ໃນຕອນບ່າຍ ວັນທີ 13 ທັນວາ 2023 ຜ່ານມານີ້, ຄະນະອັກສອນສາດ(ຄອສ) ມະຫາວິທະຍາໄລແຫ່ງຊາດ (ມຊ) ໄດ້ຈັດງານສະແດງສິລະປະ-ວັດທະນະທໍານານາຊາດ ຄັ້ງທີ I ພາຍໃຕ້ຄໍາຂວັນ “ຮ່ວມສ້າງສັນສາມັກຄີດ້ວຍພະລັງກາຍ-ໃຈ ຈາກຫຼາຍໃຫ້ກາຍເປັນໜຶ່ງ ຂອງນິສິດນັກສຶກສາລາວ ແລະຕ່າງປະເທດ”.   ຂຶ້ນທີ່ສະໂມສອນ ຄະນະເສດຖະສາດ ແລະບໍລິຫານທຸລະກິດ ມຊ. ໂດຍການເຂົ້າຮ່ວມຂອງ ທ່ານ ອຈ.ປທ. ທອງສຸກ ແກ້ວມະນີ ຄະນະບໍດີ ຄອສ, ທ່ານ ອຈ. ປທ. ນາງ ໄມພອນ ດວງພະສີ ຫົວໜ້າພາກວິຊາ ພາສາ-ວັດທະນະທໍາລາວ, ມີບັນດາທ່ານທູດ, ຫົວໜ້າໜ້າພາກວິຊາ, ພະນັກງານ, ຄູອາຈານ ພ້ອມດ້ວຍນັກສຶກສາລາວ ແລະນັກສຶກສາຕ່າງປະເທດເຂົ້າຮ່ວມຢ່າງພ້ອມພຽງ.

        ຈຸດປະສົງໃນການຈັດງານຄັ້ງນີ້, ແມ່ນເພື່ອສ້າງຄວາມສາມັກຄີຮັກແພງເຊິ່ງກັນ ແລະກັນລະຫວ່າງນັກສຶກສາລາວ ແລະນັກສຶກສາຕ່າງປະເທດທີ່ມາສຶກສາ ຢູ່ ມຊ ເວົ້າລວມ; ເວົ້າສະເພາະແມ່ນນັກສຶກສາຢູ່ໃນຄະນະອັກສອນສາດ ທັງເປັນການແລກປ່ຽນສິລະປະ-ວັດທະທໍາຮີດຄອງປະເພນີຂອງແຕ່ລະປະເທດອີກດ້ວຍ.

   ໃນງານຜູ້ເຂົ້າຮ່ວມໄດ້ຮັບຊົມກິດຈະກຳສິລະປະ-ວັນນະຄະດີຫຼາຍປະເພດຈາກນັກສຶກສາລາວ, ຈີນ, ຫວຽດນາມ, ກຳປູເຈຍ, ເກົາຫຼີ ແລະມຽນມາ ເປັນຕົ້ນແມ່ນໄດ້ຮັບຊົມການສະແດງເດີນແບບຊຸດບັນດາເຜົ່າ ແລະຊຸດນາໆຊາດ, ການສະແດງເປົ່າແຄນມົ້ງ,  ສະແດງດົນຕີພື້ນເມືອງລາວ, ຟ້ອນ “ປະທັນໃຈແມ່ນໍ້າລ້ານຊ້າງ-ແມ່ນໍ້າຂອງ”, ຮ້ອງເພງລື້ “ເມືອງລື້ຍິນດີຕ້ອນຮັບ”, ອ່ານກະວີ PIPAXING, ຮ້ອງເພງ WENBIE ການຈາກລາ, ຟ້ອນ MEILIZHONGGUO ປະເທດຈີນ ທີ່ມີຄວາມສວຍງາມ, ຮ້ອງເພງ ZUIMEIDEQIDAI ຈຸ້ຍເໝີຍເດິຈີ່ດ້າຍ(ຄວາມຄາດຫວັງທີ່ສວຍງາມທີ່ສຸດ), ຟ້ອນ XIANTINGXU (ຊຽນທິງຊູ້), ຮ້ອງເພງ ແລະການຟ້ອນ “HAIKUOTIANKONG” ກັບ “QINGPINGGUOLEYUAN”,  ຮ້ອງເພງ “BEIJINGHUANYINGNI ຍິນດີຕ້ອນຮັບສູ່ປັກກິ່ງ”, ຟ້ອນ “YESHANGHAI ກາງຄືນທີ່ຊຽງໄຮ້”, ຮ້ອງເພງ ສະບາຍດີປີໃໝ່ GONGXIFACAI , ຄໍາອວຍພອນປີໃຫມ່, ຮ້ອງເພງ: SHUIDIAOGETOU, Cò lả ນົກຍາງບິນເຈີດເຈີຍ, Một vòng việt nam ຈິດໃຈສະຫງ່າຜ່າເຜີຍຂອງຫວຽດນາມ, ຟ້ອນລະບໍາອວຍພອນ, ຄຸນລະບົກກະເຕົາ, ບົດຟ້ອນສາລະວັນ” ແລະການສະແດງແຫ່ເຂີຍ ສູ່ຂວັນລາວ ຟ້ອນລໍາວົງລາວ.

