ໃນຕອນເຊົ້າ ວັນທີ 15 ສິງຫາ 2025 ຜ່ານມາ, ມະຫາວິທະຍາໄລແຫ່ງຊາດ (ມຊ) ໄດ້ຈັດກອງປະຊຸມສະພາ ມຊ ຊຸດ V ສະໄໝສາມັນຄັ້ງທີ I ປະຈຳປີ 2025 ທີ່ຫ້ອງປະຊຸມສະຖາບັນຂົງຈື ມຊ, ໂດຍການເປັນປະທານຂອງທ່ານ ຮສ. ປອ. ລິນຄຳ ດວງສະຫວັນ ປະທານສະພາ ມຊ, ມີທ່ານ ສຈ.ປອ. ເດຊານຸລາດ ແສນດວງເດດ ອະທິການບໍດີ ມຊ ພ້ອມດ້ວຍຄະນະ ແລະບັນດາທ່ານຄະນະສະພາ ມຊ ເຂົ້າຮ່ວມ.

ໃນໂອກາດນີ້, ທ່ານ ຮສ. ປອ. ອຸ່ນຫຼ້າ ສີວັນເພັງ ຮອງອະທິການບໍດີ ມຊ ທັງເປັນເລຂາທິການສະພາ ມຊ ກໍໄດ້ຜ່ານດຳລັດວ່າດ້ວຍການແຕ່ງຕັ້ງສະມາຊິກສະພາ ມຊ ຊຸດ V ສະບັບເລກທີ 316/ນຍ ລົງວັນທີ 12 ມິຖຸນາ 2025; ຂໍ້ຕົກລົງວ່າດ້ວຍການແຕ່ງຕັ້ງກຳມະການສະພາ ມຊ ຊຸດ V ຜູ້ຕາງໜ້າເສດຖະກິດສັງຄົມ ແລະ ວັດທະນະທໍາ ແລະຜູ້ຕາງໜ້າພະນັກງານ-ຄູອາຈານ ເລກທີ 20/ສພມຊ,​ ລົງວັນທີ 31 ກໍລະກົດ 2025 ພ້ອມທັງລາຍງານບົດສະຫຼຸບການຈັດຕັ້ງປະຕິບັດວຽກສະພາໃນໄລຍະທີ່ຜ່ານມາໂດຍທ່ານໄດ້ກ່າວວ່າ: ສະພາມະຫາວິທະຍາໄລແຫ່ງຊາດ (ສະພາ ມຊ) ມີພາລະບົດບາດຄົ້ນຄວ້າ, ພິຈາລະນາ ແລະ ສະເໜີຂໍຕຳແໜ່ງວິຊາການຄູ ຂັ້ນສາດສະດາຈານ, ຂັ້ນຮອງສາດສະດາຈານ, ຂັ້ນອາຈານ ແລະຂັ້ນຜູ້ຊ່ວຍອາຈານ ໃຫ້ແກ່ຄູ-ອາຈານສອນພາຍໃນ ມຊ. ນອກນີ້ຍັງໄດ້ຄົ້ນຄວ້າ ພິຈາລະນາ ຮັບຮອງຕຳແໜ່ງວິຊາການຄູ ຂັ້ນສາດສະດາຈານກິດຕິມະສັກ, ຂັ້ນສາດສະດາຈານກຽດຕິຄຸນ, ຂັ້ນສາດສະດາຈານພິເສດ ແລະ ຂັ້ນປະລິນຍາເອກກິດຕິມະສັກ ໃຫ້ບຸກຄົນພາຍນອກ ຜູ້ທີ່ມີຜົນງານດີເດັ່ນ ໃນການປະກອບສ່ວນພັດທະນາຂົງເຂດວຽກງານການສຶກສາ ໂດຍສະເພາະວຽກງານ ມຊ ໃນດ້ານການສິດສອນ, ການຄົ້ນຄວ້າຮໍ່າຮຽນ ແລະດ້ານຜົນງານພົ້ນເດັ່ນ ໃນການຊ່ວຍພັດທະນາເສດຖະກິດ-ສັງຄົມ ແຫ່ງຊາດ. ສະພາ ມຊ ໄດ້ນຳສະເໜີໃຫ້ຂັ້ນເທິງ ເພື່ອຂໍອະນຸມັດ ແລະ ມອບຕຳແໜ່ງວິຊາການຄູ ຂັ້ນສາດສະດາຈານ, ຂັ້ນຮອງສາດສະດາຈານ,  ຂັ້ນອາຈານ, ຂັ້ນຜູ້ຊ່ວຍອາຈານ, ຂັ້ນສາດສະດາຈານກິດຕິມະສັກ, ຂັ້ນສາດສະດາຈານກຽດຕິຄຸນ, ຂັ້ນສາດສະດາຈານພິເສດ ແລະ ຂັ້ນປະລິນຍາເອກກິດຕິມະສັກ ໃຫ້ແກ່ຄູສອນ ທັງພາຍໃນ ແລະ ພາຍນອກມາແລ້ວ ຈຳນວນທັງໝົດ 1,567 ທ່ານ, ຍິງ 415 ທ່ານ (ຕ່າງປະເທດ ຈໍານວນ 3 ທ່ານ). ໃນນັ້ນມີຄູສອນປະຈຳ ທີ່ໄດ້ຮັບຕຳແໜ່ງວິຊາການຄູ ຜ່ານມາຈຳນວນທັງໝົດ 1,554 ທ່ານ, ຍິງ 415  ທ່ານທ່ານ (ຂັ້ນສາດສະດາຈານ ຈໍານວນ 28 ທ່ານ, ຍິງ 2 ທ່ານ; ຂັ້ນຮອງສາດສະດາຈານ ຈຳນວນ 290 ທ່ານ , ຍິງ 53 ທ່ານ; ຂັ້ນອາຈານ ຈໍານວນ 420 ທ່ານ, ຍິງ 153 ທ່ານ ແລະ ຂັ້ນຜູ້ຊ່ວຍອາຈານ ຈໍານວນ 401 ທ່ານ, ຍິງ 207 ທ່ານ).

