ໃນຕອນບ່າຍວັນທີ 10 ພະຈິກ 2022 ນີ້, ທີ່ມະຫາວິທະຍາໄລແຫ່ງຊາດ ໄດ້ມີພິທີມອບ-ຮັບທຶນການສຶກສາ ຈາກບໍລິສັດໄຟຟ້າຫົງສາ ຈໍາກັດ ໃຫ້ແກ່ ນັກສຶກສາມະຫາວິທະຍາໄລແຫ່ງຊາດ ປະຈໍາສົົກສຶກສາ 2022-2023 ໂດຍການມອບຂອງທ່ານ ຄະທາຍຸດ ຊູພູນ ຜູ້ອໍານວຍການໃຫຍ່ຂອງບໍລິສັດໄຟຟ້າຫົງສາ,  ຝ່າຍ ມຊ. ເຂົ້າຮ່ວມໂດຍ ທ່ານ ຮສ. ໂພສີ ທິບດາວັນ ຮອງອະທິການບໍດີ ມຊ, ມີບັນດາຫົວໜ້າຫ້ອງການ, ມີບັນດາຄະນະກໍາມະການຜູ້ຮັບຜິດຊອບທຶນ, ບັນດາແຂກທີ່ຖືກເຊີນ, ພະນັກງານ, ຄູ-ອາຈານທີ່ກ່ຽວຂ້ອງ ແລະນັກສຶກສາຜູ້ທີ່ໄດ້ຮັບທຶນເຂົ້າຮ່ວມ.

ໂຄງການມອບທຶນການສຶກສາ ຈາກບໍລິສັດໄຟຟ້າຫົງສາ ຈໍາກັດ ໃຫ້ແກ່ນັກສຶກສາ ມະຫາວິທະຍາໄລແຫ່ງຊາດ ແມ່ນເລີ່ມມາແຕ່ສົກສຶກສາ 2020-2021 ເປັນຕົ້ນມາ. ສໍາສັບສົກສຶກສາ 2022-2023 ນີ້ແມ່ນເປັນປີທີ 3. ໂດຍມີຈຸດປະສົງເພື່ອຊຸກຍູ້ ແລະສົ່ງເສີມທຶນການສຶກສາໃຫ້ແກ່ນັກສຶກສາປີທີ 3 ທີ່ມີຄຸນສົມບັດດີ, ຮຽນດີ, ຮຽນເກັ່ງ ໄດ້ມີໂອກາດສຶກສາຕໍ່ໃຫ້ສໍາເລັດການສຶກສາໃນລະດັບມະຫາວິທະຍາໄລ, ເຊິ່ງທຶນທີ່ບໍລິສັດ ໄຟຟ້າຫົງສາ ມອບໃຫ້ແກ່ ນັກສຶກສາ ມະຫາວິທະຍາໄລແຫ່ງຊາດໃນປີນີ້ມີຈໍານວນ 8 ຄົນໃນ 3 ຄະນະວິຊາຄື ຄະນະນິຕິສາດ ແລະລັດຖະສາດ, ຄະນະເສດຖະສາດ ແລະບໍລິຫານທຸລະກິດ ແລະຄະນະວິສະວະກໍາສາດ ເຊິ່ງການເບີກຈ່າຍທຶນແມ່ນໄດ້ເບີກຈ່າຍເປັນຄ່າຮຽນຕາມໜ່ວຍກິດທີ່ນັກສຶກສາຮຽນຕົວຈິງ, ເບີກຈ່າຍຄ່າອຸປະກອນການຮຽນ ປີລະ 1.000.000 ກີບຕໍ່ຄົນຕໍ່ປີ, ຈ່າຍເປັນເບ້ຍລ້ຽງເດືອນລະ 600.000 ກີບຕໍ່ຄົນຕໍ່ປີ ແລະນັກສຶກສາຜູ້ທີ່ໄດ້ຮັບທຶນຍັງໄດ້ເຂົ້າເຝິກງານຢູ່ບໍລິສັດໄຟຟ້າຫົງສາປີລະ 1 ຄັ້ງ ເພື່ອໃຫ້ຜູ້ຮັບທຶນໄດ້ຮຽນຮູ້ ແລະເຝິກຝົນປະສົບການການເຮັດວຽກກັບບໍລິສັດ. ການລົງເຝິກງານຜູ້ຮັບທຶນຈະໄດ້ເບ້ຍລ້ຽງວັນລະ 39.000 ກີບຕໍ່ວັນ ແລະຄ່າເດີນທາງທ້ຽວລະ 200.000 ກີບ, ຫຼັງຈາກຈົບການສຶກສາຜູ້ຮັບທຶນຈະຕ້ອງໄດ້ເຂົ້າເປັນສັນຍາຈ້າງງານກັບບໍລິສັດໄຟຟ້າຫົງສາໃນໄລະເວລາ 2 ປີ.