ພາບບັນຍາກາດ

ໃນວັນທີ 12 ທັນວາ 2023 ຜ່ານມາ, ຄະນະວິທະຍາສາດທຳມະຊາດ(ຄວທ) ມະຫາວິທະຍາໄລແຫ່ງຊາດ(ມຊ) ຮ່ວມກັບ ບໍລິສັດ ຊໍາຊຸງອີເລັກໂຕຣນິກ ໄດ້ຈັດພິທີມອບ-ຮັບ ໃບຢັ້ງຢືນການເຝິກອົບຮົມໃຫ້ຫຼັກສູດ Coding, Programming and Data Science (ຊຸດທີ 1) ທີ່ ຄວທ, ໂດຍການເປັນປະທານຂອງທ່ານ ສຈ. ປອ. ຮຸ່ງເພັດ ຈັນທະວົງ ຮອງອະທິການບໍດີ ມຊ, ທ່ານ ນາງ ວໍລະວັນ ຕັ້ງກົມສະຖາພອນ ຫົວໜ້າພະແນກມືຖື ຕາງໜ້າບໍລິສັດ ຊໍາຊຸງອີເລັກໂຕຣນິກ ສາຂາປະເທດໄທ ປະຈໍາ ສປປ ລາວ ແລະ ທ່ານ ຮສ. ປອ. ແຫຼມທອງ ລັດດາວົງ ຄະນະບໍດີ ຄວທ ພ້ອມດ້ວຍພະນັກງານ, ຄູ-ອາຈານ ແລະນັກສຶກສາ ເຂົ້າຮ່ວມ.

          ໃນພິທີ ທ່ານ ຮສ. ປອ. ແຫຼມທອງ ລັດດາວົງ ໄດ້ກ່າວໃນພິທີເຊິ່ງທ່ານໄດ້ໃຫ້ຮູ້ວ່າ: ຫຼັກສູດ Coding, Programming and Data Science (ຊຸດທີ 1) ຈັດຂຶ້ນພາຍໃຕ້ການຮ່ວມມືລະຫວ່າງ ຄວທ ແລະ ບໍລິສັດ ຊໍາຊຸງອີເລັກໂຕຣນິກ ເຊິ່ງໄດ້ມີການລົງນາມບົດບັນທຶກການຮ່ວມມືໃນ (MOA) ໃນວັນທີ 21 ມີນາ 2023 ທີ່ຜ່ານມາ ໂດຍມີການສ້າງສູນ SAMSUNG INNOVATION CAMPUS (SIC) ຂຶ້ນເພື່ອເປັນບ່ອນຮຽນຮູ້ດ້ານເຕັກໂນໂລຊີ ຂອງນັກສຶກສາ ມຊ ແລະຜູ້ທີ່ມີຄວາມສົນໃຈ ພ້ອມທັງເປັນການສະໜັບສະໜູນການເຝິກອົບຮົມໃຫ້ນັກສຶກສາ ແລະ ໄວໜຸ່ມລາວ ໃຫ້ມີຄວາມຮູ້, ພັດທະນາທັກສະ ແລະ ເຂົ້າໃຈເຖິງເທັກໂນໂລຊີ ພ້ອມທັງສາມາດນໍາໃຊ້ເທັກໂນໂລຊີເຂົ້າໃນຊີວິດຕົວຈິງໃຫ້ມີປະສິດທິພາບສູງຂຶ້ນ; ການຈັດຊຸດເຝິກອົບຮົມ Coding, Programming and Data Science (ຊຸດທີ 1) ແມ່ນ 1 ໃນກິດຈະກຳຂອງສູນເຊິ່ງໄດ້ເປີດຮັບສະໝັກຜູ້ທີ່ສົນໃຈເຂົ້າເຝິກອົບຮົມໃນຫຼັກສູດດັ່ງກ່າວຈຳນວນ 30 ຄົນ ຍິງ 07 ຄົນ (ໃນນີ້ເປັນນັກສຶກສາ ຄວທ ຈຳນວນ 17 ຄົນ) ມີບົດຮຽນທັງໝົດ 40 ບົດ ແບ່ງອອກເປັນ 3 ໂມດູນ (Coding, Programming and Data Science) ໃຊ້ເວລາຮຽນ 2 ວັນ/ອາທິດ ໃຊ້ເວລາທັງໝົດ 120 ຊົ່ວໂມງ (ໃນໄລຍະເວລາປະມານ 7 ເດືອນກວ່າ).

