ຂ່າວ

ນັກສຶກສາ ມຊ ເຂົ້າຮ່ວມການແຂ່ງຂັນແຜນພັດທະນາແບບຍືນຍົງສໍາລັບຊາວໜຸ່ມນັກສຶກສາອາຊຽນ

ນັກສຶກສາຈາກ ມະຫາວິທະຍາໄລແຫ່ງຊາດ ຈໍານວນ 15 ຄົນ ເຂົ້າຮ່ວມການແຂ່ງຂັນນໍາສະເໜີແຜນພັດທະນາແບບຍືນຍົງສໍາລັບຊາວໜຸ່ມນັກສຶກສາອາຊຽນ ທີ່ປະເທດສິງກະໂປ ໃນລະຫວ່າງວັນທີ 28 ຕຸລາ ຫາ 4 ພະຈິກ 2023 ຜ່ານມາ, ເຊິ່ງໂຄງການດັ່ງກ່າວ ເປັນການຮ່ວມມືກັນລະຫວ່າງ ມະຫາວິທະຍາໄລແຫ່ງຊາດລາວ ກັບ ອົງກອນເຄືອຂ່າຍຊາວໜຸ່ມໂອເອັດສ໌ຈີ (OSG Youth Alliance) ແລະ ໄດ້ມີການຄັດເລືອກຕົວແທນນັກສຶກສາລາວໄປເຂົ້າຮ່ວມ ການແຂ່ງຂັນລະດັບອາຊຽນ “1^st Annual ASEAN-China-India : ACI – Youth Leadership Summit 2023” (ພາຍໃຕ້ຫົວຂໍ້: ‘Sustainability’).

ພາຍໃນງານການແຂ່ງຂັນລະດັບອາຊຽນ “1^st Annual ASEAN-China-India : ACI – Youth Leadership Summit 2023” ແມ່ນມີນັກສຶກສາຈາກ 12 ປະເທດໂດຍມີ 10 ປະເທດຈາກອາຊຽນ, ສອງປະເທດຄູ່ຮ່ວມຄື: ສປ. ຈີນ ແລະ ອິນເດຍ ໂດຍແຕ່ລະປະເທດໄດ້ນໍາສົ່ງຕົວແທນນັກສືກສາຂອງຕົນ ຈໍານວນ 15 ຄົນ, ລວມແລ້ວມີນັກສຶກສາເຂົ້າຮ່ວມການແຂ່ງຂັນທັງໝົດ 180 ຄົນ; ໂຄງການນີ້ ມີຈຸດປະສົງເພື່ອໃຫ້ນັກສຶກສາທີ່ເຂົ້າຮ່ວມໄດ້ມີໂອກາດປະກອບສ່ວນແນວຄວາມຄິດ ໃນການສ້າງແບບແຜນກ່ຽວກັບ ການພັດທະນາແບບຍືນຍົງໃຫ້ແກ່ສັງຄົມສະໄໝໃໝ່ ໂດຍແນໃສ່ການພັດນາແບບຍືນຍົງ ເປົ້າໝາຍທີ 11 (ສ້າງຕົວເມືອງ ແລະ ທີ່ພັກອາໄສໃຫ້ທົ່ວເຖິງ, ປອດໄພ ແລະ ໝັ້ນຄົງທົນທານ) ແລະ ເປົ້າໝາຍທີ 12 (ຮັບປະກັນຮູບແບບອຸປະໂພກບໍລິໂພກ ແລະ ການຜະລິດໃຫ້ມີຄວາມຍືນຍົງ) ເປັນຫຼັກ. ນັກສຶກສາທີ່ເຂົ້າຮ່ວມກິດຈະກໍາແມ່ນຈະຖືກແບ່ງອອກເປັນກຸ່ມເພື່ອທໍາການແຂ່ງຂັນໂດຍ ກຸ່ມ 1 ປະກອບມີ 6 ຄົນ ໂດຍມາຈາກຄົນລະປະເທດກັນ. ໃນນັ້ນ, ທີມທີ່ໄດ້ລາງວັນ ອັນດັບທີ 2 (ໄດ້ຮັບທຶນການສຶກສາ 5,000 ໂດລາສິງກະໂປ ພ້ອມໂລ່ກຽດຕິຄຸນ) ໄດ້ມີນັກສຶກສາ ມຊ 1 ຄົນ ເປັນສະມາຊິກ ພາຍໃນທີມ ໂດຍມີຊື່ວ່າ: ນ. ອັກສອນຄຳ ວົງໄຊ, ນັກສຶກສາ ຊັ້ນປີທີ4 ສາຂາ ສັງຄົມສົງເຄາະ, ຄະນະວິທະຍາສາດສັງຄົມ ແລະ ທີມທີ່ໄດ້ລາງວັນ ອັນດັບທີ 6 (ໄດ້ຮັບຫຼຽນກຽດຕິຄຸນ) ໄດ້ມີນັກສຶກສາ ມຊ 1 ຄົນ ເປັນສະມາຊິກ ພາຍໃນທີມ ໂດຍມີຊື່ວ່າ: ນ. ປ່າເຍຍ ຢ່າງເຊົາເຢ້, ນັກສຶກສາ ຊັ້ນປີທີ 4 ສາຂາ ສັງຄົມສົງເຄາະ, ຄະນະວິທະຍາສາດສັງຄົມ.

