ເພື່ອເຮັດໃຫ້ພະນັກງານຫຼັກແຫຼ່ງ ຜູ້ເຮັດວຽກງານກວດກາ ຂັ້ນຮາກຖານ, ຂັ້ນໜ່ວຍ ຂອງມະຫາວິທະຍາໄລແຫ່ຊາດ(ມຊ) ໄດ້ຮັບຮູ້ ແລະເຂົ້າໃຈແຈ້ງກ່ຽວກັບ ໜ້າທີ, ພາລະບົດບາດ ແລະຂອບເຂດວຽກງານກວດກາ ໃນ ມຊ; ໃນຕອນເຊົ້າ ຂອງວັນທີ 28 ທັນວາ 2023 ນີ້, ມຊ  ໄດ້ຈັດເຝິກອົບຮົມວຽກງານກວດກາໃຫ້ແກ່ບັນດາພະນັກງານຜູ້ເຮັດວຽກກວດກາ ໃນ ມຊ ຂຶ້ນທີ່ ຫ້ອງປະຊຸມສະໂມສອນຊັ້ນ 2 ມຊ; ໂດຍການໃຫ້ເປັນປະທານກ່າວເປີດພິທີ ຂອງສະຫາຍ ຮສ.ປອ. ອຸດົມ ພອນຄໍາເພັງ ຄະນະປະຈໍາພັກ ກະຊວງສຶກສາທິການ ແລະກີລາ, ເລຂາອົງຄະນະພັກ, ອະທິການບໍດີ ມຊ, ສະຫາຍ ຮສ.ປອ ວຽງວິໄລ ທ່ຽງຈັນໄຊ ປະທານກວດກາພັກ ມຊ, ເລຂາຄະນະພັກຮາກຖານ, ຄະນະບໍດີຄະນະນິຕິສາດ ແລະລັດຖະສາດ, ສະຫາຍ ຄໍາເຟືອງ ລໍວັນໄຊ ຮອງປະທານກວດກາພັກ ມຊ ຫົວໜ້າຫ້ອງການຈັດຕັ້ງ ແລະຄຸ້ມຄອງພະນັກງານ, ສະຫາຍ ຄໍາພາ ຫວ່າງດວງນະພາ ຮອງປະທານກວດກາພັກ ມຊ, ຫົວໜ້າຫ້ອງການກວດກາ, ມີບັນດາສະຫາຍ ຜູ້ຮັບຜິດຊອບວຽກງານກວດກາຂັ້ນຮາກຖານ, ຂັ້ນໜ່ວຍທົ່ວ ມຊ ເຂົ້າຮ່ວມ.

          ສະຫາຍ ຮສ. ປອ ອຸດົມ ພອນຄໍາເພັງ ໄດ້ກ່າວ ໃນໂອກາດເປີດພິທີ ບາງຕອນວ່າ: ຜູ້ເຮັດວຽກງານກວດກາແມ່ນຜູ້ມີຄວາມອົດທົນ, ເຂັ້ມແຂງ, ມີຄວາມເສຍສະຫຼະ, ມີຄວາມທຸ່ນທ່ຽງ, ເຮັດວຽກດ້ວຍຄວາມຂະຫຍັນຂັນແຂງ ແຕ່ອ່ອນນ້ອມຖ່ອມຕົນ ຢຶດຖືຜົນປະໂຫຍດສ່ວນລວມເປັນຫຼັກ. ຂະນະດຽວກັນ ສະຫາຍກໍໄດ້ຍົກໃຫ້ເຫັນສະພາບລວມກ່ຽວກັບວຽກງານກວດກາຢູ່ຂັ້ນສູນກາງ, ຂັ້ນກະຊວງ ແລະພາກສ່ວນອື່ນໆ ຂອງພາກລັດ ແລະ ຍົກໃຫ້ເຫັນບາງປະກົດການຫຍໍ້ທໍ້ ທີ່ເກີດຂຶ້ນໃນຖັນແຖວພະນັກງານ-ລັດຖະກອນ ເຫັນວ່າ ຍັງມີການສວຍໃຊ້ອໍານາດ-ໜ້າທີ່ ເຊັ່ນ ຄວາມບໍ່ໂປ່ງໃສ ໃນການນໍາໃຊ້ງົບປະມານ, ການໃຫ້ເຊົ່າ-ສໍາປະທານທີ່ດິນ ແລະສະຖານທີ່ ແລະອື່ນໆທີ່ບໍ່ຖືກຕ້ອງຕາມລະບຽບການ; ເຊິ່ງປະກົດການສະແດງອອກທັງໝົດນັ້ນ ແມ່ນໜ້າທີ່ຂອງພະນັກງານ ຜູ້ເຮັດວຽກງານກວດກາຢູ່ແຕ່ລະຂັ້ນ, ແຕ່ລະພາກສ່ວນ ຈະຕ້ອງໄດ້ຊອກຫາວິທີແກ້ໄຂ ໃຫ້ຖືກຕ້ອງ ແລະສອດຄ່ອງກັບສະພາບຄວາມເປັນຈິງ, ເພື່ອຄືນຜົນປະໂຫຍດໃຫ້ແກ່ສ່ວນລວມ.