          ໃນໂອກາດນີ້, ທ່ານ ສຈ. ປອ. ຮຸ່ງເພັດ ຈັນທະວົງ ກໍໄດ້ມີຄຳເຫັນຕໍ່ພິທີ ວ່າ: ໂຄງການ ເຝິກອົບຮົມໄລຍະສັ້ນ “Coding, programing & Data Science’’ ນີ້ໄດ້ດຳເນີນພາຍໃຕ້ສັນຍາຮ່ວມມື ລະຫວ່າງ ຄວທ ກັບ ບໍລິສັດຊໍາຊຸງເອເລັກໂຕຼນິກ ປະຈໍາ ສປປ ລາວ. ໃນຕົ້ນປີ ກໍຄື ວັນທີ 21 ມີນາ 2023 ທີ່ຜ່ານມາ. ໂຄງການດັ່ງກ່າວນີ້ ເປັນກິດຈະກຳໜຶ່ງໃນແຜນພັດທະນາການສຶກສາ ຂອງ ມຊ ໃນການສ້າງຊັບພະຍາກອນມະນຸດ ໃຫ້ມີຄວາມເຂັ້ມແຂງດ້ານວິຊາການ ໂດຍສະເພາະມີຄວາມນຳໜ້າໃນດ້ານການນໍາໃຊ້ເຕັກໂນໂລຊີ ແລະ ສ້າງນະວັດຕະກຳ.          

         ການມອບ-ຮັບໃບຢັ້ງຢືນການເຝິກອົບຮົມໃນມຄັ້ງນີ້ ເປັນການສະແດງເຖິງໝາກຜົນຂອງໂຄງການຮ່ວມມືລະຫວ່າງ ມຊ ກັບ ບໍລິສັດຊໍາຊຸງເອເລັກໂຕຼນິກ ປະຈໍາ ສປປ ລາວ,  ເຊິ່ງມີນັກສຳມະນາກອນໄດ້ສຳເລັດການເຝິກອົບຮົມໄລຍະສັ້ນໃນຫົວຂໍ້ “Coding, programing & Data Science’’ ຈໍານວນ 26 ຄົນ. ຂ້າພະເຈົ້າຂໍສະແດງຄວາມຊົມເຊີຍ ແລະ ຂໍໃຫ້ນັກສຳມະນາກອນດັ່ງກ່າວນີ້ເປັນຜູ້ສືບທອດ, ນໍາເອົາບົດຮຽນຈາກການເຝິກອົບຮົມໄປນໍາໃຊ້ໃນວຽກງານຕົວຈິງ ເພື່ອພັດທະນາວຽກງານໃຫ້ມີຄວາມເຂັ້ມແຂງ, ທັນສະໄໝ, ມີມາດຕະຖານທຽບເທົ່າກັບພາກພື້ນ ແລະ ສາກົນ.

