ສະຖາບັນພັດທະນາຊັບພະຍາກອນມະນຸດ ລາວ-ຍີ່ປຸ່ນ (ສລຍ) ຮ່ວມກັບກົມສົ່ງເສີມວິສາຫະກິດຂະໜາດນ້ອຍ ແລະ ກາງ ກະຊວງອຸດສາະຫະກຳ ແລະການຄ້າ ແລະອົງການສົ່ງເສີມການຄ້າຍີ່ປຸ່ນ ປະຈຳນະຄອນຫຼວງວຽງຈັນ ໂດຍໄດ້ຮັບການສະໜັບສະໜູນຈາກອົງາກນ ໄຈກາ ປະຈຳລາວ ຈັດງານສົ່ງເສີມການພັດທະນາທຸລະກິດ ເພື່ອປະກອບສ່ວນແກ້ໄຂບັນຫາທາງສັງຄົມ ພາຍໃຕ້ໂຄງການ LJISUSU Scale-up ຈັດຂຶ້ນໃນຮູບແບບອອນລາຍ ແລະ ແບບເຊິ່ງໜ້າ ໃນວັນທີ 28 ກັນຍາ 2022 ຜ່ານມານີ້, ຢູ່ທີ່ ສລຍ ໂດຍມີທ່ານ ສຈ.ປອ. ຮຸ່ງເພັດ ຈັນທະວົງ ຮອງອະທິການບໍດີ  ມະຫາວິທະຍາໄລແຫ່ງຊາດ, ທ່ານ ດຣ. ບຸນເພັງ ສີບຸນເຮືອງ ຫົວໜ້າກົມສົ່ງເສີມວິສາຫະກິດຂະໜາດນ້ອຍ ແລະ ກາງ,  ທ່ານ ຢາສູຊິ ກິກູຈິ ທີ່ປືກສາອົງການສົ່ງເສີມການຄ້າຍີ່ປຸ່ນ ປະຈຳນະຄອນຫຼວງວຽງຈັນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

            ໂຄງການ LJI SUSU Scale-up ເປັນໂຄງການພັດທະນາທຸລະກິດ ເພື່ອສົ່ງເສີມການຂະຫຍາຍຕົວຂອງເສດຖະກິດ-ສັງຄົມໃນລາວ ມີຈຸດປະສົງເພື່ອສ້າງທ່າແຮງໃນການແຂ່ງຂັນ ແລະການສ້າງເຄືອຂ່າຍທາງທຸລະກິດໃຫ້ບັນດາຫົວໜ່ວຍທຸລະກິດ ເຊິ່ງຕິດພັນກັບບັນດາຫົວໜ່ວຍທຸລະກິດທັງພາຍໃນ ແລະຕ່າງປະເທດ, ເປັນຕົ້ນແມ່ນປະເທດຍີ່ປຸ່ນ ເຊິ່ງປີ 2021 ຜ່ານມາໄດ້ມີ 4 ບໍລິສັດຈາກລາວເຂົ້າຮ່ວມການແຂ່ງຂັນແຜນທຸລະກິດໃນໂຄງການດັ່ງກ່າວ ທີ່ໄດ້ຮັບການສະໜັບສະໜູນຊ່ວຍເຫຼືອທາງການເງິນຈາກອົງການໄຈກາ ປະຈຳລາວ ເພື່ອດໍາເນີນແຜນການຈັດຕັ້ງປະຕິບັດແຜນດຳເນີນທຸລະກິດໃນໄລຍະ 6 ໃຫ້ປາກົດຜົນເປັນຈິງ ແນໃສ່ເພື່ອຊຸກຍູ້-ສົ່ງເສີມການພັດທະນາທຸລະກິດໃນຂົງເຂດດັ່ງກ່າວໃຫ້ມີການຂະຫຍາຍຕົວ ເພື່ອປະກອບສ່ວນເຂົ້າໃນການແກ້ໄຂບັນຫາທາງເສດຖະກິດ-ສັງຄົມຂອງລາວໃຫ້ຫຼາຍຂຶ້ນ.