ພາບບັນຍາກາດ

• 9:00: Start of the scholarships exhibition
• 9:00 - 9:30: Opening ceremony
• 09:45 - 11:15: Panel discussions on studying in Europe
• 11:30: First game (Nice gifts for the winners)
• 13:00 - 15:00: Presentations on scholarships programmes (DAAD, Stipendium Hungaricum, Erasmus+, Campus France)
• 15:30: Second Game
• 16:30: End of the Study in Europe Exhibition

ໃນວັນທີ 4 ພະຈິກ 2022ນີ້, ຫ້ອງການຄົ້ນຄວ້າວິທະຍາສາດ ມະຫາວິທະຍາໄລແຫ່ງຊາດ (ມຊ).ໄດ້ຈັດງານບຸນວິທະຍາສາດລະດັບຊາດຄັ້ງທີ IX ປະຈໍາປີ 2022 ຂຶ້ນທີ່ສະໂມສອນໃຫຍ່ ມຊ. ໂດຍການເປັນປະທ່ານຮ່ວມຂອງທ່ານ ປອ. ສິຣິອຸດົງ ສູນດາລາ ຮອງລັດຖະມົນຕີ ກະຊວງສຶກສາທິການ ແລະ ກີລາ, ທ່ານ ຮສ. ປອ. ອຸດົມ ພອນຄໍາເພັງ ອະທິການບໍດີ ມຊ. ເຂົ້າຮ່ວມມີທ່ານ ຮສ. ປອ. ສົມກຽດ ພຣະສີ ຮອງລັດຖະມົນຕີ ສຳນັກງານຍາຍົກລັດຖະມົນຕີ, ມີບັນດາທ່ານຮອງອະທິການບໍດີ ມຊ, ບັນດາທ່ານແຂກທີ່ຖືກເຊີນ, ບັນດາທ່ານຄະນະບໍດີ, ຫົວໜ້າຫ້ອງການ, ບັນດານັກຄົ້ນຄວ້າ, ພ້ອມດ້ວຍພະນັກງານ, ຄູ-ອາຈານທົ່ວ ມຊ. ເຂົ້າຮ່ວມ.

          ໃນພິທີທ່ານ ຮສ. ປອ. ອຸດົມ ພອນຄໍາເພັງ ໄດ້ກ່າວໃຫ້ຮູ້ວ່າ ການຈັດງານບຸນວິທະຍາສາດລະດັບຊາດຄັ້ງທີ IX ປະຈໍາປີ 2022 ແມ່ນເພື່ອສະເຫຼີມສະຫຼອງວັນສ້າງຕັ້ງ ມຊ ຄົບຮອບ 26 ປີ ( 5ພະຈິກ  1996 - 5 ພະຈິກ 2022) ແລະເພື່ອສ້າງໂອກາດໃຫ້ຄູ-ອາຈານ, ນັກຄົ້ນຄວ້າວິທະຍາສາດ, ນັກສຶກສາຂອງ ມຊ ແລະ ນັກວິທະຍາສາດ ຈາກພາກສ່ວນທີ່ກ່ຽວຂ້ອງໃນທົ່ວປະເທດໄດ້ມີໂອກາດມາເຜີຍແຜ່ຜົນການຄົ້ນຄວ້າ, ໂຄສະນາຜົນງານ ແລະ ແລກປ່ຽນປະສົບການເຊິ່ງກັນ ແລະກັນ ແລະທ່ານ ກ່າວອີກວ່າ ປັດຈຸບັນ ມຊ ປະກອບມີ 5 ວິທະຍາເຂດ, 13 ຄະນະວິຊາ, 2 ສະຖາບັນ, 6 ສູນຄົ້ນຄວ້າວິທະຍາສາດ, ມີຫຼັກສູດລະດັບປະລິນຍາຕີ 118 ຫຼັກສູດ, ລະດັບປະລິນຍາໂທ 67 ຫຼັກສູດ, ແລະລະດັບປະລິນຍາເອກ 6  ຫຼັກສູດ ແລະ ມີ 10  ກວ່າຫຼັກສູດ ທີ່ສອນເປັນພາສາຕ່າງປະເທດ ແລະ ສອນເປັນ 2 ພາສາ (ພາສາລາວ ແລະພາສາຕ່າງປະເທດ) ມີນັກສຶກສາທັງໝົດ 21,613 ຄົນ, ຍິງ 10,740 ຄົນ; ມີພະນັກງານ, ຄູ-ອາຈານທັງໝົດ 1,763 ຄົນ, ຍິງ 824 ຄົນ, ໃນນັ້ນ ມີນັກຄົ້ນຄວ້າວິທະຍາສາດ 1,100 ກວ່າຄົນ; ພະນັກງານ ແລະ ຄູອາຈານ ທີ່ຈົບປະລິນຍາເອກ 186 ຄົນ, ຍິງ 41 ຄົນ, ຈົບປະລິນຍາໂທ 956, ຍິງ 408 ຄົນ; ຕໍາແໜ່ງວິຊາການລະດັບສາດສະດາຈານ ມີ 5 ຄົນ, ຍິງ 1 ຄົນ, ຮອງສາດສະດາຈານ 87 ຄົນ, ຍິງ 13 ຄົນ.