 ພ້ອມນັ້ນທີ່ປະຊຸມຍັງໄດ້ຮັບຟັງການລາຍງານວຽກງານຕ່າງໆຂອງ ມຊ ເຊັ່ນ: ວຽກງານປັບປຸງກົງຈັກການຈັດຕັ້ງ  ມຊ, ວຽກງານການຄົ້ນຄວ້າວິທະຍາສາດ ມຊ, ວຽກງງານຫຼັງປະລິນຍາຕີເປັນຕົ້ນ. ພ້ອມທັງຮັບການເຜີຍແຜ່ດຳລັດ 03/ລບ, ລົງວັນທີ 01 ມັງກອນ 2020 ວ່າດ້ວຍຕຳແໜ່ງວິຊາການຄູຢູ່ສະຖາບັນການສຶກສາຊັ້ນສູງ ແລະຄຳແນະນຳຂອງກະຊວງສຶກສາທິການ ແລະກີລາ ກ່ຽວກັບເງື່ອນໄຂ, ມາດຕະຖານ ແລະແຕ່ງຕັ້ງຕຳແໜ່ງວິຊາການຄູ ຢູ່ສະຖາບັນການສຶກສາຊັ້ນສູງ, ສະບັບເລກທີ 517/ສສກ, ລົງວັນທີ 11 ເມສາ 2023; ຄຳແນະນຳຂອງກະຊວງສືກສາທິການ ແລະກີລາ ການຄັດເລືອກ ແລະຮັບຮອງເອົາຕຳແໜ່ງວິຊາການຄູ ຢູ່ສະຖາບັນການສຶກສາຊັ້ນສູງ, ສະບັບເລກທີ 1054/ສສກ, ລົງວັນທີ 4 ທັນວາ 2020.