          ຈາກນັ້ນ, ທີ່ປະຊຸມໄດ້ຮັບຟັງການບັນຍາຍ ເອກະສານ ວ່າດ້ວຍການກວດກາພັກ ໂດຍ ສະຫາຍ ຮສ. ປອ ວຽງວິໄລ ທ່ຽງຈັນໄຊ ປະທານກວດກາພັກ ມຊ, ຮັບຟັງການບັນຍາຍ ເອກະສານ ວ່າດ້ວຍການກວດກາລັດ ໂດຍ ສະຫາຍ ຄໍາເຟືອງ ລໍວັນໄຊ ຮອງປະທານກວດກາພັກ ມຊ ແລະ ຟັງການບັນຍາຍ ກົດໝາຍວ່າດ້ວຍການສະກັດກັ້ນ ແລະຕ້ານການສໍ້ລາດບັງຫຼວງ ໂດຍສະຫາຍ ຄໍາພາ ຫວ່າງດວງນະພາ  ຮອງປະທານກວດກາພັກ ມຊ. ແລະໃນຕອນທ້າຍຂອງກອງປະຊຸມ ຍັງໄດ້ເປີດໂອກາດໃຫ້ພະນັກງານ ຜູ້ເຮັດວຽກງານກວດກາ ໄດ້ມີການສົນທະນາແລກປ່ຽນ ຄໍາຄິດເຫັນກ່ຽວກັບບັນຫາຕ່າງໆ ທີ່ກ່ຽວຂ້ອງກັບວກກງານກວດກາ ຢ່າງກວ້າງຂວາງອີກດ້ວຍ.

ພາບບັນຍາກາດ

ໃນວັນທີ 27 ທັນວາ 2023 ມະຫາວິທະຍາໄລແຫ່ງຊາດ(ມຊ) ໄດ້ຈັດກອງປະຊຸມພາ ມະຫາວິທະຍາໄລແຫ່ງຊາດ ຄັ້ງທີ II ປະຈຳປີ 2023 ທີ່ຫ້ອງປະຊຸມຕຶກສຳນັກງານອະທິການບໍດີ ມຊ, ໂດຍການເປັນປະທານຂອງທ່ານ ສຈ. ປອ. ບໍ່ແສງຄຳ ວົງດາລາ ປະທານສະພາ ມຊ, ມີທ່ານ ຮສ. ປອ. ອຸດົມ ພອນຄຳເພັງ ອະທິການບໍດີ ມຊ, ມີບັນດາທ່ານສະມາຊິກສະພາ ມຊ, ຜູູ້ຕາງໜ້າຈາກຄະນະວິຊາ ແລະສາມອົງການຈັດຕັ້ງມະຫາຊົນ (ຊາວໜຸ່ມ, ແມ່ຍິງ ແລະກຳມະບານ) ເຂົ້າຮ່ວມ.