  ໃນໂອກາດກ່າວເປີດພິທີ ທ່ານ ປອ. ສິຣິອຸດົງ ສູນດາລາ ໄດ້ກ່າວສະແດງຄວາມຍ້ອງຍໍຊົມເຊີຍ ມຊ. ທີ່ສາມາດຍາດໄດ້ຜົນສຳເລັດໃນຫຼາຍດ້ານທັງໃນເວທີລະດັບຊາດ ແລະສາກົນ, ໂດຍສະເພາະ ໄດ້ຮ່ວມມື ແລະ ຍາດແຍ່ງໄດ້ຫຼາຍແຫຼ່ງທຶນໃນການຄົ້ນຄວ້າ, ໄດ້ສົ່ງບົດຄົ້ນຄວ້າລົງວາລະສານລະດັບສາກົນເປັນຈຳນວນຫຼວງຫຼາຍ, ໄດ້ຈັດກອງປະຊຸມລະດັບຊາດ ແລະ ລະດັບສາກົນໄດ້ຫຼາຍຄັ້ງ; ພິເສດ ມຊ ໄດ້ຈັດໂຄງການ ແລະ ເປີດກອງປະຊຸມຮ່ວມກັບ ຄະນະຈັດຕັ້ງສູນກາງພັກ, ສະພາແຫ່ງຊາດ, ກະຊວງທີ່ກ່ຽວຂ້ອງ ແລະ ຢູ່ທ້ອງຖິ່ນຕ່າງໆ, ເພື່ອຄົ້ນຄວ້າ ແລະຫາວິທີແກ້ໄຂ 2 ວາລະແຫ່ງຊາດ. ທ່ານຍັງກ່າວອີກວ່າ: ເພື່ອສ້າງ ມຊ. ໃຫ້ກາຍເປັນມະຫາວິທະຍາໄລແຫ່ງການຄົ້ນຄວ້າວິທະຍາສາດ ຫຼື Research University; ເພື່ອສ້າງ ມຊ ໃຫ້ກາຍເປັນສະຖານການສຶກສາຊັ້ນສູງ ທີ່ຖືກຮັບຮູ້ໃນພາກພື້ນ ແລະ ສາກົນ, ເຮັດໃຫ້ Ranking ຂອງ ມຊ ຢູ່ໃນລຳດັບທີ່ດີຂຶ້ນເທື່ອລະກ້າວ; ເພື່ອພັດທະນາຄຸນນະພາບການການສຶກສາ, ພັດທະນາການຄົ້ນຄວ້າວິທະຍາສາດ ແລະ ນະວັດຕະກຳຂອງ ສປປ ລາວ ໃຫ້ໄດ້ມາດຕະຖານສາກົນ ແລະ ໃຫ້ໂລກຮັບຮູ້; ມັນມີຄວາມຈຳເປັນຫຼາຍສຳລັບ ມຊ. ທີ່ຄວນໃຫ້ມີຈຸດສຸມໃນການສ້າງຄະນະວິຊາ ແລະ ສະຖາບັນ, ປັບປຸງວຽກບໍລິຫານໃຫ້ມີປະສິດທິພາບ, ຕ້ອງສຸມໃສ່ສ້າງຊັບພະຍາກອນສ້າງຄວາມເປັນເລີດໃນການຄົ້ນຄວ້າວິທະຍາສາດ, ເຕັກໂນໂລຊີ ແລະນະວັດຕະກຳ; ສ້າງນັກຄົ້ນຄວ້າໃຫ້ມີຄວາມຫ້າວຫັນ, ມີຈັນຍາບັນ-ຈັນຍາທໍາສູງ, ມີຫົວຄິດປະດິດສ້າງ, ມີຄວາມກ້າ ເພື່ອພັດທະນາວິທະຍາສາດ, ເຕັກໂນໂລຊີ ແລະ ນະວັດຕະກຳ ທີ່ເປັນມິດຕໍ່ສິ່ງແວດລ້ອມ ແລະໃຫ້ປະໂຫຍດສຸງສຸດແກ່ທຸກຝ່າຍ (stakeholders).

