ຂ່າວ

ຄະນະນໍາ ມຊ ແລະ ຕ້ອນຮັບ ຄະນະນໍາ ມະຫາວິທະຍາໄລເຕັກໂນໂລຊີອາວະກາດ ກຸ້ຍຫຼິນ ສປ ຈີນ.

ໃນຕອນເຊົ້າ ວັນທີ 26 ມິຖຸນາ 2026ນີ້, ທີ່ຫ້ອງຮັບແຂກ VIP ຕຶກສຳນັກງານຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດ (ມຊ), ທ່ານ ສຈ.ປອ. ພູເພັດ ກ້ຽວພິລາວົງ, ຮອງຜູ້ອຳນວຍການໃຫຍ່ ມຊ ພ້ອມດ້ວຍ ຄະນະບໍດີ, ຫົວໜ້າຫ້ອງການ ແລະພະນັກງານທີ່ກ່ຽວຂ້ອງ ໄດ້ຮັບການເຂົ້າຢ້ຽມຢາມ ຄະນະນໍາຈາກ ມະຫາວິທະຍາໄລເຕັກໂນໂລຊີອາວະກາດກຸ້ຍຫຼິນ (Guilin University of Aerospace Technology - GUAT) ສາທາລະນະລັດ ປະຊາຊົນຈີນ, ນຳໂດຍ ທ່ານ ສຈ. ຈ່າງ ລີພິງ (Prof. Zhang Lieping), ຮອງອະທິການບໍດີ ມະຫາວິທະຍາໄລເຕັກໂນໂລຊີອາວະກາດກຸ້ຍຫຼິນ ພ້ອມຄະນະ. ການພົບປະກັນໃນຄັ້ງນີ້ ທັງສອງຝ່າຍໄດ້ປຶກສາຫາລື ແລະ ແລກປ່ຽນຄວາມຄິດເຫັນ ດ້ານວິຊາການ ໃນ 2 ຫົວຂໍ້ສຳຄັນ ຄື: (1) ການສຶກສາ ແລະ ຄົ້ນຄວ້າຄວາມເປັນໄປໄດ້ໃນການນຳໃຊ້ຍານພາຫະນະທາງອາກາດທີ່ບໍ່ມີຄົນຂັບ ຫຼື ໂດນ (UAVs) ເຂົ້າໃນວຽກງານການກະສິກຳ ອັດສະລິຍະ (Smart Agriculture) ພ້ອມທັງຊຸກຍູ້ການພັດທະນາວິທະຍາໄລວິສະວະກອນ ອາວະກາດ ຈີນ-ອາຊຽນ (China-ASEAN Aerospace Engineers College). (2) ປຶກສາຫາລືກ່ຽວກັບການຮ່ວມມືສ້າງ ແລະ ພັດທະນາບຸກຄະລາກອນທີ່ມີຄວາມສາມາດ (Joint talent cultivation) ລວມເຖິງການສົ່ງເສີມໂຄງການແລກປ່ຽນນັກສຶກສາລະຫວ່າງກັນ ການຢ້ຽມຢາມ ແລະ ພົບປະຄະນະນໍາ ມຊ ຄັ້ງນີ້ ຖືເປັນບາດກ້າວອັນສຳຄັນໃນການຂະຫຍາຍສາຍພົວພັນ ແລະ ການຮ່ວມມືທາງດ້ານວິຊາການ, ວິທະຍາສາດ ແລະ ເຕັກໂນໂລຊີອາວະກາດທີ່ທັນສະໄໝ, ເຊິ່ງຈະຊ່ວຍຍົກລະດັບຄຸນນະພາບການສຶກສາ, ການຄົ້ນຄວ້າ ແລະ ການພັດທະນາຊັບພະຍາກອນມະນຸດຂອງທັງສອງສະຖາບັນໃຫ້ມີຄວາມກ້າວໜ້າໃນອະນາຄົດ.

