໃຈ (MOA) ລະຫວ່າງ ຄຊນ ແລະ ຄະນະວິສະວະກໍາສາດ ມະຫາວິທະຍາໄລ ມະຫາສາລະຄາມ ປະເທດໄທ; ຝ່າຍ ຄຊນ. ມຊ ເຊັນໂດຍ ທ່ານ ຮສ.ປອ. ອຸ່ນຫຼ້າ ສີວັນເພັງ ຄະນະບໍດີ; ຝ່າຍ ຄະນະວິສະວະກໍາສາດ ມະຫາວິທະຍາໄລ ມະຫາສາລະຄາມ ເຊັນໂດຍ ທ່ານ ຮສ. ດຣ. ຈັກກາມາດ ລາວຫາວານິດ ຄະນະບໍດີ; ເຊິ່ງເນື້ອໃນຂອງບົດບັນທຶກ ແມ່ນທັງສອງຝ່າຍ ຈະໄດ້ສ້າງສາຍພົວພັນຮ່ວມມື ທາງດ້ານວິຊາການເຊັ່ນ: ດ້ານການຄົ້ນຄວ້າວິທະຍາສາດ, ດ້ານການຮຽນ-ການສອນ ແລະການແລກປ່ຽນບົດຮຽນຂອງບຸກຄະລາກອນພະນັກງານ ແລະນັກສຶກສາໃຫ້ມີຄວາມຮູ້ກວ້າງໄກ(ໄລຍະເວລາຂອງສັນຍາ ກຳນົດ 05 ປີ). ໂດຍ ຊ້ອງໜ້າ ທ່ານ ຮສ.ປອ. ເດຊານຸລາດ ແສນດວງເດດ ຮອງອະທິການບໍດີ ມຊ ແລະ ທ່ານ ສຈ. ດຣ. ອານົງລິດ ແຂງແລງ (Prof. Dr. Anongrit KANGRANG) ຮອງອະທິການບໍດີ ມະຫາວິທະຍາໄລມະຫາສາລະຄາມ (ປະເທດໄທ) ແລະ ມີຄະນະອາຈານ ທີ່ກ່ຽວຂ້ອງຈາກ ມະຫາວິທະຍາໄລ ມະຫາສາລະຄາມ ແລະຄະນະອາຈານຈາກ ຄຊນ. ມຊ ເຂົ້າຮ່ວມ.
ໃນຕອນບ່າຍ ຂອງວັນທີ 22 ມີນາ 2024 ຜ່ານມານີ້, ຄະນະນິຕິສາດ ແລະ ລັດຖະສາດ (ຄນລ) ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີ ປາຖະກະຖາ ຫວນຄືນມູນເຊື້ອວັນສຳຄັນຂອງຊາດ ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 69 ປີ (ວັນທີ 22 ມີນາ 1955 - ວັນທີ 22 ມີນາ 2024) ແລະວັນສ້າງຕັ້ງ ຄນລ ຄົບຮອບ 38 ປີ (ວັນທີ 23 ມີນາ 1986 - ວັນທີ 23 ມີນາ 2024) ທີ່ຫ້ອງປະຊຸມຂອງຄະນະ, ໂດຍການປາຖະກະຖາຂອງທ່ານ ຮສ. ປອ. ວຽງວິໄລ ທ່ຽງຈັນໄຊ ຄະນະປະຈຳພັກ ມຊ, ເລຂາຄະນະພັກຮາກຖານ, ຄະນະບໍດີ ຄນລ ແລະ ທ່ານ ຮສ. ປອ. ກຽດ ກຽດຕິສັກ ອະດີດຮອງລັດຖະມົນຕີ ກະຊວງຍຸຕິທຳ, ອະດີດຜູ້ອຳນວຍການໂຮງຮຽນກົດໝາຍຜູ້ທຳອິດ, ມີບັນດາ ຮອງຄະນະບໍດີ, ຫົວໜ້າພາກ-ຮອງພາກວິຊາ, ຫົວໜ້າພະແນກ-ຮອງພະແນກ,ພະນັກງານ, ຄູ-ອາຈານ ແລະນັກສຶກສາເຂົ້າຮ່ວມຮັບຟັງ.