            ພາຍໃນງານໄດ້ມີການສົນທະນາແລກປ່ຽນ ແລະນຳສະເໜີຄວາມຮູ້, ປະສົບການເຊິ່ງກັນ ແລະ ກັນຂອງບັນດາຜູ້ຕາງໜ້າຈາກບໍລິສັດຕ່າງໆ ໃນນັ້ນ ບໍລິສັດ Music securities lnc ຈາກປະເທດຍີ່ປຸ່ນ ໄດ້ຮ່ວມບັນຍາຍໃນຫົວຂໍ້ “ປັດໄຈສຳຄັນທີ່ມີຜົນຕໍ່ກັບນັກລົງທຶນ ແລະບໍລິສັດໂລກາ ຈຳກັດ”  ເຊິ່ງເປັນບໍລິສັດຂອງຄົນລາວທີ່ປະສົບຜົນສຳເລັດ ໄດ້ແລກປ່ຽນປະສົບການຄວາມຮູ້ ໃນຫົວຂໍ້ “ຍຸດທະສາດການຂະຫຍາຍຕົວ ແລະການຂະຫຍາຍເຄືອຂ່າຍທາງທຸລະກິດ” ນອກນີ້, ຍັງໄດ້ມີການມອບລາງວັນພິເສດໃຫ້ແກ່ບໍລິສັດທີ່ມີຄວາມພະຍາມໃນການສ້າງຄຸນຄ່າໃຫ້ກັບສັງຄົມລາວ ເຊິ່ງປະກອບມີ ລາງວັນຜູ້ປະກອບການດີເດັ່ນ ແລະລາງວັນຮູບແບບທຸລະກິດທີ່ສ້າງຄຸນຄ່າແກ່ສັງຄົມດີເດັ່ນ ໃຫ້ແກ່ບໍລິສັດທີ່ຖືກຄັດເລືອກຈຳນວນໜຶ່ງຕື່ມອີກ.

ພາບບັນຍາກາດ

ໃນວັນທີ 6 ຕຸລາ 2022 ຜ່ານມາ, ຄະນະວິທະຍາສາດສັງຄົມ (ຄສຄ) ມະຫາວິິທະຍາໄລແຫ່ງຊາດ ໄດ້ຈັດພິທີສະຫຼຸບສົກຮຽນ ປະຈຳສົກສຶກສາ 2021-2022 ຊຸດຮຽນ 2018-2022 ແລະ ໄຂສົກຮຽນໃໝ່ 2022-2023 ທີ່ສະໂມສອນຊັ້ນສອງ ມະຫາວິທະຍາໄລແຫ່ງຊາດ, ໂດຍການເປັນປະທານຂອງ ທ່ານ ຮສ. ປອ. ເດຊານຸລາດ ແສນດວງເດດ ຄະນະບໍດີ ຄະນະວິທະຍາສາດສັງຄົມ ມີທ່ານຮອງຄະນະບໍດີ, ຫົວໜ້າ-ຮອງຫົວໜ້າພາກວິຊາ, ແຂກຖືກເຊີນ, ອະດີດພະນັກງານບຳນານ, ພະນັກງານ, ຄູ-ອາຈານ ແລະ ນັກສຶກສາເຂົ້າຮ່ວມ.