ທ່ານຮອງຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດ ເດີນໄປເຮັດວຽກ ແລະ ຢ້ຽມຢາມທີ່ປະເທດຍີ່ປຸ່ນ

ໃນວັນທີ 23 ມິຖຸນາ 2026 ຜ່ານມາ, ທ່ານ ສຈ. ປອ. ພູເພັດ ກ້ຽວພິລາວົງ ຮອງຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດລາວ, ໄດ້ເຂົ້າພົບປະ ແລະຢ້ຽມຢາມ ທ່ານ FUJISAWA Masato ອະທິການບໍດີ ມະຫາວິທະຍາໄລໂກເບ (Kobe) ປະເທດຍີ່ປຸ່ນ ໂດຍມີທ່ານ TAMAKI Hisashi ຮອງອະທິການບໍດີ, ຜູ້ອຳນວຍການຫ້ອງການສົ່ງເສີມການຮ່ວມມືສາກົນ; ທ່ານ ສຈ. UCHIDA Yuichiro ຄະນະບໍດີຂອງວິທະຍາໄລການສຶກສາຮ່ວມມືສາກົນ (GSICS); ທ່ານ ສຈ. OGAWA Keiichi ຮອງຄະນະບໍດີຂອງ GSICS; ທ່ານ TOKUOKA Mami ຜູ້ຊ່ວຍສາດສະດາຈານ ໂຄງການຢູ່ GSICS; ແລະ ທ່ານ ISHII Yudai, ຜູ້ຊ່ວຍສາດສະດາຈານໂຄງການຢູ່ GSICS ເຂົ້າຮ່ວມ. ໃນໂອກາດນີ້, ທ່ານ ສຈ. ປອ. ພູເພັດ ກ້ຽວພິລາວົງ ກໍໄດ້ລາຍງານໂດຍຫຍໍ້ກ່ຽວກັບສະພາບຂອງ ມະຫາວິທະຍາໄລແຫ່ງຊາດ ແລະ ການກະກຽມສະເຫຼີມສະຫຼອງວັນ ສ້າງຕັ້ງມະຫາວິທະຍາໄລແຫ່ງຊາດ ຄົບຮອບ 30 ປີທີ່ຈະຈັດຂຶ້ນໃນເດືອນພະຈິກ ທີ່ຈະມາເຖິງນີ້. ພ້ອມນັ້ນ, ທ່ານຍັງໄດ້ສະແດງຄວາມຊົມເຊີຍຕໍ່ສາຍພົວພັນຮ່ວມມືທີ່ມີຢ່າງມາດົນນານລະຫວ່າງສອງມະຫາວິທະຍາໄລ. ນອກນັ້ນ, ທ່ານກໍໄດ້ກ່າວຕື່ມອີກວ່າ ອະດີດນັກສຶກສາຂອງມະຫາວິທະຍາໄລໂກເບ ປະເທດຍີ່ປຸ່ນ ໄດ້ມີການປະກອບໃນຫຼາຍວຽກງານຢູ່ ສປປ ລາວ ເຊິ່ງມີຫຼາຍຄົນທີ່ເຮັດວຽກຢູ່ມະຫາວິທະຍາໄລແຫ່ງຊາດລາວ ແລະ ໄດ້ຮັບໜ້າທີ່ໃນອົງການຕ່າງໆທີ່ກ່ຽວຂ້ອງໃນຫຼາຍວຽກງານ. ຫຼັງຈາກນັ້ນ, ທັງສອງຝ່າຍກໍແລກປ່ຽນຄວາມຄິດເຫັນກ່ຽວກັບການແລກປ່ຽນນັກສຶກສາລະຫວ່າງສອງມະຫາວິທະຍາໄລ, ໂດຍທ່ານ FUJISAWA Masato ກໍໄດ້ສະແດງຄວາມຄາດຫວັງກ່ຽວກັບການຮ່ວມມືຂອງຝ່າຍ ໃຫ້ກວ້າງຂວາງກວ່າເກົ່ານອກເໜືອຈາກ ຄະນະເສດຖະສາດ ແລະ ການບໍລິຫານທຸລະກິດ ໄປໃນຂົງເຂດຕ່າງໆເຊັ່ນ: ວິສະວະກຳ, ວິທະຍາສາດ ແລະ ກະເສດສາດ. ໃນໂອກາດນີ້, ຜູ້ເຂົ້າຮ່ວມຍັງໄດ້ແລກປ່ຽນຂໍ້ມູນກ່ຽວກັບທຶນການສຶກສາ ແລະ ໂຄງການສະໜັບສະໜູນທີ່ອຳນວຍຄວາມສະດວກ ສຳລັບນັກສຶກສາຈາກລາວທີ່ກຳລັງສຶກສາຢູ່ປະເທດຍີ່ປຸ່ນ. ນອກຈາກທຶນການສຶກສາຂອງລັດຖະບານຍີ່ປຸ່ນ (MEXT) ແລ້ວ, ກໍຍັງມີໂຄງການຕ່າງໆເຊັ່ນ: ໂຄງການທຶນການສຶກສາພັດທະນາຊັບພະຍາກອນມະນຸດ (JDS) ແລະ ໂຄງການຜູ້ນຳໂລກ SDGs ເຊິ່ງໄດ້ປະກອບສ່ວນຢ່າງຫຼວງຫຼາຍຕໍ່ການແລກປ່ຽນຊັບພະຍາກອນມະນຸດລະຫວ່າງສອງປະເທດ ລາວ-ຍີ່ປຸ່ນ, ສຳລັບການຢ້ຽມຢາມຄັ້ງນີ້ຄາດວ່າຈະເສີມສ້າງການຮ່ວມມື ແລະ ການແລກປ່ຽນທາງວິຊາການລະຫວ່າງສອງມະຫາວິທະຍາໄລຕື່ມອີກ. ຂໍຂອບໃຈພາບ ແລະ ຂໍ້ມູນຈາກ: https://www.kobe-u.ac.jp/en/announcement/20260625-67926/