ພາບບັນຍາກາດ

ນັກສຶກສາ ຄສປ ໄດ້ເປັນຕົວແທນ ນັກສຶກສາລາວ ເຂົ້າຮ່ວມການແຂ່ງຂັນອອກແບບດ້ານສະຖາປັດ ລະດັບອາຊີ

ໃນວັນທີ 14 ພະຈິກ 2023, ຄະນະສະຖາປັດຕະຍະກຳສາດ (ຄສປ) ມະຫາວິທະຍາໄລແຫ່ງຊາດ (ມຊ) ໄດ້ຈັດການແຂ່ງຂັນການອອກແບບສະຖາປັດຕະຍະກຳ ທີ່ຄະນະຂອງຕົນ, ໂດຍມີທ່ານ ຮສ. ປອ. ສຸກັນ ຈິດປັນຍາ ຮັກສາການຄະນະບໍດີ ຄສປ, ມີບັນດາແຂກຖືກເຊີນ, ພະນັກງານ, ຄູ-ອາຈານ ແລະນັກສຶກສາຈາກ ຄສປ ເຂົ້າຮ່ວມແບບເຊິ່ງໜ້າ ແລະອອນລາຍ.

ການແຂ່ງຂັນອອກແບບສະຖາປັດຕະຍະກຳໃນຄັ້ງນີ້ ຈັດຂຶ້ນເພື່ອຄັດເລືອກເອົານັກສຶກສາ ຜູ້ທີ່ມີຜົນງານດີເດັ່ນ ເປັນຕົວແທນຂອງປະເທດລາວ ໄປເຂົ້າຮ່ວມການແຂ່ງຂັນໃນລະດັບອາຊີ ທີ່ໄທເປ ສປ ຈີນ; The 12^th ACARA ເປັນໂຄງການຮ່ວມມືກັນລະຫວາ່ງ 3 ມະຫາວິທະຍາໄລຄື: ມະຫາວິທະຍາໄລແຫ່ງຊາດ, ມະຫາວິທະຍາໄລສຸພານຸວົງ ແລະມະຫາວິທະຍາໄລຈຳປາສັກ (ໂດຍສະເພາະແມ່ນສະສາຂາສະຖາປັດຕະຍະກຳສາດ).

ການແຂ່ງຂັນຄັ້ງນີ້, ມີນັກສຶກສາສົ່ງຜົນງານເຂົ້າຮ່ວມການແຂ່ງຂັນທັງໝົດ 12 ຜົນງານ ໂດຍພາຍໃຕ້ຫົວຂໍ້ ເສດຖະກິດໜູນວຽນທີ່ຕິດພັນກັບການພັດທະນາແບບຍືນຍົງ “Naturally Circular” ສາມາດຜ່ານເຂົ້າຮອບສຸດທ້າຍໄດ້ 5 ຜົນງານ; ເຊິ່ງໃນຮອບນີ້ ນັກສຶກສາໄດ້ນຳສະເໜີຜົນງານຂອງຕົນເອງໃຫ້ກັບຄະນະກຳມະການໂດຍແມ່ນອາຈານ ຈາກ 3 ມະຫາວິທະຍາໄລເຂົ້າຮ່ວມຕັດສິນຄື: ທ່ານ ຮສ. ປອ. ສຸກັນ ຈິດປັນຍາ ຈາກ ມຊ, ທ່ານ ນາງ ສຸກສາທິດ ແສນແສງພົມ ຈາກມະຫາວິທະຍາໄລສຸພານຸວົງ ແລະທ່ານ ທົງໄຊ ເທບພະລັກສາ ຈາກມະຫາວິທະຍາໄລຈຳປາສັກ; ຜ່ານການແຂ່ງຂັນຜົນປະກົດວ່າ: ທ້າວ ພະໂນສອນ ປິວແກ້ວປະເສີດ ນັກສຶກສາປີທີ 4 ສາຂາ ສະພາບແວດລ້ອມ ແລະຜັງເມືອງ ຄສປ. ມຊ ສາມາດຄວ້າລາງວັນຊະນະເລີດ ພ້ອມທັງເປັນຕົວແທນນັກສຶກສາລາວ ເຂົ້າຮ່ວມການແຂ່ງໃນລະດັບອາຊີ ທີ່ ໄຕ້ຫວັນ ສປ. ຈີນ ທີ່ຈະຈັດຂຶ້ນໃນລະຫວ່າງວັນທີ 8-9 ທັນວາ 2023 ນີ້; ສ່ວນລາງວັນທີ 2 ແມ່ນ Mr. Vichet DOEURNG ນັກສຶກສາປີທີ 4 ສາຂາ ສະຖາປັດຕະຍະກຳສາດ ຄສປ ມຊ; ສ່ວນອັບດັບທີ 3 ແມ່ນ ທ້າວ ພິສອດ ທຳມະວົງ ນັກສຶກສາປີທີ 4 ສາຂາ ສະຖາປັດຕະຍະກຳສາດ ມະຫາວິທະຍາໄລສຸພານຸວົງ.