ຮູບພາບບັນຍາກາດ

ໃນຕອນເຊົ້າ ວັນທີ 16 ສິງຫາ 2025, ສະຖາບັນຂົງຈື ມະຫາວິທະຍາໄລແຫ່ງຊາດ ໄດ້ຈັດການສອບເສັງຄັດເລືອກນັກສຶກສາເຂົ້າຮຽນໃນຫຼັກສູດສາຂາຄູພາສາຈີນ ສົກສຶກສາ 2025-2026 ທີ່ສະຖາບັນຂົງຈື, ໂດຍການເຂົ້າຮ່ວມຂອງທ່ານປອ. ທະນົງສັກ ດວງດາລາ ຮອງຫົວໜ້າຫ້ອງການວິຊາການ,​ ທ່ານ ນາງ ນິລິນທອນ ສັກລໍໍຄໍາ ຕາງໜ້າຈາກກົມການສຶກສາຊັ້ນສູງ ກະຊວງສຶກສາທິການ ແລະກິລາ, ທ່ານ ຄຳຮຸ່ງ ຈັນທະວົງ ຜູ້ອຳນວຍການສະຖາບັນຂົງຈືຝ່າຍ, ທ່ານ ເຝິງກວາງຮົວ ຜູ້ອຳນວຍການສະຖາບັນຂົງຈືຝ່າຍຈີນ ພ້ອມດ້ວຍຄະນະກຳມະການຄວບຄຸມການສອບເສັງ ແລະນັກຮຽນເຂົ້າຮ່ວມ.

ໃນສົກສຶກສານີ້ມີຜູ້ສະໝັກສອບເສັງທັງໝົດ 629 ຄົນ, ຍິງ 426 ຄົນ, ມີຫ້ອງສອບເສັງທັງໝົດ 24 ຫ້ອງເສັງແບ່ງອອກເປັນຫ້ອງລະ 25 ຄົນ, ມີຫ້ອງລວມທີ່ບັນຈຸນັກສອບເສັງໄດ້ 40 ຄົນ. ມີການແຕ່ງຕັ້ງຄະນະກຳມະການຄວບຄຸມການສອບເສັງໂດຍແມ່ນອາຈານມາຈາກ 4 ພາກສ່ວນຄື: ຄະນະສຶກສາສາດ, ຄະນະວິທະຍາສາດທຳມະຊາດ, ຄະນະອັກສອນສາດ ແລະຄະນະວິທະຍາສາດສັງຄົມ ທັງໝົດ 25 ທ່ານ ແລະ ອາຈານຈາກສະສະຖາບັນຂົງຈື 45 ທ່ານ.  ສ່ວນແຜນການຮັບນັກສຶກສາໃນປີນີ້ແມ່ນ 105 ຄົນ, ສ່ວນການສອບເສັງຈະແບ່ງອອກເປັນສອງພາກຄື: ພາກເຊົ້າສອບເສັງການຂຽນ ໂດຍເລີ່ມແຕ່ ເວລາ 8:30 – 10:00 ໂມງ ສອບເສັງວິຊາຄະນິດສາດ, ພາສາລາວ-ວັນນະຄະດີ, ພູມສາດ ແລະປະຫວັດສາດ ແລະ ເວລາ 10:30 – 12:00 ໂມງ ສອບເສັງ ພາສາຈີນ ແລະພາສາອັງກິດ; ສ່ວນພາກບ່າຍ ສອບເສັງສຳພາດ ພາສາຈີນ ເວລາ 13:30 – 16:00 ໂມງ ແມ່ນການສໍາພາດເຊິ່ງໜ້າໂດຍແມ່ນຄູອາຈານຈີນເປັນຄົນສໍາພາດດ້ວຍພາສາຈີນ.

