ຄະນະເສດຖະສາດ ແລະ ບໍລິຫານທຸລະກິດ (ຄສບ) ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີສະຫຼຸບການຮຽນ-ການສອນສົກສຶກສາ 2023-2024, ເປີດສົກຮຽນໃໝ່ 2024-2025 ແລະ ມອບ-ຮັບໃບປະກາສະນີຍະບັດໃຫ້ຜູ້ສໍາເລັດການສຶກສາ ປະຈໍາສົກສຶກສາ 2023-2024 ຂຶ້ນໃນວັນທີ 23 ຕຸລາ ນີ້ ທີ່ຄະນະດັ່ງກ່າວ ໂດຍການເຂົ້າຮ່ວມ ແລະ ມອບໃບປະກາສະນີຍະບັດ ຂອງທ່ານ ຮສ. ປອ. ເດຊານຸລາດ ແສນດວງເດດ ວ່າການແທນອະທິການບໍດີ ມຊ, ມີຮອງຄະນະບໍດີ ຄສບ, ຄູ-ອາຈານ, ນັກສຶກສາ, ຜູ້ປົກຄອງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານ ນາງ ຮສ. ວາດສະໜາ ຈັນທະນະສິນ ຮອງຄະນະບໍດີ ຄສບ ໄດ້ຜ່ານບົດສະຫຼຸບການຈັດຕັ້ງປະຕິບັດແຜນການສົກປີ 2023-2024 ແລະ ທິດທາງແຜນການ ສົກປີ 2024-2025 ວ່າ: ທົ່ວ ຄສບ ມີຄູອາຈານ-ພະນັກງານທັງໝົດ 86 ຄົນ ຍິງ 45 ຄົນ ຍັງສຶກສາຮຽນຕໍ່ຢູ່ຕ່າງປະເທດ 5 ທ່ານ ຍິງ 4 ທ່ານ; ຄູ-ອາຈານມີວຸດທິການສຶກສາໃນລະດັບປະລິນຍາເອກ 15 ຄົນ ຍິງ 3 ຄົນ, ໃນລະດັບປະລິນຍາໂທມີ 69 ຄົນ ຍິງ 41 ຄົນ ແລະ ປະລິນຍາຕີມີ 2 ຄົນ ເປັນຍິງ 1 ຄົນ; ຄູ-ອາຈານ ມີວິທະຍານາມມະຍົດຄື: ຮອງສາດສະດາຈານ ມີ 13 ຄົນ ຍິງ 5 ຄົນ, ອາຈານມີ 37 ຄົນ ຍິງ 21 ຄົນ ແລະ ຜູ້ຊ່ວຍອາຈານມີ 21 ຄົນ ຍິງ 13 ຄົນ. ພ້ອມນັ້ນ, ທົ່ວ ຄສບ ມີນັກສຶກສາທັງໝົດ 4.125 ຄົນ ຍິງ 2.777 ຄົນ. ໃນນີ້, ມີສຶກສາ ປະລິນຍາເອກ 12 ຄົນ ຍິງ 4 ຄົນ, ນັກສຶກສາ ປະລິນຍາໂທ 157 ຄົນ ຍິງ 74 ຄົນ, ນັກສຶກສາປະລິນຍາຕີ 3.954 ຄົນ ຍິງ 2.700 ຄົນ.

ໃນສົກຮຽນ ປີ 2023-2024 ພະນັກງານ, ຄູ-ອາຈານ ມີແນວຄິດຫຼັກໝັ້ນການເມືອງດີ, ມີຄວາມເຊື່ອໝັ້ນຕໍ່ການນໍາພາ, ມີແນວຄິດອຸ່ນອ່ຽນທຸ່ນທ່ຽງດີ, ມີຄວາມດຸໝັ່ນຄົ້ນຄວ້າ ແລະ ພັດທະນາຕົນເອງ, ມີຄວາມສາມັກຄີເປັນເອກກະພາບກັນດີ, ປະກອບສ່ວນທຸກການເຄື່ອນໄຫວວຽກງານຂອງການຈັດຕັ້ງມອບໝາຍໃຫ້; ໄດ້ເອົາໃຈໃສ່ສຶກສາອົບຮົມແນວຄິດການເມືອງໃຫ້ຄູ-ອາຈານ, ນັກສຶກສາໃນການປະຕິບັດຕາມແນວທາງຂອງພັກ ແລະ ກົດໝາຍຂອງລັດຢ່າງເຂັ້ມງວດ ຊຶ່ງສະແດງອອກເຊັ່ນ: ຄູ-ອາຈານ ໄດ້ມີຜົນການໃນການສອນດີ-ສອນເກັ່ງ ແລະ ນັກສຶກສາໄດ້ມີຜົນງານໃນການຮຽນດີຮຽນເກັ່ງ.