         ໂອກາດນີ້, ທີ່ປະຊຸມໄດ້ຮັບຟັງການລາຍງານກອງປະຊຸມສະພາ ມຊ ຄັ້ງວັນທີ 15 ສິງຫາ 2023; ໂດຍ ທ່ານ ຮສ. ປອ. ໄກສອນ ເພັງໂສພາ ຫົວໜ້າຫ້ອງການ ການສຶກສາຫຼັງປະລິນຍາ ມຊ ໂດຍທ່ານໄດ້ໃຫ້ຮູ້ວ່າ: ເຫັນດີຮັບຮອງເອົາຜົນງານຂອງການສະເໜີຕໍາແໜ່ງວິຊາການຄູ ຈໍານວນ 13 ທ່ານ (ຍິງ 6 ທ່ານ) ຈາກ 2 ຄະນະວິຊາ. ເຊິ່ງປະກອບມີ ຂັ້ນອາຈານ ຈໍານວນ 7 ທ່ານ (ຍິງ 3 ທ່ານ) ແລະ ຂັ້ນຮອງສາດສະດາຈານ 6 ທ່ານ (ຍິງ 3 ທ່ານ), ພ້ອມນັ້ນໃນກອງປະຊຸມ ຜູ້ເຂົ້າຮ່ວມ ຍັງໄດ້ຮັບຟັງການລາຍງານ ຄວາມຄືບໜ້າການປັບປຸງດຳລັດ 071, ລາຍງານກ່ຽວກັບວຽກງານການຮຽນ-ການສອນລະດັບປະລິນຍາຕີ ມຊ ແລະວຽກງານການຮຽນ-ການສອນ ລະດັບຫຼັງປະລິນຍາຕີ ມຊ ແລະ ພິຈາລະນາຮັບຮອງຕຳເເໜ່ງວິຊາການຄູ ໃນຄັ້ງນີ້ມີ 9  ຄະນະວິຊາ ທີ່ໄດ້ສະເໜີເພື່ອພິຈາລະນາຕໍາແໜ່ງວິຊາການຄູສອນ ເຊິ່ງປະກອບມີຂັ້ນສາດສະດາຈານ ຈຳນວນ 3 ທ່ານ, ຂັ້ນຮອງສາດສະດາຈານ ຈຳນວນ 17 ທ່ານ, ຂັ້ນອາຈານ ຈໍານວນ 26 ທ່ານ ແລະ ຂັ້ນຜູ້ຊ່ວຍອາຈານ 30 ທ່ານ.

        ນອກນັ້ນ, ກອງປະຊຸມຍັງໄດ້ຜ່ານມາດຖານເງື່ອນໄຂກ່ຽວກັບການຂໍຕຳແໜ່ງວິຊາການຄູຂັ້ນ ຜູ້ຊ່ວຍອາຈານ, ອາຈານ, ຮອງສາດສະດາຈານ ແລະສາດສະດາຈານອີກດ້ວຍ ເຊິ່ງມີຜູ້ຍື່ນຂໍຕຳແໜ່ງວິຊາການທັງໝົດ 76 ຄົນ.

ພາບບັນຍາກາດ

ໃນວັນທີ 22 ທັນວາ 2023 ຄະນະວິທະຍາສາດທຳມະຊາດ (ຄວທ) ມະຫາວິທະຍາໄລແຫ່ງຊາດ (ມຊ) ໄດ້ ຈັດງານບຸນວິທະຍາສາດປະຈຳປີ 2023 ທີ່ຕຶກຫ້ອງທົດລອງວິທະຍາສາດ ຄວທ, ໂດຍການເປັນປະທານຂອງທ່ານ ຮສ. ປອ. ອຸດົມ ພອນຄຳເພັງ ອະທິການບໍດີ ມຊ, ທ່ານ ຮສ. ປອ. ແຫລມທອງ ລັດດາວົງ ຄະນະບໍດີ ຄວທ, ມີທ່ານຮອງຄະນະບໍດີ, ແຂກຖືກເຊີນ, ພະນັກງານ, ຄູ-ອາຈານ ແລະນັກສຶກສາເຂົ້າຮ່ວມ.