ໃນພິທີ ທ່ານ ຮສ. ປອ. ວຽງວິໄລ ທ່ຽງຈັນໄຊ ໄດ້ເລົ່າຄືນມູນເຊື້ອ ວັນສ້າງຕັ້ງພັກ ປະຊາຊົນ ປະຕິວັດລາວ ໂດຍທ່ານໄດ້ຍົກໃຫ້ເຫັນ ປະຫວັດຄວາມເປັນມາ ຂອງພັກປະຊາຊົນ ປະຕິວັດລາວ ທ່ານ ກ່າວບາງຕອນວ່າ: ພັກປະຊາຊົນ ປະຕິວັດລາວ ແມ່ນອົງການຈັດຕັ້ງ ເສນາທິການ ທາງການເມືອງ, ເປັນກອງນໍາໜ້າ ແລະ ເປັນຕົວແທນແຫ່ງສິດຜົນປະໂຫຍດ ຂອງຊົນຊັ້ນກໍາມະກອນ-ຊາວຜູ້ອອກແຮງງານລາວບັນດາເຜົ່າ; ພັກປະຊາຊົນ ປະຕິວັດລາວ ໄດ້ນໍາພາປະຊາຊົນລາວບັນດາເຜົ່າ ເຮັດສໍາເລັດພາລະກິດປະຕິວັດປົດປ່ອຍຊາດ, ລຶບລ້າງລະບອບລ່າເມືອງຂຶ້ນ, ສ້າງສັງກາດໃໝ່ໃຫ້ແກ່ປະເທດຊາດ. ພາຍຫຼັງປະເທດຊາດໄດ້ຮັບການປົດປ່ອຍຢ່າງສົມບູນ, ພັກກໍໄດ້ສືບຕໍ່ນໍາພາປະຊາຊົນລາວບັນດາເຜົ່າ ປົກປັກຮັກສາເອກະລາດ ແລະ ກໍ່ສ້າງຊີວິດໃໝ່. ຈຸດປະສົງ ຂອງພັກ ແມ່ນນໍາພາປວງຊົນລາວທັງຊາດ ດໍາເນີນພາລະກິດປ່ຽນແປງໃໝ່, ກໍ່ສ້າງ ແລະ ຂະຫຍາຍລະບອບ ປະຊາທິປະໄຕ ປະຊາຊົນ, ສ້າງປະຖົມປັດໄຈ ໃຫ້ແກ່ການກ້າວຂຶ້ນສັງຄົມນິຍົມເທື່ອລະກ້າວ; ພັກປະຊາຊົນ ປະຕິວັດລາວ ຖືເອົາຫຼັກມູນພື້ນຖານ ຂອງລັດທິມາກ - ເລນິນ ເປັນພື້ນຖານແຫ່ງແນວຄິດ-ທິດສະດີ ຂອງພັກ, ຖືເອົາຫຼັກການລວມສູນ ປະຊາທິປະໄຕ ຂອງພັກ, ນໍາພາເປັນໝູ່ຄະນະ ບຸກຄົນຮັບຜິດຊອບເປັນຫຼັກການ ຂອງພັກ, ຖືເອົາຄວາມສາມັກຄີອັນໜຶ່ງອັນດຽວເປັນຫຼັກ, ເອົາການຕໍານິຕິຊົມຊຶ່ງກັນ ແລະ ກັນ ເປັນກົດເກນ ຂອງການເຄື່ອນໄຫວ ແລະ ຖືເອົາມະຫາຊົນ ເປັນກໍາລັງແຮງໃນການນໍາພາ ຂອງພັກ. ພັກກໍາເນີດຂຶ້ນໃນເງື່ອນໄຂທີ່ປະເທດເຮົາ ກໍຄື 3 ຊາດອິນດູຈີນ: ລາວ, ຫວຽດນາມ ແລະ ກໍາປູເຈຍ ຕົກເປັນຫົວເມືອງຂຶ້ນ ຂອງຈັກກະພັດລ່າເມືອງຂຶ້ນຝຣັ່ງ ແລະ ຖືກກົດຂີ່ຂູດຮີດຢ່າງໜັກໜ່ວງ; ດ້ວຍນໍ້າໃຈຮັກຊາດ ແລະ ຄຽດແຄ້ນ ຕໍ່ພວກລ່າເມືອງຂຶ້ນຜູ້ຮຸກຮານ, ປະຊາຊົນ 3 ຊາດອິນດູຈີນ ໄດ້ລຸກຂຶ້ນຕໍ່ສູ້ຈົນກາຍເປັນກະແສຟອງທີ່ຟົດເດືອດ, ສໍາລັບ ຢູ່ປະເທດລາວ ພວກລ່າເມືອງຂຶ້ນຝຣັ່ງຍິ່ງກົດຂີ່ຂູດຮີດໜັກໜ່ວງເທົ່າໃດ, ປະຊາຊົນລາວ ກໍຍິ່ງຄຽດແຄ້ນຂຶ້ນເທົ່ານັ້ນ, ຂະບວນການຕໍ່ສູ້ຢ່າງພິລະອາດຫານ ຂອງປະຊາຊົນລາວເຜົ່າຕ່າງໆ ແຕ່ເໜືອເຖິງໃຕ້ ໄດ້ເກີດຂຶ້ຶ້ນຢ່າງຕໍ່ເນື່ອງ ເຊັ່ນ: ຂະບວນການຕໍ່ສູ້ ຊຶ່ງນໍາພາໂດຍອົງແກ້ວ - ອົງກົມມະດໍາ, ຂະບວນການຕໍ່ສູ້ ນໍາພາໂດຍພໍ່ກະດວດ, ຂະບວນການຕໍ່ສູ້ ນໍາພາໂດຍເຈົ້າຟ້າປັດໃຈ, ຂະບວນການຕໍ່ສູ້ ຂອງນາຍຄູຄໍາ ແລະ ອື່ນໆ, ແຕ່ຂະບວນການຕໍ່ສູ້ເຫຼົ່ານັ້ນລ້ວນແຕ່ຖືກປາບປາມ ແລະ ປະລາໄຊ ຍ້ອນຫຼາຍສາເຫດ, ແຕ່ສາເຫດສໍາຄັນ ແລະ ເປັນປັດໄຈຕັດສິນ ແມ່ນຍ້ອນບໍ່ມີການຈັດຕັ້ງພັກ ທີ່ຖືລັດທິມາກ - ເລນິນ ຊີ້ນໍາ-ນໍາພາ.
ພາຍຫຼັງພັກກອມມູນິດອິນດູຈີນ ໄດ້ຮັບການສ້າງຕັ້ງຂຶ້ນ ໃນປີ 1930, ອິດທິພົນ ຂອງພັກກອມມູນິດອິນດູຈີນ ໄດ້ຂະຫຍາຍຕົວແຮງ, ການເຄື່ອນໄຫວປະຕິວັດ ຂອງມະຫາຊົນ ຢູ່ 3 ປະເທດອິນດູຈີນ ໄດ້ຂະຫຍາຍຕົວຢ່າງກວ້າງຂວາງ, ໃນປີ 1934 ຄະນະພັກແຄວ້ນລາວ ກໍໄດ້ຮັບການສ້າງຕັ້ງຂຶ້ນ, ຂະບວນການຕໍ່ສູ້ ຂອງປະຊາຊົນລາວ ກໍສາມາດຍາດໄດ້ ໄຊຊະນະຢ່າງຕໍ່ເນື່ອງ. ພາຍໃຕ້ການນໍາພາ ຂອງພັກກອມມູນິດອິນດູຈີນ ໂດຍສະເພາະອົງຄະນະພັກແຄວ້ນລາວ ປະຊາຊົນລາວ ສາມາດຢຶດອໍານາດການປົກຄອງ ໃນວັນທີ 23 ສິງຫາ 1945 ແລະ ໄດ້ປະກາດເອກະລາດໃນວັນທີ 12 ຕຸລາ 1945; ຕໍ່ໜ້າຄວາມຮຽກຮ້ອງຕ້ອງການອັນໃໝ່ ຂອງການປະຕິວັດ ໃນກອງປະຊຸມໃຫຍ່ ຄັ້ງທີ II ຂອງພັກກອມມູນິດອິນດູຈີນ ໃນປີ 1951, ກອງປະຊຸມໄດ້ຕົກລົງໃຫ້ສ້າງຕັ້ງພັກປະຕິວັດຂຶ້ນໃນແຕ່ລະປະເທດ, ພາຍຫຼັງຫ້າງຫາກະກຽມໄດ້ໄລຍະໜຶ່ງມາເຖິງ ວັນທີ 22 ມີນາ 1955 ກອງປະຊຸມໃຫຍ່ຜູ້ແທນສະມາຊິກພັກ ທົ່ວປະເທດກໍໄດ້ເປີດຂຶ້ນ, ກອງປະຊຸມໄດ້ເປັນເອກະພາບໃສ່ຊື່ພັກວ່າ “ພັກປະຊາຊົນລາວ” ໂດຍແມ່ນ ປະທານ ໄກສອນ ພົມວິຫານ ເປັນເລຂາທິການໃຫຍ່.