ຄະນະສຶກສາສາດ ຈັດການສອບເສັງຈົບພາສາລາວໃຫ້ແກ່ນັກສຶກສາຕ່າງປະເທດປະຈໍາສົກສຶກສາ 2025-2026

ໃນສົກສຶກສາທີ່ຜ່ານມາ ການຮຽນ-ການສອນພາສາລາວ ຢູ່ມະຫາວິທະຍາໄລແຫ່ງຊາດ ຖືວ່າໄດ້ຮັບຄວາມສົນໃຈຈາກນັກສຶກສາຕ່າງປະເທດຫຼາຍພໍສົມຄວນ ສຳລັບຄະນະສຶກສາສາດ ແມ່ນໄດ້ເປີດການຮຽນການສອນເປັນຄັ້ງທຳອິດໃນສົກສຶກສາ 2025-2026 ທີ່ພາກວິຊາພາສາລາວ-ວັນນະຄະດີ, ເຊິ່ງມີນັກສຶກສາທັງໝົດ 173 ຄົນ ຍິງ 61 ຄົນ ( ເປັນນັກສຶກສາທີ່ມາຈາກ ສປ ຈີນ 163 ຄົນ ຍິງ 55 ຄົນ, ເກົາຫຼີ 3 ຄົນ, ມົງໂກລີ 4 ຄົນ ຍິງ 3 ຄົນ, ຫວຽດນາມ 2 ຄົນ ຍິງ 1, ຍີ່ປຸ່ນ 1 ຄົນ ຍິງ 1 ຄົນ ແລະ ອົດສະຕຣາລີ 1 ຄົນ) ແລະ ໃນວັນທີ 15 ມິຖຸນາ 2026 ຜ່ານມາ, ພາກວິຊາພາສາລາວ-ວັນນະຄະດີ ກໍໄດ້ຈັດການສອບເສັງຈົບການກຽມພາສາລາວ ໃຫ້ແກ່ນັກສຶກສາຕ່າງປະເທດປະຈໍາສົກສຶກສາ 2025-2026 ໂດຍມີຄະນະນຳ ຄະນະສຶກສາສາດ ນຳໂດຍ ທ່ານ ຄຳເຟືອງ ລໍວັນໄຊ ຫົວໜ້າຄະນະວິຊາ ພ້ອມດ້ວຍຮອງຫົວໜ້າຄະນະວິຊາ, ຄະນະພາກວິຊາ ໄດ້ລົງຕິດຕາມ ແລະ ຮ່ວມສັງເກດການໃນການສອບເສັງຄັ້ງນີ້. ໃນໂອກາດນີ້, ທ່ານ ອຈ. ປອ. ນາງ ແຫວນທອງ ນັນທະວົງ ຮອງຫົວໜ້າພາກວິຊາຄູພາສາລາວ-ວັນນະຄະດີ ໄດ້ໃຫ້ຮູ້ວ່າ ພາກວິຊາຄູພາສາລາວ-ວັນນະຄະດີ ຄະນະສຶກສາສາດ ໄດ້ດຳເນີນການຮຽນການສອນໃຫ້ກັບນັກສຶກສາຕ່າງປະເທດ ປະກອບມີ 4 ວິຊາຄື: ການຟັງ, ການເວົ້າ, ການອ່ານ ແລະ ການຂຽນ, ສຳລັບການສອບເສັງຄັ້ງນີ້ ກໍອີງຕາມລາຍວິຊາທີ່ສິດສອນຄື: ການຟັງ ແລະ ການຂຽນ ແມ່ນທຸກຄົນເສັງພ້ອມກັນ (ເປັນຮູບແບບການຢາຍເຈ້ຍຄໍາຖາມໃຫ້ແຕ່ລະຄົນຕອບ), ສ່ວນການເວົ້າ ແລະການອ່ານ ແມ່ນເວົ້າ-ອ່ານເຊິ່ງໜ້າ (ຈະມີຄະນະກຳມະການຄວບຄຸມຫ້ອງສອບເສັງເກັບກຳຄະແນນ) ການສອບເສັງດຳເນີນໄປເປັນເວລາ 4 ວັນແຕ່ວັນທີ 15-18 ມິຖຸນາ. ພ້ອມນີ້, ທ່ານຍັງໄດ້ໃຫ້ຮູ້ຕື່ມອີກວ່າ ໃນສົກສຶກສາ 2026 – 2027 ທີ່ຈະມາເຖິງ ຄະນະສຶກສາສາດແມ່ນມີຄວາມພ້ອມໃນການກະກຽມແຜນການຮຽນ-ການສອນສຳລັບນັກສຶກສາຕ່າງປະເທດທີ່ຕ້ອງການຢາກມາຮຽນພາສາລາວ, ສ່ວນແຜນການຮັບນັກສຶກສາຕ່າງປະເທດແມ່ນຄືກັບສົກສຶກສາທີ່ຜ່ານມາ ໂດຍອີງຕາມແຜນການແບ່ງປັນຕົວເລກ ຂອງມະຫາວິທະຍາໄລແຫ່ງຊາດ ແລະ ຜູ້ທີ່ມີຄວາມສົນໃຈຢາກສອບຖາມຂໍ້ມູນເພີ່ມເຕີມແມ່ນສາມາດ ສອບຖາມໄດ້ທີ່ພາກວິຊາຄູພາສາລາວ-ວັນນະຄະດີ ຄະນະສຶກສາສາດ ມະຫາວິທະຍາໄລແຫ່ງຊາດ (ວິທະຍາເຂດດົງໂດກ) ຫຼື ຕິດຕາມຂໍ້ມູນໄດ້ທີ່ Facebook page: ຄູພາສາລາວ-ວັນນະຄະດີ ຄສສ, ມຊ