ພາບບັນຍາກາດ

ມຊ ຈັດພິທີຮັບຟັງການບັນຍາຍພິເສດ

ໃນວັນທີ 13 ພະຈິກ 2023 ຜ່ານມານີ້, ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີຮັບຟັງການບັນຍາຍພິເສດ ຈາກທ່ານ ສຈ. ປອ. ຊິອິຈິ ຄິຕະໂອກະ ທີ່ປຶກສາພິເສດ (ອະດີດປະທານອົງການໄຈກາ) ປະເທດຍີ່ປຸ່ນ ພ້ອມດ້ວຍຄະນະທີ່ຫ້ອງປະຊຸມ ຄະນະເສດຖະສາດ ແລະບໍລິຫານທຸລະກິດ, ໂດຍການຕ້ອນຮັບ ແລະເຂົ້າຮ່ວມຮັບຟັງຂອງທ່ານ ຮສ. ປອ. ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະກີລາ, ທ່ານ ຮສ. ປອ. ອຸດົມ ພອນຄຳເພັງ ອະທິການບໍດີ ມຊ ມີທ່ານຄະນະບໍດີ ຄະນະເສດຖະສາດ ແລະບໍລິຫານທຸລະກິດ, ພະນັກງານ, ຄູ-ອາຈານ ແລະນັກສຶກສາຈາກ , ຄະນະເສດຖະສາດ ແລະບໍລິຫານທຸລະກິດ ແລະຄະນະວິທະຍາສາດທໍາມະຊາດເຂົ້າຮ່ວມ.

ທ່ານ ສຈ. ປອ. ຊິອິຈິ ຄິຕະໂອກະ ໄດ້ບັນຍາຍໃນຫົວຂໍ້ “ການສ້າງປະເທດຍີ່ປຸ່ນສະໄໝ ແລະການປະກອບສ່ວນ ຂອງປະເທດຍີ່ປຸ່ນຕໍ່ກັບປະເທດລາວ” ໂດຍທ່ານໄດ້ຍົກໃຫ້ເຫັນປະຫວັດຄວາມເປັນມາຂອງການສ້າງປະເທດຍີ່ປຸ່ນແຕ່ສະໄໝເອໂດະ (ປີ 1603-1868), ຈົນມາຮອດການປະຕິຮູບຍຸກເມຈິ (ປີ 1868-1878) ແລະການສ້າງລັດສະໄໝໃໝ່; ພ້ອມນັ້ນ ທ່ານຍັງໄດ້ຍົກໃຫ້ເຫັນການຮ່ວມມືລະຫວ່າງ ລາວ-ຍີ່ປຸ່ນ ທີ່ລັດຖະບານຍີ່ປຸ່ນໄດ້ໃຫ້ການຊ່ວຍເຫຼືອແກ່ ສປປ ລາວ ເຊັ່ນ ດ້ານການສຶກສາ, ພະລັງງານ, ການກໍ່ສ້າງ-ບູລະນະ ໂຄງລ່າງພື້ນຖານ ແລະການປົກຄອງດ້ວຍກົດໝາຍ ແລະສາທາລະນະສຸກເປັນຕົ້ນ.

ຫຼັງຈາກສຳເລັດການບັນຍາຍ ໃນພິທີຍັງໄດ້ມີການສົນທະນາແລກປ່ຽນກັນໃນທີ່ປະຊຸມເຊິ່ງມີນັກສຶກສາຫຼາຍຄົນໃຫ້ຄວາມສົນໃຈໃນຫົວຂໍ້ການບັນຍາຍໃນຄັ້ງນີ້.

ພາບບັນຍາກາດ

ຄສປ ຈັດພິທີແຂ່ງຂັນອອກແບບໂອນຊາ ທີ່ເຮັດຈາກໄມ້ໄຜ່

ໃນຕອນເຊົ້າວັນທີ 13 ພະຈິກ 2023 ນີ້, ຄະນະສະຖາປັດຕະຍະກໍາສາດ (ຄສປ) ມະຫາວິທະຍາໄລແຫ່ງຊາດ(ມຊ) ໄດ້ຈັດພິທີແຂ່ງຂັນອອກແບບໂອນຊາ ຫຼືເຄື່ອງຫຼິ້ນທີ່ເຮັດຈາກໄມ້ໄຜ່ ຂຶ້ນທີ່ຫ້ອງປະຊຸມຂອງ ຄສປ. ໂດຍການເປັນປະທານ ແລະກ່າວເປີດພິທີຂອງທ່ານ ຮສ. ມະໂນລົດ ພິນິດ ຮອງຄະນະບໍດີ ຄະນະສະຖາປັດຕະຍະກຳສາດ ມຊ, ມີບັນດາຄະນະກໍາມະການຈາກ ຄະນະສະຖາປັດຕະຍະກຳສາດ ມຊ, ອາຈາຈາກມະຫາວິທະຍາໄລສຸພານຸວົງ ແລະອາຈານຈາກມະຫາວິທະຍາໄລຈໍາປາສັກ ແລະມີຄະນະກໍາມະການຈາກຝ່າຍ ສປຈ ທີ່ເຂົ້າຮ່ວມຜ່ານທາງອອນລາຍ, ມີບັນດາຫົວໜ້າພະແນກ, ຮອງຫົວໜ້າພະແນກ, ພ້ອມດ້ວຍພະນັກງານຄູ-ອາຈານ ແລະນັກສຶກສາ ເຂົ້າຮ່ວມຢ່າງພ້ອມພຽງ.

ຈຸດປະສົງໃນການຈັດງານດັ່ງກ່າວແມ່ນເພື່ອຄັດເລືອກເອົາຜົນງານນັກສຶກສາ ຜູ້ທີ່ມີຜົນງານການອອກແບບດີເດັ່ນ ເພື່ອເປັນຕົວແທນຂອງນັກສຶກສາ ສປປ ລາວ ເຂົ້າຮ່ວມການແຂ່ງຂັນໃນລະດັບນາໆຊາດ ທີ່ຈະຈັດຂຶ້ນທີ່ສວນນົກກວາງຊູ ເມືອງໜານຊາ ສປ ຈີນ ໃນວັນທີ 10 ທັນວາ 2023.

ທ່ານ ຮສ. ມະໂນລົດ ພິນິດ ໄດ້ໃຫ້ຮູ້ວ່າ ການແຂ່ງຂັນໃນປະເທດລາວ ເປັນການແຂ່ງຂັນເພື່ອຄັດເລືອກເອົາຕົວແທນນັກສຶກສາ ຄະນະສະຖາປັດຕະຍະກຳສາດ ຈາກ 3 ມະຫາວິທະຍາໄລ ຄື ມະຫາວິທະຍາໄລແຫ່ງຊາດ, ມະຫາວິທະຍາໄລສຸພານຸວົງ ແລະມະຫາວິທະຍາໄລຈໍາປາສັກ. ການແຂ່ງຂັນດັ່ງກ່າວ ແມ່ນໄດ້ເລີ່ມມາ ແຕ່ປີ 2022 ເຊິ່ງໄດ້ຮັບຄວາມຮ່ວມມື ແລະມີຜົນສໍາເລັດເພາະນັກສຶກສາ 2 ທີມ ທີ່ເປັນຕົວແທນຂອງ ສປປ ລາວ ໄດ້ຖືກນໍາຜົນງານໄປກໍ່ສ້າງຈິງ ທີ່ສວນນົກກວາຊູ ເມືອງໜານຊາ ສປ. ຈີນ ແລະໄດ້ຮັບລາງວັນ Excellence Reward ໃນຫົວຂໍ້ “Compaehensive Award” ດັ່ງນັ້ນ, ຈຶ່ງໄດ້ສືບຕໍ່ດໍາເນີນຕໍ່ເນື່ອງມາໃນປີນີ້ ແລະຄາດໝາຍໃຫ້ມີການດໍາເນີນການແຂ່ງຂັນໃນທຸກໆປີ. ການແຂ່ງຂັນດັ່ງກ່າວນີ້ ເປັນກິດຈະກໍາວິຊາການທີ່ສົ່ງເສີມການຮຽນ-ການສອນ, ເປັນເວທີ ທີ່ໃຫ້ນັກສຶກສາ ໄດ້ມີໂອກາດສະແດງຜົນງານການອອກແບບສູ່ສາຍຕາຂອງສັງຄົມ ແລະນັກສຶກສາ ຍັງໄດ້ແລກປ່ຽນບົດຮຽນ ກັບນັກສຶກສາຂອງບັນດາມະຫາວິທະຍາໄລໃນເຂດອາຊີ.