          ໃນພິທີ ທ່ານ ຮສ. ສະເຫຼີມສັກ ພາບຸດດີ ຮອງຄະນະບໍດີ ຄະນະວິທະຍາສາດສັງຄົມ ກໍໄດ້ຂຶ້ນຜ່ານບົດສະຫຼຸບປະຈຳສົກສຶກສາ 2021-2022 ຊຸດຮຽນ 2018-2022 ແລະ ຜ່ານແຜນການຈັດຕັ້ງປະຕິໃນສົກຮຽນໃໝ່ 2022-2023 ເຊິ່ງທ່ານໃຫ້ຮູ້ວ່າ: ຄສຄ ເປັນ 1 ໃນ 13 ຄະນະວິຊາທີ່ຂຶ້ນກັບ ມະຫາວິທະຍາໄລແຫ່ງຊາດ ມີທັງໝົດ 6 ພະແນກ ແລະ 5 ພາກວິຊາຄື: ພາກວິຊາການເມືອງ ແລະ ບໍລິຫານລັດກິດ, ພາກວິຊາພູມີສາດ ແລະສາລະສົນເທດ, ພາກວິຊາປະຫວັດສາດ ແລະບູຮານວິທະຍາດ, ພາກວິຊາການທ່ອງທ່ຽວ ແລະ ການໂຮມແຮມ ແລະພາກວິຊາສັງຄົມສົງເຄາະ ແລະ ການພັດທະນາ; ມີ 2 ສູນຄື: ສູນຄົ້ນຄວ້າ ແລະ ຝຶກອົບຮົມ RTC ແລະ ສູນເພດພາວະສຶກສາ. ມີພະນັກງານຄູ, ຄູ-ອາຈານທັງໝົດ 98 ຄົນ (48 ຄົນ), ອາຈານສອນ 31 ຄົນ ຍິງ 12 ຄົນ, ອາຈານສອນ ແລະເຮັດວຽກບໍລິຫານ 59 ຄົນ ຍິງ 30 ຄົນ ແລະພະນັກງານບໍລິຫານ 8 ຄົນ ຍິງ 6 ຄົນ.  ມີນັກສຶກສາທັງໝົດ 455 ຄົນ ຍິງ 155 ຄົນ (ນັກສຶກສາລະດັບປະລິນຍາໂທ 283 ຄົນ ຍິງ 96 ຄົນ ແລະ ນັກສຶກສາລະດັບປະລິນຍາຕີ 172 ຄົນ ຍິງ 59 ຄົນ); ສຳລັບສົກສຶກສານີ້ ຄສຄ ມີນັກສຶກສາທີ່ສຳເລັດການສຶກສາທັງໝົດ 646 ຄົນ ຍິງ 376 ຄົນ (ລະດັບປະລິນຍາໂທ 111 ຄົນ ຍິງ 96 ຄົນ, ລະດັບປະລິນຍາຕີ 535 ຍິງ 336 ຄົນ) ແລະມີນັກສຶກສາທີ່ໄດ້ຮັບໃບປະກາສະນີຍະບັດກຽມນິຍົມ 3 ຄົນ ຍິງ 2 ຄົນ ແລະໄດ້ຮັບການຍ້ອງຍໍປະເພດຕ່າງໆ 195 ຄົນ ຍິງ 113 ຄົນ (ຍ້ອງຍໍດີເດັ່ນຮອບດ້ານ 30 ຄົນ ຍິງ 21 ຄົນ, ເດັ່ນການຮຽນ 52 ຄົນ ຍິງ 30 ຄົນ ແລະ ເດັ່ນກິດຈະກຳ 107 ຄົນ ຍິງ 56 ຄົນ). ສຳລັບທິດທາງແຜນການໃນຕໍ່ໜ້າ ຄສຄ ຈະສືບຕໍ່ປຸກລະດົມພະນັກງານ, ຄູ-ອາຈານ ໃນການປະກອບສ່ວນເຂົ້າໃນການປະຕິບັດແຜຍຸດທະສາດການພັດທະນາຂອງ ຄສຄ  (2021-2025) ໂດຍສະເພາະແມ່ນເລັ່ງໃສ່ການພັດທະນາການສຶກສາໃນມີຄຸນນະພາບ ແລະ ດີເລີດທາງດ້ານວິຊາການ ເປັນຕົ້ນ.