ສໍາລັບວຽກງານວິຊາການ: ວຽກງານປະລິນຍາຕີ ແລະ ຫຼັງປະລິນຍາຕີ ຄສບ ໄດ້ຈັດຕັ້ງການຮຽນ-ການສອນ ໄປຕາມປະຕິທິນການສຶກສາຂອງ ມຊ ວາງອອກ; ໄດ້ສໍາເລັດການປະເມີນ 10 ຫຼັກສູດ ເພື່ອເປັນບ່ອນອີງໃນການປັບປຸງຄືນ; ຄສບ ໄດ້ຮັບການຢັ້ງຢືນ ແລະ ຜ່ານການປະເມີນມາດຕະຖານຄຸນນະພາບຂອງ 3 ຫຼັກສູດຄື: ການຄ້າ, ບໍລິຫານທຸລະກິດ ແລະ ເສດຖະສາດພັດທະນາ ແລະ ວາງແຜນ ຈາກເຄືອຄ່າຍມະຫາວິທະຍາໄລອາຊຽນ (AUN); ຈັດ ແລະ ເຂົ້າຮ່ວມການຝຶກອົບຮົມ 24 ຄັ້ງ ໃນຫົວຂໍ້ຕ່າງໆ (Leadership, Gender, ການນໍາໃຊ້ເຄື່ອງມືທາງເສດຖາມິຕິ, ຫຼັກການເຮັດຄົ້ນຄວ້າ, AI, ການນໍາໃຊ້ເຄື່ອງມື Online, ການວາງແຜນການເງິນກ່ອນໄວກະສຽນ, ສອນນ້ອງສ້າງອອມ ປັບປຸງຫຼັກສູດຄືນ, ການກວດສອບທາງບັນຊີ; ຈັດກອງປະຊຸມສໍາມະນາທາງວິຊາການພາຍໃນ ຈໍານວນ 59 ຄັ້ງ ແລະ ຢູ່ຕ່າງປະເທດ ຈຳນວນ 18 ຄັ້ງ; ໄດ້ຈັດການສອບເສັງເພື່ອຄັດເລືອກເອົາ ນັກສຶກປະລິນຍາຕີໄປຮຽນຕໍ່ໃນຫຼັກສູດ 2+2 ຢູ່ ເມືອງໂຕກຽວ ປະເທດຍີ່ປຸ່ນ; ໃນແຕ່ລະປີ ຄສບ ໄດ້ລົງໄປໂຄສະນາເຜີຍແຜ່ຫຼັກສູດໃຫ້ກັບນັກສຶກສາ ທີ່ໂຮງຮຽນມັດທະຍົມຕອນປາຍຕ່າງໆ ເພື່ອກຽມພ້ອມເລືອກສາຂາວິຊາຮຽນ ແລະ ອື່ນໆ.