ໃນການແຂ່ງຂັນອອກແບບ ແມ່ນໄດ້ເລີ່ມມາແຕ່ ເດືອນກັນຍາ 2023 ເຊິ່ງທີມນັກສຶກສາສົ່ງຜົນງານເຂົ້າແຂ່ງຂັນທັງໝົດມີ 17 ທີມ; ໃນນັ້ນມີ 10 ທີມທີ່ຜ່ານການຄັດເລືອກໃຫ້ມາແຂ່ງຂັນໃນຮອບສຸດທ້າຍ ເພື່ອຄັດເລືອກເອົາພຽງ 2 ທີມ, 2 ຜົນງານດີເດັ່ນ ນໍາໄປກໍ່ສ້າງຈິງ ທີ່ ສວນນົກກວາງຊູ ເມືອງໜານຊາ ສປ ຈີນ ເຊິ່ງເປັນຮອບການແຂ່ງຂັນລະດັບນາໆຊາດ ແລະຮ່ວມງານວາງສະແດງຂອງ “Belt and Road International Bamboo Art Exhibition” ໃນງານ Guangzhou Garden Expo” ຄັ້ງທີ 31 ເຊິ່ງຈະຈັດຂຶ້ນໃນວັນທີ 10 ທັນວາ 2023 ທີ່ ສປ ຈີນ.

ຜົນການແຂ່ງຂັນອອກແບບຄັ້ງນີ້ ອັນດັບທີ 1 ມີ 02 ທີມ ຄື: ທີມ Tensegrity ແລະທີມ Project C ຈາກ ຄະນະສະຖາປັດຕະຍະກໍາສາດ ມຊ ໄດ້ຮັບເງິນລາງວັນ ທີມລະ 17.250.000 ກີບ ແລະທັງເປັນຕົວແທນໄປແຂ່ງຂັນຢູ່ ສປ ຈີນ, ອັນດັບທີ 2 ມີ 2 ທີມ ຄື: ທີມ Khaen ຈາກມະຫາວິທະຍາໄລຈໍາປາສັກ ແລະທີມ V. R. G ຈາກຄະນະສະຖາປັດຕະຍະກໍາສາດ ມຊ ແລະ ອັນດັບທີ 3 ມີ 2 ທີມຄື: ທີມ Alpha Tean ຈາກຄະນະສະຖາປັດຕະຍະກໍາສາດ ມຊ ແລະທີມ Champa Team ຈາກມະຫາວິທະຍາໄລຈໍາປາສັກ.

ຄຊປປລ ຄະນະວິທະຍາສາດສັງຄົມ ຈັດກອງປະຊຸມໃຫຍ່ຄັ້ງທີ VI

ໃນຕອນເຊົ້າວັນທີ 10 ພະຈິກ 2023 ຜ່ານມານີ້, ຄະນະຊາວໜຸ່ມ ປະຊາຊົນ ປະຕິວັດລາວ ຄະນະວິທະຍາສາດສັງຄົມ (ຄສຄ) ມະຫາວິທະຍາໄລແຫ່ຊາດ(ມຊ) ໄດ້ຈັດກອງປະຊຸມໃຫຍ່ຄັ້ງທີ VI ຂຶ້ນທີ່ຫ້ອງປະຊຸມສະໂມສອນຊັ້ນ II . ໂດຍການເປັນປະທານຮ່ວມຂອງສະຫາຍ ນາງ. ທໍາ ນັນທະວົງສາ ຄະນະພັກຮາກຖານ ຄສຄ, ທ່ານ ປອ. ວິໄລສັກ ສີໂຄດວົງສາ ຄະນະບໍລິຫານງານຊາວໜຸ່ມ ກະຊວງສຶກສາທິການ ແລະກີລາ, ຮອງເລຂາຊາວໜຸ່ມ ມຊ, ທ່ານ ລິນທາ ຈັນທະມາລີ ເລຂາຊາວໜຸ່ມຮາກຖານ ຄສຄ, ທ່ານ ນາງ. ຈັນທະຈອນ ສິງຫາລາດ ປະທານສະຫະພັນແມ່ຍິງຮາກຖານ ຄສຄ ແລະທ່ານ ອໍາພອນ ວົງສຸພັນ ປະທານ ກໍາມະບານຮາກຖານ ຄສຄ, ມີບັນດາແຂກທີ່ຖືກເຊີນ, ສະມາຊິກ ຄຊປປລ ທີ່ເປັນພະນັກງານ, ຄູ-ອາຈານ ແລະນັກສຶກສາ ຄສຄ ເຂົ້າຮ່ວມ.

