ໃນຕອນເຊົ້າວັນທີ 19 ຕຸລາ 2022 ນີ້, ສະຖາບັນຂົງຈື(ສຂຈ) ມະຫາວິທະຍາໄລແຫ່ງຊາດ(ມຊ) ຈັດພິທີສະເຫຼີມສະຫຼອງວັນສະຖາບັນຂົງຈືໂລກ, ສະເຫຼີມສະຫຼອງວັນຄູແຫ່ງຊາດຄົບຮອບ 28 ປີ ແລະ ຈັດພິທີໄຂສົກຮຽນໃໝ່ ຫຼັກສູດປະລິຍາຕີ, ເຂົ້າຮ່ວມໃນພິທີ ມີ  ທ່ານ ປອ.  ສຸລິອຸດົງ ສູນດາລາ  ຮອງລັດຖະມົນຕີ ກະຊວງສືກສາທິການ ແລະກີລາ, ທ່ານ ຈຽງຈ້າຍຕົງ ເອກອັກຄະລັດຖະທູດ ສປ. ຈີນ  ປະຈຳ ລາວ, ທ່ານ ສຈ. ປອ. ຮຸ່ງເພັດ ຈັນທະວົງ ຮອງອະທິການບໍດີ ມຊ, ມີຜູ້ອຳນວຍການສະຖາບັນຂົງຈື ຝ່າຍລາວ, ຝ່າຍຈີນ, ແຂກຖືກເຊີນ ຈາກພາກສ່ວນຕ່າງໆທີ່ກ່ຽວຂ້ອງ ພ້ອມດ້ວຍພະນັກງານ, ຄູ-ອາຈານ ແລະນັກສືກສາເຂົ້າຮ່ວມ.

ໃນໂອກາດນີ້, ທ່ານ ຫຼົວໝິງ ຜູ້ອຳນວຍການສະຖາບັນຂົງຈື ຝ່າຍຈີນ ໄດ້ຂຶ້ນລາຍງານປະຫວັດຄວາມເປັນມາຂອງວັນຂົງຈືໂລກ ຊຶ່ງທ່ານ ໄດ້ໃຫ້ຮູ້ວ່າ: ສະຖາບັນຂົງຈືແມ່ນອົງການຈັດຕັ້ງການສືກສາທີ່ບໍ່ຫວັງຜົນກຳໄລທີ່ສ້າງຕັ້ງຂຶ້ນໃນຮູບແບບຝ່າຍຈີນ ຮ່ວມມືກັບຕ່າງປະເທດ ແນໃສ່ເຜີຍແຜ່ພາສາຈີນ ແລະຊຸກຍູ້ໃຫ້ປະຊາຊົນທົ່ວໂລກ ໄດ້ເຂົ້າເຖິງພາສາ ແລະວັດທະນະທຳຂອງຈີນ ແລະເພື່ອສົ່ງເສີມການແລກປ່ຽນວັນນະຄະດີ ລະຫ່ວາງຈີນ ກັບຕ່າງປະເທດໃຫ້ເຂົ້າໃຈກັນຫຼາຍຂຶ້ນ. ເຊິ່ງໃນແຕ່ລະປີໄດ້ຈັດຫຼາຍກິດຈະກໍາ ເຊັ່ນ: ການແຂ່ງຂັນພາສາຈີນນັກສຶກສາທົ່ວໂລກ, ຂົວພາສາຈີນ, ແຂ່ງຂັນວິດີໂອສັ້ນ, ແຂ່ງຂັນຮ້ອງເພງຈີນ, ແຂ່ງຂັນຂຽນຕົວໜັງສືຈີນ ການອ່ານກະວີຈີນເປັນຕົ້ນ;  ທັງນີ້ກໍເພື່ອ ແນໃສ່ເຮັດໃຫ້ປະຊາຊົນສອງຊາດເຂົ້າໃຈເຊິ່ງກັນ ແລະກັນ.

