ໃນວັນທີ 12-13 ມັງກອນ 2024 ຜ່ານມານີ້, ສະຖາບັນພັດທະນາຊັບພະຍາກອນມະນຸດ ລາວ-ຍີ່ປຸ່ນ (ສລຍ) ມະຫາວິທະຍາໄລແຫ່ງຊາດ (ມຊ) ໄດ້ຈັດກິດຈະກຳສະເຫຼີມ-ສະຫຼອງບຸນປີໃໝ່ຍີ່ປຸ່ນ ປະຈຳປີ 2024 ທີ່ສະຖາບັນຂອງຕົນ, ໂດຍຫການເຂົ້າຮ່ວມຂອງທ່ານ ຮສ. ປອ. ອຸດົມ ພອນຄຳເພັງ ອະທິການບໍດີ ມຊ, ທ່ານ ປອ. ພອນແກ້ວ ຈັນທະມາລີ ຜູ້ອຳນວຍການ ສລຍ ມີຜູ້ຕາງໜ້າຈາກອົງການໄຈກາປະຈຳ ສປປ ລາວ, ແຂກຖືກເຊີນ ພະນັກງານ, ຄູ-ອາຈານ ແລະ ນັກສຶກສາເຂົ້າຮ່ວມ.

          ການຈັດງານບຸນປີໃໝ່ຍີ່ປຸ່ນໃນຄັ້ງນີ້, ກໍເພື່ອເຜີຍແຜ່ວັດທະນະທຳ ແລະວິຖີຊີວິດການເປັນຢູ່ຂອງຄົນຍີ່ປຸ່ນ ເພື່ອໃຫ້ພະນັກງານ, ຄູ-ອາຈານ ແລະນັກສຶກສາ ຜູ້ເຂົ້າຮ່ວມງານ ໄດ້ເຫັນ, ໄດ້ຊົມ ແລະມີຄວາມຮັບຮູ້-ເຂົ້າໃຈ ວັດທະນະທໍາ, ວິຖີການດໍາລົງຊີວິດ ທີ່ເປັນເອກະລັກສະເພາະຂອງ ຄົນຢີ່ປຸ່ນ, ເຊິ່ງພາຍໃນງານຍັງມີການສະແດງ ເພື່ອໃຫ້ເຫັນຄວາມງົດງາມດ້ານສິລະປະ ລະຫວ່າງລາວ ແລະຍີ່ປຸ່ນ ເຊັ່ນ: ມີການສະແດງບົດຟ້ອນລາວ, ການເຕັ້ນແບບຍີ່ປຸ່ນ, ການສະແດງການຕໍ່ສູ້ແບບຄາຣາເຕໂດ ແລະການໃສ່ຊຸດກິໂມໂນຂອງຍີ່ປຸ່ນ. ພາຍໃນງານຍັງ ບໍລິສັດ ແລະຫ້າງຮ້ານຕ່າງໆ ຕັ້ງບູດວາງສະແດງ ຜະລິດຕະພັນຂອງລາວ ອີກດ້ວຍ.

ພາບບັນຍາກາດ

ໃນຕອນເຊົ້າວັນທີ 10 ມັງກອນ 2024 ນີ້, ທ່ານ ຫຼີຊູ່ເຫຼີຍ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະໂຄສະນາສູນກາງພັກຄອມມູນິດຈີນ  ພ້ອມດ້ວຍຄະນະ  ແລະ ທ່ານ ວາລະໄຊ ເລັ່ງສະຫວັດ ຮອງຫົວຫນ້າຄະນະພົວພັນຕ່າງປະເທດສູນກາງພັກ ພ້ອມດ້ວຍຄະນະໄດ້ເດີນທາງມາຢ້ຽມຢາມ ສະຖາບັນຂົງຈື  ມະຫາວິທະຍາໄລແຫ່ງຊາດ, ໂດຍມີທ່ານ ຮສ.ປອ. ອຸດົມ ພອນຄໍາເພັງ ເລຂາອົງຄະນະພັກ, ອະທິການບໍດີພ້ອມຄະນະ ໃຫ້ກຽດຕ້ອນຮັບ ທີ່ຫ້ອງປະຊຸມສະຖາບັນຂົງຈື. ໃນໂອກາດຕ້ອນຮັບຄະນະຜູ້ແທນ ຂັ້ນສູງ  ສປ.ຈີນ,  ທ່ານ ຄໍາຮຸ່ງ ຈັນທະວົງ ຜູ້ອໍານວຍການສະຖາບັນຂົງຈື ຝ່າຍລາວ ໄດ້ລາຍງານໂດຍຫຍໍ້ກ່ຽວກັບປະຫວັດຄວາມເປັນມາ ແລະ ຜົນງານຂອງສະຖາບັນຂົງຈື ໃນ13ປີ ຜ່ານມາ, ທ່ານ ຫຼົວໝິງ(LUO Ming) ຜູ້ອໍານວຍການຝ່າຍຈີນ ໄດ້ກ່າວລາຍງານກ່ຽວກັບກິດຈະກໍາ ແລະ ສິ່ງປະດິດຂອງນັກສຶກສາລາວ ແລະ ການສະແດງການຊົງຊາ, ການດີດພິນຈີນ, ການຂຽນຕົວອັກສອນຈີນ ຂອງນັກສຶກສາລາວທີ່ຮຽນຢູ່ສະຖາບັນຂົງຈື.

       ຈາກນັ້ນ, ຄະນະນໍາທັງສອງຝ່າຍລາວ-ຈີນ ໄດ້ລົງຕິດຕາມໃກ້ຊິດຕິດແທດຫ້ອງຮຽນພາສາຈີນ ຂອງນັກສຶກສາ ປີທີ1 ແລະ ປີ 2 ຫຼັກສູດຄູພາສາຈີນ, ເຊິ່ງນັກສຶກສາໄດ້ໃຊ້ພາສາຈີນ ແລະພາສາລາວໃນການແນະນໍາຕົນເອງ ພ້ອມທັງໄດ້ເວົ້າກ່ຽວກັບເປົ້າໝາຍການຮຽນພາສາຈີນ ໃຫ້ແກ່ຄະນະນໍາທັງສອງຝ່າຍໄດ້ຮັບຟັງ.

            ທ່ານ ຫຼີຊູ່ເຫຼີຍ ໄດ້ຕີລາຄາສູງຕໍ່ຜົນງານຂອງສະຖາບັນຂົງຈືທີ່ໄດ້ສ້າງໃນ 13 ປີຜ່ານມາ, ເຊິ່ງທ່ານໄດ້ກ່າວຍ້ອງຍໍຊົມເຊີຍນ້ອງນັກສຶກສາສະຖາບັນທີ່ສາມາດໃຊ້ພາສາຈີນ-ລາວ ໃນການແນະນໍາຕົນເອງ ແລະສົນທະນາໄດ້ຢ່າງຄ່ອງແຄ້ວ. ນອກຈາກນີ້ຍັງສາມາດເຂົ້າໃຈວັດທະນະທໍາຈີນເປັນຢ່າງດີ. ແລະຂໍໃຫ້ປະກອບສ່ວນເຂົ້າໃນວຽກງານສ້າງສາຍພົວພັນມິດຕະພາບລາວ-ຈີນ. ທ່ານໄດ້ກ່າວຕື່ມວ່າ: ຫວັງຢ່າງຍິ່ງວ່າ ພາຍໃຕ້ການນໍາພາຊີ້ນໍາ ຂອງຄະນະນໍາມະຫາວິທະຍາໄລແຫ່ງຊາດ ແລະ ມະຫາວິທະຍາໄລຊົນເຜົ່າກວາງຊີ ສປ.ຈີນ (GUANGXI MINZU UNIVERSITY) ແລະ ການເອົາໃຈໃສ່ຂອງຄະນະນໍາ ແລະ ພະນັກງານທັງຝ່າຍ ລາວ-ຈີນ ຈະເຮັດໃຫ້ສະຖາບັນຂົງຈືກາຍເປັນສະຖາບັນຕົວແບບພາຍໃນພາກພື້ນ ແລະ ສາກົນ. ແລະອວຍພອນໄຊໃຫ້ ມະຫາວິທະຍາໄລແຫ່ງຊາດ ຈົ່ງພັດທະນາເລື້ອຍໄປຢ່າງບໍ່ຢຸດຢັ້ງ.