ພາບບັນຍາກາດ

ມະຫາວິທະຍາໄລແຫ່ງຊາດ(ມຊ) ຮ່ວມກັບ ອະດີດນັກສຶກສານາຍຮ້ອຍຕຳຫຼວດ ໂຮງຮຽນ 12-75 ສສ ຫວຽດນາມ ແລະບໍລິສັດ ອຸດົມຊັບຈະເລີນ ກໍ່ສ້າງ ຈຳກັດ ໄດ້ຮ່ວມກັນຈັດກິດຈະກຳແຂ່ງຂັນກິລາເປຕັງມິດຕະພາບ ເພື່ອເປັນການສະເຫຼີມ-ສະຫຼອງວັນຄູແຫ່ງຊາດ ຄົບຮອບ 28 ປີ (7 ຄຸລາ 1994-2022) ໃນວັນທີ 5 ຕຸລາ 2022 ທີ່ສະໜາມກິລາເປຕັງແຫ່ງຊາດ ໂດຍການເຂົ້າຮ່ວມຂອງ ທ່ານ ຮສ. ປອ. ອຸດົມ ພອນຄໍາເພັງ ອະທິການບໍດີ ມຊ, ທ່ານ ພົຕ ບຸນມີ ແສງຄຳຢອງ ພະນັກງານບຳນານ ຕາງໜ້ານັກສຶກສານາຍຮ້ອຍຕຳຫຼວດ ໂຮງຮຽນ 12-75 ສສ ຫວຽດນາມ, ທ່ານ ຄອນພະຈັນ ໄຊຍະສຸກ ປະທານບໍລິສັດ ອຸດົມຊັບຈະເລີນ ກໍ່ສ້າງ ຈຳກັດ, ມີບັນດາຄະນະບໍດີ, ຫົວໜ້າຫ້ອງການ, ພະນັກງານ, ຄູ-ອາຈານ, ອະດີດນັກສຶກສາ ແລະແຂກທີຮັບເຊີນ ເຂົ້າຮ່ວມ.

ທ່ານ ຮສ. ປອ. ອຸດົມ ພອນຄໍາເພັງ ໄດ້ກ່າວວ່າ: ການສ້າງຂະບວນການແຂ່ງຂັນກິລາເປຕັງໃນຄັ້ງນີ້ ເພືອເປັນການສະເຫຼີມ-ສະຫຼອງວັນຄູແຫ່ງຊາດ 7 ຕຸລາ ຄົບຮອບ 28 ປີ ແລະຊົມເຊີຍວັນສຳຄັນຕ່າງໆ ຂອງພັກ-ຂອງຊາດ, ທັງເປັນການຮັດແໜ້ນຄວາມສາມັກຄີ ລະຫວ່າງ ພະນັກງານຄູ-ອາຈານ ແລະອະດີດນັກສຶກສານາຍຮ້ອຍຕຳຫຼວດ ໂຮງຮຽນ 12-75 ສສ ຫວຽດນາມ ແລະບັນດາບໍລິສັດຫ້າງຮ້ານ ອ້ອມຂ້າງ ໃຫ້ນັບມື້ນັບແໜ້ນແຟ້ນຍິ່ງຂຶ້ນ.

ໂອກາດນີ້, ພົຕ ບຸນມີ ແສງຄຳຢອງ ກ່າວວ່າ: ການແຂ່ງຂັນກິລາມິດຕະພາບໃນຄັ້ງນີ້, ນອກຈາກຈະເປັນການສະເຫຼີມ-ສະຫຼອງວັນສຳຄັນດັ່ງກ່າວແລ້ວ ຍັງເປັນການເຕົ້າໂຮມຄວາມສາມັກຄີ ອີກທັງເປັນການສ້າງຂະບວນການກິລາເພື່ອຮັກສາສຸຂະພາບ ແລະເສີມສ້າງໃຫ້ມີສຸຂະພາບແຂງແຮງຕ້ານພະຍາດຕ່າງໆ. ພ້ອມນີ້ທ່ານຍັງໄດ້ຕາງໜ້ານັກສຶກສານາຍຮ້ອຍຕຳຫຼວດ ໂຮງຮຽນ 12-75 ສສ ຫວຽດນາມ ຂໍສະແດງຄວາມຮູ້ບຸນຄຸນ ແລະ ອວຍພອນໃຫ້ການນຳພັກ-ລັດທຸກທ່ານຂໍໃຫ້ສືບຕໍ່ຊີ້ນຳ-ນຳພາປະເທດຊາດ ໂດຍສະເພາະຂົງເຂດການສຶກສາ ກໍຄືມະຫາວິທະຍາໄລແຫ່ງຊາດ ໃຫ້ເຕີບໃຫຍ່ຂະຍາຍຕົວຍິ່ງຂຶ້ນ ສະແດງຄວາມຮູ້ບຸນຄຸນ ແລະ ອວຍພອນໃຫ້ ບັນດາຄູ-ອາຈານທຸກຂະແໜງການ ຈົ່ງມີສຸຂະພາບເຂັ້ມແຂງ ພ້ອມກັນສືບຕໍ່ນໍາພາສ້າງບຸກຄະລາກອນໃຫ້ມີຄວາມກ້າວໜ້າທຽບທັນກັບພາກພື້ນ ແລະ ສາກົນ.