 ທ່ານ ຄຳຮຸ່ງ ຈັນທະວົງ ຜູ້ອຳນວຍການສະຖາບັນຂົງຈືຝ່າຍລາວ ໄດ້ຂຶ້ນຜ່ານບົດສະຫຼຸບການເຄື່ອນໄຫວວຽກງານການສຶກສາປະຈຳສົກຮຽນ 2021-2022 ແລະຜ່ານທິດທາງແຜນການເຄື່ອນໄຫວວຽກງານ ປະຈຳສົກຮຽນ 2022-2023 ເຊິ່ງທ່ານໄດ້ຍົກໃຫ້ເຫັນ ພາລະບົດບາດຂອງສະຖາບັນຂົງຈື ໃນການຮ່ວມມື ແລະແລກປ່ຽນທາງດ້ານການສຶກສາ ການສ້າງຫຼັກສູດເຝິກອົບຮົມລະຫວ່າງປະເທດລາວ ແລະ ສປ.ຈີນ ເວົ້າລວມ; ເວົ້າສະເພາະ ແມ່ນສະຖາບັນຂົງຈື ມຊ ແລະມະຫາວິທະຍາໄລຊົນເຜົ່າກວາງຊີ, ເພື່ອພັດທະນາຊັບພະຍາກອນມະນຸດ ສະຖາບັນຂົງຈື ທີ່ ມຊ, ເຊິ່ງແມ່ນເວທີແລກປ່ຽນວັດທະນະທໍາລະຫວ່າງສອງຊາດລາວ-ຈີນ, ແມ່ນແຫຼ່ງສົ່ງເສີມການຮຽນ-ການສອນພາສາຈີນໃຫ້ແກ່ນັກຮຽນ-ນັກສຶກສາ ແລະຜູ້ສົນໃຈຮຽນພາສາຈີນ, ແມ່ນສະຖາບັນໜຶ່ງ ທີ່ມີກົງຈັກການຈັດຕັ້ງທຽບເທົ່າກັບຄະນະວິຊາ, ໄດ້ຈັດການຮຽນ-ການສອນ ບໍາລຸງພາສາຈີນໃຫ້ແກ່ນັກສຶກສາ ແລະ ຜູ້ທີ່ສົນໃຈຢາກຮຽນພາສາຈີນ. ສິ່ງໜຶ່ງທີ່ເອກອ້າງທະນົງໃຈ ແລະເປັນໃບໜ້າໃບຕາໃຫ້ແກ່ ມຊ ໃນເວທີສາກົນ ກໍແມ່ນສະຖາບັນຂົງຈື ສາມາດເປີດການຮຽນ-ການສອນລະດັບປະລິນຍາຕີ ສາຂາ ຄູພາສາຈີນ ໂດຍຮ່ວມມືກັບ ຄະນະອັກສອນສາດ ແລະຄະນະສຶກສາສາດ ເຊິ່ງເປັນສະຖາບັນແຫ່ງທໍາອິດຂອງໂລກ ທີ່ມີຫຼັກສູດປະລິນຍາຕີເປັນຂອງຕົນເອງ. ນອກຈາກການຮຽນ-ການສອນແລ້ວ, ຍັງຖືໄດ້ວ່າ ສະຖາບັນຂົງຈື ເປັນປະຕູປ່ອງຢ້ຽມໜຶ່ງທີ່ເຮັດວຽກການພົວພັນຮ່ວມມື ກັບ ສປ.ຈີນ ຢ່າງໃກ້ຊິດ, ເຊິ່ງສະແດງໃຫ້ເຫັນຢູ່ບ່ອນວ່າ: ແຂກຈາກ ສປ.ຈີນ ທີ່ມາຢ້ຽມຢາມ ມຊ ແຕ່ລະຄະນະສ່ວນຫຼາຍແມ່ນສະເໜີມາຢ້ຽມຢາມ ສະຖາບັນຂົງຈື. ແຕ່ປີ 2010 ມາຮອດປັດຈຸບັນ ສະຖາບັນຂົງຈື ໄດ້ສໍາເລັດການສິດສອນພາສາຈີນໃຫ້ນັກສຶກສາລາວແລ້ວ 25 ຊຸດ ຈໍານວນ 14.344ຄົນ.