ພາບບັນຍາກາດ

ໃນລະຫວ່າງວັນທີ 5-6 ທັນວາ 2023 ຜ່ານມານີ້, ມະຫາວິທະຍາໄລສະຫວັນນະເຂດ(ມຂ), ມະຫາວິທະຍາໄລແຫ່ງຊາດ(ມຊ), ອົງການອ໋ອກຟາມ(OXFAM) ແລະອົງການສະຫະພາບເອີລົບ(EU) ໄດ້ຮ່ວມກັນຈັດງານສົ່ງເສີມ ການລົບລ້າງຄວາມຮຸນແຮງຕໍ່ແມ່ຍິງ ແລະເດັກນ້ອຍ ພາຍໃຕ້ຫົວຂໍ້ “ການຫຼຸດຜ່ອນຜົນກະທົບຂອງດິນຟ້າອາການທີ່ກໍໃຫ້ເກີດຄວາມຮຸນແຮງຕໍ່ແມ່ຍິງ ແລະເດັກນ້ອຍ” ຂຶ້ນທີ່ສະໂມສອນໃຫຍ່ຂອງມະຫາວິທະຍາໄລສະຫວັນນະເຂດ, ເມືອງໄກສອນພົມວິການ, ແຂວງສະຫວັນນະເຂດ ໂດຍການເປັນປະທານຮ່ວມຂອງ ທ່ານ ນາງ ຫຼິງທອງ ແສງຕາວັນ ຮອງເຈົ້າແຂວງ ແຂວງສະຫັວນະເຂດ, ທ່ານ ຮສ. ປອ. ຄູນ ສັກບົວວົງ ຮັກສາການ ອະທິການບໍດີ ມຂ, ທ່ານ ອີນາ ມາຈູລີໂອນີແຕ ເອກອັກຄະລັດຖະທູດ ອີຢູ ປະຈຳລາວ, ທ່ານ ນາງ ໃຈປະເສີດ ພັນພູວັນນະ ຜູ້ຈັດການແຜນງານ ສົ່ງເສີມບົດບາດຍີງ-ຊາຍ ແລະການມີສ່ວນຮ່ວມຂອງການອົງການ ອ໋ອກສະຟາມ ປະຈໍາ ສປປ ລາວ, ທ່ານ ປທ. ນາງ ວຽງສຸກ ແພງບຸບຜາ ຮອງຫົວໜ້າຫ້ອງການ ມຊ, ມີນັກວິທະຍາກອນຈາກກົມປົກປ້ອງແຮງງານ, ສູນກາງສະຫະພັນກຳມະບານລາວ ແລະຈາກ ມຊ, ເຂົ້າຮ່ວມມີບັນດາທ່ານຕາງໜ້າຈາກພະແນກສຶກສາແຂວງ, ຈາກຄະນະບໍລິຫານງານສາມອົງການຈັດຕັ້ງມະຫາຊົນຂອງເມືອງ, ຕາງໜ້າຈາກອົງການຕ່າງໆທີ່ກ່ຽວຂ້ອງ, ມີບັນດາທີມງານຈາກສູນເຝິກທັກສະ ນະຄອນຫຼວງວຽງຈັນ, ມີບັນດານັກສຶກສາຈາກ ມຂ ແລະນັກຮຽນຈາກ ມສ ອ້ອມຂ້າງ 500 ກວ່າຄົນເຂົ້າຮ່ວມ.

          ຈຸດປະສົງໃນການຈັດງານຄັ້ງນີ້ ແມ່ນເພື່ອເພີ່ມຄວາມເຂົ້າໃຈ ແລະໄດ້ແລກປ່ຽນບົດຮຽນກ່ຽວກັບ ການຕ້ານການໃຊ້ຄວາມຮຸນແຮງ ຕໍ່ແມ່ຍິງ ແລະເດັກນ້ອຍ ທີ່ຕິດພັນກັບການປ່ຽນແປງດິນຟ້າອາກາດ ທີ່ເປັນສາເຫດຂອງການເກີດຄວາມຮຸນແຮງ ໃຫ້ກັບບັນດານັກສືກສາ ແລະນັກຮຽນ ກວ່າ 500 ຄົນ.ໃຫ້ໄດ້ຮຽນຮູ້ ແລະເຂົ້າໃຈ ຫຼັກການ ເຄົາລົບ ແລະປົກປ້ອງສັງຄົມ ໃຫ້ມີຄວາມເຂັ້ມແຂງ ແລະນຳພາການປ່ຽນແປງ ພຶດຕິກຳຂອງຕົນ ເພື່ອຫຼຸດຜ່ອນຜົນກະທົບໃນການປ່ຽນແປງດິນຟ້າອາກາດ ແລະຄວາມບໍ່ຍຸດຕິທໍາທາງເພດໃນທຸກສະພາບການເປັນຕົ້ນ ເມື່ອເກີດວິກິດການດິນຟ້າອາກາດ ຫຼື ໄພພິບັດ ທີ່ເປັນປັດໃຈ ທີ່ກໍ່ໃຫ້ເກີດມີຄວາມຮຸນແຮງໃນສັງຄົມ.