ໃນພິທີ ສະຫາຍ ລິນທາ ຈັນທະລີມາ ເລຂາຊາວໜຸ່ມ ຄະນະວິທະຍາສາດສັງຄົມ ໄດ້ຂຶ້ນຜ່ານບົດລາຍງານການເຄື່ຶອນໄຫວໃນໄລຍະ 5 ປີ (2019-2023 ) ຜ່ານມາ ແລະສະເໜີທິດທາງແຜນການ 5 ປີ ໃນຕໍ່ໜ້າ (2023-2028) ຂອງ ຄສຄ ໃນການຈັດຕັ້ງປະຕິບັດວຽກງານຕໍ່ທີ່ປະຊຸມ; ເຊິ່ງສະຫາຍໄດ້ຍົກໃຫ້ເຫັນຜົນງານອັນພົ້ນເດັ່ນຫຼາຍດ້ານເຊັ່ນ: ການສຶກສາອົບຮົມການເມືອງ-ແນວຄິດໃຫ້ສະມາຊິກຊາວໜຸ່ມ ໂດຍຜ່ານຂະບວນການປະຕິບັດຂໍ້ແຂ່ງຂັນ 4 ບຸກ ໃນແຕ່ລະປີ ແລະສົມທົບກັບພຶດຕິກຳຕົວຈິງຂອງສະມາຊິກ ສາມາດຕີລາຄາໄດ້ວ່າ 80% ເຫັນວ່າມີຄະແນນສະເລ່ຍ 8,25% ຂອງຈຳນວນສະມາຊິກທັງໝົດ (ໃນເກນ ດີ-ດີເດັ່ນ). ສຳລັບການຈັດຕັ້ງເຊື່ອມຊືມເອກະສານເອກະສານສຳຄັນຕ່າງໆ ສາມາດຈັດຕັ້ງປະຕິບັດໄດ້ 65% ຂອງແຜນການທີ່ໄດ້ກຳນົດໄວ້ໃນກອງປະຊຸມໃຫຍ່ໄວ້ 1-2 ຄັ້ງ/ປີ ເນື່ອງມາຈາກສະພາບໂຄວິດ-19 ແຜ່ລະບາດ. ປັບປຸງ ແລະກໍ່ສ້າງການຈັດຕັ້ງຊາວໜຸ່ມໄດ້ອະນຸມັດຮັບມະຫາຊົນເຂົ້າເປັນສະມາຊິກຊາວໜຸ່ມ ຄຊປປລ ໄດ້ 3 ຄັ້ງ ມີສະມາຊິກ 16 ສະຫາຍ, ຊຸກຍູ້ສະມາຊິກຜູ້ມີເປົ້າໝາຍຂະຫຍາຍເປັນສະມາຊິກພັກປະຊາຊົນ ປະຕິວັດລາວ ໃຫ້ໄດ້ 11 ສະຫາຍ, ຍິງ 6 ສະຫາຍ, ສະມາຊິກພັກສຳຮອງ 3 ສະຫາຍ, ຍິງ 2 ສະຫາຍ. ປັບປຸງກົງຈັກການຈັດຕັ້ງຊາວໜຸ່ມ ໃຫ້ສອດຄ່ອງກັບແຜນກຳນົດພະນັກງານ (2021-2025) ສ້າງພະນັກງານສືບທອດ, ປ່ຽນແທນ ສາມາດຕອບສະໜອງໄດ້ຄວາມຮຽກຮ້ອງຕ້ອງການຂອງຕຳແໜ່ງງານຕ່າງໆ, ໄດ້ສ້າງຂະບວນການສິລະປະ ແລະກີລາ ໃນການສະເຫຼີມ-ສະຫຼອງວັນສຳຄັນຕ່າງໆ ຂອງຊາດ ແລະ ຂອງພັກ ປະຕິບັດໄດ້ເກີນແຜນທີກຳນົດໄວ້, ສຳລັບວຽກງານ 4 ບຸກ ແມ່ນສາມາດປະຕິບັດຂໍ້ແຂ່ງຂັນ 4 ບຸກໄດ້ປະເພດດີ-ດີເດັ່ນ 80% ຂຶ້ນໄປ, ໄດ້ນຳພາສະມາຊິກພະນັກງານ ແລະ ສະມາຊິກນັກສຶກສາບໍລິຈາກເລືອດທັງຢູ່ພາຍໃນ ມຊ ແລະຢູ່ນອກໄດ້ທັງໝົດ 488 ເທື່ອຄົນ, ຍິງ 278 ເທື່ອຄົນ. ໄດ້ນຳພາສະມາຊິກປ້ອງກັນເວນຍາມ 24 ຊົ່ວໂມງ ໃນຂອບເຂດຄວາມຮັບຜິດຊອບຕົນ ເຫັນວ່າມີຄວາມເປັນລະບຽບດີ.

ຈາກນັ້ນ ໃນພິທີຍັງໄດ້ມີການປ່ອນບັດ ຄັດເລືອກເອົາ ຄຊປປລ ຄະນະວິທະຍາສາດສັງຄົມ ມຊ ຊຸດໃໝ່; ມີຜູ້ສະໝັກທັງໝົດ 11 ສະຫາຍ, ຄັດເລືອກເອົາ 7 ສະຫາຍ; ຜ່ານການຄັດເລືອກໃນທີ່ປະຊຸມ ໄດ້ເລືອກ ສະຫາຍ ງາມຕາ ວົງວິໄລທອງ ເປັນເລຂາ, ສະຫາຍ ສົມໃຈ ບູລິດຳ ເປັນຮອງ, ສະຫາຍ ກັນຫາ ແສງມະນີ ເປັນປະທານກວດກາ, ສະຫາຍ ບຸນນັດ ແກ້ວປັນຍາ, ສະຫາຍ ມາລາວັນ ຈັນທະວົງສິນ, ສະຫາຍ ບຸນຈັນ ແຈ່ມມາໄລ ແລະສະຫາຍ ຄໍາອົ້ນ ທໍາມະວົງ ເປັນຄະນະ.