ຈາກນັ້ນ ໄດ້ຮັບຟັງການໂອ້ລົມຈາກ ທ່ານ ສຸລິອຸດົງ ສູນດາລາ ຮອງລັດຖະມົນຕີ ກະຊວງສືກສາທິການ ແລະກີລາ ເພື່ອເປັນເຂັມຊີ້ທິດເຍືອງທາງໃຫ້ສະຖາບັນຂົງຈື ແລະຕອນທ້າຍ ໄດ້ມີພິທີເຊັນສັນຍາສືບຕໍ່ມອບທຶນການສຶກສາຂອງທະນາຄານລາວ-ຈີນໃຫ້ສະຖາບັນຂົງຈືຕື່ມອີກ.

ພາບບັນຍາກາດ

ໃນຕອນເຊົ້າ ວັນທີ 30 ກັນຍາ 2022 ທີ່ໂຮງຮຽນ ພອນສະຫວັນ ແລະຊົນເຜົ່າກຽມມະຫາວິທະຍໄລ(ຮພຊ) ມະຫາວິທະຍາໄລແຫ່ງຊດ(ມຊ) ໄດ້ຕ້ອນຮັບການມາຢ້ຽມ ຂອງຄະນະຜູ້ແທນ ຈາກມະຫາວິທະຍາໄລເຕັກນິກນະຄອນດານັງ ສສ ຫວຽດນາມ,  ນຳໂດຍ ທ່ານ ປອ. ຮວາງຢູ້ງ ຮອງຜູ້ອໍານວຍການ ມະຫາວິທະຍາໄລເຕັກນິກນະຄອນດານັງ ພ້ອມດ້ວຍຄະນະ . ໂດຍມີທ່ານ ຮສ. ປອ. ຄໍາພຸດ ພົມມະສອນ ຜູ້ອໍານວຍການ ຮພຊ ພ້ອມດ້ວຍຄະນະ ແລະບັນດາຫົວໜ້ວຍໜ່ວຍງານ, ພະນັກງານ, ຄູ-ອານຈານທີ່ກ່ຽວຂ້ອງໃຫ້ການຕ້ອນຮັບ ທີ່ຫ້ອງປະຊຸມ ຂອງ ຮພຊ.