ພາບບັນຍາກາດ

ໃນຕອນເຊົ້າວັນທີ 3 ມັງກອນ 2024 ຄະນະວິທະຍາສາດສັງຄົມ (ຄສຄ) ມະຫາວິທະຍາໄລແຫ່ງຊາດ(ມຊ) ໄດ້ຈັດກອງປະຊຸມລາຍງານຜົນການເກັບກໍາຂໍ້ມູນ ແລະສໍາຫຼວດພາກສະໜາມກ່ຽວກັບຫັດຖະກຳຈັກສານໄມ້ປ່ອງ ໃນປີ 2022-2023 ແລະ ຜ່ານແຜນສໍາຫຼວດຫັດຖະກຳຈັກສານໃນປີ 2024 ຂຶ້ນທີ່ຫ້ອງປະຊຸມຂອງສູນ RTC ຄສຄ ໂດຍການເປັນປະທານຂອງທ່ານ ຮສ. ສະເຫຼີມສັກ ພາບຸດດີ ຮັກສາການ ຄະນະບໍດີ ຄສຄ, ເຂົ້າຮ່ວມມີບັນດາຊ່ຽວຊານຈາກປະເທດຢີ່ປຸ່ນ , ຫົວໜ້າພາກວິຊາ, ຮອງຫົວໜ້າພາກວິຊາ, ພະນັກງານ, ຄູ-ອາຈານ ແລະນັກສຶກສາຈາກພາກວິຊາປະຫວັດສາດ ແລະ ບູຮານວິທະຍາ ເຂົ້າຮ່ວມ.