ຫຼັກສູດຄູພາສາຈີນເປັນການຮ່ວມມືກັນລະຫວ່າງ ມະຫາວິທະຍາໄລແຫ່ງຊາດ ຮ່ວມ ມະຫາວິທະຍາໄລຊົນເຜົ່າກວາງ ສປ ຈີນ ເປັນບົບການຮຽນແບບ 2 + 2 , ຮຽນ ປີ 1-2 ຢູ່ສະຖາບັນຂົງຈື ແລະ ປີ3-4 ປີຮຽນຢູ່ມະຫາວິທະຍາໄລຊົນເຜົ່າກວາງ ສປ ຈີນ, ເຊິ່ງການຮຽນ-ການສອນແມ່ນສອນໂດຍຊ່ຽວຊານຈາກ ສປ ຈີນ 80% ແລະ ອາຈານລາວ 20% ເມືື່ອນັກສຶກສາຮຽນຮອດປີທີ 2 ຈະໄດ້ມີການສອບເສັງຄັດເລືອກເພື່ອໄປຮຽນຢູ່ ສປ ຈີນ ໂດຍຜູ້ທີ່ໄດ້ຮັບການຄັດເລືອກ 60 ຄົນແມ່ນຈະໄດ້ຮັບທຶນການສຶກສາ 100%. ສຳລັບຜົນການສອບເສັງຄາດວ່າຈະສາມາດປະກາດຜົນພາຍຫຼັງການສອບເສັງໄດ້ປະມານ 2 ອາທິດ ແລະຈະໄດ້ເລີ່ມຮຽນການສອນປະມານອາທິດທີສອງຂອງເດືອນກັນຍາ.

ຮູບພາບບັນຍາກາດ

ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີສອບເສັງຄັດເລືອກເອົານັກສຶກສາເຂົ້າຮຽນປະຈຳສົກສຶກສາ 2025-2026 ຂຶ້ນໃນວັນທີ 9 ສິງຫາ 2025 ນີ້, ໂດຍການເຂົ້າຮ່ວມຂອງ ທ່ານ ປອ. ສຳລານ ພັນຄະວົງພຸດ ຮອງລັດຖະມົນຕີກະຊວງສຶກສາທິການ ແລະະ ກິລາ, ມີພະນັກງານຄູ-ອາຈານ, ນັກນັກຮຽນ-ນັກສຶກສາເຂົ້າຮ່ວມ.ທ່ານ ສຈ.ປອ. ເດຊານຸລາດ ແສນດວງເດດ ອະທິການບໍດີ ມຊ ໄດ້ໃຫ້ສໍາພາດວ່າ: ໃນສົກສຶກສາ 2025-2026 ນີ້ ມຊ ໄດ້ຈັດການສອບເສັງຄັດເລືອກເອົານັກສຶກສາເຂົ້າຮຽນໂດຍມີ 1 ສູນໃຫຍ່ຄື: ວິທະຍາເຂດດົງໂດກ ປະກອບມີ 13 ຈຸດ ແລະ 1 ຈຸດສໍາຮອງ ຊຶ່ງມີຈໍານວນຫ້ອງສອບເສັງທັງໝົດມີ 296 ຫ້ອງ, ມີກຳມະການຍາມຫ້ອງສອບເສັງຈໍານວນ 600 ທ່ານ, ຍາມຫ້ອງລະ 2 ທ່ານ ຕໍ່ນັກສຶກສາ 20 ນ້ອງ, ສຳລັບຫ້ອງໃຫຍ່ ແມ່ນ 3-4 ຄົນຕາມອັດຕາສ່ວນຂອງນັກສອບເສັງ, ຕົວເລກຜູ້ລົງທະບຽນສອບເສັງທາງອອນລາຍທັງໝົດ 7.010 ຄົນ. ໃນນັ້ນສາຍທໍາມະຊາດ (A) ມີ 1.821 ຄົນ ແລະ ສາຍສັງຄົມ (B) ມີ 4.416 ຄົນ. ສຳລັບໂຕເລກຜູ້ທີ່ມາສອບເສັງຕົວຈິງມີ 6.237 ຄົນ. ຄາດຄະເນແຜນຮັບນັກສຶກສາເຂົ້າຮຽນໃນສົກສຶກສາ 2025-2026 ລະດັບປະລິນຍາຕີທັງໝົດຈໍານວນ 5.670 ຄົນ. ການສອບເສັງແບ່ງອອກເປັນ 2 ກຸ່ມຄື: ສາຍທໍາມະຊາດ (ກຸ່ມ A) ແລະ ສາຍສັງຄົມ (ກຸ່ມ B). ສຳລັບກຸ່ມ A ສອບເສັງວິຊາຄະນິດສາດ A + ຟິຊິກສາດ, ພາສາລາວ + ວັນນະຄະດີ, ເຄມີສາດ, ຊີວະສາດ, ພາສາອັງກິດ, ກຸ່ມ B ສອບເສັງວິຊາຄະນິດສາດ B + ພາສາລາວ -ວັນນະຄະດີ, ພູມີສາດ, ປະຫວັດສາດ, ພາສາອັງກິດ.

