ໃນຕອນບ່າຍ ວັນທີ 25 ພະຈິກ 2023 ຜ່ານມາ, ກຳມະບານຮາກຖານ ຄະນະສະຖາປັດຕະຍະກຳສາດ (ຄສປ) ມະຫາວິທະຍາໄລແຫ່ງຊາດ (ມຊ) ໄດ້ຈັດການການອອກແຮງງານລວມເນື່ອງໃນໂອກາດຕ້ອນຮັບວັນຊາດ ທີ 2 ທັນວາ ແລະສ້າງຂະບວນການຕ້ອນຮັບກອງປະຊຸມສາມຂັ້ນຂອງອົງຄະນະພັກ ມຊ ຢູ່ທີ່ຄະນະ ແລະ ສ້ອມແປງເສັ້ນທາງດ້ານ ໂຮງຮຽນມັດທະຍົມສົມບູນສາທິດ ແລະ ເສັ້ນທາງຂ້າງຮົ້ວ ມຊ  ທີ່ເປ່ເພ່ເປັນຂຸມ, ໂດຍການນຳພາຂອງ ທ່ານ ພິສິດ ສີຫາລາດ ຄະນະພັກຮາກຖານ,  ຫົວໜ້າພະແນກຄົ້ນຄວ້າວິທະຍາສາດ ແລະບໍລິການວິຊາການ ຄສປ, ມີພະນັການ, ຄູ-ອາຈານ ແລະນັກສຶກສາ 200 ກວ່າຄົນເຂົ້າຮ່ວມ.

        ການອອກແຮງງານໃນຄັ້ງນີ້ ແມ່ນໄດ້ຈັດອອກເປັນສອງຈຸຄື: ຈຸທີ 1 ອະນາໄມຂອບເຂດອາຄານຮຽນ, ຕຶກສຳນັກງານຄະນະບໍດີ ແລະບໍລິເວນສວນດອກໄມ້ອ້ອມຂ້າງຕຶກ, ສ່ວນຈຸທີ 2 ແມ່ນລົງພື້ນທີ່ສ້ອມແປງເສັ້ນທາງທີ່ເປ່ເພ່ເປັນຂຸມ ດ້ວຍການເທຊິມັງເພື່ອປົກຂຸມ ເພື່ອໃຫ້ ພະນັກງານ, ຄູ-ອາຈານ, ນັກສຶກສາ ແລະພໍ່ແມ່ປະຊາຊົນ ທີ່ສັນຈອນໄປມາຕາມເສັ້ນທາງບໍລິເວນດັ່ງກ່າວມີຄວາມສະດວກຫຼາຍຂຶ້ນ

ພາບບັນຍາກາດ

ໃນວັນທີ 25 ພະຈິກ 2023 ຜ່ານມານີ້, ມະຫາວິທະຍາໄລແຫ່ງຊາດ(ມຊ) ໄດ້ມີພິທີວາງສີລາລືກໂຄງການກໍ່ສ້າງ ສວນພຶກສາສາດ ມຊ (ທີ່ວິທະຍາເຂດດົງໂດກ) ໂດຍການເຂົ້າຮ່ວມຂອງທ່ານ ຮສ. ປອ. ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກີລາ, ມີທ່ານ ຮສ. ປອ. ອຸດົມ ພອນຄຳເພັງ ອະທິການບໍດີ ມຊ ພ້ອມດ້ວຍແຂກຖືກເຊີນ, ພະນັກງານ, ຄູ-ອາຈານ ແລະນນັກສຶກສາເຂົ້າຮ່ວມ.

        ທ່ານ ຮສ. ປອ. ພຸດ ສິມມາລາວົງ ໄດ້ມີຄຳເຫັນຕໍ່ພິທີ, ເຊິ່ງທ່ານໄດ້ກ່າວບາງຕອນວ່າ: ການກໍ່ສ້າງສວນພຶກສາສາດ ມຊ ຖືເປັນອີກໂຄງການໜຶ່ງທີ່ສຳຄັນ, ເຊິ່ງໃນໄລຍະຜ່ານມາຄະນະນຳ ມຊ ໄດ້ພະຍາຍາມສົ່ງເສີມໃຫ້ເກີດໂຄງການນີ້ຂຶ້ນ ເປັນສູນຮຽນຮູ້ດ້ານຊີວະນາໆພັນ ຄຽງຄູ່ກັບການພັດທະນາຫຼັກສູດການຮຽນ-ການສອນໃຫ້ຕິດພັນກັບການລົງເຝິກປະຕິບັດຕົວຈິງ; ເຊິ່ງຄາດວ່າພາຍຫຼັງທີ່ກໍ່ສ້າງສຳເລັດ, ສວນດັ່ງກ່າວຈະກາຍເປັນບ່ອນຮຽນຮູ້ໃຫ້ແກ່ນັກສຶກສາ, ຄູ-ອາຈານ ແລະຜູ້ທີ່ມີຄວາມສົນໃຈໄດ້ເຂົ້າມາຊົມໃຊ້.