ພາບບັນຍາກາດ

ຄວສ ປັບປຸງດ້ານຄຸນະພາບການສຶກສາ ໂດຍຜ່ານການພັດທະນາພື້ນຖານໂຄງລ່າງ

ພິທີວາງສິລາລືກໂຄງການກໍ່ສ້າງປັບປຸງສິ່ງອໍານວຍຄວາມສະດວກ ແລະ ອຸປະກອນການທົດລອງ ໃນຄະນະວິສະວະກຳສາດ (ຄວສ) ມະຫາວິທະຍາໄລແຫ່ງຊາດ(ມຊ) ໄດ້ຈັດຂຶ້ນວັນທີ 9 ພະຈິກ 2023 ທີ່ຄະນະວິສະວະກຳສາດ (ວິທະຍາເຂດໂສກປ່າຫຼວງ) ເປັນກຽດເຂົ້າຮ່ວມໃນພິທີມີທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີ ກະຊວງສຶກສາທິການ ແລະ ກີລາ, ທ່ານ Toshimichi KOGA ເລຂາເອກ ເອກອັກຄະ ຣາຊະທູດ ຜູ້ມີອໍານາດເຕັມ ແຫ່ງປະເທດຍີ່ປຸ່ນ ປະຈຳ ສປປ ລາວ, ທ່ານ Toshio NAGASE ຫົວໜ້າ ອົງການຮ່ວມມືສາກົນ ແຫ່ງປະເທດຍີ່ປຸ່ນ (JICA) ປະຈຳສປປ ລາວ, ທ່ານ ສຈ.ປອ ຮຸ່ງເພັດ ຈັນທະວົງ ຮອງອະທິການບໍດີ ມະຫາວິທະຍາໄລແຫ່ງຊາດ ພ້ອມຫົວໜ້າກົມ ຮອງຄະນະບໍດີ ຫົວໜ້າພາກວິຊາ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ຮສ.ປອ ສຸລິພັນ ກັນນິຖາ ຄະນະບໍດີ ຄະນະວິສະວະກຳສາດ ໄດ້ລາຍງານຫຍໍ້ກ່ຽວກັບໂຄງການ ດັ່ງກ່າວນີ້ວ່າ: ພິທີລົງນາມໃນສັນຍາຊ່ວຍເຫຼືອລ້າ ລະຫວ່າງ ອົງການຮ່ວມມືສາກົນຍີ່ປຸ່ນ (JICA) ປະຈໍາລາວ ກັບລັດຖະບານ ແຫ່ງ ສປປ ລາວ ຈັດຂຶ້ນໃນວັນທີ 25 ມີນາ 2021 ໄດ້ມອບທຶນຊ່ວຍເຫຼືອລ້າ ຈຳ ນວນ 2.5 ຕື້ເຢນ ໃຫ້ແກ່ “ໂຄງການກໍ່ສ້າງປັບປຸງສິ່ງອຳນວຍຄວາມສະດວກ ແລະ ອຸປະກອນການທົດລອງ ໃນຄະນະວິສະວະກຳສາດ ມະຫາວິທະຍາໄລແຫ່ງຊາດ” ຈຸດປະສົງຂອງໂຄງການດັ່ງກ່າວ ແມ່ນເພື່ອປັບປຸງ ແລະ ຍົກລະດັບສິ່ງອໍານວຍຄວາມສະດວກ ແລະ ອຸປະກອນທົດລອງທາງດ້ານການສຶກສາ ແລະ ການຄົ້ນຄວ້າທາງດ້ານວິສະວະກຳສາດ ຂອງອາຈານ ແລະ ນັກສຶກສາ ພາຍໃນ ມຊ, ໂຄງການດັ່ງກ່າວ ປະກອບສ່ວນໃນການປັບປຸງດ້ານຄຸນະພາບການສຶກສາ ຂອງຄະນະວິສະ ວະກຳສາດ ໂດຍຜ່ານການພັດທະນາພື້ນຖານໂຄງລ່າງ ແລະ ການສ້າງຂີດຄວາມສາມາດ.