ສໍາລັບການແຂ່ງຂັນໃນຄັ້ງນີ້ ໄດ້ແບ່ງອອກເປັນ 26 ທີມ ເຊິ່ງຕະຫຼອດການແຂ່ງຂັນ ແມ່ນເຕັມໄປດ້ວຍບັນຍາກາດເບີກບານມ່ວນຊື່ນ ແລະມິດຕະພາບທີ່ດີ. ຜົນການແຂ່ງຂັນລາງວັນຊະນະເລີດແມ່ນ ທີມອະທິການບໍດີ ມຊ, ຮອງຊະນະເລີດອັນດັບໜຶ່ງ ທີມ ຄະນະວິທະຍາສາດການກິລາ-ກາຍະກຳ, ຮອງຊະນະເລີດອັນດັບສອງ ທີມຄະນະອັກສອນສາດ, ຮອງຊະນະເລີດອັນດັບສາມ ທີມອະດີດນັກສຶກສານາຍຮ້ອຍຕຳຫຼວດ ໂຮງຮຽນ 12-75 ສສ ຫວຽດນາມ ໂດຍແຕ່ລະທີມແມ່ນໄດ້ຮັບຂັນລາງວັນທີມລະໜຶ່ງໜ່ວຍ.

ພ້ອມດຽວກັນນີ້ຈຳນວນໃນ 22 ທີມທີ່ເຂົ້າຮ່ວມແຂ່ງຂັນ ຍັງໄດ້ຮັບຂັນລາງວັນຊົມເຊີຍ ທີມລະໜຶ່ງໜ່ວຍ; ພ້ອມທັງຍັງໄດ້ມອບຂັນທີ່ລະນຶກໃຫ້ບໍລິສັດ ອຸດົມຊັບຈະເລີນ ກໍ່ສ້າງ ຈຳກັດ ທີ່ມາເຂົ້າຮ່ວມແຂ່ງຂັນກິລາເປຕັງມິດຕະພາບ ໃນຄັ້ງນີ້.

ຈາກນັ້ນ, ບໍລິສັດ ອຸດົມຊັບຈະເລີນ ກໍ່ສ້າງ ຈຳກັດ ໄດ້ມອບເງີນ ຈໍານວນ 50 ລ້ານກີບ ແລະກຸ່ມບໍລິສັດ ພົງສະຫວັນ ໄດ້ມອບເງິນ ຈໍານວນ 10 ລ້ານ ປະກອບສ່ວນໃຫ້ການສະໜັບສະໜູນຊຸກຍູ້ການສ້າງຂະບວນການເປຕັງຄັ້ງນີ້ ຕາງໜ້າຮັບໂດຍ ທ່ານ ຮສ ປອ ອຸດົມ ພອນຄຳເພັງ.  

ພາບບັນຍາກາດ

ໃນວັນທີ 5 ຕຸລາ 2022 ຜ່ານມາ, ຄະນະວິທະຍາສາດປ່າໄມ້ (ຄປມ) ມະຫາວິທະຍາໄລແຫ່ງຊາດ ໄດ້ຈັດພິທີສະຫຼຸບສົກຮຽນປະຈຳສົກສຶກສາ 2021-2022 ແລະ ຜ່ານມາແຜນການຮຽນ-ການສອນ ປະຈຳສົກສຶກສາ 2022-2023 ທີ່ຫ້ອງປະຊຸມຂອງຄະນະ, ໂດຍການເປັນປະທານຂອງ ທ່ານ ສຈ. ປອ. ລັດສະໜີ ບຸບຜາ ຄະນະບໍດີ ຄະນະວິທະຍາສາດປ່າໄມ້, ມີທ່ານຮອງຄະນະບໍດີ, ຫົວໜ້າ-ຮອງຫົວໜ້າພາກວິຊາ, ພະນັກງານ, ຄູ-ອາຈານ ແລະ ນັກສຶກສາ ເຂົ້າຮ່ວມ.