ທາດແທ້ ຂອງພັກປະຊາຊົນ ປະຕິວັດລາວ ແມ່ນເປັນຕົວແທນທີ່ຈົງຮັກພັກດີ ຕໍ່ສິດຜົນປະໂຫຍດ ຂອງຊົນຊັ້ນກໍາມະກອນ, ຊາວຜູ້ອອກແຮງງານລາວ ທີ່ຮັກຊາດ ແລະ ຂອງຊາດລາວທັງໝົດ; ຢຶດໝັ້ນລັດທິມາກ-ເລນິນ, ແນວຄິດ ໄກສອນ ພົມວິຫານ ແລະ ມູນເຊື້ອອັນດີງາມ ຂອງພັກ ເປັນພື້ນຖານແນວຄິດ, ທິດສະດີ ຂອງພັກ. ການເນັ້ນກ່ຽວກັບການເປັນຕົວແທນທີ່ຈົງຮັກພັກດີ ຕໍ່ປະໂຫຍດ ຂອງຊົນຊັ້ນກໍາມະກອນນັ້ນ ແມ່ນເພື່ອສະແດງອອກໃຫ້ເຫັນທາດແທ້ ກໍຄື ເຈດຈໍານົງອັນສູງສົ່ງ ຂອງພັກເຮົາ ຊຶ່ງເວລາໃດກໍຖືເປັນພັກ ຂອງຊົນຊັ້ນກໍາມະກອນ, ເວລາໃດກໍຖືຜົນປະໂຫຍດ ຂອງຊາດເປັນກົກ ແລະ ເໜືອກວ່າຜົນປະໂຫຍດ ຂອງພັກເອງ, ຖືບັນຫາຊາດ ແລະ ຜົນປະໂຫຍດອັນສູງສົ່ງ ຂອງຊາດສູງກວ່າບັນຫາຊົນຊັ້ນ ແລະ ຜົນປະໂຫຍດ ຂອງຊົນຊັ້ນ.