         ໂຄງການກໍ່ສ້າງສວນພຶກສາສາດ ມຊ ເປັນອີກໂຄງການໜຶ່ງທີ່ຢູ່ໃນແຜນຂອງການພັດທະນາ ມຊ ໃນໄລຍະ 5 ປີ ໃຫ້ກາຍເປັນວິທະຍາເຂດສີຂຽວ ແລະຍືນຍົງ, ພ້ອມນັ້ນ ສວນພຶກສາສາດດັ່ງກ່າວ ຈະກາຍເປັນແຫຼ່ງຮຽນຮູ້ກ່ຽວກັບພັນພືດຊະນິດຕ່າງໆທີ່ມີຄວາມຫຼາກຫຼາຍ ໃຫ້ຄູ-ອາຈານ, ນັກສຶກສາໄດ້ລອງເຝິກປະຕິບັດຕົວຈິງຄຽງຄູ່ກັບການຮຽນຮູ້ພາກທິດສະດີ. ພາຍໃຕ້ການພັດທະນາຂອງຕະຫຼາດເຂດດົງໂດກ ຮ່ວມກັບ ມະຫາວິທະຍາໄລແຫ່ງຊາດ  ຄາດວ່າຈະສາມາດເປີດນຳໃຊ້ຢ່າງເປັນທາງການໄດ້ໃນທ້າຍປີ 2024 ນີ້.

ພາບບັນຍາກາດ

ອົງຄະນະພັກ ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີປາຖະກະຖາວັນປະກາດເອກະລາດ ຄົບຮອບ 78 ປີ ແລະ ວັນການທູດລາວ ຄົບຮອບ 78 ປີ (12 ຕຸລາ 1945-12 ຕຸລາ 2023) ຂຶ້ນໃນວັນທີ 24 ພະຈິກ ທີ່ສະໂມສອນໃຫຍ່ ມຊ, ໂດຍການໃຫ້ກຽດປາຖະກະຖາຂອງທ່ານນາງ ວິລະວອນ ພັນທະວົງ ຄະນະປະຈຳພັກ ຮອງຫົວໜ້າຄະນະໂຄສະນາອົບຮົມສູນກາງພັກ, ມີບັນດາຄະນະພັກຮາກຖານ, ຄະນະໜ່ວຍພັກ, ຄູ-ອາຈານ, ນັກສຶກສາເຂົ້າຮ່ວມ.

 ທ່ານນາງ ວິລະວອນ ພັນທະວົງ ໄດ້ຍົກໃຫ້ເຫັນຄວາມໝາຍຄວາມສຳຄັນຂອງວັນປະກາດເອກະລາດ ຄົບຮອບ 78 ປີ ແລະ ວັນການທູດລາວ ຄົບຮອບ 78 ປີໂດຍສະເພາະບັນດາປັດໄຈສຳຄັນທີ່ສ້າງເງື່ອນໄຂໃຫ້ແກ່ການປະກາດເອກະລາດ 12 ຕຸລາ 1945 ແລະ ສືບຕໍ່ເສີມຂະຫຍາຍມູນເຊື້ອວັນປະກາດເອກະລາດ 12 ຕຸລາ ເພື່ອສືບຕໍ່ເສີມຂະຫຍາຍມູນເຊື້ອອັນພິລະອາດຫານຂອງປະຊາຊົນລາວບັນດາເຜົ່າຕໍ່ສູ້ບໍ່ຍອມໃຫ້ປະເທດອັນແສນຮັກຂອງຕົນຕົກຢູ່ພາຍໃຕ້ການປົກຄອງຂອງຈັກກະພັດຜູ້ຮຸກຮານຈຶ່ງພ້ອມກັນລຸກຂຶ້ນຕໍ່ສູ້ບໍ່ຍອມຈຳນົນ ຍອມຕາຍດີກວ່າເປັນຂ້ອຍຂ້າຂອງຊາດອື່ນ ໃນທີ່ສຸດກໍສາມາດປະກາດຄວາມເປັນເອກະລາດໃຫ້ໂລກໄດ້ຮັບຮູ້ຄວາມເປັນຊາດຂອງພວກເຮົາ. ສຳລັບວັນການທູດລາວ ເປັນວັນດຽວກັນກັບວັນປະກາດເອກະລາດ ຊຶ່ງເປັນວັນທີ່ມີຄວາມໝາຍຄວາມສຳຄັນທີ່ສຸດໃນປະຫວັດສາດຂອງຊາດລາວເຮົາ ເພາະເຮັດໃຫ້ປະຊາຄົມໂລກຮັບຮູ້ເຖິງຄວາມເປັນເອກະລາດ ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດລາວ. 