ໃນສົກຮຽນ 2023-2024 ມີນັກສຶກສາ ປາລິນຍາໂທ ເສດຖະສາດຮຸ່ນທີ 15 ບໍລິຫານທຸລະກິດ ແລະ ການບັນຊີ ຮຸ່ນທີ 14 ໄດ້ສໍາເລັດການສຶກສາທັງໝົດ 150 ຄົນ ຍິງ 76 ຄົນ; ນັກສຶກສາປະລິນຍາເອກ 14 ຄົນ, ສໍາເລັດການສຶກສາ 2 ຄົນ. ສ່ວນນັກສຶກສາປະລິນຍາຕີໄດ້ສໍາເລັດການສຶກສາມີຈໍານວນ 969 ຄົນ ຍິງ 678 ຄົນ. ໃນນັ້ນ, ນັກສຶກສາຕ່າງປະເທດ 17 ຄົນ ຍິງ 10 ຄົນ, ພະ 2 ອົງ. ໃນນັ້ນ, ນັກສຶກສາທີ່ໄດ້ຮັບກຽດນິຍົມປະຈໍາຊຸດສຶກສາປີ 2020-2024 ມີທັງໝົດ 17 ຄົນ ຍິງ 14 ຄົນ; ມີນັກສຶກສາຊັ້ນປະລິນຍາຕີ ແລະ ປະລິນຍາໂທ ໄດ້ຮັບການຍ້ອງຍໍຈາກຄະນະບໍດີ ໃນຜົນງານຮຽນດີ-ຮຽນເກັ່ງ, ບົດດີເດັ່ນ ແລະ ປະກອບສ່ວນເຄື່ອນໄຫວກິດຈະກຳນອກຫຼັກສູດດີເດັ່ນເປັນຕົ້ນ. ໃນໂອກາດນີ້, ທ່ານ ເດຊານຸລາດ ແສນດວງເດດ ຍັງໄດ້ໃຫ້ກຽດໂອ້ລົມຕໍ່ພິທີດັ່ງກ່າວຕື່ມອີກ.