          ໃນໂອກາດນີ້ ທ່ານ ຮສ. ປອ. ຄໍາພຸດ ພົມມະສອນ ໄດ້ກ່າວຕ້ອນຮັບ ແລະກ່າວສະແດງຄວາມຍິນດີ ຕໍ່ການມາຢ້ຽມຢາມຂອງ ທ່ານ ປອ. ຮວາງຢູ້ງ ຮອງຜູ້ອຳນວຍການ ມະຫາວິທະຍາໄລເຕັກນິກນະຄອນດານັງ ພ້ອມດ້ວຍຄະນະຢ່າງອົບອຸ່ນ, ພ້ອມທັງລາຍງານສະພາບລວມໂດຍຫຍໍ້ ຂອງ ຮພຊ ໃຫ້ຄະນະຜູ້ແທນດັ່ງກ່າວຮັບຊາບ. ໂອກາດດຽວກັນ ທ່ານ ປອ. ຮວາງຢູ້ງ ກໍໄດ້ກ່າວຈຸດປະສົງການມາຢ້ຽມຢາມຄັ້ງນີ້, ແມ່ນເພື່ອຮັດແໜ້ນຄວາມສາມັກຄີ, ການແລກປ່ຽນບົດຮຽນດ້ານການຄຸ້ມຄອງ ການຮຽນ-ການສອນ ພ້ອມທັງໄດ້ສະເໜີໃຫ້ທຶນການສຶກສາ ຂອງມະຫາວິທະຍາໄລເຕັກນິກດານັງ ແກ່ນ້ອງນັກຮຽນ ຮພຊ. ຈຳນວນ 5 ທຶນ ເປັນມູນຄ່າ 500 ລ້ານດົງ (ສະກຸນເງິນຫວຽດນາມ);  ນອກຈາກນີ້ ຍັງໄດ້ສະໜັບສະໜູນທຶນການສຶກສາ ເພີ່ມເຕີມ ເປັນການຍົກເວັ້ນຄ່າຮຽນ, ຄ່າຫໍພັກ ແລະອຸປະກອນການຮຽນ ແຕ່ກິນຢູ່ກຸ້ມຕົນເອງ;  ຈາກນັ້ນ ທ່ານ ກໍໄດ້ມອບບັດເຊີນ, ເຊີນທ່ານຜູ້ອໍານວຍການ ຮພຊ. ມຊ  ເຂົ້າຮ່ວມພິທີສະເຫຼີມ-ສະຫຼອງວັນສ້າງຕັ້ງມະຫາວິທະຍາໄລເຕັກນິກນະຄອນດານັງ ທີ່ຈະໄດ້ຈັດຂຶ້ນໃນວັນທີ 20 ພະຈິກ 2022 ນີ້ ແລະຕອນທ້າຍ ທັງສອງຝ່າຍຍັງໄດ້ແລກປ່ຽນຂອງທີ່ລະນຶກເຊິ່ງກັນ ແລະກັນອີກດ້ວຍ.

 ສະຖາບັນພັດທະນາຊັບພະຍາກອນມະນຸດ ລາວ-ຍີ່ປຸ່ນ (ສລຍ) ຮ່ວມກັບກົມສົ່ງເສີມວິສາຫະກິດຂະໜາດນ້ອຍ ແລະ ກາງ ກະຊວງອຸດສາະຫະກຳ ແລະການຄ້າ ແລະອົງການສົ່ງເສີມການຄ້າຍີ່ປຸ່ນ ປະຈຳນະຄອນຫຼວງວຽງຈັນ ໂດຍໄດ້ຮັບການສະໜັບສະໜູນຈາກອົງາກນ ໄຈກາ ປະຈຳລາວ ຈັດງານສົ່ງເສີມການພັດທະນາທຸລະກິດ ເພື່ອປະກອບສ່ວນແກ້ໄຂບັນຫາທາງສັງຄົມ ພາຍໃຕ້ໂຄງການ LJISUSU Scale-up ຈັດຂຶ້ນໃນຮູບແບບອອນລາຍ ແລະ ແບບເຊິ່ງໜ້າ ໃນວັນທີ 28 ກັນຍາ 2022 ຜ່ານມານີ້, ຢູ່ທີ່ ສລຍ ໂດຍມີທ່ານ ສຈ.ປອ. ຮຸ່ງເພັດ ຈັນທະວົງ ຮອງອະທິການບໍດີ  ມະຫາວິທະຍາໄລແຫ່ງຊາດ, ທ່ານ ດຣ. ບຸນເພັງ ສີບຸນເຮືອງ ຫົວໜ້າກົມສົ່ງເສີມວິສາຫະກິດຂະໜາດນ້ອຍ ແລະ ກາງ,  ທ່ານ ຢາສູຊິ ກິກູຈິ ທີ່ປືກສາອົງການສົ່ງເສີມການຄ້າຍີ່ປຸ່ນ ປະຈຳນະຄອນຫຼວງວຽງຈັນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