ໃນກອງປະຊຸມ ໄດ້ຮັບຟັງການສັງຮວມຄືນແຜນການຈັດຕັ້ງປະຕິບັດຜົນການສໍາຫຼວດພາກສະໜາມກ່ຽວກັບວຽກຫັດຖະກຳໃນປີ 2022 ແລະການລາຍງານຜົນສໍາເລັດການສໍຳຫຼວດປີ 2022-2023 ເຊິ່ງຜົນການສໍາຫຼວດແມ່ນໄດ້ສໍາເລັດການສຳຫຼວດເກັບກໍາຂໍ້ມູນກ່ຽວກັບຫັດຖະກຳຈັກສານ ປະເພດກະພາ, ຊາງ, ປອງ, ຕຼໍ, ກະຕ່າ, ພາເຂົ້າ ແລະ ເຄື່ອງຈັກສານປະເພດອື່ນໆ ຢູ່ ດາກປະດູ່ໃໝ່ ເມືອງຊານໄຊ ແຂວງອັດຕະປື ໂດຍປະຊາຊົນມີພູມປັນຍາໃນການຈັກສານດ້ວຍການສືບທອດມາຈາກບັນພະບູລຸດ, ຊຶ່ງໃນຂົງເຂດບ້ານນີ້ສ່ວນໃຫຍ່ແມ່ນສານ ເພື່ອຮັບໃຊ້ເຂົ້າໃນຊີວິດປະຈຳວັນ ເຊັ່ນ ໃຊ້ເຂົ້າໃນການເກັບກາເຟ, ໃສ່ເຄື່ອງປູກຝັງ, ເປ້ຟືນ ເປັນຕົ້ນ. ພ້ອມນັ້ນ ຍັງໄດ້ສືບຕໍ່ການສໍາຫຼວດເກັບກໍາຂໍ້ມູນ ພູມປັນຍາໃນການຜະລິດຫັດຖະກໍາຈັກສານໄມ້ປ່ອງເປັນສິນຄ້າຢູ່ບ້ານໂພນຊອງ ເມືອງວຽງຄໍາ ແຂວງວຽງຈັນ ຊຶ່ງເປັນບ້ານໜຶ່ງທີ່ທາງເມືອງວຽງຄໍາ ໄດ້ປະກາດເອົາຫັດຖະກຳຈັກສານໄມ້ປ່ອງຢູ່ບ້ານນີ້ ເປັນສິນຄ້າ (ODOP) ຂອງເມືອງ. ຜ່ານການຄົ້ນຄວ້າ ໄດ້ຮັບຮູ້ວ່າຫັດຖະກໍາຈັກສານ ແມ່ນມີຄວາມສໍາຄັນຫຼາຍຕໍ່ການດໍາລົງຊີວິດຂອງປະຊົນລາວ ຊຶ່ງມັນເປັນພູມປັນຍາທີ່ຕິດພັນກັບວິຖີຊີວິດຂອງຊາວບ້ານທີ່ສືບທອດມາຈາກບັນພະບູລຸດ; ປັດຈຸບັນນີ້ ປະຊາຊົນ ໄດ້ມີການອະນຸຮັກການຈັກສານຮູບແບບ ແລະລວດລາຍແບບດັ້ງເດີມ ພ້ອມກັນນັ້ນກໍພັດທະນາການຜະລິດໃຫ້ເປັນສິນຄ້າ ເພື່ອສ້າງລາຍໄດ້ໃຫ້ແກ່ເສດຖະກິດຄອບຄົວ ແລະພັດທະນາຄຸນນະພາບຊີວິດໃຫ້ດີຂຶ້ນເທື່ອລະກ້າວ. ໃນກອງປະຊຸມຍັງໄດ້ມີການສາທິດ ວິທີການບັນທຶກກ່ຽວຂ້ອງເຄື່ອງຫັດຖະກຳຈາກໄມ້ປ່ອງຈາກຊ່ຽວຊານຍີ່ປຸ່ນ ເພື່ອໃຫ້ຄວາມຮູ້ແກ່ຜູ້ທີ່ເຂົ້າຮ່ວມກອງປະຊຸມ.

ໃນປີ 2024 ນີ້, ທາງທີມງານສໍາຫຼວດຈະໄດ້ກວດແກ້ຂຽນບົດລາຍງານການສໍາຫຼວດໃນປີ 2022-2023 ເພື່ອຈັດພິມບູຮານວິທະຍາ ເຫຼັ້ມ 3, ຮວບຮວມຂໍ້ມູນ ແລະຂຽນບົດລາຍງານ ຜົນການສໍາຫຼວດ 2024, ສືບຕໍ່ການຮ່ວມມືດ້ານວິຊາການ ແລະສໍາລັບແຜນການສຳຫຼວດໃນປີ 2024 ແມ່ນຈະເລີ່ມລົງສໍາຫຼວດໃນລະຫວ່າງວັນທີ 4 ຫາ 8 ມັງກອນ 2024 ຢູ່ທີ່ ເມືອງສິງ, ເມືອງລອງ ແລະເມືອງຫຼວງນໍ້າທາ ແຂວງຫຼວງນໍ້າທາ.