ທ່ານ ສຈ. ປອ. ເດຊານຸລາດ ແສນດວງເດດ ກ່າວໃຫ້ຮູ້ອີກວ່າ: ສໍາລັບສົກສຶກສາ 2025-2026  ມຊ. ມີຫຼັກສູດລະດັບປະລິນຍາຕີທັງໝົດຈໍານວນ 120 ຫຼັກສູດໃນນັ້ນ ມີຫຼັກສູດນານາຊາດປະລິນຍາຕີ 2 ຫຼັກສູດ, ຫຼັກສູດຕໍ່ເນື່ອງປະລິນຍາຕີ 44 ຫຼັກສູດ ແລະຫຼັກສູດອະນຸປະລິນຍາຕີ 5 ຫຼັກສູດ. ເພື່ອໃຫ້ສາມາດຄັດເລືອກເອົານັກຮຽນທີ່ມີຄຸນນະພາບເຂົ້າຮຽນ ມຊ ພວກເຮົາມີມາດຕະການຄວບຄຸມຫ້ອງສອບເສັງຢ່າງເຄັ່ງຄັດຄື: ໄດ້ມີລະບຽບ ແລະ ຂໍ້ແນະນໍາການສອບເສັງສໍາລັບນັກສອບເສັງ ແລະສຳລັບຄະນະກຳມະການ, ມີການຄວບຄຸມການອອກຫົວບົດສອບເສັງ, ການຈັດພິມ, ການກວດບົດສອບເສັງດ້ວຍລະບົບຄອມພິວເຕີ ແລະການຍາມຫ້ອງສອບເສັງ ແມ່ນມີຄະນະກຳມະການຍາມ 2 ທ່ານ ຍາມຫ້ອງສອບເສັງທີ່ມີນັກສອບເສັງ 20 ຄົນ(ກຳມະການ 1 ຄົນ ຕໍ່ນັກສອບເສັງ 10 ຄົນ) ນັກສອບເສັງທີ່ນັ່ງໂຕະດຽວກັນຈະມີຫົວຂໍ້ບົດສອບເສັງທີ່ແຕກຕ່າງກັນ ບໍ່ສາມາດກ່າຍກັນໄດ້ ນອກຈາກນັ້ນ ມຊ. ຍັງມີການກວດຕົວນັກສອບເສັງກ່ອນການເຂົ້າຫ້ອງໂດຍຫ້າມນໍາເອົາເຄື່ອງເອເລັກໂຕນິກ ແລະໂທລະສັບເຂົ້າຫ້ອງສອບເສັງ, ກຳມະການກໍຫ້າມໃຊ້ໂທລະສັບເຊັ່ນກັນ.

ທ່ານກ່າວອີກວ່າ ສຳລັບສາຂາວິຊາຮຽນທີ່ມີຄົນສະໜັກໜ້ອຍ ຫຼືບໍ່ໄດ້ຕາມເປົ້າໝາຍ ໃນກໍລະນີນີ້ ແມ່ນຈະຊັບຊ້ອນໃຫ້ຜູ້ທີ່ມາສອບເສັງ ແຕ່ເສັງບໍ່ໄດ້ສາຂາຕົ້ນຕໍ  ແມ່ນຈະຊັບຊ້ອນໃຫ້ເຂົ້າຮຽນສາຂາສຳຮອງ ທີ່ຜູ້ສອບເສັງເລືອກໄວ້ໃນເວລາລົງທະບຽນ. ສ່ວນຜູ້ທີ່ບໍ່ລົງທະບຽນສອບເສັງ ແລະຜູ້ທີ່ລົງທະບຽນແຕ່ບໍ່ມາສອບເສັງ ແມ່ນຈະບໍ່ສາມາດພິຈາລະນາໃຫ້ເຂົ້າຮຽນ.

