ໃນຕອນເຊົ້າ ວັນທີ 6 ຕຸລາ 2023 ຄະນະສຶກສາສາດ (ຄສສ) ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີສະຫຼຸບຊຸດຮຽນ 2019-2023, ເປີດສົກຮຽນໃໝ່ 2023-2024 ແລະສະເຫຼີມ-ສະຫຼອງວັນຄູແຫ່ງຊາດ 7 ຕຸລາ ຂຶ້ນທີ່ສະໂມສອນໃຫຍ່ ມຊ. ໂດຍການເປັນປະທານຂອງທ່ານ ຮສ. ປອ. ສີຖານ ສຸຂະວົງ ຄະນະບໍດີ ຄສສ, ມີບັນດາທ່ານຮອງຄະນະບໍດີ, ມີບັນດາທ່ານແຂກທີ່ຖືກເຊີນ, ບັນດາພະນັກງານ, ຄູ-ອາຈານ ແລະນັກສຶກສາເຂົ້າຮ່ວມຢ່າງພ້ອມພຽງ.

          ໃນໂອກາດນີ້, ທ່ານ ຮສ.ປອ. ຄໍາແສງ ທະລັງສີ ຮອງຄະນະບໍດີ ຄສສ ໄດ້ຂຶ້ນຜ່ານບົດສະຫຼຸບ ການຈັດຕັ້ງປະຕິບັດການສຶກສາລະດັບປະລິນຍາຕີ ຊຸດສຶກສາ 2019-2023  ແລະປະລິນຍາໂທ ຊຸດສຶກສາ 2021-2023  ເຊິ່ງທ່ານໃຫ້ຮູ້ວ່າ: ຄະນະສຶກສາສາດ ປະກອບມີ 6 ພາກວິຊາ, 6 ພະແນກ ແລະ 3ໂຮງຮຽນສາທິດ. ໄດ້ຈັດການຮຽນ-ການສອນແຕ່ລະດັບສາມັນສຶກສາ (ອະນຸບານ ຮອດມັດທະຍົມ ປີທີ 7) ແລະວິຊາຊີບ (ລະດັບປະລິນຍາຕີ ຮອດປະລິນຍາເອກ). ມີພະນັກງານ, ຄູ-ອາຈານ ທັງໝົດ 208 ທ່ານ, ຍິງ 140 ທ່ານ. ມີນັກສຶກສາ ໃນສົກສຶກສາ 2022-2023 ລວມທັງໝົດ ຈໍານວນ 3.919 ຄົນ, ຍິງ 2.165 ຄົນ ໃນນັ້ນ ມີນັກສຶກສາປະລິນຍາເອກ 7 ຄົນ, ຍິງ 5 ຄົນ, ນັກສຶກສາ ປະລິນຍາໂທ 94 ຄົນ, ຍິງ 36 ຄົນ, ນັກສຶກສາປະລິນຍາຕີ 510 ຄົນ, ຍິງ 383 ຄົນ, ນັກຮຽນໂຮງຮຽນມັດທະຍົມສຶກສາສົມບູນ ສາທິດ ຈໍານວນ 2.030 ຄົນ, ຍິງ 1.093 ຄົນ, ນັກຮຽນ ປະຖົມສຶກສາສົມບູນ ສາທິດ ຈໍານວນ 862 ຄົນ, ຍິງ 444 ຄົນ ແລະນັກຮຽນເຮືອນລ້ຽງເດັກ ແລະອານຸບານ ສາທິດ ຈໍານວນ 416 ຄົນ, ຍິງ 235 ຄົນ.

          ສໍາລັບນັກສຶກສາທີ່ຈົບໃນສົກສຶກສານີ້ ມີຈໍານວນທັງໝົດ 260 ຄົນ ຍິງ 178 ຄົນ ໃນນັ້ນ ມີນັກສຶກສາລະດັບປະລິນຍາໂທ ຈໍານວນ 43 ຄົນ, ຍິງ 21 ຄົນ, ນັກສຶກສາລະດັບປະລິນຍາຕີ ຈໍານວນ 217 ຄົນ, ຍິງ 157 ຄົນ. ໃນນັ້ນ ນັກສຶກສາລະດັບປະລິນຍາຕີໄດ້ຮັບກຽດນິຍົມ ຈໍານວນ 11 ຄົນ, ຍິງ 8 ຄົນ.