ພາບບັນຍາກາດ

ໃນຕອນບ່າຍວັນທີ 27 ທັນວາ 2023 ຜ່ານມານີ້, ສະຫະພັນແມ່ຍິງຮາກຖານ ຄະນະວິທະຍາສາດທໍາມະຊາດ(ຄວທ) ຈັດກອງປະຊຸມໃຫຍ່ຄັ້ງທີ VII  ຂຶ້ນທີ່ຫ້ອງປະຊຸມສະໂມສອນຊັ້ນ II. ໂດຍການເປັນປະທານຮ່ວມຂອງສະຫາຍ ຮສ. ປອ. ແຫຼມທອງ ລັດດາວົງ ເລຂາຄະນະພັກຮາກຖານ, ຄະນະບໍດີ ຄວທ, ສະຫາຍ ນາງ ໃບສີ ວາເນັງຈື ຄະນະບໍລິຫານງານສະຫະພັນແມ່ຍິງກະຊວງສຶກສາ ແລະກີລາ, ປະທານສະຫະພັນແມ່ຍິງະພັນແມ່ຍິງ ມຊ, ສະຫາຍ ນາງ ສົມມະນີ ລູຊະວົງ ປະທານສະຫະພັນແມ່ຍິງຮາກຖານ ຄວທ, ສະຫາຍ  ໄກສອນ ສົນທິກຸມມານ ປະທານກໍາມະບານຮາກຖານ ຄວທ ແລະສະຫາຍ ປອ. ແສງທອງ ບຸນຍາວົງ ເລຂາຊາວໜຸ່ມ ຮາກຖານ ຄວທ,  ມີບັນດາແຂກທີ່ຖືກເຊີນ, ບັນດາຄະນະບໍລິຫາງານແມ່ຍິງຮາກຖານ ຄວທ ແລະສະມາຊິກສະຫະພັນແມ່ຍິງ ພາກສ່ວນພະນັກງານ, ຄູ-ອາຈານ ແລະນັກສຶກສາຂອງ ຄວທ ເຂົ້າຮ່ວມ 80 ສະຫາຍ.

           ໃນພິທີ ນາງ ສົມມະນີ ລູຊະວົງ ປະທານສະຫະພັນແມ່ຍິງຮາກຖານ ຄວທ ໄດ້ຂຶ້ນຜ່ານບົດລາຍງານການເຄື່ຶອນໄຫວໄລຍະ 5 ປີ (2019-2023 ) ຜ່ານມາ ແລະສະເໜີທິດທາງແຜນການໄລຍະ 5 ປີ ໃນຕໍ່ໜ້າ (2024-2029) ຂອງ ສະຫະພັນແມ່ຍິງ ຄວທ ໃນການຈັດຕັ້ງປະຕິບັດວຽກງານຕໍ່ທີ່ປະຊຸມ; ເຊິ່ງສະຫາຍໄດ້ຍົກໃຫ້ເຫັນຜົນງານອັນພົ້ນເດັ່ນຫຼາຍດ້ານເຊັ່ນ ວຽກງານການສຶກສາອົບຮົມການເມືອງແນວຄິດ ຄະນະບໍລິຫານງານຮາກຖານ ຄວທ, ຫົວໜ້າໜ່ວຍ, ຫົວໜ້າຈຸ ກໍໄດ້ເປັນເຈົ້າການ, ເປັນແບບຢາງ ແລະລົງໃກ້ຊິດຕິດແທດ ໃນຂອບເຂດທີ່ຕົນຮັບຜິດຊອບ, ເພື່ອສຶກສາອົບຮົມແນວຄິດສະມາຊິກໃຫ້ມີແນວຄິດອຸ່ນອ່ຽງທຸ່ນທ່ຽງ  ແລະມີຄວາມເຊື່ອໜັ້ນຕໍ່ການນໍາພາຂອງພັກ ແລະລັດ ພ້ອມທັງໄດ້ນໍາພາສະມາຊິກເຂົ້າຮ່ວມຮັບຟັງການເຜີຍແຜ່ ເອກະສານສໍຳຄັນຕ່າງໆເຊັ່ນເຊື່ອມຊຶມມະຕິຄໍາສັ່ງ, ລະບຽບກົດໝາຍ, ນິຕິກໍາຕ່າງໆ ແລະວັນສຳຄັນຕ່າງໆ ຕາມແຈ້ງການຂອງຄະນະພັກຮາກຖານ ຄວທ. ວຽກງານການປັບປຸງການຈັດຕັ້ງ, ວຽກຂະຫຍາຍສະຫະພັນແມ່ຍິງ ແລະບໍາລຸງສ້າງພະນັກງານເພດຍິງ ໄດ້ແຕ່ງຕັ້ງຫົວໜ້າໜ່ວຍ 6 ຄັ້ງ ຈໍານວນ 12 ສະຫາຍ, ແຕ່ງຕັ້ງ ຮອງໜ່ວຍ 11 ຄັ້ງ ຈໍວນວນ 18 ສະຫາຍ, ໄດ້ຍົກຍ້າຍແມ່ຍິງທີ່ເປັນນັກສຶກສາໄປເຄື່ອນໄຫວຢູ່ກົມກອງອື່ານ ຈໍານວນ 794 ສະຫາຍ. ຍົກຍ້າຍໄປຍົກລະດັບຢູ່ຕ່າງປະເທດ 5 ສະຫາຍ. ນອກຈາກນັ້ນຍັງມີວຽກງານດ້ານອື່ນໆອີກເຊັ່ນ ວຽກງານນະໂຍບາຍ, ປົກປ້ອງສິດຜົນປະໂຫຍດຂອງແມ່ຍິງ ແລະເດັກນ້ອຍ, ວຽກງານຂະບວນການແຂ່ງຂັນ 3 ດີ, ວຽກງານປຸກລະດົມຂະບວນການແມ່ຍິງປະກອບສ່ວນໃນການຈັດຕັ້ງປະຕິບັດແຜນພັດທະນາແມ່ຍິງ ແລະໜ້າທີ່ວິຊາສະເພາະ, ວຽກງານປ້ອງກັນຊາດປ້ອງກັນຄວາມສະຫງົບ, ວຽກງານຫາລາຍໄດ້ເພິ່ມໃຫ້ແກ່ຄອບຄົວ, ການຮັກສາສຸຂະພາບ, ວຽກງານວັດທະນະທຳ, ການເຄື່ອນໄຫວສິລະປະ-ກີລາ, ການຍ້ອງຍໍ ແລະອອກແຮງງານຕ່າງໆ, ວຽກງານສ້າງຄັງ ແລະວຽກງານກວດກາ.