ໃນພິທີທ່ານ ຮສ. ປອ. ຄູນ ສັກບົວວົງ ໄດ້ກ່າວເປີດພິທີເຊິ່ງທ່ານໄດ້ໃຫ້ຮູ້ວ່າ ການຈັດງານໃນຄັ້ງນີ້ ກໍເພື່ອເປັນການສະເຫຼີມສະຫຼອງວັນຢຸດຕິການໃຊ້ຄວາມຮຸນແຮງທີ່ມີຕໍ່ແມ່ຍິງ ແລະ ເດັກ (Ending Violence Against Women and Girls) EVAWG, ທັງເປັນການແລກປ່ຽນຄຳຄິດຄຳເຫັນ, ບົດຮຽນ ແລະປະສົບການກ່ຽວກັບການມີສ່ວນຮ່ວມໃນວຽກງານພັດທະນາ ແລະການເຂົ້າເຖິງການບໍລິການທາງສັງຄົມຂອງ ຍິງ-ຊາຍ, ຄົນພິການ ແລະກຸ່ມຄົນຫຼາກຫຼາຍທາງເພດ. ງານດັ່ງກ່າວນີ້ ເກີດຂຶ້ນໄດ້ກໍຍ້ອນມີການຮ່ວມມື ແລະ ການປະກອບສ່ວນຂອງຫຼາຍພາກສ່ວນ, ເປັນຕົ້ນແມ່ນຈາກ ສະຫະພາບເອີລົບປະຈໍາລາວ, ອົງການຈັດຕັ້ງທາງສັງຄົມ, ອົງການພັດທະນາສາກົນ, ຕາງໜ້າຈາກກົມກອງ, ພະນັກງານ, ຄູ-ອາຈານ ແລະນັກສຶກສາ ໃນທົ່ວມະຫາວິທະຍາໄລສະຫວັນະເຂດ ແລະ ເມືອງໄກສອນພົມວິຫານ. ທ່ານຍັງກ່າວຕື່ມວ່າ ງານໃນຄັ້ງນີ້ຈະສົ່ງຜົນປະໂຫຍດຢ່າງຫຼວງຫຼາຍຕໍ່ທຸກພາກສ່ວນໃນສັງຄົມ ໂດຍສະເພາະ ນັກຮຽນ-ນັກສຶກສາ ໃຫ້ມີຄວາມເຂົ້າໃຈຢ່າງຖ່ອງແທ້ ກ່ຽວກັບຄວາມສຳຄັນຕໍ່ກັບການຕ້ານ ແລະ ລົບລ້າງຄວາມຮຸນແຮງຕໍ່ແມ່ຍິງ ແລະ ເດັກນ້ອຍ ແລະ ບົດບາດ ຍິງ-ຊາຍ, ບົດບາດຂອງກຸ່ມຄົນຕ່າງໆໃນສັງຄົມ, ຄວາມເທົ່າທຽມກັນ ແລະ ບົດບາດຂອງການມີສ່ວນຮ່ວມນຳກັນ ຕໍ່ກັບການພັດທະນາປະເທດຊາດ ພັດທະນາສັງຄົມ.

ໃນງານຍັງໄດ້ຮັບຟັງການບັນຍາຍໃນຫົວຂໍ້ຕ່າງໆເຊັ່ນ “ຜົນກະທົບການປ່ຽນແປງຂອງດິນຟ້າອາກາດກ່ຽວກັບແມ່ຍິງ ແລະເດັກນ້ອຍ”, ຄວາມໝາຍທົ່ວໄປຂອງ GBV ແລະນະໂຍບາຍການຕ້ານການໃຊ້ຄວາມຮຸນແຮງຕໍ່ແມ່ຍິງ ແລະເດັກນ້ອຍ”, “ຄວາມຮຸນແຮງໃນສະຖານທີ່ເຮັດວຽກ ແລະການແກ້ໄຂຂໍ້ຂັດແຍ່ງ”, “ການເຮັດວຽກການດູແລທີ່ບໍ່ໄດ້ຮັບຄ່າຈ້າງ” ຮັບຟັງການສົນທະນາເປັນຄະນະກ່ຽວກັບ “ການຢຸດຕິຄວາມຮູນແຮງຍຸກ 4.0”, ຮັບຊົມການແຂ່ງຂັນໂຕ້ວາທີ ໃນຫົວຂໍ້ຕ່າງໆເຊັ່ນ “ການປ່ຽນແປງດິນຟ້າອາກາດທີ່ມີຜົນກະທົບຕໍ່ແມ່ຍິງ ແລະ ເດັກນ້ອຍ”, “ນະໂຍບາຍການປົກປ້ອງແມ່ຍິງໃນຄວາມບໍ່ເປັນທຳທາງເພດ ແລະການໄດ້ຮັບຜົນປະໂຫຍດຢ່າງເຕັມສ່ວນ”, ຮັບຊົມການສະແດງລະຄອນເທິງເວທີຂອງໄວໜຸ່ມໃນເລື່ອງ “ຟ້າຫຼັງຝົນ”, ການຮ້ອງເພງ, ການຟ້ອນ-ການເຕັ້ນ, ຮັບຊົມວີດີໂອຕ່າງໆກ່ຽວກັບການລົບລ້າງຄວາມຮຸນແຮງຕໍ່ແມ່ຍິງ ແລະເດັກຍິງ ທີ່ໄດ້ຮັບລາງວັນຈາກການປະກວດໃນງານຄັ້ງນີ້ ແລະໄດ້ຢ້ຽມຊົມບູດວາງສະແດງ ແລະໃຫ້ຄໍາປຶກສາແກ່ແມ່ຍິງ ແລະຜູ້ໄດ້ຮັບຄວາມຮຸນແຮງຈາກພາກສ່ວນຕ່າງໆ.

ນອກຈາກນັ້ນ, ໃນງານຍັງມີກິດຈະກຳຕ່າງໆ ເພື່ອສົ່ງເສີມຄວາມເຂົ້າໃຈກ່ຽວກັບການຢຸດຕິການໃຊ້ຄວາມຮຸນແຮງຕໍ່ແມ່ຍິງ ແລະເດັກນ້ອຍ ເຊັ່ນ ການແຕ້ມຮູບເພື່ອສື່ເຖິງການຢຸດໃຊ້ຄວາມຮຸນແຮງ, ການຫຼິ້ນເກມກາຮູດ ແລະມີກິດຈະກຳຖາມ-ຕອບຕະຫຼອດງານ ເພື່ອແຈກຂອງລາງວັນຕ່າງໆຢ່າງຫຼວງຫຼາຍ, ເຊິ່ງງານດັ່ງກ່າວແມ່ນໄດ້ດຳເນີນໄປຢ່າງຄຶກຄືນ ແລະມ່ວນຊື່ນຕະຫຼອດການດຳເນີນງານ.