          ໃນໂອກາດດັ່ງກ່າວ, ທ່ານ ສຈ. ປອ. ສີທອງ ທອງມະນີວົງ ຮອງຄະນະບໍດີ ຄະນະວິທະຍາສາດປ່າໄມ້ ກໍໄດ້ຂຶ້ນຜ່ານບົດສະຫຼຸບລາຍງານ ປະຈຳສົກສຶກສາ 2021-2022 ແລະ ຜ່ານມາແຜນການຮຽນ-ການສອນ ປະຈຳສົກສຶກສາ 2022-2023  ເຊິ່ງທ່ານໄດ້ໃຫ້ຮູ້ວ່າ: ຄະນະວິທະສາດປ່າໄມ້ ມີພະນັກງານ, ຄູ-ອາຈານທັງໝົດ 86 ຄົນ, ຍິງ 32 ຄົນ, ໃນນັ້ນ ກຳລັງສຶກສາຕໍ່ໃນລະດັບປະລິນຍາເອກ 14 ຄົນ, ຍິງ 4 ຄົນ ແລະ ປະລິນຍາໂທ 1 ຄົນ ແລະ ມີອາສາສະໝັກ 20 ຄົນ; ສຳລັບໃນສົກສຶກສາ 2021-2022 ຄປມ ມີນັກສຶກສາທັງໝົດ 482 ຄົນ ຍິງ 234 ຄົນ, ນັກສຶກສາ ປະລິນຍາເອກ 17 ຄົນ, ຍິງ 3 ຄົນ, ນັກສຶກສາລະດັບປະລິນຍາໂທ 45 ຄົນ ຍິງ 12 ຄົນ, ນັກສຶກສາລະດັບປະລິນຍາມີ 416 ຄົນ ຍິງ 216 ຄົນ ແລະ ນັກສຶກສາລະດັບອະນຸປະລິນຍາມີ 4 ຄົນ ຍິງ 3 ຄົນ (ໃນນີ້ມີນັກສຶກສາ ໃນແຜນ 118 ຄົນ); ສ່ວນໃນສົກສຶກສານີ້ ມີນັກສຶກສາສຳເລັດການສຶກສາທັງໝົດ 148 ຄົນ ຍິງ 79 ຄົນ (ລະດັບປະລິນຍາຕີ 141 ຄົນ, ປະລິນຍາໂທ 4 ຄົນ ແລະ ອະນຸປະລິນຍາ 3 ຄົນ); ຕະຫຼອດໄລຍະຜ່ານມາ ພະນັກງານ, ຄູ-ອາຈານ ໄດ້ສຸມໃສ່ການພັດທະນາບຸກຄະລາທີ່ມີຄວາມຮູ້ຄວາມສາມາດ ອອກມາຮັບໃຊ້ສັງຄົມ, ໂດຍສະເພາະແມ່ນວຽກງານການສິດສອນ ເຊິ່ງສະແດງອອກໃຫ້ໃນຫຼາຍດ້ານ ມີພະນັກງານ, ອາຈານ ທີ່ໄດ້ຮັບໃບຍ້ອງຍໍຂັ້ນກະຊວງ ຈຳນວນ 54 ທ່ານ ຍິງ 21 ທ່ານ, ຂັ້ນມະຫາວິທະຍາໄລແຫ່ງຊາດ 17 ທ່ານ ຍິງ 8 ທ່ານ.

          ພ້ອມນັ້ນ, ໃນທ້າຍພິທີ ຍັງໄດ້ຮັບຟັງການມີການໂອ້ລົມຂອງທ່ານ ທ່ານ ສຈ. ປອ. ລັດສະໜີ ບຸບຜາ ກໍໄດ້ເນັ້ນໃຫ້ພະນັກງານ, ຄູ-ອາຈານ ສືບຕໍ່ຮັກສາມູນເຊື້ອອັນດີງາມ ແລະ ສືບຕໍ່ເອົາໃຈໃສ່ໃນການສິດສອນ, ພັດທະນາ-ເສີມສ້າງຄວາມຮູ້ໃໝ່ ສຸມໃສ່ການຄົ້ນຄວ້າວິທະຍາສາດ.

ພາບບັນຍາກາດ