ສະຖາບັນຂົງຈື ຈັດງານວາງສະແດງ ແລະ ແລກປ່ຽນວັດທະນະທຳຮູບແຕ້ມ ລາວ-ຈີນ

ໃນວັນທີ 1 ກໍລະກົດ 2026 ຜ່ານມາ, ສະຖາບັນຂົງຈື ມະຫາວິທະຍາໄລແຫ່ງຊາດ (ມຊ) ໄດ້ຈັດງານວາງສະແດງ ແລະ ແລກປ່ຽນວັດທະນະທຳຮູບແຕ້ມ ລາວ-ຈີນ ຂຶ້ນທີ່ສະໂມສອນຂອງສະຖາບັນດັ່ງກ່າວ, ໂດຍການເຂົ້າຮ່ວມຂອງທ່ານ ສຈ. ປອ. ເດຊານຸລາດ ແສນດວງເດດ ຜູ້ອຳນວຍການໃຫຍ່ ມຊ, ທ່ານ ຊົ້ງ ຊຸນເຟິງ ປະທານບໍລິຫານ ແລະ ເລຂາທິການໃຫຍ່ ສະພາສົ່ງເສີມການຄ້າ-ວັດທະນະທຳສາກົນປັກກິ່ງ ສປ ຈີນ, ທ່ານ ຫຼິວຊານຢູ ຊ່ຽວຊານຮູບແຕ້ມຈາກ ສປ. ຈີນ ພ້ອມດ້ວຍທ່ານຫົວໜ້າສະຖາບັນຂົງຈືຝ່າຍລາວ-ຝ່າຍຈີນ, ຜູ້ຕາງໜ້າຈາກກະຊວງຖະແຫຼງຂ່າວວັດທະນະທຳ, ອາຈານຈາກສະຖາບັນວິຈິດສິນແຫ່ງຊາດ, ພະນັກງານ, ຄູ-ອາຈານ ແລະນັກສຶກສາເຂົ້າຮ່ວມ. ໃນພິທີ, ທ່ານ ຄຳຮຸ່ງ ຈັນທະວົງ ຫົວໜ້າສະຖາບັນຂົງຈື ໄດ້ກ່າວວ່າ: ງານວາງສະແດງ ແລະ ແລກປ່ຽນວັດທະນະທຳຮູບແຕ້ມ ລາວ-ຈີນ ໃນຄັ້ງນີ້ ເປັນກິດຈະກຳໜຶ່ງທີ່ຈະຊ່ວຍກະຕຸ້ນໃນການສືບຕໍ່-ສົ່ງເສີມ ການຮ່ວມມືດ້ານສິລະປະ, ວັດທະນະທຳ ແລະ ການສຶກສາລະຫວ່າງ ລາວ-ຈີນ ໃຫ້ມີຄວາມເລິກເຊິ່ງ ແລະ ກວ້າງຂວາງກວ່າເກົ່າ ສອດຄ່ອງກັບເຈດຈຳນົງຮ່ວມ ຂອງຜູ້ນຳສອງປະເທດໃນການສ້າງປະຊາຄົມລາວ-ຈີນ ທີ່ມີໃນອະນາຄົດຮ່ວມກັນ, ພິເສດສຸດ ສຳລັບປີ 2026 ຍັງເປັນການສະເຫຼີມ-ສະຫຼອງສາຍພົວພັນການຮ່ວມມືມິດຕະພາບຂອງສອງຊາດ ລາວ-ຈີນ ; ຈີນ-ລາວ ຄົບຮອບ 65 ປີ ແລະ ການສະເຫຼີມສະຫຼອງວັນສ້າງຕັ້ງ ມຊ ຄົບຮອບ 30 ປີ, ກິດຈະກໍານີ້ຖືເປັນອີກໜຶ່ງກິດຈະກໍາປິ່ນອ້ອມວັນສຳຄັນດັ່ງກ່າວ. ໃນໂອກາດດຽວກັນ, ທ່ານ ສຈ. ປອ. ເດຊານຸລາດ ແສນດວງເດດ ໄດ້ກ່າວຕື່ມວ່າ: ວັດທະນະທຳ ແລະ ສິລະປະ ແມ່ນຂົວຕໍ່ອັນສຳຄັນທີ່ເຊື່ອມຫົວໃຈຂອງປະຊາຊົນທັງສອງຊາດ, ສິລະປະຮູບແຕ້ມບໍ່ພຽງແຕ່ສະທ້ອນຄວາມງາມຂອງທຳມະຊາດ ແລະ ວັດທະນະທຳເທົ່ານັ້ນ, ແຕ່ຍັງສະທ້ອນເຖິງປັນຍາ, ຈິດວິນຍານ, ຄຸນຄ່າ ແລະ ເອກະລັກຂອງແຕ່ລະຊາດ. ດັ່ງນັ້ນ, ງານວາງສະແດງສິລະປະຮູບແຕ້ມໃນມື້ນີ້ ບໍ່ພຽງແຕ່ເປັນການນຳສະເໜີຜົນງານທາງດ້ານສິລະປະເທົ່ານັ້ນ ແຕ່ເປັນການສືບສານຄວາມເປັນມິດ, ການຮຽນຮູ້ເຊິ່ງກັນ ແລະ ກັນ ແລະການເສີມສ້າງຄວາມເຂົ້າໃຈລະຫວ່າງປະຊາຊົນສອງຊາດ ລາວ-ຈີນ ອີກດ້ວຍ. ສຳລັບຜົນງານທີ່ນຳມາວາງສະແດງໃນຄັ້ງນີ້ ລ້ວນແຕ່ແມ່ນຜົນງານທີ່ສ້າງສັນໂດຍ ອາຈານຜູ້ທີ່ມີຄວາມຊ່ຽວຊານດ້ານສິລະປະຮູບແຕ້ມຈາກ ສປປ ລາວ ແລະ ສປ ຈີນ ທີ່ສະແດງໃຫ້ເຫັນເຖິງຄວາມງົດງາມ ຂອງວັດທະນະທຳ ແລະ ສື່ເຖິງວິຖີຊີວິດການເປັນຢູ່ຂອງຄົນ ແລະ ທຳມະຊາດໄດ້ຢ່າງເລິກເຊິ່ງ.