ພາບບັນຍາກາດ

ໃນຕອນເຊົ້າວັນທີ 1 ທັນວາ 2023 ຜ່ານມານີ້, ຄະນະຊາວໜຸ່ມ ປະຊາຊົນ ປະຕິວັດລາວ ຄະນະສຶກສາສາດ(ຄສສ) ມະຫາວິທະຍາໄລແຫ່ຊາດ(ມຊ) ໄດ້ຈັດກອງປະຊຸມໃຫຍ່ຄັ້ງທີ VI ຂຶ້ນທີ່ຫ້ອງປະຊຸມສະໂມສອນຊັ້ນ II. ໂດຍການເປັນປະທານຮ່ວມຂອງ ສະຫາຍ ນາງ ເພັດສະໝອນ ແກ້ວໂສພາ ຄະ​ນະ​​ປະ​ຈຳ​ຊາວ​ໜຸ່ມ ກະ​ຊວງ​ສຶກ​ສາ​ທິ​ການ ແລະ ກີ​ລາ, ຮອງເລ​ຂາຄະ​ນະ​ບໍ​ລິ​ຫານ​ງານ​ຊາວ​ໜຸ່ມ​ ມຊ, ສະ​ຫາຍ ອະນຸໄທ ສຸວັນດວນ  ຄະ​ນະ​ພັກ​ຮາກ​ຖານ ຄະ​ນະ​ສຶກ​ສາ​ສາດ ຜູ້​ຊີ້​ນຳ​ວຽກ​ງານ ​ສາມອົງ​ການ​ຈັດ​ຕັ້ງ​ມະ​ຫາ​ຊົນ ຄະ​ນະ​ສຶກ​ສາ​ສາດ, ມີປະທານສະຫະພັນແມ່ຍິງ, ປະທານສະຫະພັນກຳມະບານ, ມີຕາງໜ້າຈາກຄະນະໜ່ວຍຊາວໜຸ່ມທີ່ຂຶ້ນກັບຮາກຖານອ້ອມຂ້າງ ຄສສ, ພ້ອມດ້ວຍບັນດາສະມາຊິກຊາວໜຸ່ມທີ່ເປັນພະນັກງານ, ຄູ-ອາຈານ ແລະນັກສຶກສາເຂົ້າຮ່ວມທັງໝົດ ຈໍານວນ 151 ສະ​ຫາຍ, ຍິງ 118 ສະ​ຫາຍ.

 ສະຫາຍ ບຸນຖ້າຍ ຄັດທະວົງ ໄດ້ຂຶ້ນຜ່ານບົດລາຍງານການເຄື່ອນໄຫວໃນໄລຍະ 5 ປີ (2019- 2023)ຜ່ານມາ ແລະສະເໜີທິດທາງແຜນການ 5 ປີ (2023-2028) ໃນການຈັດຕັ້ງເຄື່ອນໄຫວວຽກງານຊາວໜຸ່ມ ຂອງ ຄສສ ຕໍ່ທີ່ປະຊຸມ; ເຊິ່ງສະຫາຍໄດ້ຍົກໃຫ້ເຫັນຜົນງານອັນພົ້ນເດັ່ນຫຼາຍດ້ານເຊັ່ນ: ວຽກ​ງານ​ສຶກ​ສາ​ອົບ​ຮົມ​ແນວ​ຄິດ, ວຽກ​ງານ​ການ​ປັບ​ປຸງ-ກໍ່​ສ້າງ​ການ​ຈັດ​ຕັ້ງ​ຊາວ​ໜຸ່ມ-ເຍົ​າ​ວະ​ຊົນ, ວຽກ​ງານ​ຂະ​ບວນ​ການ ແລະກິດ​ຈ​ະ​ກຳ, ວຽກ​ງານກວດ​ກາ, ວຽກ​ງານ​ລະ​ບຽບ​ວິ​ໄນ, ການ​ຍ້ອງ​ຍໍ​ບຸກ​ຄົນ​ດີ​ເດັ່ນ, ວຽກ​ງານ​ຂະ​ຫຍາຍ​ສະ​ມາ​ຊິກ​ຊາວ​ໜຸ່ມ ແລະເຍົາ​ວະ​ຊົນ, ວຽກ​ງານ​ການ​ເງິນ ແລະວຽກງານອືື່ນໆ, ຈາກຜົນງານດັ່ງກ່າວ ສະມາຊິກຊາວໜຸ່ມ ຄສສ ໄດ້ຮັບໃນຍ້ອງຍໍຂັ້ນ ມຊ  ຈໍານວນ 104 ສະຫາຍ, ຍິງ 72 ສະຫາຍ. ເປັນ​ກຽດ​ມອບ​ໂດຍ ສະຫາຍ ນາງ ເພັດສະໝອນ ແກ້ວໂສພາ.