ການຈັດງານໃນຄັ້ງນີ້ແມ່ນເພື່ອ ວາງສະແດງ-ເຜີຍແຜ່ຜົນງານການຄົ້ນຄວ້າວິທະຍາສາດ, ຜະລິດຕະພັນ ແລະນະວັດຕະກຳຕ່າງໆຂອງນັກສຶກສາ ແລະຄູ-ອາຈານ ພາຍໃນຄະນະຈາກ 5 ພາກວິຊາຄື, ພາກວິຊາເຄມີສາດ, ພາກວິຊາຊີວະວິທະຍາ, ພາກວິຊາຟີຊິກສາດ, ພາກວິຊາຄະນິດສາດ ແລະພາກວິຊາວິທະຍາສາດຄອມພີວເຕີ. ໃນໄລຍະຜ່ານມາ ຄວທ ມີຫຼາຍຜົນງານທີ່ພົ້ນເດັ່ນເຊັ່ນໄດ້ຮັບທຶນສະໜັບສະໜູນການຄົົ້ນຄວ້າຈາກພາກສ່ວນຕ່າງໆ ໄດ້ດັ່ງນີ້: ທຶນລັດຖະບານ ແລະ KFAS ໄດ້ທັງໝົດຈໍານວນ 30 ຫົວຂໍ້ (ສະເລ່ຍ ຫົວຂໍ້ລະ 40-50 ລ້ານກວ່າກີບ), ຮັບທຶນຄົ້ນຄວ້າຈາກໂຄງການ SSHEP2 ຈໍານວນ 3 ໂຄງການ (ມູນຄ່າ 750 ລ້ານກວ່າ ກີບ); ທຶນຈາກຕ່າງປະເທດ ເຊັ່ນ: ຈາກໂຄງການ ISP (ມູນຄ່າ ~180.000 USD) ແລະ ໂຄງການ UNESCO (ມູນຄ່າ 45,000 USD) ເຊິ່ງທຶນດັ່ງກ່າວ ແມ່ນໄດ້ຊ່ວຍເຫຼືອໃນການສະໜອງອຸປະກອນການທົດລອງ-ວິໄຈ ແລະ ສ້າງບຸກຄະລາກອນ; (ພິເສດ ໃນທ້າຍປີ 2023 ນີ້, ຄວທ ໄດ້ຮັບໂຄງການຈາກກອງທຶນພັດທະນາວິທະຍາສາດ ແລະ ເຕັກໂນໂລຊີ “ກຊສສ” ຈໍານວນ 4 ໂຄງການ, ມູນຄ່າ 1,600 ລ້ານ ກວ່າກີບ); ພິເສດ ສາມາດມາດຄົ້ນຄວ້າ, ຄົ້ນພົບ ພັນພືດ ແລະ ສັດຊະນິດໃໝ່ ພ້ອມທັງໄດ້ຕີພິມຜົນການຄົ້ນຄວ້າໃນວາລະສານສາກົນ ເຊັ່ນ:1. ຄົ້ນພົບ ພືດຊະນິດໃໝ່ລະດັບຕະກຸນ ຂອງ ສປປ ລາວ New record family ມີ 1 ຕະກຸນ ຈາກພູຈອມວອຍ; 2. ພືດຊະນິດໃໝ່ລະດັບຊະນິດ ຂອງ ສປປ ລາວ New records species ມີ 47 ຊະນິດ; 3. ພືດຊະນິດໃໝ່ຂອງໂລກ New records species ມີ 29 ຊະນິດ; 4. ຄົ້ນພົບ ສັດຕະສາດ ມີທັງໝົດ 5 ຊະນິດ: ກົບ 4 ຊະນິດ ແລະ ງູ 1 ຊະນິດ.

ໃນພິທີຍັງໄດ້ຮັບຟັງການໂອລົມຈາກ ທ່ານ ຮສ. ປອ. ອຸດົມ ພອນຄຳເພັງ ເຊິ່ງທ່ານໄດ້ກ່າວວ່າ: ຄະນະວິທະຍາສາດທຳມະຊາດ ກໍ່ເປັນໜຶ່ງໃນຄະນະວິຊາທີ່ເປັນອົງປະກອບກົງຈັກການຈັດຕັ້ງຂອງມະຫາວິທະຍາໄລແຫ່ງຊາດ ທີ່ມີການຈັດຕັ້ງການເຄື່ອນໄຫວ ຕາມພາລະບົດບາດ, ໜ້າທີ່ ແລະ ມີຜົນງານພົ້ນເດັ່ນໃນຫຼາຍດ້ານ, ມີຜົນງານດີເດັ່ນໃນດ້ານຕ່າງໆ ໂດຍສະເພາະດ້ານການຄົ້ນຄວ້າວິໄຈວິທະຍາສາດ ແລະ ເຕັກໂນໂລຊີ, ມີການຄົ້ນຄວ້າວິທະຍາສາດ ທີ່ຕິດພັນກັບການຮຽນ-ການສອນ, ມີການຕີພິມຜົນການຄົ້ນຄວ້າໃນວາລະສານ ທາງພາຍໃນ ແລະ ສາກົນ. ໃນຍຸກປັດຈຸບັນການນຳໃຊ້ເທັກໂນໂລຊີແມ່ນຄວາມສຳຄັນຫຼາຍ ໂດຍສະເພາະມານຳໃຊ້ເຂົ້່າໃນການຄົ້ນຄວ້າວິທະຍາສາດ, ການສ້າງສ້າງນະວັດຕະກຳ ແບບໃໝ່, ໂດຍສະເພາະແມ່ນຫັນມານຳໃຊ້ລະບົບ ສະໜອງອັດສະລິຍະ (AI) ເພື່ອສ້າງນະວັດຕະກຳມາຮອງຮັບການໃຊ້ງານໃນຊີວິດປະຈຳວັນຂອງຄົນໃຫ້ສະດວກສະບາຍສະບາຍຍິ່ງຂຶ້ນໄປນັ້ນເອງ.