          ໃນວາລະດຽວກັນ ໄດ້ມີພິທີສະເຫຼີມ-ສະຫຼອງວັນຄູແຫ່ງຊາດ ວັນທີ 7 ຕຸລາ ຄົບຮອບ 29 ປີ ( 7 ຕຸລາ 1994 - 7 ຕຸລາ 2023) ເຊິ່ງຜູ້ເຂົ້າຮ່ວມແມ່ນໄດ້ຮັບຟັງປະຫວັດວັນຄູແຫ່ງຊາດ ແລະບົດກອນອວຍພອນວັນຄູຈາກຕ່າງໜ້ານັກສຶກສາທີ່ຂຶ້ນມາອວຍພອນວັນຄູເນື່ອງໃນໂອກາດວັນຄູແຫ່ງຊາດ ຄົບຮອບ 29 ປີອີກດ້ວຍ.

ພາບບັນຍາກາດ

ການແຂ່ງຂັນນໍາສະເໜີແຜນພັດທະນາແບບຍືນຍົງສໍາລັບຊາວໜຸ່ມນັກສຶກສາອາຊຽນ, ເຊິ່ງມະຫາວິທະຍາໄລແຫ່ງຊາດ ຈັດຮ່ວມກັບ ອົງກອນເຄືອຂ່າຍຊາວໜຸ່ມໂອເອັດສ໌ຈີ (OSG Youth Alliance), ປະເທດສິງກະໂປ. ການແຂ່ງຂັນຈັດຂຶ້ນທີ່ ມະຫາວິທະຍາໄລແຫ່ງຊາດ ໃນວັນທີ 06 ຕຸລາ 2023 ໂດຍຄັດເລືອກເອົາ 3 ທີມ (15 ຄົນ) ເພື່ອເປັນຕົວແທນນັກສຶກສາລາວໄປເຂົ້າຮ່ວມ ການແຂ່ງຂັນລະດັບອາຊຽນ (1st Annual ASEAN-China-India : ACI – Youth Leadership Summit 2023) ທີ່ ປະເທດສິງກະໂປ ໃນລະຫວ່າງວັນທີ 29 ຕຸລາ - 3 ພະຈິກ 2023; ຊຶ່ງທີມທີ່ໄດ້ຮັບການຄັດເລືອກໄດ້ແກ່: New Hope, Green World ແລະ CEIT-IoT

ໃນຕອນເຊົ້າ ວັນທີ 5 ຕຸລາ 2023 ຄະນະວິທະຍາສາດການກີລາ-ກາຍະກຳ (ຄວກ) ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີສະຫຼຸບຊຸດຮຽນ 2019-2023, ເປີດສົກຮຽນໃໝ່ 2023-2024 ແລະສະເຫຼີມ-ສະຫຼອງວັນຄູແຫ່ງຊາດ 7 ຕຸລາ ຂຶ້ນທີ່ຫ້ອງປະຊຸມ ສະໂມສອນຊັ້ນ II ມຊ, ໂດຍການເປັນປະທານຂອງທ່ານ ຮສ. ໂພສີ ທິບດາວັນ ຮອງອະທິການບໍດີ ມຊ, ມີທ່ານ ຮສ. ປອ. ອິນຕອງ ເລີດສິນໄຊ ຄະນະບໍດີ ຄະນະວິທະຍາສາດການກີລາ-ກາຍະກຳ, ມີບັນດາທ່ານຮອງຄະນະບໍດີ, ມີທ່ານແຂກທີ່ຖືກເຊີນ, ບັນດາພະນັກງານ, ຄູ-ອາຈານ ແລະນັກສຶກສາເຂົ້າຮ່ວມ.

          ໃນໂອກາດນີ້, ທ່ານ ປອ. ໃຈລາສີ ຍໍພັນໄຊ ຮອງຄະນະບໍດີ ຄວກ ໄດ້ຂຶ້ນຜ່ານບົດສະຫຼຸບຊຸດຮຽນ 2019-2023, ເຊິ່ງທ່ານໄດ້ໃຫ້ຮູ້ວ່າ: ຄະນະວິທະຍາສາດການກີລາ-ກາຍະກຳ ມີພະນັກງານ ຄູ-ອາຈານທັງໝົດ ຈໍານວນ 38 ຄົນ, ຍິງ 14 ຄົນ. ມີນັກສຶກສາທັງໝົດ 146 ຄົນ, ຍິງ 50 ຄົນ. ສໍຳລັບການຈັດຕັ້ງການຮຽນ-ການສອນໃນຊຸດຮຽນ 2019-2023 ປະກອບມີ 7 ສາຂາຄື ສາຂາພະລະສຶກສາ, ສາຂາຄູຝຶກບານເຕະ, ຄູຝຶກບານສົ່ງ, ຄູຝຶກແລ່ນ-ລານ, ບໍລິຫານການກີລາ, ວິທະຍາສາດການກີລາ ແລະຕໍ່ເນື່ອງປະລິນຍາຕີສາຂາຄູພະລະສຶກສາ.