            ໂຄງການ LJI SUSU Scale-up ເປັນໂຄງການພັດທະນາທຸລະກິດ ເພື່ອສົ່ງເສີມການຂະຫຍາຍຕົວຂອງເສດຖະກິດ-ສັງຄົມໃນລາວ ມີຈຸດປະສົງເພື່ອສ້າງທ່າແຮງໃນການແຂ່ງຂັນ ແລະການສ້າງເຄືອຂ່າຍທາງທຸລະກິດໃຫ້ບັນດາຫົວໜ່ວຍທຸລະກິດ ເຊິ່ງຕິດພັນກັບບັນດາຫົວໜ່ວຍທຸລະກິດທັງພາຍໃນ ແລະຕ່າງປະເທດ, ເປັນຕົ້ນແມ່ນປະເທດຍີ່ປຸ່ນ ເຊິ່ງປີ 2021 ຜ່ານມາໄດ້ມີ 4 ບໍລິສັດຈາກລາວເຂົ້າຮ່ວມການແຂ່ງຂັນແຜນທຸລະກິດໃນໂຄງການດັ່ງກ່າວ ທີ່ໄດ້ຮັບການສະໜັບສະໜູນຊ່ວຍເຫຼືອທາງການເງິນຈາກອົງການໄຈກາ ປະຈຳລາວ ເພື່ອດໍາເນີນແຜນການຈັດຕັ້ງປະຕິບັດແຜນດຳເນີນທຸລະກິດໃນໄລຍະ 6 ໃຫ້ປາກົດຜົນເປັນຈິງ ແນໃສ່ເພື່ອຊຸກຍູ້-ສົ່ງເສີມການພັດທະນາທຸລະກິດໃນຂົງເຂດດັ່ງກ່າວໃຫ້ມີການຂະຫຍາຍຕົວ ເພື່ອປະກອບສ່ວນເຂົ້າໃນການແກ້ໄຂບັນຫາທາງເສດຖະກິດ-ສັງຄົມຂອງລາວໃຫ້ຫຼາຍຂຶ້ນ.

            ພາຍໃນງານໄດ້ມີການສົນທະນາແລກປ່ຽນ ແລະນຳສະເໜີຄວາມຮູ້, ປະສົບການເຊິ່ງກັນ ແລະ ກັນຂອງບັນດາຜູ້ຕາງໜ້າຈາກບໍລິສັດຕ່າງໆ ໃນນັ້ນ ບໍລິສັດ Music securities lnc ຈາກປະເທດຍີ່ປຸ່ນ ໄດ້ຮ່ວມບັນຍາຍໃນຫົວຂໍ້ “ປັດໄຈສຳຄັນທີ່ມີຜົນຕໍ່ກັບນັກລົງທຶນ ແລະບໍລິສັດໂລກາ ຈຳກັດ”  ເຊິ່ງເປັນບໍລິສັດຂອງຄົນລາວທີ່ປະສົບຜົນສຳເລັດ ໄດ້ແລກປ່ຽນປະສົບການຄວາມຮູ້ ໃນຫົວຂໍ້ “ຍຸດທະສາດການຂະຫຍາຍຕົວ ແລະການຂະຫຍາຍເຄືອຂ່າຍທາງທຸລະກິດ” ນອກນີ້, ຍັງໄດ້ມີການມອບລາງວັນພິເສດໃຫ້ແກ່ບໍລິສັດທີ່ມີຄວາມພະຍາມໃນການສ້າງຄຸນຄ່າໃຫ້ກັບສັງຄົມລາວ ເຊິ່ງປະກອບມີ ລາງວັນຜູ້ປະກອບການດີເດັ່ນ ແລະລາງວັນຮູບແບບທຸລະກິດທີ່ສ້າງຄຸນຄ່າແກ່ສັງຄົມດີເດັ່ນ ໃຫ້ແກ່ບໍລິສັດທີ່ຖືກຄັດເລືອກຈຳນວນໜຶ່ງຕື່ມອີກ.

ພາບບັນຍາກາດ