 ການປາຖະກະຖາຄັ້ງນີ້ແນໃສ່ເພື່ອໃຫ້ຄູ-ອາຈານ, ນັກສຶກສາໄດ້ຮັບຮູ້ເຂົ້າໃຈຄວາມໝາຍ ຄວາມສຳຄັນມູນເຊື້ອການຕໍ່ສູ້ອັນພິລະອາດຫານ, ຄວາມສາມັກຄີເປັນປຶກແຜ່ນຂອງກອງທັບ ແລະ ປະຊາຊົນບັນດາເຜົ່າຜູ້ທີ່ຮັກຊາດ ພາຍໃຕ້ການນໍາພາອັນສະຫຼາດສ່ອງໃສຂອງພັກ ເລີ່ມຈາກການນໍາພາຕໍ່ສູ້ປົດປ່ອຍຊາດ ຈົນສາມາດປະກາດຄວາມເປັນເອກະລາດຂອງຊາດລາວໃຫ້ຊາວໂລກໄດ້ຮັບຮູ້ເຖິງຜືນແຜ່ນດິນອັນຄົບຖ້ວນຂອງປະເທດລາວ, ເປັນວັນແຫ່ງຄວາມພາກພູມໃຈຂອງປະຊາຊົນລາວບັນດາເຜົ່າ ພ້ອມທັງເປັນການໂຄສະນາເຜີຍແຜ່ແນວທາງນະໂຍບາຍຂອງພັກຕໍ່ວຽກງານການຕ່າງປະເທດ ໃນການພົວພັນກັບບັນດາປະເທດເພື່ອນມິດໃນພາກພື້ນ ແລະ ສາກົນ ບົນພື້ນຖານຫຼັກການສະເໝີພາບ ແລະ ຕ່າງຝ່າຍຕ່າງໄດ້ຮັບຜົນປະໂຫຍດ”. ນັບຈາກນັ້ນມາວຽກງານການຕ່າງປະເທດ ກໍເປັນຂະແໜງການໜຶ່ງທີ່ມີບົດບາດສຳຄັນທີ່ໄດ້ຕິດພັນກັບຂະບວນການຕໍ່ສູ້ກູ້ຊາດ, ປົກປັກຮັກສາ ແລະ ສ້າງສາພັດທະນາປະເທດຊາດ.

ພາບບັນຍາກາດ

ທ້າວ ຈັນທະພອນ ແສງອ່ອນແກ້ວ (ຈາກພາກວິຊາວິສະວກໍາໂຍທາ ຄະນະວິສະວະກຳສາດ) ແລະນາງ ເພັດໄພລິນ ໝື່ນດວງ (ຈາກພາກວິຊາຄອມພິວເຕີ ແລະຂໍ້ມູນຂ່າວສານ ຄະນະວິສະວະກໍາສາດ)ໄດ້ຮັບຫຼຽນລາງວັນຮອນດາ ສຳລັບນັກວິທະຍາສາດ ແລະວິສະວະກອນໜຸ່ມ ຢູ່ ສປປ ລາວ ປະຈຳປີ 2023 ແລະ ເງິນສົດ ​ຄົນ​ລະ 3.000 ໂດລາ. ພິທີມອບ-ຮັບລາງວັນດັ່ງກ່າວ ໄດ້ຈັດຂຶ້ນໃນຕອນບ່າຍວັນທີ 22 ພະຈິກ 2023 ນີ້ ທີ່ສະຖາບັນພັດ​ທະ​ນາ​ຊັບ​ພະ​ຍາ​ກອນ​ມະ​ນຸດ ລາວ-ຍີ່ປຸ່ນ ເຂົ້າຮ່ວມມີ ທ່ານ ຮສ.ປອ. ອຸດົມ ພອນຄຳເພັງ ອະທິການບໍດີມະຫາວິທະຍາໄລແຫ່ງຊາດ, ທ່ານ Kenichi KOBAYASHI ເອກອັກຄະຣາຊທູດຍີ່ປຸ່ນ ປະຈຳ ສປປລາວ, ທ່ານ Dr. Kazuko MATSUMOTO ຮອງປະທານມູນນິທິຮອນດາ, ທ່ານ ນ. ດອກແກ້ວ ພົນທະຈິດ ຮອງຫົວໜ້າກົມກິດຈະການນັກສຶກສາກະຊວງສຶກສາທິການ ແລະກີລາ, ທ່ານ Toshio NAGASE ຜູ້ຕາງໜ້າອົງການ ໄຈກາ ປະຈໍາລາວ, ທ່ານ ປອ. ພອນແກ້ວ ຈັນທະມາລີ ຜູ້ອໍານວຍການສະຖາບັນພັດທະນາຊັບພະຍາກອນມະນຸດ ລາວ-ຍີປຸ່ນ ມີບັນດາແຂກທີ່ຖືກເຊີນ ແລະ ນັກສຶກສາເຂົ້າຮ່ວມ.