          ຈາກຜົນງານດັ່ງກ່າວມີສະມາຊິກສະຫະພັນແມ່ຍິງ ຄວທ ຄັດເລືອກໄດ້ບຸກຄົນ 3 ດີ ໃນໄລຍະທ້າຍສະໄໝ V (2016-2020) ໄດ້ຮັບໃບຍ້ອງຍໍທີ່ມີຜົນງານດີເດັ່ນ ປະເພດ 1 ຈໍານວນ 83 ສະຫາຍ, ຍິງ 35 ສະຫາຍ, ປະເພດ 2 ຈໍານວນ 235 ສະຫາຍ, ຍິງ 94 ສະຫາຍ, ປະເພດ 3 ຈໍານວນ 153 ສະຫາຍ, ຍິງ 66 ສະຫາຍ. ໄດ້ຮັບການຍ້ອງຍໍພໍ່ຕົວແບບ 3 ດີ ຈໍານວນ 2 ສະຫາຍ, ແມ່ຕົວແບບ 2 ສະຫາຍ ແລະລູກຕົວແບບ 2 ສະຫາຍ. ນອກຈາກນັ້ນ ໃນປີ 2021 ບຸກຄົນດີເດັ່ນ 3 ດີ ຂັ້ນສະຫະພັນແມ່ຍິງກະຊວງສຶກສາທິການ ແລະກີລາ ຈໍານວນ 38 ສະຫາຍ, ຂັ້ນສະຫະພັນແມ່ຍິງມະຫາວິທະຍາໄລແຫ່ງຊາດ ຈໍານວນ 7 ສະຫາຍ. ປີ 2022 ບຸກຄົນດີເດັ່ນ 3 ດີ ຂັ້ນຂັ້ນສະຫະພັນແມ່ຍິງກະຊວງສຶກສາທິການ ແລະກີລາ ຈໍານວນ 36 ສະຫາຍ, , ຂັ້ນສະຫະພັນແມ່ຍິງມະຫາວິທະຍາໄລແຫ່ງຊາດ ຈໍານວນ 8 ສະຫາຍ.