ພາກວິຊາພາສາອັງກິດ ຄະນະອັກສອນສາດ ຈັດກິດຈະກຳສະແດງພອນສະຫວັນການນຳໃຊ້ພາສາອັງກິດຂອງນັກສຶກສາ

ກິດຈະກຳດັ່ງກ່າວຈັດຂື້ນ ໃນຕອນບ່າຍວັນທີ 20 ພຶດສະພາ 2026 ທີ່ສະໂມສອນໃຫຍ່ຊັ້ນສອງ ຈັດໂດຍຄະນະອັກສອນສາດ ມະຫາວິທະຍາໄລແຫ່ງຊາດ ໄດ້ຈັດກິດຈະກຳການສະແດງພອນສະຫວັນການນຳໃຊ້ພາສາອັງກິດຂອງນັກສຶກສາພາກວິຊາພາສາອັງກິດ; ໂດຍການໃຫ້ກຽດເຂົ້າຮ່ວມຂອງ ທ່ານ ປອ. ນາງ ທອງມາລາ ໂພສີຄຳ ຫົວໜ້າຄະນະອັກສອນສາດ, ມີທ່ານ ອຈ ລະດົມຈັນ ຂັນຕຣີ ຫົວໜ້າພາກວິຊາພາສາອັງກິດ, ພ້ອມດ້ວຍຫົວໜ້າ-ຮອງຫົວໜ້າພາກວິຊາ, ພະນັກງານ, ຄູ-ອາຈານ, ແຂກຖືກເຊີນ ແລະ ນັກສຶກສາເຂົ້າຮ່ວມຢ່າງພ້ອມພຽງ.

ຈຸດປະສົງຂອງງານໃນຄັ້ງນີ້ ເພື່ອໃຫ້ນັກສຶກສາໄດ້ສະແດງຄວາມຮູ້-ຄວາມສາມາດ, ພອນສະຫວັນ, ຖອດຖອນບົດຮຽນ ແລະ ແລກປ່ຽນປະສົບການໃນການໃຊ້ພາສາອັງກິດໂດຍຜ່ານກິດຈະກຳ; ການແຂ່ງຂັນໃນປີນີ້ ມີທີມນັກສຶກສາປີທີ 1 ຫາ ປີທີ 4 ພາກວິຊາພາສາອັງກິດ ຄະນະອັກສອນສາດ ເຂົ້າຮ່ວມແຂ່ງຂັນຫຼາຍກວ່າ 30 ທີມ ແລະ ຜ່ານການຄັດເລືອກເຂົ້າແຂ່ງຂັນຕົວຈິງ 19 ທີມ. ສຳລັບລາຍການສະແດງປະກອບມີ: ການເລົ່າເລື່ອງ 5 ທີມ, ການສະແດງລະຄອນ 3 ທີມ, ການຮ້ອງເພງພາສາອັງກິດ 7 ທີມ ແລະ ການແຂ່ງຂັນສະກົດຄໍາ ຕົວແທນນັກສຶກສາ 18 ຫ້ອງ.

ໃນໂອກາດດຽວກັນນີ້, ທ່ານ ປອ. ນາງ ທອງມາລາ ໂພສີຄຳ ກໍໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຄະນະຮັບຜິດຊອບ ແລະ ຄູ-ອາຈານພາຍໃນພາກວິຊາ ທີ່ໄດ້ເສຍສະຫຼະເວລາ ແລະ ເອົາໃຈໃສ່ຊີ້ນຳນຳພາຈົນເຮັດໃຫ້ກິດຈະກຳທີ່ມີຄວາມໝາຍນີ້ເກີດຂຶ້ນໄດ້, ອັນເປັນການປະກອບສ່ວນສຳຄັນເຂົ້າໃນການຍົກລະດັບຄຸນນະພາບການຮຽນ-ການສອນພາສາຕ່າງປະເທດ ຢູ່ມະຫາວິທະຍາໄລແຫ່ງຊາດ ໃຫ້ມີບາດກ້າວຂະຫຍາຍຕົວໃໝ່ທີ່ດີຂຶ້ນ.