ສຳລັບການປະກາດຜົນສອບເສັງ ແມ່ນຄາດວ່າຈະປະກາດຜົນໃນວັນທີ 11 ກັນຍາ 2025 ແລະລົງທະບຽນເຂົ້າຮຽນໃນວັນທີ 15 ກັນຍາ 2025.

ໃນວັນທີ 6 ສິງຫາ ນີ້ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດພິທີລົງນາມບົດບັນທຶກຄວາມເຂົ້າໃຈວ່າດ້ວຍການຮ່ວມມື ແລະ ແລກປ່ຽນທາງວິຊາການ ລະຫວ່າງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ສວສສຊ), ສະຖາບັນການເມືອງ ແລະ ການປົກຄອງແຫ່ງຊາດ (ສມປຊ) ແລະ ມະຫາວິທະຍາໄລແຫ່ງຊາດ (ມຊ) ໂດຍການເຂົ້າຮ່ວມລົງນາມຂອງທ່ານ ກອງແກ້ວ ໄຊສົງຄາມ ປະທານ ສວສສຊ, ທ່ານ ພູວົງ ອຸ່ນຄໍາແສນ ຫົວໜ້າ ສມປຊ ແລະ ທ່ານ ສຕ. ປອ. ເດຊານຸລາດ ແສນດວງເດດ ອະທິການບໍດີມະຫາວິທະຍາໄລແຫ່ງຊາດ, ມີບັນດາຮອງປະທານ, ຮອງຫົວໜ້າສະຖາບັນ, ຮອງອະທິການບໍດີ ແລະ ບັນດາແຂກທີ່ຖືກເຊີນຈາກທັງ 3 ພາກສ່ວນເຂົ້າຮ່ວມເປັນສັກຂີພິຍານ.

ການລົງນາມບົດບັນທຶກຄວາມເຂົ້າໃຈຄັ້ງນີ້ ມີຈຸດປະສົງເພື່ອສ້າງຄວາມຮ່ວມມືໃນການຊຸກຍູ້ຊ່ວຍເຫຼືອຊຶ່ງກັນ ແລະ ກັນ ໃນການຈັດຕັ້ງປະຕິບັດວຽກງານຕາມພາລະບົດບາດໜ້າທີ່ຂອງອົງການ ເວົ້າລວມ ເວົ້າສະເພາະກໍແມ່ນວຽກງານຄົ້ນຄວ້າວິທະຍາສາດໃຫ້ມີປະສິດທິພາບ ແລະ ປະສິດທິຜົນສູງຂຶ້ນ; ເປັນຈຸດປະສານງານ ແລະ ເຄືອຂ່າຍການຄົ້ນຄວ້າວິທະຍາສາດດ້ານການເມືອງ-ການປົກຄອງ, ເສດຖະກິດ, ສັງຄົມ ແລະ ສິ່ງແວດລ້ອມທີ່ເຂັ້ມແຂງ, ມີຄວາມເປັນເອກະພາບ, ສາມາດສະໜອງຂໍ້ມູນ, ຂໍ້ສະເໜີແນະ ແລະ ໃຫ້ຄໍາປຶກສາທາງດ້ານວິຊາການໃຫ້ແກ່ການພັດທະນາ ເສດຖະກິດ-ສັງຄົມ ຢູ່ ສປປ ລາວ ແລະ ເສີມສ້າງຂີດຄວາມອາດສາມາດໃນການຄົ້ນຄວ້າວິທະຍາສາດການເມືອງ-ການປົກຄອງ, ເສດຖະກິດ, ສັງຄົມ ແລະ ສິ່ງແວດລ້ອມ ຂອງ ສປປ ລາວ ໃຫ້ສູງຂຶ້ນຢ່າງບໍ່ຢຸດຢັ້ງໃຫ້ເທົ່າທຽມກັບ ພາກພື້ນ ແລະ ສາກົນເທື່ອລະກ້າວ, ສໍາລັບເນື້ອໃນການຮ່ວມມືແມ່ນປະກອບດ້ວຍການກໍ່ສ້າງຊັບພະຍາກອນມະນຸດ, ການແລກປ່ຽນນັກຄົ້ນຄວ້າ, ຄູສອນ ແລະ ຜູ້ບັນຍາຍພິເສດ, ການແລກປ່ຽນຜົນການຄົ້ນຄວ້າ ແລະ ຂໍ້ມູນຂ່າວສານຊຶ່ງກັນ ແລະ ກັນ, ການເຜີຍແຜ່ຜົນການຄົ້ນຄວ້າວິທະຍາສາດຮ່ວມກັນ ແລະ ການຮ່ວມມືກັນຊອກຫາແຫຼ່ງທຶນ ຈາກແຫຼ່ງຕ່າງໆທັງພາຍໃນ ແລະ ຕ່າງປະເທດ ເພື່ອຮັບໃຊ້ເຂົ້າໃນວຽກງານຄົ້ນຄວ້າວິທະຍາສາດຕາມພາລະບົດບາດຂອງແຕ່ລະຝ່າຍ ແລະ ຕາມການມອບໝາຍຂອງຂັ້ນເທິງ ແລະ ຂົງເຂດອື່ນໆ ທີ່ທັງສາມຝ່າຍເຫັນດີເປັນເອກະພາບຮ່ວມກັນ.