          ນັກສຶກສາທີ່ສໍາເລັດໃນສົກສຶກສາ 2019-2023 ມີຈໍານວນ 82 ຄົນ, ຍິງ 25 ຄົນ ໃນນັ້ນມີນັກສຶກສາທີ່ໄດ້ກຽດນິຍົມ ຈໍານວນ 5 ຄົນ, ຍິງ 1 ຄົນ. ຜ່ານການຈັດຕັ້ງປະຕິບັດການສຶກສາຮໍ່າຮຽນ ແລະເຄື່ອນໄຫວກິດຈະກໍາຕ່າງໆຕະຫຼອດສົກສຶກສາຜ່ານມາ ມີນັກສຶກສາໄດ້ຮັບການຍ້ອງຍໍ ດີເດັ່ນຮອບດ້ານ ຈຳນວນ 39 ຄົນ, ຍິງ 14 ຄົນ; ດີເດັ່ນດ້ານການເຄື່ອນໄຫວກິດຈະກຳ ຈໍານວນ 45 ຄົນ, ຍິງ 11 ຄົນ.

            ໃນຕອນທ້າຍພິທີ ທ່ານ ຮສ. ໂພສີ ທິບດາວັນ ໄດ້ຂຶ້ນໂອລົມຕໍ່ ພິທີ ເຊິ່ງກ່ອນອື່ນ ທ່ານໄດ້ກ່າວຍ້ອງຍໍຊົມເຊີຍຕໍ່ຜົນງານຂອງນັກສຶກສາທີ່ນັກສຶກາສາ ແລະໄດ້ກ່າວຍ້ອງຍ້ອງຍໍຜົນງານທີ່ທາງຄະນະວິທະຍາສາດການກີລາ-ກາຍະກຳ ຍາດມາໄດ້ໃນຕະຫຼອດໄລຍະ 1 ປີຜ່ານມາ. ພ້ອມນັ້ນທ່ານກໍຍັງໄດ້ ກ່າວເນັ້ນບາງຕອນວ່າໃຫ້ຄູ-ອາຈານເອົາໃຈໃສ່ວຽກງານຄົ້ນຄວ້າຕື່ມອີກ ເພື່ອສ້າງໃຫ້ມີຜູ້ຊ່ຽວຊານໃນວົງການກີລາລາວ. ນອກນັ້ນທ່ານຍັງໄດ້ຮຽກຮ້ອງມາຍັງນັກສຶກສາຈົ່ງສືບຕໍ່ປະຕິບັດຕົນໃຫ້ເປັນຄົນດີ ເປັນຜູ້ທີ່ມີຄຸນທາດການເມືອງ ມີຄຸນສົມບັດສິນທໍາປະຕິບັດ ຄຽງຄູ່ກັບຄວາມຮູ້ຄວາມສາມາດທີ່ມີ ເພື່ອນໍາເອົາຄວາມຮູ້ທີ່ໄດ້ຮໍ່າຮຽນມາຕະຫຼອດ 4 ປີໃຫ້ສາມາດນໍາເອົາໄປປະກອບອາຊີບໄດ້ ບໍ່ວ່າຈະເປັນວຽກງານດ້ານກີລາ ຫຼື ດ້ານອື່ນໆກໍ່ໃຫ້ສາມາດຫາລາຍໄດ້ລ້ຽງຊີບ ແລະຄອບຄົວໃຫ້ມີຊິວິດທີ່ດີຂຶ້ນ.

ໃນວັນທີ 6 ຕຸລາ 2023 ນີ້, ຄະນະວິທະຍາສາດທຳມະຊາດ (ຄວທ) ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີເປີດຫຼັກສູດ ປະລິນຍາເອກ ສາຂາ ຟີຊິກສາດ ຂຶ້ນທີ່ຫ້ອງປະຊຸມຂອງ ຄະນະຕົນ ເຊິ່ງເປັນຫຼັກສູດທຳອິດ, ໂດຍການເຂົ້າຮ່ວມຂອງທ່ານ ຮສ. ໂພສີ ທິບດາວັນ ຮອງອະທິການບໍດີ ມຊ, ທ່ານ ຄຳແກ້ວ ຫານຊະນະ ຮອງຫົວໜ້າກົມການສຶກສາຊັ້ນສູງ ແລະທ່ານ ຮສ. ປອ. ແຫຼມທອງ ລັດດາວົງ ຄະນະບໍດີ ຄວທ, ມີຫົວໜ້າພາກວິຊາ, ພະນັກງານ, ຄູ-ອາຈານ ແລະນັກສຶກສາເຂົ້າຮ່ວມ.