ນັບແຕ່ມື້ສ້າງຕັ້ງຂຶ້ນ ພັກປະຊາຊົນ ປະຕິວັດລາວ ໄດ້ກໍານົດອຸດົມການ ຂອງຕົນຢ່າງຈະແຈ້ງຄື: ນໍາພາປວງຊົນລາວດໍາເນີນການຕໍ່ສູ້ຕ້ານພວກຈັກກະພັດລ່າເມືອງຂຶ້ນ ເພື່ອນໍາເອົາຄວາມເປັນເອກະລາດມາໃຫ້ແກ່ປະເທດຊາດ ແລະ ສິດເປັນເຈົ້າມາໃຫ້ປະຊາຊົນ, ສ້າງສາປະເທດຊາດ ສູ່ຈຸດໝາຍສັງຄົມນິຍົມ. ປັດຈຸບັນ ພັກເຮົາໄດ້ເສີມຂະຫຍາຍອຸດົມການໃຫ້ ມີຄວາມສອດຄ່ອງຕື່ມອີກຄື: ສືບຕໍ່ຢຶດໝັ້ນແນວທາງປ່ຽນແປງໃໝ່ ຮອບດ້ານ ແລະ ມີຫຼັກການ ຂອງພັກ, ນໍາພາທົ່ວປວງຊົນລາວທັງຊາດ ປະຕິບັດໜ້າທີ່ປົກປັກຮັກສາປະເທດຊາດ ແລະ ໝາກຜົນ ຂອງການປະຕິວັດໄວ້ໃຫ້ໝັ້ນຄົງ; ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານໃຫ້ແກ່ການບູລະນະລະບອບປະຊາທິປະໄຕ ປະຊາຊົນໃຫ້ກ້າວເດີນສູ່ຈຸດໝາຍສັງຄົມນິຍົມຢ່າງໜັກແໜ້ນ, ເຮັດໃຫ້ປະເທດຊາດມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມສາມັກຄີປອງດອງ, ປະຊາທິປະໄຕ, ຍຸຕິທໍາ ແລະ ສີວິໄລ.
ຈາກນັ້ນ ໃນພິທີ ໄດ້ຮັບຟັງການເລົ່າຄືນມູນເຊື້ອການສ້າງຕັ້ງ ຄນລ ຄົບຮອບ 38 ປີ (23 ມີນາ 1986 – 23 ມີນາ 2024) ໂດຍທ່ານ ສຈ. ປອ. ເກດ ກຽດຕິສັກ ເຊິ່ງທ່ານໄດ້ເລົ່າຄືນປະຫວັດການສ້າງຕັ້ງໂຮງຮຽນກົດຫມາຍຄັ້ງທຳອິດ ໃນປີ 1986 ໃນເບື້ອງຕົ້ນ ແມ່ນໂຮງຮຽນກົດໝາຍຊັ້ນກາງດອນນົກຄຸ້ມ ຫຼັງຈາກນັ້ນ ກໍໄດ້ມີການປັບປຸງດ້ານຫຼັກສູດການຮຽນ-ການສອນ ລວມເຖິງກົງຈັກການຈັດຕັ້ງ ແລະໄດ້ສົ່ງພະນັກງານຫຼັກແຫຼງໄປຍົກລະດັບໃນຕ່າງປະເທດຫຼາຍຄົນ ກ່ອນຈະຮວມເຂົ້າເປັນ 1 ໃນຄະນະວິຊາ ຂອງ ມຊ ໃນວັນທີ 5 ພະຈິກ 1996 ແລ້ວປ່ຽນຊື່ມາເປັນ ຄະນະນິຕິສາດ ແລະລັດຖະສາດ (ຄນລ) ຕັ້ງຢູ່ວິທະຍາເຂດດອນນົກຄຸ້ມ. ພ້ອມທັງ ດຳເນີນການຮຽນ-ການສອນ ໃນຫຼັກສູດກົດໝາຍ ແລະການພົວພັນສາກົນ ເຊິ່ງສາມາດສ້າງ ແລະ ພັດທະນາຊັບພະຍາກອນມະນຸດ ອອກມາຮັບໃຊ້ສັງຄົມໄດ້ຫຼາຍພັນຄົນ ນັບແຕ່ອະດີດຈົນຮອດປັດຈຸບັນ; ດຳເນີນຫຼັກສູດການຮຽນ-ການສອນ ທັງໝົດ 13 ຫຼັກສູດ ໃນນັ້ນ ມີຫຼັກສູດປະລິນຍາຕີ 5 ຫຼັກສູດ, ຫຼັກສູດຕໍ່ເນື່ອງປະລິນຍາຕີ 4 ຫຼັກສູດ ແລະຫຼັກສູດປະລິນຍາໂທ 4 ຫຼັກສູດ ໃນ 5 ພາກວິຊາຄື: ພາກວິຊາກົດໝາຍແພ່ງ, ພາກວິຊາກົດໝາຍອາຍາ, ພາກວິຊາກົດໝາຍທຸລະກິດ, ພາກວິຊາລັດຖະສາດ ແລະພາກວິຊາພົວພັນສາກົນ.