ພາບບັນຍາກາດ

ມະຫາວິທະຍາໄລແຫ່ງຊາດ (ມຊ) ຮ່ວມກັບມູນນິທິອາຊຽນ (ASEAN Foundation) ແລະ ບໍລິສັດຜະລິດໂປຣແກມບໍລິຫານທຸລະກິດ SAP ໄດ້ຈັດງານແຂ່ງຂັນວິທະຍາສາດຂໍ້ມູນອາຊຽນ ຮອບຊີງຊະນະເລີດລະດັບພາກພື້ນ ປີ 2024 ພາຍໃຕ້ຫົວຂໍ້: ການພັດທະນາທີ່ຍືນຍົງ ຂຶ້ນໃນວັນທີ 22 ຕຸລານີ້ ທີ່ສູນການຮ່ວມມືສາກົນ ແລະ ການຝຶກອົບຮົມ (ICTC) ນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ປອ. ສິຣິອຸດົງ ສູນດາລາ ຮອງລັດຖະມົນຕີກະຊວງສຶກສາທິການ ແລະ ກິລາ, ມີທ່ານ ຮສ. ປອ. ສິນທະວອນ ດາລາວົງ ຮອງອະທິການບໍດີ ມຊ, ມີທ່ານ ປິຕິ  ສິຣິແສນງາມ ຜູ້ອໍານວຍການມູນນິທິອາຊຽນ, ມີຜູ້ອໍານວຍການພາກພື້ນ ຮັບຜິດຊອບວຽກງານຊ່ວຍສັງຄົມສົງເຄາະຂອງວິສາຫະກິດໃນຂົງເຂດອາຊີຕາເວັນອອກ, ປາຊີຟິກ, ສປຈີນ, ມີເອກອັກຄະຣາຊະທູດ/ຜູ້ຕາງໜ້າຈາກສະຖານທູດຂອງບັນດາປະເທດສະມາຊິກອາຊຽນ ປະຈໍາ ລາວ, ມີຕາງໜ້ານັກສຶກສາຈາກ 10 ປະເທດສະມາຊິກອາຊຽນ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ໃນໄລຍະຜ່ານມາ ມຊ ໄດ້ຮ່ວມມືກັບພາກສ່ວນກ່ຽວຂ້ອງຈັດງານດັ່ງກ່າວຂຶ້ນໃນລະດັບປະເທດ ໃນປີ 2019 ແລະ ປີ 2023. ການຈັດງານຄັ້ງນີ້, ແມ່ນການວິເຄາະຂໍ້ມູນດ້ານເສດຖະກິດ-ສັງຄົມ ເພື່ອໄຈ້ແຍກບັນຫາທີ່ປະເທດສະມາຊິກອາຊຽນກຳລັງປະເຊີນຢູ່ ແລະ ຈາກ 18 ເປົ້າໝາຍຂອງອົງການສະຫະປະຊາຊາດ (ສປຊ). ໃນນັ້ນ, ໄດ້ເລືອກເອົາ 6 ເປົ້າໝາຍການພັດທະນາແບບຍືນຍົງຂອງອົງການ ສປຊ ແລະ ນໍາສະເໜີວິທີແກ້ໄຂບັນຫາດັ່ງກ່າວໂດຍໝູນໃຊ້ເຕັກໂນໂລຊີເຂົ້າຊ່ວຍ ຊຶ່ງ 6 ເປົ້າໝາຍທີ່ນໍາມາວິເຄາະປະກອບມີ: (1) SDG 2 – Zero Hunger, ເປົ້າຫມາຍທີ2: ລືບລ້າງຄວາມອຶດຫິວ, ບັນລຸການຄໍ້າປະກັນ ສະບຽງອາຫານ ແລະ ປັບປຸງດ້ານໂພຊະນາການ ແລະ ສົ່ງເສີມການກະສິກໍາແບບຍືນຍົງ (2) SDG 3 – Good Health and Well-Being, ເປົ້າຫມາຍທີ3: ຮັບປະກັນການມີສຸຂະພາບທີ່ດີ ແລະ ສົ່ງເສີມ ຊີວິດການເປັນຢູ່ທີ່ດີຂອງທຸກຄົນ ທຸກເກນອາຍຸ (3) SDG 6 – Clean Water and Sanitation, ເປົ້າຫມາຍທີ 6: ຮັບປະກັນໃຫ້ມີນໍ້າໃຊ້ ແລະ ການບໍລິຫານນໍ້າ ແບບຍືນຍົງ ແລະ ສຸຂະອະນາໄມສໍາລັບຫມົດທຸກຄົນ (4) SDG 11 – Sustainable Cities and Communities, ເປົ້າຫມາຍທີ11: ສ້າງຕົວເມືອງ ແລະ ທີ່ພັກອາໃສຂອງປະຊາຊົນ ໃຫ້ທົ່ວເຖີງ, ປອດໄພ, ຫມັ້ນຄົງທົນທານ ແລະ ຍືນຍົງ (5) SDG 12 – Responsible Consumption and Production, ເປົ້າຫມາຍທີ12: ຮັບປະກັນຮູບແບບການອຸປະໂພກບໍລິໂພກ ແລະ ການຜະລິດ ໃຫ້ມີຄວາມຍືນຍົງ (6). SDG 13 – Climate Action. ເປົ້າຫມາຍທີ13: ເອົາມາດຕາການອັນຮີບດ່ວນເພື່ອແກ້ໄຂ ບັນຫາການປ່ຽນແປງດິນຟ້າອາກາດ ແລະ ຮັບມືຜົນກະທົບຈາກບັນຫາດັ່ງກ່າວ

ການແຂ່ງຂັນໃນຄັ້ງນີ້, ໄດ້ແບ່ງອອກເປັນ 2 ກຸ່ມ ໃນການນໍາສະເໜີບົດຈາກຜູ້ເຂົ້າຮ່ວມແຂ່ງຂັນແຕ່ລະປະເທດສະມາຊິກອາຊຽນຄື: ກຸຸ່ມທີ 1: ບຣູໄນ, ກໍາປູເຈຍ, ອິນໂດເນເຊຍ, ລາວ, ມາເລເຊຍ; ກຸ່ມທີ 2: ມຽນມາ, ຟີລິບປິນ, ສິງກະໂປ, ໄທ, ຫວຽດນາມ ໂດຍເປັນຕົວແທນນັກຮຽນ-ນັກສຶກສາ ປະເທດລະ 2 ຄົນ.