            ຈາກນັ້ນ ໃນພິທີຍັງໄດ້ມີການປ່ອນບັດ ຄັດເລືອກເອົາ ຄະນະບໍລິຫານງານສະຫະພັນແມ່ຍິງຮາກຖານ ຄະນະວິທະຍາສາດທຳມະຊາດ ມຊ ຊຸດໃໝ່; ມີຜູ້ສະໝັກທັງໝົດ 7 ສະຫາຍ ຄັດເລືອກເອົາ 5 ສະຫາຍ ຜ່ານການຄັດເລືອກໃນທີ່ປະຊຸມ ໄດ້ເລືອກ ສະຫາຍ ນາງ ອິນນາວັນ ນາມຄາລັກ ເປັນປະທານ, ສະຫາຍ ປອ. ນາງ ສົມພູທອນ ພົມມະຈັກ ເປັນຮອງ, ສະຫາຍ ປອ. ນາງ ກິ່ງສະດິງທອງຄໍາ ວົງເດັດ ເປັນປະທານກວດກາ, ສະຫາຍ ນາງ ພິດສະໄໝ ມຸນລະດົກ ແລະສະຫາຍ ນາງ ອໍລະດີ ຄໍາມະນີວົງ ເປັນຄະນະ.

         ໃນຕອນທ້າຍ ພິທີໄດ້ຮັບຟັງການ ໂອ້ລົມ ຂອງສະຫາຍ ຮສ.ປອ ແຫຼມທອງ ລັດດາວົງ  ແລະສະຫາຍ ນາງ ໃບສີ ວາເນັງຈື ເຊິ່ງ ທັງສອງສະຫາຍ ໄດ້ກ່າວສະແດງການຍ້ອງຍໍຊົມເຊີຍ ຕໍ່ການຊີ້ນໍານໍາພາຂອງຄະນະບໍລິຫານງານສະຫະພັນແມ່ຍິງຮາກຖານ ຄວທ ທີ່ໄດ້ນໍາພາສະມາຊິກແມ່ຍິງປະຕິບັດໜ້າທີ່ການເມືອງຂອງຕົນ ຍາດໄດ້ຜົນສໍາເລັດໃນຫຼາຍດ້ານ, ເຊິ່ງສອງສະຫາຍຕ່າງກໍໄດ້ຮຽກຮ້ອງໃຫ້ຄະນະບໍລິຫານງານແມ່ຍິງຮາກຖານ ຊຸດໃໝ່ ສືບຕໍ່ປະຕິບັດໜ້າທີ່ການເມືອງທີ່ໄດ້ຮັບມອບໝາຍ ໃຫ້ດີຂຶ້ນເປັນກ້າວໆ. ໃຫ້ປະສົບຜົນສໍາເລັດເປັນຕົ້ນດ້ານແບບແຜນວິທີການນໍາພາ, ວິທີການເຮັດວຽກ, ວຽກງານພາຍໃນໝູ່ຄະນະໃຫ້ຈະແຈ້ງ ແລະສອດຄ່ອງກັບການສຶກສາຄົ້ນຄວ້າຮໍ່າຮຽນຕາມຄຳຂວັນຂອງສະຫະພັນແມ່ຍິງລາວ ແລະຂໍ້ແຂ່ງຂັນ 3 ດີ ຂອງສະຫະພັນແມ່ຍິງລາວ“ພົນລະເມືອງດີ, ພັດທະນາດີ ແລະສ້າງຄອບຄົວດີ”.

ພາບບັນຍາກາດ