ຜ່ານການແຂ່ງຂັນປະກົດວ່າລາງວັນທີ 1 ການແຂ່ງຂັນຮ້ອງເພງ ໄດ້ແກ່ ນາງ ອອນນີ ລີ, ການແຂ່ງຂັນເລົ່າເລື່ອງໄດ້ແກ່ ທ້າວ ວໍລະເດດ ວິຊຽນ, ການແຂ່ງຂັນລະຄອນ ໄດ້ແກ່ຫ້ອງ 3B ແລະການແຂ່ງຂັນສະກົດຄຳໄດ້ແກ່ຫ້ອງ 3A.

ພາກວິຊາພາສາ-ວັດທະນະທຳລາວ ຈັດການແຂ່ງຂັນເວົ້າພາສາລາວສຳລັບນັກສຶກສາຕ່າງປະເທດ

ກິດຈະກຳຈັດການແຂ່ງຂັນເວົ້າພາສາລາວສຳລັບນັກສຶກສາຕ່າງປະເທດ ຄັ້ງທີ XII ໄດ້ຈັດຂຶ້ນໃນວັນທີ 13 ພຶດສະພາ 2026 ທີ່ ສະໂມສອນໃຫຍ່ ມຊ ເຊິ່ງຈັດໂດຍພາກວິຊາພາສາ-ວັດທະນະທຳລາວ ຄະນະອັກສອນສາດ ມະຫາວິທະຍາໄລແຫ່ງຊາດ (ມຊ) ໂດຍການເຈົ້າຮ່ວມຂອງທ່ານ ປອ. ນາງ ມະໄລຄຳ ໄຊຍະກອນ ຮອງຫົວໜ້າຄະນະວິຊາຄະນະອັກສອນສາດ, ມີທ່ານຫົວຫນ້າ-ຮອງຫົວຫນ້າພາກວິຊາພາສາ-ວັດທະນະທໍາລາວ, ຫົວຫນ້າພະແນກ, ພະນັກງານ, ຄູ-ອາຈານ ແລະ ນັກສຶກສາຕ່າງປະເທດເຂົ້າຮ່ວມ.

ຈຸດປະສົງຂອງການຈັດກິດຈະກຳໃນຄັ້ງນີ້ແມ່ນເປັນເວທີສຳຄັນໃນການເປີດໂອກາດໃຫ້ນັກສຶກສາຕ່າງປະເທດທີ່ກຳລັງຮຽນພາສາລາວຢູ່ ມຊ ໄດ້ສະແດງຄວາມສາມາດດ້ານການຮຽນຮູ້ກ່ຽວກັບພາສາລາວເຊັ່ນ: ການອ່ານ ການຂຽນ ແລະ ການຟັງ ເຊິ່ງປີນີ້ຈັດຂຶ້ນພາຍໃຕ້ຫົວຂໍ້: "ເວົ້າດ້ວຍຮັກ ມັກດ້ວຍໃຈ ຝັກໄຝ່ໃນຄວາມຮູ້ ສູ້ດ້ວຍຄວາມອົດທົນ ເພື່ອຜົນສຳເລັດໃນການຮຽນ ຂອງພວກເຮົາ" ໂດຍນັກສຶກສາທີ່ເຂົ້າຮ່ວມແຂ່ງຂັນຈະເລືອກຫົວຂໍ້ມາຜູ້ລະ 1 ຫົວຂໍ້ທີ່ກ່ຽວຂ້ອງ ມານຳສະເໜີປາກເປົ່າພາຍໃນ 5 ນາທີ.

ນັກສຶກສາຕ່າງປະເທດທີ່ເຂົ້າຮ່ວມການແຂ່ງຂັນໃນຄັ້ງນີ້ ແມ່ນມາຈາກ 2 ຫຼັກສູດຄື: ຫຼັກສູດກຽມພາສາລາວ ແລະ ຫຼັກສູດບຳລຸງພາສາ-ວັດທະນະທຳລາວ ທີ່ຄະນະອັກສອນສາດ ມຊ ໃນສົກສຶກສາ 2025-2026 ມີນັກສຶກສາເຂົ້າຮ່ວມແຂ່ງຂັນທັງຫມົດຈໍານວນ 30 ຄົນ ທີ່ມາຈາກຫຼາຍປະເທດ ເຊັ່ນ: ປະເທດຈີນ, ມຽນມາ, ກຳປູເຈຍ ແລະ ສ. ເກົາຫຼີ.

ບົດຄວາມອື່ນ ໆ...

ໜ້າ 4 ຂອງ 76