ພາຍຫຼັງທີ່ສໍາເລັດການສໍາຫຼວດ ແລະ ອອກແບບໂຄງການ ໂດຍບໍລິສັດທີ່ປຶກສາ MOHRI Architect & Associates ຮ່ວມກັບ INTEM Consulting ແລະ ໄດ້ຮັບໃບອະນຸຍາດປຸກສ້າງ ໃນວັນທີ 27 ມິຖຸນາ 2023 ຈາກພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ໃນໄລຍະເວລາດຽວກັນ ທາງບໍລິສັດທີ່ປຶກສາ ກໍປະສົບຜົນສໍາເລັດໃນການຈັດການປະມູນໂຄງການດັ່ງກ່າວຂຶ້ນ ທີ່ນະ ຄອນຫຼວງໂຕກຽວ ປະເທດຍີ່ປຸ່ນ ໃນເດືອນກັນຍາ 2023 ແລະ ໄດ້ຄັດເລືອກເອົາບໍລິສັດ KUBOTA Construction (ບໍລິສັດຮັບເໝົາກໍ່ສ້າງຄູໂບຕາ) ເປັນບໍລິສັດທີ່ຊະນະການປະມູນຮັບເໝົາວຽກງານການກໍ່ສ້າງອາຄານທົດລອງ 2 ຫຼັງ ຄື:

ອາຄານທີ 1: ເປັນອາຄານຫ້ອງທົດລອງທາງດ້ານວິສະວະກຳ ເປັນອາຄານ 3 ຊັ້ນ ຂະໜາດພື້ນທີ່ນໍາໃຊ້ 2.159,56 ຕາແມັດ ພາຍໃນຕຶກປະກອບມີຫ້ອງທົດລອງ, ຫ້ອງເຮັດວຽກຂອງອາຈານ ພະນັກງານ ແລະ ນັກສຶກສາ ໃນ 6 ພາກວິຊາເປົ້າໝາຍຄື: ພາກວິຊາວິສະວະກຳໂຍທາ, ພາກວິຊາວິສະວະກໍາ ຂົວທາງ, ພາກວິຊາ ວິສະວະກຳຂົນສົ່ງ ແລະ ພາລາທິການ, ພາກວິຊາ ວິສະວະກຳກົນຈັກ, ພາກວິຊາ ວິສະວະກຳໄຟຟ້າ, ພາກວິຊາ ວິສະວະກຳເອເລັກໂຕຣນິກ ແລະ ໂທລະຄົມມະນາຄົມ.

ອາຄານທີ 2: ເປັນອາຄານສູນວິສະວະກຳ ເພື່ອການພັດທະນາແບບຍືນຍົງ ເປັນອາຄານ 2 ຊັ້ນ ຂະ ໜາດພື້ນທີ່ 1.454,40 ຕາແມັດ. ພາຍໃນຕຶກປະກອບດ້ວຍເຄື່ອງມືທົດລອງພິເສດຈໍານວນໜຶ່ງ ສໍາລັບການຄົ້ນຄວ້າວິໄຈໃຫ້ແກ່ຄູອາຈານ ແລະ ສຳລັບການຮ່ວມມືກັບພາກອຸດສາຫະກຳ, ຫ້ອງເຝິກອົບຮົມ, ຫ້ອງຄອມພິວເຕີ ແລະ ຫ້ອງປະຊຸມສໍາມະນາທາງວິຊາການ ເພື່ອຮອງຮັບວຽກງານການຄົ້ນຄວ້າ ແລະ ການ ບໍລິການວິຊາການຂອງຄະນະວິສະວະກຳສາດ.

ໂດຍພາຍໃນອາຄານທັງສອງ ໄດ້ມີການສະໜອງບັນດາອຸປະກອນເຄື່ອງມືທົດລອງ ທາງດ້ານວິສະວະກຳ ທີ່ທັນສະໄໝ ພ້ອມດ້ວຍລະບົບໄຟຟ້າ, ລະບົບປັບອາກາດ, ເຄື່ອງສຽງ ແລະ ເຄື່ອງສາຍ LCD, ສະໜອງໂຕະຕັ່ງ ແລະ ອຸປະກອນຮັບໃຊ້ຫ້ອງການອື່ນໆ.

ໂຄງການນີ້ ມີໄລຍະດໍາເນີນການທັງໝົດ 15 ເດືອນ ເຊິ່ງໂຄງການແມ່ນໄດ້ເລີ່ມມາແຕ່ວັນທີ 30 ກັນ ຍາ 2023 ໃນໄລຍະຜ່ານມາ ແມ່ນໄດ້ເລີ່ມລົງມືກະກຽມສະຖານທີ່ຍົກຍ້າຍສິ່ງກີດຂວາງເຊັ່ນ: ສາຍໄຟຟ້າ, ສາຍສື່ສານ ແລະ ລະບົບທໍ່ນໍ້າປະປາທີ່ເດີນຜ່ານບໍລິເວນໂຄງການ ຄາດວ່າໂຄງການຈະສໍາເລັດການກໍ່ສ້າງວຽກອາຄານໃນວັນທີ 30 ພະຈິກ 2024 ແລະ ສຳເລັດການຕິດຕັ້ງເຄື່ອງມືທົດລອງພາຍໃນວັນທີ 31 ທັນວາ 2024.

ບົດຄວາມອື່ນ ໆ...

Page 24 of 48