ທ່ານ ຮສ. ປອ. ສິນທະວອນ ດາລາວົງ ໄດ້ກ່າວອີກວ່າ: ງານໃນຄັ້ງນີ້, ແມ່ນມີຄວາມສໍາຄັນຫຼາຍ ແລະ ປີນີ້ ສປປ ລາວ ໄດ້ຮັບກຽດເປັນປະທານອາຊຽນ. ການແຂ່ງຂັນໃນຄັ້ງນີ້, ຈະເປັນເວທີແລກປ່ຽນບົດຮຽນຊຶ່ງກັນ ແລະ ກັນ ເຮັດໃຫ້ຄູ-ອາຈານ, ນັກສຶກສາບັນດາປະເທດອາຊຽນ ທີ່ເຂົ້າຮ່ວມໄດ້ຮັບຮູ້ຂໍ້ມູນຂອງປະເທດອາຊຽນໄດ້ຫຼາຍຂຶ້ນ. ພ້ອມນັ້ນ, ນັກສຶກສາລາວ ຍັງມີໂອກາດໄດ້ຮຽນຮູ້ ກັບບັນດານັກຮຽນ-ສຶກສາປະເທດອາຊຽນ. ໃນນັ້ນ, ຍັງເປັນການຮ່ວມມືທີ່ດີ, ສ້າງເງື່ອນໄຂ, ສ້າງໂອກາດ ໃຫ້ນັກຮຽນ-ນັກສຶກສາ ໄດ້ມີການພັດທະນາທັກສະ, ຄວາມຮູ້ ແລະ ຄວາມສາມາດຂອງເຂົາເຈົ້າໃນເວທີພາກພື້ນ ແລະ ສາກົນ.

ຊຶ່ງຜົນແຂ່ງຂັນໃນຄັ້ງນີ້: ຊະນະເລີດ (ທີ 1) ໄດ້ແກ່ ທີມນັກສຶກສາປະເທດ ຫວຽດນາມ ໄດ້ຮັບທຶນການສຶກສາ 2,000 ໂດລາ ພ້ອມໂລລາງວັນ ແລະ ໃບຢັ້ງຢືນ; ທີ 2 ຕົວແທນນັກສຶກສາ ປະເທດ ມາເລເຊຍ ໄດ້ຮັບທຶນການສຶກສາ 1,500 ໂດລາ ພ້ອມໂລລາງວັນ ແລະ ໃບຢັ້ງຢືນ; ທີ 3 ຕົວແທນນັກສຶກສາປະເທດໄທ ໄດ້ຮັບທຶນການສຶກສາ 1,000 ໂດລາ ພ້ອມໂລລາງວັນ ແລະ ໃບຢັ້ງຢືນ. ໃຫ້ກຽດມອບລາງວັນໃນຄັ້ງນີ້ ໂດຍ ທ່ານ ສິຣິອຸດົງ ສູນດາລາ ຮອງລັດຖະມົນຕີກະຊວງສຶກສາທິການ ແລະ ກິລາ.

ພາບບັນຍາກາດ

ນາງ ສີຣິທິດາ ພຸດທະຈັກ ນັກສຶກສາຈາກພາກວິຊາ ວິສະວະກໍາເຄມີ ຄະນະວິສະວະກໍາສາດ ແລະ ນາງ ສຸພາພອນ ທໍາມະວົງສາ ນັກສຶກສາຈາກພາກວິຊາວິສະວະກໍາສິ່ງແວດລ້ອມ ຄະນະວິສະວະກໍາສາດ ໄດ້ຮັບຫຼຽນລາງວັນຮອນດາ ສຳລັບນັກວິທະຍາສາດ ແລະ ວິສະວະກອນໜຸ່ມ ຂອງມູນນິທິຮອນດາ ຢູ່ ສປປ ລາວ ປະຈຳປີ 2024, ພ້ອມໃບຢັ້ງຢືນ ແລະ ເງິນຄົນລະ 3.000 ໂດລາ.