          ທ່ານ ພອນແກ້ວ ຈັນທະມາລີ ຜູ້ອຳນວຍການສະຖາບັນພັດທະນາຊັບພະຍາກອນມະນຸດລາວ-ຍີ່ປຸ່ນ ໄດ້ຕາງ​ໜ້າ​ຄະ​ນະ​ບໍ​ລິ​ຫານ​ໂຄງ​ການ​ລາງວັນຮອນດາ ສຳລັບນັກວິທະຍາສາດ ແລະວິສະວະກອນໜຸ່ມ ຢູ່ ສປປ ລາວ ປະຈຳປີ 2023 ຂຶ້ນ​​ລາຍ​ງານ​ໂດຍ​ຫຍໍ້​ກ່ຽວ​ກັບ​ການ​ຈັດ​ຕັ້ງ​ປະ​ຕິ​ບັດ​ໂຄງ​ການ​ດັ່ງ​ກ່າວ​ໃນ​ໄລ​ຍະ​ໜຶ່ງ​ປີ​ຜ່ານ​ມາ​ວ່າ: ມູນນິທິຮອນດາ​ດັ່ງ​ກ່າວ​ສ້າງ​ຕັ້ງ​ຂຶ້ນ​ເພື່ອ ແນໃສ່ປູກຈິດສຳນຶກໃຫ້ໄວຊາວໜຸ່ມໃນຂອບເຂດທົ່ວໂລກ ມີວິໄສທັດກວ້າງໄກ ມີແນວຄິດສັງສັນ ອົດທົນຜ່ານຜ່າບັນດາຂໍ້ຫຍຸ້ງຍາກ ແລະຮຽນຮູ້ຢ່າງຕໍ່ເນື່ອງ ເພື່ອໃຫ້ສາມາດບັນລຸຄວາມຝັນຂອງຕົນໃນການປະກອບສ່ວນເຂົ້າໃນການພັດທະນາປະເທດຊາດແບບຍືນຍົງໂດຍຜ່ານການຈັດຕັ້ງປະຕິບັດພາລະກິດຂອງການຈັດຕັ້ງທີ່ຕົນສ້າງຂຶ້ນ ຫຼື ສັງກັດຢູ່. ພ້ອມດຽວກັນນັ້ນ ຜູ້ທີ່ໄດ້ຮັບລາງວັນຮອນດາສໍາລັບນັກວິທະຍາສາດ ແລະວິສະວະກອນໜຸ່ມ ກໍຕ້ອງປະກອບສ່ວນເຂົ້າໃນການເສີມຂະຫຍາຍສາຍພົວພັນທີ່ດີ ແລະ ສົ່ງເສີມການແລກປ່ຽນວັດທະນະທຳຂອງສອງຊາດ ລາວ-ຍີ່ປຸ່ນ.