ຈາກນັ້ນ ໃນພິທີ ໄດ້ມີການປ່ອນບັດ ຄັດເລືອກເອົາ  ຄຊປປລ ຄະນະສຶກສາສາດ ມຊ ຊຸດໃໝ່; ມີຜູ້ສະໝັກທັງໝົດ 11 ສະຫາຍ, ຄັດເລືອກເອົາ 7 ສະຫາຍ; ຜ່ານການຄັດເລືອກໃນທີ່ປະຊຸມ ໄດ້ເລືອກ  ສະ​ຫາຍ ບຸນຖ້າຍ ຄັດທະວົງ ເປັນເລຂາ, ສະ​ຫາຍ ສາຍຄໍາ ພົມມະທັດ ເປັນຮອງເລຂາ ແລະປະທານກວດກາ, ສະຫາຍ ນາງ ນາລີ ແພງບຸບຜາ  ເປັນ​ຮອງເລ​ຂາ, ສະ​ຫາຍ ສິງຄໍາ ເພັດສຸພັນ, ສະຫາຍ ນາງ ຈິດປະເສີດ ຜາພູເງິນ, ສະຫາຍ ໄພວອນ ນັນທະວົງ ແລະສະຫາຍ ປູນນາ ເພັດວັນສອນ ເປັນ​ຄະ​ນະ.

ໃນຕອນທ້າຍທີ່ປະຊຸມ ໄດ້ຮັບຟັງການໂອ້ລົມຈາກ ສະຫາຍ ນາງ ເພັດສະໝອນ ແກ້ວໂສພາ ຄະນະບໍລິຫານງານຊາວໜຸ່ມ ກະຊວງສຶກສາທິການ ແລະກີລາ, ຮອງເລຂາຄະນະບໍລິຫານງານຊາວໜຸ່ມ ມຊ, ສະ​ຫາຍ ອະນຸໄທ ສຸວັນດວນ ຄະ​ນະ​ພັກ​ຮາກ​ຖານ​ ຄສສ, ຜູ້​ຊີ້​ນຳ​ວຽກ​ງານ​ສາມ​ອົງ​ການ​ຈັດ​ຕັ້ງ​ມະ​ຫາ​ຊົນ; ເຊິ່ງທັງ​ສອງ​ສະ​ຫາຍໄດ້ສະແດງຄວາມຍ້ອງຍໍຊົມເຊີຍຕໍ່ການຊີ້ນຳ-ນຳພາຂອງຄະນະບໍລິຫານງານຊາວໜຸ່ມຮາກຖານ ຄສສ ຊຸດເກົ່າທີ່ໄດ້ຊີ້ນຳ-ນຳພາພະນັກງານ, ສະມາຊິກຊາວໜຸ່ມ, ພະນັກງານ, ຄູ-ອາຈານ ແລະຊາວໜຸ່ມນັກສຶກສາ ປະຕິບັດໜ້າທີ່ການເມືອງຂອງຕົນ ຈົນຍາດໄດ້ຜົນສຳເລັດຫຼາຍດ້ານ, ພ້ອມດຽວກັນ, ສະຫາຍຍັງໄດ້ສະແດງຄວາມເປັນຫ່ວງເປັນໃຍຕໍ່ດ້ານອ່ອນ, ຂໍ້ຄົງຄ້າງເຊິ່ງໄດ້ຮຽກຮ້ອງໃຫ້ຄະນະຊາວໜຸ່ມຊຸດໃໝ່ ຕ້ອງສືບຕໍ່ປັບປຸງ, ແກ້ໄຂ, ເນັ້​ນ​ໜັກ​ໃສ່​ວຽກ​ງານ 4 ບຸກ​ຂອງ​ຊາວ​ໜຸ່ມ ແລະເຮັດ​ແນວ​ໃດ​ເພື່ອ​ໃຫ້​ສະ​ມາ​ຊິກ​ຊາວ​ໜຸ່ມ ກາຍ​ເປັນ​ແບບ​ຢ່າງ​ທີ່​ດີ, ເປັນ​ຜູ້​ສືບ​ທອດ​ຂອງ​ພັກ ພ້ອ​ມ​ທັງ​ເປັນ​ເຈົ້າ​ການ​ໃນ​ການ​ຕ້ານ ແລະສະ​ກັດ​ກັ້ນ ​ປະ​ກົດ​ການ​ຫຍໍ້ທໍ້ ​ທຸກ​ຮູບ​ແບບ​ທີ່​ຈະ​ເກີດ​ຂຶ້ນ, ເພີ່ມ​ທະ​ວີ​ຮັດ​ແໜ້ນ​ສາຍ​ພົວ​ພັນ​ສາ​ມັກ​ຄີ​ພາຍ​ໃນ ແລະພາຍນອກ​ໃຫ້ຫຼາ​ຍ​ຂຶ້ນ.

ພາບບັນຍາກາດ