ໂອກາດນີ້ ທ່ານ ກອງແກ້ວ ໄຊສົງຄາມ ໄດ້ມີຄຳເຫັນວ່າ: ການລົງນາມບົດບັນທຶກໃນຄັ້ງນີ້ ກໍເພື່ອຍົກສູງການຮ່ວມມືໃຫ້ເປັນຮູບປະທໍາຫຼາຍຂຶ້ນ ຕາມເນື້ອໃນຈິດໃຈຂົງເຂດການຮ່ວມມື, ນອກນັ້ນ, ຍັງ ເປັນການປະກອບສ່ວນໃນການສ້າງເວທີເພື່ອແລກປ່ຽນຄໍາຄິດຄໍາເຫັນ, ແລກປ່ຽນຜົນການຄົ້ນຄວ້າ ແລະ ສ້າງເຄືອຂ່າຍນັກຄົ້ນຄວ້າ, ສ້າງຄວາມສໍາພັນກັນລະຫວ່າງ 3 ສະຖາບັນ ໃນການສຶກສາ, ຄົ້ນຄວ້າ, ວິໄຈ ເພື່ອສ້າງໃຫ້ໄດ້ກຳລັງແຮງສັງລວມ ແລະ ຕໍ່ຍອດຜົນງານດ້ານວິທະຍາສາດ ໃຫ້ກາຍເປັນຜະລິດຕະພັນທີ່ມີຄຸນນະພາບ ອອກຮັບໃຊ້ສັງຄົມພາຍໃນ ແລະ ຕ່າງປະເທດໃຫ້ຫຼາຍຂຶ້ນ, ເຮັດໃຫ້ນັກຄົ້ນຄວ້າ, ນັກວິທະຍາສາດ ເປັນເຈົ້າການ ແລະ ຕັ້ງໜ້າປະກອບສ່ວນຊ່ວຍພັກ-ລັດ ຄົ້ນຄວ້າຊອກຫາທາງອອກໃນການແກ້ໄຂບັນຫາຄວາມຫຍຸ້ງຍາກຕ່າງໆ ທີ່ປະເຊີນໜ້າແຕ່ລະໄລຍະ ກໍຄືເສັ້ນທາງການພັດທະນາຢູ່ປະເທດເຮົາໃຫ້ຫຼາຍກ່ວາເກົ່າ ເປັນຕົ້ນການແກ້ໄຂບັນຫາເສດຖະກິດ-ການເງິນ-ເງິນຕາ, ນັບທັງການແກ້ໄຂບັນຫາທີ່ຕິດພັນຂອດຂຶ້ນການຄຸ້ມຄອງ-ບໍລິຫານຂອງລັດ ແລະ ອື່ນໆ.

ຮູບພາບບັນຍາກາດ