   ໃນພິທີທ່ານ ຮສ. ປອ. ສູນທອນ ສິງສຸໂພ ຮອງຫົວໜ້າພາກວິຊາ ຟີຊິກສາດ ຄວທ. ໄດ້ຂຶ້ນນຳສະເໜີກ່ຽວກັບຫຼັກສູດ ລະດັບປະລິນຍາເອກ ສາຂາ ຟີຊິກສາດ ເປັນເຫຼັກສູດທຳອິດຂອງຄະນະ ຄວທ ຂຶ້ນກັບພາກວິຊາຟີຊິກສາດ ແລະພະແນກການສຶກສາຫຼັງປະລິນຍາຕີ ຄວທ; ການເປີດການຮຽນ-ການສອນ ຫຼັກສູດດັ່ງກ່າວ ກໍເພື່ອສ້າງນັກວິຊາການ ລະດັບປະລິນຍາເອກ ໃຫ້ມີຄວາມຮູ້-ຄວາມສາມາດ ຢ່າງເລິກເຊິ່ງທາງດ້ານຟີຊິກສາດ, ມີປະສົບການ ທີ່ສາມາດນຳໃຊ້ເຂົ້າໃນວຽກງານການຄົ້ນຄວ້າ, ເປັນຜູ້ໃຫ້ຄຳປຶກສາ ແລະ ພັດທະນາວິທະຍາສາດ, ມີຈັນຍາບັນ, ມີຄຸນສົມບັດສິນທຳປະຕິວັດ, ມີທັດສະນະມະຫາຊົນ ແລະ ມີທັດສະນະແຮງງານ. ເຊິ່ງຜູ້ທີ່ຮຽນຈົບຫຼັກສູດນີ້ ຍັງສາມາດ ສິດສອນ ແລະ ເຮັດການຄົ້ນຄວ້າ ຢູ່ຕາມສະຖາບັນການສຶກສາຊັ້ນສູງຕ່າງໆ ທັງພາຍໃນ ແລະ ຕ່າງປະເທດ; ສາມາດ ນຳໃຊ້ທິດສະດີ, ຫຼັກການທາງດ້ານຟີຊິກສາດ  ແລະ ເຄື່ອງມືຕ່າງໆທີ່ກ່ຽວຂ້ອງ ເຂົ້າໃນການແກ້ໄຂບັນຫາດ້ານທໍລະນີສາດ, ວັດສະດຸສາດ, ພະລັງງານທົດແທນ ແລະ ລັງສີນິວເຄລຍ; ປະດິດສ້າງເຄື່ອງມື, ອຸປະກອນ ແລະ ລະບົບຄວບຄຸມການຜະລິດ ເຂົ້າໃນການປະກອບອາຊີບທີ່ກ່ຽວຂ້ອງ; ໄລຍະເວລາຂອງການຮຽນ-ການສອນແມ່ນເລີ່ມແຕ່ປີ 2023-2026 (3 ປີ, ມີ 6 ພາກຮຽນ)ມີນັກສຶກສາທັງໝົດ 5 ທ່ານ ເຊິ່ງຈັດຕັ້ງການຮຽນ-ການສອນ ຮູບແບບ 2 (ແມ່ນຮູບແບບການສຶກສາທີ່ເນັ້ນໃສ່ການຮຽນພາກທິດສະດີ ແລະ ການຄົ້ນຄວ້າວິທະຍາສາດ) ສອນເປັນລະບົບໜ່ວຍກິດ ໃນແຜນການຮຽນ ຊຶ່ງລວມທັງໝົດມີ 57 ໜ່ວຍກິດ.  ສຳລັບອາຈານທີ່ຈະມາສິດສອນແມ່ນອາຈານຢູ່ພາຍໃນຄະນະ, ອາຈານຮັບເຊີນຈາກພາກສ່ວນຕ່າງໆທີ່ກ່ຽວຂ້ອງ ທັງພາຍໃນ ແລະຈາກປະເທດຫວຽດນາມ.

   ຕອນທ້າຍພີທີ ທ່ານ ນາງ ພູວັນ ສຸກສົມຫວັງ ຫົວຫນ້າພະແນກການສຶກສາຫລັງປະລິນຍາຕີ ຄວທ ໄດ້ຂຶ້ນຜ່ານຂໍ້ຕົກລົງສະບັບເລກທີ 526/ສສກ, ລົງວັນທີ 15 ກຸມພາ 2023 ວ່າດ້ວຍການຮອງຮັບອະນຸມັດນຳໃຊ້ຫຼັກສູດປະລິນຍາເອກ ວິທະຍາສາດ ສາຂາຟີຊິກສາດຂອງ ຄວທ.  ມຊ ໃຫ້ທີີ່ປະຊຸມຮັບຊາບອີກດ້ວຍ.

ພາບບັນຍາກາດ