ພິທີມອບ-ຮັບລາງວັນດັ່ງກ່າວ ໄດ້ຈັດຂຶ້ນໃນວັນທີ 16 ຕຸລາ ຜ່ານມາ ທີ່ສະຖາບັນພັດທະນາຊັບພະຍາກອນມະນຸດລາວ-ຍີ່ປຸ່ນ ໂດຍການເຂົ້າຮ່ວມ ແລະ ມອບລາງວັນໃນຄັ້ງນີ້ ມີ ທ່ານ ອາກິລະ ໂຄຈິມະ (Akira KOJIMA) ຜູ້ອໍານວຍການມູນນິທິຮອນດາ ແລະ ປະທານຄະນະກໍາມາທິການສາກົນ, ທ່ານ ຮສ. ປອ. ເດຊານຸລາດ ແສນດວງເດດ ວ່າການແທນອະທິການບໍດີມະຫາວິທະຍາໄລແຫ່ງຊາດ (ມຊ) ປະທານຄະນະກໍາມະການຄັດເລືອກນັກສຶກສາໂຄງການລາງວັນຮອນດາ, ມີທ່ານ ໂຄອິຊູມິ ສຶໂຕມຸ (KOIZUMI Tsutomu) ເອກອັກຄະລັດຖະທູດຍີ່ປຸ່ນ ປະຈຳ ລາວ, ພ້ອມດ້ວຍແຂກຖືກເຊີນ ແລະ ນັກສຶກສາ ເຂົ້າຮ່ວມ.

ໃນໂອກາດນີ້, ທ່ານ ປອ. ພອນແກ້ວ ຈັນທະມາລີ ຜູ້ອຳນວຍການສະຖາບັນພັດທະນາຊັບພະຍາກອນມະນຸດລາວ-ຍີ່ປຸ່ນ ຕາງໜ້າຄະນະບໍລິຫານໂຄງການລາງວັນຮອນດາ ສຳລັບນັກວິທະຍາສາດ ແລະ ວິສະວະກອນໜຸ່ມ ຂອງມູນນິທິຮອນດາ ຢູ່ ສປປ ລາວ ປະຈຳປີ 2024 ໄດ້ລາຍງານການຈັດຕັ້ງປະຕິບັດໂຄງການດັ່ງກ່າວໃນໄລຍະໜຶ່ງປີຜ່ານມາວ່າ: ມູນນິທິຮອນດາດັ່ງກ່າວ, ສ້າງຕັ້ງຂຶ້ນເພື່ອ ແນໃສ່ປູກຈິດສຳນຶກໃຫ້ໄວຊາວໜຸ່ມໃນຂອບເຂດທົ່ວໂລກ ມີວິໄສທັດກວ້າງໄກມີແນວຄິດສັງສັນ, ອົດທົນຜ່ານຜ່າບັນດາຂໍ້ຫຍຸ້ງຍາກ ແລະ ຮຽນຮູ້ຢ່າງຕໍ່ເນື່ອງ ເພື່ອໃຫ້ສາມາດບັນລຸຄວາມຝັນຂອງຕົນໃນການປະ ກອບສ່ວນເຂົ້າໃນການພັດທະນາປະເທດຊາດແບບຍືນຍົງ ໂດຍຜ່ານການຈັດຕັ້ງປະຕິບັດພາລະກິດຂອງການຈັດຕັ້ງທີ່ຕົນສ້າງຂຶ້ນ ຫຼື ສັງກັດຢູ່. ພ້ອມນັ້ນ, ຜູ້ທີ່ໄດ້ຮັບລາງວັນຮອນດາສໍາລັບນັກວິທະ ຍາສາດ ແລະ ວິສະວະກອນໜຸ່ມ ກໍຕ້ອງປະກອບສ່ວນເຂົ້າໃນການເສີມຂະຫຍາຍສາຍພົວພັນທີ່ດີ ແລະ ສົ່ງເສີມການແລກປ່ຽນວັດທະນະທຳຂອງສອງຊາດລາວ-ຍີ່ປຸ່ນ.