ພາບບັນຍາກາດ

ໃນວັນທີ 21 ທັນວາ 2023 ຜ່ານມາ, ສະຖາບັນພັດທະນາຊັບພະຍາກອນມະນຸດ ລາວ-ຍີ່ປຸ່ນ (ສລຍ) ຮ່ວມກັບ ສະຖາບັນຂົງຈື (ສຂຈ) ມະຫາວິທະຍາໄລແຫ່ງຊາດ (ມຊ) ໄດ້ຈັດເຝິກອົບຮົມການແນະນຳຂັ້ນຕອນການກຳນົດຕຳແໜ່ງງານ ທີ່ຫ້ອງປະຊຸມ ສະຖາບັນພັດທະນາຊັບພະຍາກອນມະນຸດ ລາວ-ຍີ່ປຸ່ນ ໂດຍການເຂົ້າຮ່ວມຂອງທ່ານ ປອ. ພອນແກ້ວ ຈັນທະມາລີ ຜູ້ອຳນວຍການ ສລຍ, ທ່ານ ຄຳຮຸ່ງ ຈັນທະວົງ ຜູ້ອຳນວຍການ ສຂຈ ແລະທ່ານ ຄຳເຟືອງ

ລໍວັນໄຊ ຫົວໜ້າຫ້ອງການຈັດຕັ້ງ ແລະ ຄຸ້ມຄອງພະນັກງານ, ມີຜູ້ຕາງໜ້າຈາກພະແນກພັດທະນາການຈັດຕັ້ງ ກະຊວງພາຍໃນ, ພະນັກງານ, ຄູ-ອາຈານ ເຂົ້າຮ່ວມ.

          ກອງປະຊຸມໃນຄັ້ງນີ້ຜູ້ເຂົ້າຮ່ວມໄດ້ຮັບຟັງການນຳສະເໜີກ່ຽວກັບສະພາບລວມ, ການຈັດຕັ້ງຂອງສະຖາບັນ ເຊິ່ງນຳສະເໜີໂດຍຜູ້ອຳນວຍການ ຂອງສອງສະຖາບັນ. ຈາກນັ້ນ ທີ່ປະຊຸມ ໄດ້ຮັບຟັງການເຜີຍແຜ່ ດຳລັດວ່າດ້ວຍການກຳນົດຕຳແໜ່ງງານ ສະບັບເລກທີ່ 734/ລບ, ລົງວັນທີ 31 ທັນວາ 2021 ເຊິ່ງປະກອບມີທັງໝົດ 5 ໜວດ 36 ມາດຕາ ແລະຄວາມຮູ້ກ່ຽວກັບການກຳນົດຕຳແໜ່ງງານ ເຊິ່ງເຜີຍແຜ່ໂດຍ ທ່ານ ນາງ ອານົງລິນ ເພັດໄກສອນ ຮອງຫົວໜ້າພະແນກພັດທະນາການຈັດຕັ້ງ ກະຊວງພາຍໃນ ໂດຍມີຈຸດປະສົງເພື່ອເປັນບ່ອນອີງໃຫ້ແກ່ອົງການຈັດຕັ້ງ ໃນການກໍານົດຈຳນວນລັດຖະກອນ, ການຄັດເລືອກບັນຈຸ, ການສັບຊ້ອນ, ການປະເມີນຜົນ, ການບຳລຸງ-ກໍ່ສ້າງ, ການແຕ່ງຕັ້ງ ແລະການປະຕິບັດລະບຽບວິໄນ ຕໍ່ລັດຖະກອນ ພ້ອມເປັນການຍົກສູງບົດບາດ ແລະໜ້າທີ່ຂອງກັນ ແລະກັນ ທັງເປັນການເສີມຂະຫຍາຍຫົວຄິດປະດິດສ້າງຂອງພະນັກງານລັດຖອນ.

          ພ້ອມນັ້ນ, ໃນທີ່ປະຊຸມຍັງໄດ້ມີການຮ່ວມກັນຂຽນການກຳນົດຕຳແໜ່ງງານຂອງແຕ່ລະພະແນກ ແລະ ບຸກຄົນ ຕົວຈິງເພື່ອໃຫ້ມີຄວາມເຂົ້າໃຈ ແລະຖືກຕ້ອງຕາມຂັ້ນຕອນອີກດ້ວຍ.

ພາບບັນຍາກາດ