          ຄະນະກໍາມະການຄັດເລືອກນັກສຶກສາເພື່ອຮັບລາງວັນ ໄດ້ແຈ້ງໃຫ້ນັກ​ສຶກ​ສາຮູ້​ກ່ຽວ​ກັບການສອບເສັງຄັດເລືອກດ້ວຍການຂຽນບົດຄວາມໃນຫົວຂໍ້ສະເພາະໃດໜຶ່ງເປັນພາສາລາວ ແລະ ພາສາອັງກິດ ພ້ອມທັງໄດ້ດໍາເນີນການສຳພາດເປັນພາສາອັງກິດ ເພື່ອສາມາດຄັດເລືອກໄດ້ນັກສຶກສາສອງຄົນທີ່ຈະໄດ້ຮັບລາງວັນ ການສອບເສັງຂຽນບົດຄວາມເປັນພາສາລາວ ຄັ້ງທີ 1 ມີນັກສຶກສາເຂົ້າສອບເສັງທັງໝົດ 35 ຄົນ ຍິງ 20 ຄົນ, ໃນນັ້ນມາຈາກ ​ຄະ​ນະ​ວິ​ສະ​ວະ​ກຳ​ສາດ (ຄວສ) 15 ຄົນ ຍິງ 9 ຄົນ, ຄະ​ນະ​ວິ​ທະ​ຍາ​ສາດ​ທຳ​ມະ​ຊາດ (ຄວທ) 13 ຄົນ ຍິງ 7 ຄົນ ແລະ ຄະ​ນະ​ຊັບ​ພະ​ຍາ​ກອນ​ນ້ຳ (ຄຊນ) 7 ຄົນ ຍິງ 4 ຄົນ, ການສອບເສັງຂຽນບົດຄວາມເປັນພາສາອັງກິດ ຄັ້ງທີ 2, ມີນັກສຶກສາເຂົ້າຮ່ວມ 20 ຄົນ ຍິງ 11 ຄົນ, ໃນນັ້ນມາຈາກ ຄວສ 10 ຄົນ (ຍິງ 5 ຄົນ) ຄວທ 9 ຄົນຍິງ 5 ຄົນ, ແລະ ຄຊນ 0 ຄົນ, ການສອບເສັງສໍາພາດ ຄັ້ງທີ 3 ມີຜູ້ເຂົ້າຮ່ວມ 10 ຄົນຍິງ 5 ຄົນ.

          ທ່ານ ຮສ.ປອ. ອຸດົມ ພອນຄຳເພັງ ໄດ້​ເວົ້າ​ວ່າ: ມະຫາວິທະຍາໄລແຫ່ງຊາດໄດ້ຮັບການສະໜັບສະໜູນ ແລະຮ່ວມມືຈາກມູນນິທິຮອນດາທີ່ປະເທດຍີ່ປຸ່ນໃນການຄັດເລືອກ ແລະໃຫ້ລາງວັນຮອນດາເພື່ອນັກວິທະຍາສາດ ແລະວິສະວະກອນໜຸ່ມ ຢູ່ ສປປ ລາວ ສຳລັບນັກສຶກສາດີເດັ່ນມາເປັນເວລາ 16 ປີ ແລ້ວ ເຮັດໃຫ້ນັກສຶກສາທີ່ໄດ້ຮັບລາງວັນມີໂອກາດພັດທະນາຕົນເອງ ເພື່ອກາຍເປັນບຸກຄະລາກອນທີ່ດີເດັ່ນ ແລະກຽມພ້ອມປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ພ້ອມທັງໄດ້ກາຍເປັນຂົວຕໍ່ຮັດແໜ້ນສາຍສໍາພັນ ແລະ ການຮ່ວມມືທີ່ດີງາມລະຫວ່າງ ສປປ ລາວ ແລະ ຍີ່ປຸ່ນໄດ້ດີຕະຫຼອດມາ. ມາຮອດປັດຈຸບັນ ມີນັກສຶກສາທີ່ໄດ້ຮັບລາງວັນຮອນດາແລ້ວຈຳນວນ 32 ຄົນ, ເປັນຍິງ 15 ຄົນ ແລະໄດ້ໄປປະເທດຍີ່ປຸ່ນ ເພື່ອການສຶກສາຄົ້ນຄວ້າໄລຍະສັ້ນ ຈຳນວນ 8 ຄົນ ເປັນຍິງ 4 ຄົນ, ໄປຮຽນຕໍ່ປະລິນຍາໂທ ແລະປະລິນຍາເອກ ຈໍານວນ 5 ຄົນ ເປັນຍິງ 4 ຄົນ

ໃນ​ໂອ​ກາດນີ້ ທ່ານ ຄາສຶໂກະ ມິສຶໂມະໂຕະ (Kazuko MATSUMOTO)  ແລະທ່ານ ຮສ.ປອ. ອຸດົມ ພອນຄຳເພັງ ກໍ່ໄດ້​ໃຫ້​ກຽດ​ຂຶ້ນມອບຫຼຽນ​ລາງວັນພ້ອມ​ດ້ວຍ​ເງິນ​​ສົດໃຫ້ຜູ້ທີ່ໄດ້ຮັບລາງວັນ​ຄົນ​ລະ 3.000 ໂດ​ລາ.

ພາບບັນຍາກາດ