ໃນປີ 2024 ນີ້, ຄະນະກຳມະການ ເຫັນດີເປັນເອກະພາບໃຫ້ນັກສຶກສາເຂົ້າຮ່ວມແຂ່ງຂັນລວມມີ ປີ 2,3,4 ແລະ ປີ 5 ຊຶ່ງມີນັກສຶກສາເຂົ້າແຂ່ງຂັນທັງໝົດ 115 ຄົນ. ຜ່ານການສອບເສັງຄັດເລືອກດ້ວຍການຂຽນບົດຄວາມໃນຫົວຂໍ້ສະເພາະໃດໜຶ່ງເປັນພາສາລາວ ແລະ ພາສາອັງກິດ ພ້ອມທັງໄດ້ດຳເນີນການສຳພາດເປັນພາສາອັງກິດ ເພື່ອສາມາດຄັດເລືອກໄດ້ນັກສຶກສາສອງຄົນທີ່ຈະໄດ້ຮັບລາງວັນ. ການສອບເສັງຂຽນບົດຄວາມເປັນພາສາລາວ ຄັ້ງທີ 1 ມີນັກສຶກສາເຂົ້າສອບເສັງທັງໝົດ 40 ຄົນ ຍິງ 20 ຄົນ, ໃນນັ້ນ, ມາຈາກຄະນະວິສະວະກຳສາດ (ຄວສ) 15 ຄົນ ຍິງ 9 ຄົນ, ຄະນະວິທະຍາສາດທຳມະຊາດ (ຄວທ) 13 ຄົນ ຍິງ 6 ຄົນ ແລະ ຄະນະຊັບພະຍາກອນນ້ຳ (ຄຊນ) 5 ຄົນ ຍິງ 4 ຄົນ ແລະ ຄະນະສະຖາປັດຕະຍະກໍາສາດ (ຄສປ) 7 ຄົນ ຍິງ 6 ຄົນ; ການສອບເສັງຂຽນບົດຄວາມເປັນພາສາອັງກິດ ຄັ້ງທີ 2, ມີນັກສຶກສາເຂົ້າຮ່ວມ 20 ຄົນ ຍິງ 11 ຄົນ, ໃນນັ້ນ, ມາຈາກ ຄວສ 10 ຄົນ ຍິງ 5 ຄົນ, ຄວທ 4 ຄົນ ຍິງ 1 ຄົນ ແລະ ຄສປ 6 ຄົນ ຍິງ 5 ຄົນ. ການສອບເສັງສໍາພາດ ຄັ້ງທີ 3 ມີຜູ້ເຂົ້າຮ່ວມ 10 ຄົນ ຍິງ 7 ຄົນ. ໃນນັ້ນ, ມາຈາກ ຄວສ 5 ຄົນ ຍິງ 3 ຄົນ, ຄວທ 2 ຄົນ ຍິງ 1 ຄົນ ແລະ ຄສປ 3 ຄົນເປັນຍິງທັງໝົດ.

ໂອກາດນີ້, ທ່ານ ຮສ. ປອ.  ເດຊານຸລາດ ແສນດວງເດດ ຍັງໄດ້ກ່າວວ່າ: ມຊ ໄດ້ຮັບການສະໜັບສະ ໜູນ ແລະ ຮ່ວມມືຈາກມູນນິທິຮອນດາ ທີ່ປະເທດຍີ່ປຸ່ນໃນການຄັດເລືອກ ແລະ ໃຫ້ລາງວັນຮອນດາເພື່ອນັກວິທະຍາສາດ ແລະ ວິສະວະກອນໜຸ່ມ ຂອງມູນນິທິຮອນດາ ຢູ່ ສປປ ລາວ ສຳລັບນັກສຶກສາດີເດັ່ນ. ມາຮອດປັດຈຸບັນເປັນເວລາ 17 ປີ ແລ້ວ ເຮັດໃຫ້ນັກສຶກສາທີ່ໄດ້ຮັບລາງວັນມີໂອກາດພັດທະນາຕົນເອງ ເພື່ອກາຍເປັນບຸກຄະລາກອນທີ່ດີເດັ່ນ ແລະ ກຽມພ້ອມປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ພ້ອມທັງໄດ້ກາຍເປັນຂົວຕໍ່ຮັດແໜ້ນສາຍສໍາພັນ ແລະ ການຮ່ວມມືທີ່ດີງາມລະຫວ່າງ ສປປ ລາວ ແລະ ຍີ່ປຸ່ນໄດ້ດີຕະຫຼອດມາ.

ພາບບັນຍາກາດ