  ໃນງານດັ່ງກ່າວໄດ້ມີນັກຄົ້ນຄວ້າຂຶ້ນບັນຍາຍຫຼາຍຫົວຂໍ້ ເປັນຕົ້ນແມ່ນຫົວຂໍ້ “ຍຸດທະສາດການພັດທະນາຕົວເມືອງ ແລະໂຄງຮ່າງພື້ນຖານໃນ ສປປ ລາວ ເພື່ອເຊື່ອມໂຍງກັບພາກພື້ນຕາມໜຶ່ງແລວໜຶ່ງເສັ້ນທາງ”, ຫົວຂໍ້ “ແນວທາງນະໂຍບາຍການພັດທະນາ ການຄົ້ນຄວ້າວິທະຍາສາດ ຂອງ ສປປ ລາວ”,  “ການຮັບມືກັບເງິນເຟີ້ ແລະການຫຼຸດຄ່າຂອງເງິນກີບໃນ ສປປ ລາວ”, “ຄວາມປອດໄພຂອງເຂື່ອນ ແລະການພັດທະນາເຂື່ອນພະລັງງານໄຟຟ້າພະລັງນໍ້າແບບຢືນຍົງໃນ ສ ປປ ລາວ. ນອກຈາກນັ້ນ, ຍັງມີການນໍາສະເໜີບົດຄວາມວິຊາການ ແລະຫົວຂໍ້ຕ່າງໆ ເປັນຕົ້ນແມ່ນ “ການຄຸ້ມຄອງ ແລະສົ່ງເສີມດ້ານພະລັງງານ ແລະບໍແຮ່”, “ການຄຸ້ມຄອງຊັບພະຍາກອນນໍ້າແບບຢືນຍົງ”, “ເຕັກໂນໂລຊີການເພີ່ມຜົນຜະລິດກະສິກໍາ”, “ການພັດທະນາເສດຖະກິດ ແລະວັດທະນະທໍາ”, ຄວາມ
ຫຼາກຫຼາຍທາງຊີວະພາບເພື່ອການພັດທະນາແບບຢືນຍົງ”, “ນະວັດຕະກໍາດ້ານວິສະວະກໍາ ແລະສະຖາປັດຕະຍະກໍາ” ແລະ “ເຕັກໂນໂລຊີດ້ານການສຶກສາ”.

  ໃນງານຍັງມີການວາງສະແດງຜົນງານການຄົ້ນຄວ້າຂອງແຕ່ລະພາກສ່ວນທົ່ວ ມຊ. ໃຫ້ບັນດາທ່ານແຂກທີ່ເຂົ້າຮ່ວມງານໄດ້ຮັບຊົມອີກດ້ວຍ.