ໃນຕອນບ່າຍວັນ 19 ມີນາ 2024 ຜ່ານມາ, ສະຫະພັນກຳມະບານ ມະຫາວິທະຍາໄລແຫ່ງຊາດ(ມຊ) ໄດ້ຈັດກອງປະຊຸມ ສະຫຼຸບວຽກງານກວດກາ ຂອງສະຫະພັນກຳມະບານ ມຊ ແລະ ສະຫຼຸບວຽກງານ-ຍ້ອງຍໍ ການປະຕິບັດຂໍ້ແຂ່ງຂັນ 5 ເປັນເຈົ້າ ຂຶ້ນທີ່ຫ້ອງປະຊຸມ ສະໂມສອນໃຫຍ່ ມຊ; ໂດຍການເຂົ້າຮ່ວມເປັນປະທານຂອງສະຫາຍ ຮສ. ປອ. ສິນທະວອນ ດາລາວົງ ຄະນະປະຈໍາພັກ, ຮອງອະທິການບໍດີ, ຜູ້ຊີ້ນໍາວຽກງານ ສາມອົງການຈັດຕັ້ງມະຫາຊົນ ມຊ, ສະຫາຍ ສິງທອງ ສີສະຫວັດ ຮອງປະທານ ສະຫະພັນກໍາມະບານກະຊວງສຶກສາທິການ ແລະ ກີລາ ແລະສະຫາຍ ຮສ ປອ ບຸນທອນ ສຸຂະວົງ ຮອງປະທານ ສະຫະພັນກໍາມະບານກະຊວງສຶກສາທິການ ແລະ ກີລາ , ປະທານຄະນະບໍລິຫານງານສະຫະພັນກໍາມະບານ ມຊ, ມີບັນດາສະຫາຍ ຄະນະບໍລິຫານງານສະຫະພັນກຳມະບານ ຮາກຖານອ້ອມຂ້າງ ແລະສະມາຊິກກຳມະບານເຂົ້າຮ່ວມ.
ໃນພິທີ ສະຫາຍ ນາງ ຄໍາພໍ ແສງຈັນ ປະທານກວດກາຄະນະບໍລິຫານງານ ສະຫະພັນກໍາມະບານ ມຊ ໄດ້ຂຶ້ນຜ່ານບົດສະຫຼຸບລາຍງານຜົນການກວດກາ ເຊິ່ງສະຫາຍໄດ້ຍົກໃຫ້ເຫັນການປະຕິບັດວຽກງານໃນໄລຍະຜ່ານມາວ່າ: ໃນໄລຍະຜ່ານມາ ຄະນະບໍລິຫານງານ ສະຫະພັນກຳມະບານ ມຊ ໄດ້ລົງຕິດຕາມກວດກາ 3 ຄັ້ງຄື: ຄັ້ງທີ 1 ປີ 2021 ໄດ້ລົງຕິດຕາມກວດກາ 15 ຮາກຖານ, ຄັ້ງທີ 2 ປີ 2022 ໄດ້ຕິດຕາມກວດກາ 17 ຮາກຖານ ແລະຄັ້ງທີ 3 ລົງຕິດຕາມກວດກາ 16 ຮາກຖານ, ໂດຍຜ່ານການຕິດຕາມກວດກາເຫັນວ່າ ຫຼາຍຮາກຖານມີການພັດທະນາ-ປ່ຽນແປງທີ່ດີຂຶ້ນ ຖ້າທຽບໃສ່ໄລຍະຜ່ານມາ ເປັນຕົ້ນແມ່ນ ແບບແຜນວິທີເຮັດວຽກ, ການປະສານງານກັບຜູ້ຮັບຜິດຊອບແມ່ນໄດ້ຮັບການຮ່ວມມືເປັນຢ່າງດີ, ມີການປະຊຸມສ່ອງແສງກັບໜ່ວຍເປັນແຕ່ລະໄຕມາດ ແລະແບ່ງໜ້າທີ່ໃຫ້ ຄະນະບໍລິຫານງານແຕ່ລະຮາກຖານ ໃນການເຮັດວຽກ; ວຽກງານສະຕິຖິ ແລະການຂະຫຍາຍສະມາຊິກແມ່ນມີຫຼາຍຮາກຖານທີ່ສາມາດເຮັດຕາມເວລາທີ່ທາງຂັ້ນເທິງໄດ້ກຳນົດຄື: ໃນ 1 ປີຜ່ານມາ ມີການຮັບສະມາຊິກໃໝ່ 2 ຄັ້ງ; ຫຼາຍຮາກຖານມີການເອົາໃຈໃສ່ເບິ່ງແຍງສະມາຊິກກຳມະບານ ໂດຍສະເພາະແມ່ນສິດ-ຜົນປະໂຫຍດ ແລະນະໂຍບາຍຕ່າງໆໃນເວລາ ເຈັບເປັນ, ແຕ່ງງານ, ເກີດລູກ, ຜ່າຕັດ ແລະສະມາຊິກທີ່ເສຍຊິວິດ; ດຳເນີນວຽກງານປັບປຸງການຈັດຕັ້ງໜ່ວຍ ແລະຮາກຖານ ຄຽງຄູ່ກັບການປັບປຸງແກ້ໄຂ້ບາງບັນຫາທີ່ຍັງຄົງຄ້າງ.
ຈາກນັ້ນ ໃນພິທີ ສະຫາຍ ຄຳປັນ ສູນທະລາວົງ ຄະນະບໍລິຫານງານສະຫະພັນກໍາມະບານ ມຊ ກໍໄດ້ຜ່ານບົດສະຫຼຸບວຽກງານຂໍ້ແຂ່ງຂັນ 5 ເປັນເຈົ້າ ປະຈຳປີ 2023 ຂອງສະຫະພັນ ກຳມະບານ ມຊ ຊຶ່ງປັດຈຸບັນ ຄະນະບໍລິຫານງານ ສະຫະພັນກຳມະບານ ມຊ ມີທັງໝົດ 18 ສະຫາຍ, ຍິງ 5 ສະຫາຍ; ມີ 17 ຮາກຖານ ປະກອບມີ 13 ຮາກຖານຄະນະວິຊາ, 2 ຮາກຖານສະຖາບັນ, 1 ຮາກຖານໂຮງຮຽນສາມັນ ແລະ 1 ຮາກຖານສຳນັກງານອະທິການບໍດີ, ມີ 98 ໜ່ວຍ, ມີສະມາຊິກກຳມະບານທັງໝົດ 6,542 ຄົນ, ຍິງ 3,458 ຄົນ; ເປັນພະນັກງານ 1,753 ຄົນ, ຍິງ 824 ຄົນ, ເປັນນັກສຶກສາ 4,799 ຄົນ, ຍິງ 2,634 ຄົນ. ເຊິ່ງຜ່ານການຈັດຕັ້ງປະຕິບັດ ຂໍ້ແຂ່ງຂັນ 5 ເປັນເຈົ້າ ໃນຂໍ້ແຂ່ງຂັນທີ 1. ເປັນເຈົ້າເຝິກຝົນຫຼໍ່ຫຼອມຕົນເອງ ທາງດ້ານການເມືອງ-ແນວຄິດ ແມ່ນສາມາດປະເມີນໄດ້ 90%; 2. ເປັນເຈົ້າການໃນການປະຕິບັດກົດໝາຍ ແລະລະບຽບການຂອງລັດ ປະເມີນໄດ້ 90%; 3. ເປັນເຈົ້າການໃນການພັດທະນາຕົນເອງ ສາມາດປະເມີນໄດ້ 90%; 4. ເປັນເຈົ້າການປົກປ້ອງສິດ ແລະຜົນປະໂຫຍດອັນຊອບທຳ ປະເມີນໄດ້ 98%; 5. ເປັນເຈົ້າການປະຕິບັດໜ້າທີ່ວິຊາສະເພາະ ຢ່າງປະດິດສ້າງ ແມ່ນສາມາດປະເມີນໄດ້ 95%.