ພາບບັນຍາກາດ

ໃນວັນທີ 3 ພະຈິກ 2022, ຜ່ານມາ ມະຫາວິທະຍາໄລແຫ່ງຊາດ ໄດ້ຈັດກອງປະຊຸມເຜີຍແຜ່ວຽກງານ ICT ແລະ E-Learning ທີ່ສະໂມສອນໃຫຍ່ມະຫາວິທະຍາໄລແຫ່ງຊາດ, ໂດຍການເປັນປະທານຂອງທ່ານ ຮສ. ປອ. ນາງ ສົມຈັນ ບຸນພັນມີ ຮອງອະທິການບໍດີ ມຊ ແລະ ທ່ານ ປອ. ຄຳແກ້ວ ຫານຊະນະ ຮອງຫົວໜ້າກົມການສຶກສາຊັ້ນສູງ ກະຊວງສຶກສາທິການ ແລະ ກີລາ, ບັນດາແຂກທີ່ຖືກເຊີນ, ພາກສ່ວນທີ່ກ່ຽວຂ້ອງ, ພະນັກງານ, ຄູ-ອາຈານ ແລະ ນ້ອງໆນັກສຶກສາຈາກຄະນະ ຄວສ , ຄວທ ເຂົ້າຮ່ວມ.

ໃນໂອກາດດັ່ງກ່າວ, ທ່ານ ຮສ. ປອ. ນາງ ສົມຈັນ ບຸນພັນມີ ກໍໄດ້ມີຄຳເຫັນໃນທີ່ປະຊຸມ ເຊິ່ງທ່ານໄດ້ກ່າວວ່າ: ການຮຽນ-ການສອນແບບ E-Learning ຖືເປັນວຽກງານຫນື່ງທີ່ສຳຄັນ ເພື່ອຫັນສູ່ການສຶກສາແບບທັນສະໄໝ, ພາຍຫລັງທີ່ຫລາຍປະເທດທົ່ວໂລກປະເຊີນກັບການແຜ່ລະບາດຂອງພະຍາດໂຄວິດ-19 ໃນໄລຍະຜ່ານມາ ເຮັດໃຫ້ບໍ່ສາມາດດຳເນີນການຮຽນ-ການສອນແບບເຊິ່ງໜ້າໄດ້, ດັ່ງນັ້ນ ຈື່ງໄດ້ປັບປ່ຽນມາເປັນການຮຽນ-ການສອນແບບອອນລາຍຜ່ານການນຳໃຊ້ສື່ຕ່າງໆ ເພື່ອປັບຕົວໃຫ້ເຂົ້າສະຖານນະການທີ່ເກີດຂຶ້ນ, ສຳລັບ ມະຫາວິທະຍາໄລແຫ່ງຊາດ ກໍມີໜ່ວຍງານທີ່ຮັບຜິດຊອບວຽກງານ E-Learning ທີ່ຂຶ້ນກັບຫ້ອງການ ວິຊາການ ໂດຍການສົມທົບກັບ ສູນເຕັກໂນໂລຊີ ແລະ ຂໍ້ມູນຂ່າວສານ. ສະນັ້ນ ບໍ່ວ່າສະຖານະການໂລກຈະມີການປ່ຽນແນວໃດການສຶກສາກໍບໍ່ໄດ້ຢຸດນີ້ງ ແຕ່ກົງກັນຂ້າມຍິ່ງຕ້ອງໄດ້ພັດທະນາໄດ້ເລື້ອຍໆ ແລະມີຄຸນະພາບ.

ພ້ອມນັ້ນ ຜູ້ເຂົ້າຮ່ວມຍັງໄດ້ຮັບຟັງການເຜີຍແຜ່ໃນຫົວຂໍ້: “Covid-19 and University Distance Education Center Roles & Responsibilities”; ຫົວຂໍ້: ນິຕິກຳ/ນະໂຍບາຍ ທາງດ້ານ E-Learning ຂອງສະຖາບັນການສຶກສາຊັ້ນສູງ ແລະ ທິດທາງການພັດທະນາ ແລະການນຳໃຊ້ E-Learning ໃນອະນາຄົດ; ນິຕິກຳ/ນະໂນບາຍ/ຄູ່ມືທາງດ້ານ E-Learning ຂອງມະຫາວິທະຍາໄລແຫ່ງຊາດ ແລະ ການນຳໃຊ້ E-Learning ໃນອະນາຄົດ ແລະ ຫົວຂໍ້: E-Learning best practices and latest trends.

ພາບບັນຍາກາດ